Chbat yichʼ cholel lekil aʼyej kʼalal to ta toyol vitstik ta Andes

NOPO avaʼi ti vaxaklajuneb krixchanoetik vayalik ta lumtik ta jun neneʼ jobelal nae. Li tsatsal ikʼal voʼe tsjip xa yalel yaʼeluk li jol nae xchiʼuk te xi jtʼelajetkutik ta sik ta kuni vayebkutik ti xkoʼolaj kʼuchaʼal koxtale. Yileluke mi junuk toʼox krixchano vayem te li ta bikʼit nae, ta skoj ti kʼuyelan laj kilkutike.

¿Kʼu yuʼun te oyunkutik? Jaʼ ti oy ta koʼontonkutik ta jchʼunbekutik li smantal Jesús ti skʼan xichʼ cholel li lekil aʼyej «ta sbejel banamil[e]» (Hech. 1:8; Mat. 24:14). Jaʼ yuʼun lik jcholkutik mantal li ta jun namal balumil li ta vitstik Andes ta Boliviae.

¿Mi kʼun yoʼ li kʼotkutik-oe?

Li baʼyel vokol la jtsalkutike jaʼ ti vokol li kʼotkutike. Laj kilkutik ti chʼabal yorail ch-abtej li jkuchvanej karoetik li ta namal balumile. Kʼalal tal to xchʼa li aktavuse, jaʼ to kilkutike toj bikʼit, jaʼ yuʼun muʼyuk bu jta jchotleb jkotolkutik. Pe ti kʼusie jaʼ ti li kʼot jkotolkutike.

Li kʼusi ta jkʼankutike jaʼ ti jcholkutik mantal li ta lumetik ta tayal vitsetike. Jaʼ yuʼun ti kʼalal li kʼotkutik ti bu chpaj aktavuse, laj tambe ta kokkutik, xi choletkutik muyel li ta vaʼal vitse xchiʼuk ep tajmek jkuchojkutik muyel li kʼusitik chtun kuʼunkutike.

Akʼo mi bikʼit yilel li lumetike, toj nom xil sbaik li naetike, jaʼ yuʼun chi jalijkutik jayibuk ora ta svulaʼanel li jujun uni lumetike. Akʼo mi nom xa tajmek li xanavkutik yilel, pe oy to onoʼox yan na yilel li ta nome. Nopolik noʼox chi chʼaykutik ta be, yuʼun ep ta xol li bikʼtal beetike.

«¿Kʼu yuʼun ti jaʼ to la talike?»

Toj labal to sba laj yaʼi jun ants ti nat tajmek li xanavkutike, jaʼ yuʼun laj yakʼ ta chʼamunel sna sventa jmeltsan jveʼelkutik ta sob xchiʼuk laj yakʼbunkutik siʼil. Kʼalal laj yaʼi kʼusi chchanubtasvan ta melel Vivlia ta sventa ti kʼuyelan oy animaetik li vinike, xi la sjakʼbunkutike: «¿Kʼu yuʼun ti jaʼ to la talike?», xi. Oy tajmek ta yoʼonton li mantale, yuʼun kʼalal li lokʼkutik batel li ta lume, la xchiʼinunkutik lokʼel ta be yuʼun oy to kʼusitik tsjakʼ. Jun vinik noxtok ti muʼyuk bu yabinojbe-o skʼoplal li yajrextikotak Jeovae, lek tajmek laj yil li jvuntike. Koliyal tajmek laj yal ti ay jvulaʼankutike xchiʼuk laj yakʼbunkutik syaveal jun neneʼ jobelal na sventa te xi vaykutik.

Oy jun akʼobal ti jaʼo ikʼ tajmek osile, muʼyuk bu xkakʼkutik venta mi ta sna mukʼtikil ikʼal xinichetik la jpas li jkarpa nakutike. Muʼyuk jal echʼ une kap sjolik, vaʼun la stiʼunkutik. Pe muʼyuk bu xi nikkutik ta skoj ti toj lubemunkutike, ta lek jlikel une mu xa kʼusi spasbunkutik li xinichetike.

Kʼalal jaʼtik toʼox lik vaykunkutik ta lumtike, kʼuxik tajmek li jpatkutik xchiʼuk li jchʼilteʼkutike, pe te nop xaʼi li jbekʼtalkutike. Pe kʼalal ta jkʼelkutik li osiletik ti muʼyuk to bu pikbile, ti te xlametik tok ta sbae xchiʼuk li mukʼtikil vitsetik ti joybil sjol ta taive, chchʼay batel ti kʼusi kʼuxik chkaʼikutike. Li kʼusi noʼox chkaʼikutik tee, jaʼ li uni ukʼume xchiʼuk li skʼejimol mutetike.

Kʼalal mi li atinkutik xaʼox li ta uni ukʼume, jmoj ta jkʼelkutik junuk teksto ta Vivlia, chi veʼkutik, vaʼun ta jtam batel jbekutik ti kʼun chi muykutik batel ta vaʼal vits sventa chbat jvulaʼankutik li lumetik ta nome. Xtoj-o jvokolkutik ti chi muykutik batele. Laj kojtikinkutik jun ants ti oy xa sjabilale, okʼ ti kʼalal laj yaʼi ti te oy ta Vivlia li sbi Diose, ti jaʼ Jeovae. Xmuyubaj tajmek, yuʼun xuʼ xa xalbe sbi Dios li ta s-orasione.

