Li Jeovae chaʼi kʼalal xi jvokolet ta jkʼopontike
«Li Mucʼul Diose jaʼ te oy o sat ta stojol li bochʼo tucʼ yoʼntonique; lec tstucʼulanbe scʼop ti cʼalal chcʼopanate.» (SAL. 34:15.)
1, 2. 1) ¿Kʼu yelan chaʼi sba epal krixchanoetik li avie? 2) ¿Kʼu yuʼun muʼyuk bu labal sba chkiltik li kʼusitik yakal chkʼot ta pasele?
¿MI OY kʼusi yakal xakʼbot tsots avokol? Mi jaʼ jeche, pato avoʼonton ti mu atukuk noʼoxe. Ta smiyonal noʼox krixchanoetik chilik tsatsal vokolil jujun kʼakʼal li ta chopol balumil liʼe. Jlome vokol xa chkuch yuʼunik. Jaʼ jech chaʼi sbaik kʼuchaʼal li jkʼejimol David ti xi la stsʼibae: «Solel chevbil scotol li jbecʼtale, alubenun xa o chcaʼay; xiʼavet ta scoj li xcʼuxul coʼntone. Toj chechel chcaʼay li coʼntone; ta xa xlaj scotol li jtsatsale; xmaclajet xa jsat yuʼun noxtoc», xi (Sal. 38:8, 10).
2 Li yajtsʼaklomutik Cristoe muʼyuk bu labal sba chkiltik ti oy ep vokoliletik li avi kʼakʼale, yuʼun kaʼiojbetik smelolal ti senyail ti liʼ xa oy li Jesuse te smakoj batel «xcʼuxul li cʼusi achʼ ta xvoqʼue» (Mar. 13:8; Mat. 24:3). Li jpʼel kʼop ta griego ti chichʼ jelubtasel kʼuchaʼal «xcʼuxul li cʼusi achʼ ta xvoqʼue» ti xie, ta xichʼ tunesel sventa chichʼ albel skʼoplal li xkʼuxul chaʼi jun ants kʼalal chvokʼ yole. Taje lek chakʼ ta ilel ti kʼu to yepal vokolil chil krixchanoetik li ta jkʼakʼaliltik ti «xiʼbal sba[e], [ti] naca vocol ta xvul ta loqʼuel[e]» (2 Tim. 3:1, Ch).
Li Jeovae chaʼibe smelolal li jvokoltike
3. ¿Kʼusi lek snaʼojik li yajtuneltak Diose?
3 Li yajtunelutik Jeovae lek jnaʼojtik ti muʼyuk kolemutik li ta vokoliletik avie xchiʼuk ti yantik to sok batele. Pe maʼuk noʼox chkil jvokoltik kʼuchaʼal li yantik krixchanoetike, yuʼun oy jun jkontratik, «jaʼ li pucuje», li Diabloe, ti oy tajmek ta yoʼonton tslajes li xchʼunel koʼontontike (1 Ped. 5:8). Mu van vokoluk jech chkaʼi jbatik kʼuchaʼal xi laj yal Davide: «Ituchʼ xa coʼnton yuʼun li chopolcʼoptael laj yacʼbicune; alubenun xa, muʼyuc xa jtsatsal chcaʼay. La jmala me oy bochʼo chicʼuxubaj to ta yoʼnton, pero muʼyuc; la jmala me oy bochʼo chtal spatbun coʼnton, pero muʼyuc noxtoc», xi (Sal. 69:20).
4. ¿Kʼusi tspat koʼontontik kʼalal chkat koʼontontike?
4 ¿Mi jaʼ la skʼan laj yal ti chʼabal xa spatobil yoʼonton li Davide? Moʼoj ta melel. Jkʼeltik avil li kʼusi laj yal ta tsʼakal li ta salmo taje: «Li Mucʼul Diose chaʼibe scʼop li meʼonetique, muc teuc noʼox tsjip ta yoʼnton li yuʼuntac ti ochemic ta chuquele», xi (Sal. 69:33). Bakʼintike oyikʼal van chukbil chkaʼi jbatik yuʼun li at-oʼontone xchiʼuk li vokoliletike. Oyikʼal van oy jrasontik ta snopel ti mu xaʼibeik smelolal yantik ti kʼuyelan chkaʼi jbatike. Pe jech kʼuchaʼal li Davide, tspat me tajmek koʼontontik ti jnaʼojtik ti lek chaʼibe smelolal jvokoltik li Jeovae (Sal. 34:15).
5. ¿Kʼusi spatoj-o yoʼonton ta melel li ajvalil Salomone?
5 Taje lek laj yalbe skʼoplal kʼalal laj yakʼ ta stojolal Dios li chʼulna ta Jerusalen li Salomone, li xnichʼon Davide (kʼelo 2 Crónicas 6:29-31). La skʼanbe vokol Jeova ti akʼo xaʼibe s-orasion li krixchanoetik ti ta sjunul yoʼonton tskʼoponik sventa chakʼbeik yojtikin li «svocolic yuʼun li chamele». ¿Kʼusi van tspas Dios ta sventa li orasionetik taje? Li Salomone spatoj yoʼonton ta melel ti maʼuk noʼox chaʼi ti xvokoletik ta skoj vokole, yuʼun snaʼoj xtok ti tstakʼe. ¿Kʼu yuʼun? Yuʼun li Jeovae xojtikin ta melel li kʼusi oy ta «yut yoʼntonic li jujun cristianoetique».