Jun moltotil noxtoke laj yalbunkutik ti tae ta naʼel yuʼun Diose xchiʼuk lik ta kʼejimol, lik skʼejinta ti takbilunkutik la batel yuʼun anjeletike. Jech xtok, oy jun vinik ti mu xuʼ xlokʼ ta sna ta skoj ti toj ipe, laj yalbunkutik ti mu la buchʼu xakʼ svokol xvulaʼanat li ta jteklum tee. Labal to laj yil ti ta La Paz to likemunkutik batele. Jun vinik noxtoke labal tajmek laj yil ti tsvulaʼanik ta sna krixchanoetik li yajrextikotak Jeovae, yuʼun la li yantik relijionetike jaʼ noʼox la tstijik kampana sventa chtakvanik ta ikʼel.

Ta venta ti mu jpʼejuk ta na oy slusik li ta lum taje, li krixchanoetike jaʼo chvayik kʼalal ch-ikʼube xchiʼuk jaʼ to chjulavik mi sakub xaʼoxe. Jaʼ yuʼun chaʼa, sventa jtakutik ta snaike, ta 6:00 noʼox ta sob chlik jcholkutik li mantale. Yuʼun mi toyol xaʼox kʼakʼal li batkutike batemik xaʼox jutuk mu skotolikuk ta abtel ta yosilik. Kʼalal yakalik xaʼox ta abtel li jlome, ta xpajik jlikeluk sventa chaʼiik li mantal ta Vivliae, jaʼ yuʼun jaʼo chkux ek li uni jlok osil vakaxe. Epal krixchanoetik ti te ta jtakutik ta snaike, tskʼiik nukulil chij sventa ta jchotlebinkutik, vaʼun tstsob skotol li yutsʼ yalalik sventa xaʼiik li mantale. Ep jtsʼunolajeletike lek ep chi yakʼbunkutik ixim sventa koliyal chalik ti ta xkakʼbekutik vunetik ti lokʼem sloʼil ta Vivliae.

«Muʼyuk xa chʼayikun ta ajolik»

Yoʼ xchanik mas sventa Vivlia li krixchanoetike, mu junuk noʼox velta skʼan jvulaʼantik. Ep ti laj yalik ti akʼo la xi abolajkutik tajmek xi batkutik yan velta yoʼ jchanubtaskutike. Jaʼ yuʼun ep ta velta ayemunkutik li ta jvokʼ yosilal Bolivia taje.

Li ta yan vulaʼal li aykutike, jun ants ti oy xa sjabilale xmuyubaj tajmek ti li yilkutik yan veltae, xi laj yale: «Kalaboxuk chkaʼi. Muʼyuk xa chʼayikun ta ajolik», xi. Jun vinike koliyal tajmek laj yal ta sventa li kabtelkutike xchiʼuk laj yal ti te la tskʼan chi vaykutik ta sna kʼalal mi li batkutik ta yan veltae. Ti kʼusi van jaʼ jun mukʼta matanal ta sventa ti laj kakʼ kipalkutike jaʼ ti kʼalal laj kaʼikutik ti batem xa ta mukʼta lum jun antse —ti la jchiʼinkutik ta loʼil kʼalal li aykutik ta sba veltae— xchiʼuk ti chchol xa lekil aʼyeje.

Li ta slajeb kʼakʼal kʼalal li aykutik ta vulaʼal ta sba veltae ilaj li skasil spasobil jveʼelkutik ti jkuchojkutik batele xchiʼuk jutuk xaʼox tajmek li jveʼelkutike. La jtsob ep jsiʼkutik sventa jtsan jkʼokʼkutik xchiʼuk la jlakan li jveʼelkutik ti oy kuʼunkutike. Laje li sutkutik tal ta kokkutik. Epal kilometro to xil ti bu chlok jkaroalkutik li lum taje. Kʼalal li kʼotkutike ikʼ xaʼox osil.

Kʼalal li sut ta jnakutike

Oy kʼusi la jnuptankutik kʼalal li sutkutik tale, yuʼun isok li jkaroalkutike. Ta mas jelavele la jta jkaroalkutik, ta spat jun kamion li batkutik ti noj tajmek ta krixchanoetike.

Oy jlom krixchanoetike tskʼan tsnaʼik kʼusi ta jpaskutik te, jaʼ yuʼun la jcholbekutik mantal. Akʼo mi mu onoʼox snaʼ xkʼopojik lek li krixchanoetik tee, pe toj lek yoʼontonik xchiʼuk xlamet noʼox stalelalik.

Baluneb ora jalij li xanbale, vaʼun pasemunkutik ta taiv yaʼel kʼalal li kʼot ta jnakutike xchiʼuk achʼem yaʼel li jbakilkutik ta sikile. Pe mu jecheʼuk noʼox laj kakʼ jvokolkutik, yuʼun laj takutik ta be jun ants ti nakal ta mukʼta lum ti tskʼan chanubtasel ta Vivliae.

Jaʼ jun melel matanal ti ay kalbekutik lekil aʼyej li krixchanoetik ti nakalik ta namal osile. Ta chanib lum ay jcholkutik mantal xchiʼuk ta epal bikʼtal parajeetik. Ta melel, jaʼ la jnopkutik li kʼusi chal Isaías 52:7: «Toj cʼupil noʼox sba yacan chanovic batel ta vitsetic li bochʼotic yichʼojic batel lequil aʼyeje, ti chalic oy jun oʼntonale, ti chalic cʼusi jaʼ sventa jlequilaltique, ti chalic oy xa coltaele» (Rom. 10:15).

[Lokʼol ta pajina 17]

Chapalunkutik sventa chbat kalkutik li lekil aʼyeje