6. ¿Kʼu yelan xuʼ stsal kuʼuntik li vokoliletike, xchiʼuk kʼu yuʼun?
6 Li voʼotik eke, xuʼ xi jnopajutik ta stojolal Jeova ta orasion sventa chkalbe li jvokoltike xchiʼuk li kʼusitik kʼux chkaʼitike, skotol li kʼusi ta jvul-o koʼontontike. Tspat koʼontontik ti jnaʼojtik ti chaʼibe smelolal jvokoltike xchiʼuk ti chat yoʼonton ta jtojolaltike. Jaʼ jech lek laj yakʼ ta aʼiel li jtakbol Pedro kʼalal xi laj yale: «Acʼbeic sventain Dios scotol li sloʼil avoʼntonique, yuʼun oy ta yoʼnton tscʼan ta scoltaoxuc», xi (1 Ped. 5:7). Jech ta melel, oy ta yoʼonton Jeova li kʼusi chkʼot ta jtojolaltike. Li Jesuse xi lek laj yakʼ ta ilel ti kʼuyelan kʼuxutik ta yoʼonton li sTote: «Xanaʼic ti jun centavo noʼox stojol ta chaʼcot li bicʼtal mutetique. Pero me jcotuc mu xbaj yalel ta banamil me mu jechuc tscʼan li Jtotique. Li voʼoxuque cʼalal ta stsotsil ajolic lec atbil. Jaʼ yuʼun mu me xaxiʼic. Yuʼun voʼoxuc echʼem tsots acʼoplalic jech chac cʼu chaʼal li bicʼtal mutetique», xi (Mat. 10:29-31).
Oy ta jtojolaltik li koltael chakʼ Jeovae
7. ¿Kʼusi koltael xuʼ jtatik?
7 Jpat koʼontontik ti xuʼ yuʼun xchiʼuk tskʼan tskoltautik li Jeovae, kʼusiuk vokolal oy ta jtojolaltik. «Li Diose jaʼ jchabivanej, jaʼ stsatsal coʼntontic o; jaʼ chiscoltautic ti cʼalal oy jvocoltique.» (Sal. 34:15-18; 46:1.) ¿Kʼuxi tskoltautik? Jkʼeltik kʼusi chalbutik 1 Corintios 10:13: «Li Diose mu snaʼ sjel yoʼnton o, jech mu xacʼ taluc ta atojolic tsots preva ti me mu xa stsʼic avuʼunic chile. Jech noxtoc cʼalal oyoxuc ta prevae, jaʼ chacʼ avilic cʼu xʼelan xuʼ chacolic loqʼuel, yuʼun jech chcuch avuʼunic». Li Jeovae xuʼ van tslajes li vokolil ti ta jvul-o koʼontontike. O xuʼ van jaʼ mas lek chil ti chakʼ kipaltik sventa xkuch kuʼuntike. Pe kʼuk noʼox xi, li Jeovae xuʼ tskoltautik.
8. ¿Kʼusi skʼan jpastik sventa tskoltautik li Diose?
8 ¿Kʼusi skʼan jpastik sventa jtatik li koltael chakʼ Diose? Jvules ta joltik ti chalbutik Pedro ti akʼo xkakʼbetik sventain Jeova skotol li sloʼil koʼontontike. Taje jaʼ skʼan xal ti akʼo xkakʼbetik ta skʼob li jvokoltike, jaʼ xkaltik, ti mu xa jvul-o mas koʼontontik ta skoje xchiʼuk ti oyuk smukʼul koʼonton jmalatik ti akʼo xakʼbutik kʼusi chtun kuʼuntik li Diose (Mat. 6:25-32). Jech noxtok, jaʼ skʼan xal ti ta jpat koʼontontik ta stojolale, ti maʼuk ta kipal jtuktike o ta skoj ti kʼusi xkojtikintike. Sventa jech taje skʼan onoʼox bikʼit xkakʼ jbatik. Kʼalal bikʼit chkakʼ jbatik «ta stojol li Dios ti echʼem stsatsale», chkakʼtik ta ilel ti bikʼitutik ta jyalele (kʼelo 1 Pedro 5:6). Taj xtoke, jaʼ tskoltautik ti akʼo kʼunuk xkaʼitik xkuchel batel li kʼusitik chakʼ to kʼotuk ta jtojolaltik li Jeovae. Akʼo mi ta jkʼantik akʼo xchapaj ta anil li jvokoltike, jpatoj koʼontontik ti lek snaʼoj bakʼin xchiʼuk kʼuxi tskoltautike (Sal. 54:7; Isa. 41:10).
9. ¿Kʼusi vokolal laj yakʼbe sventain Jeova li Davide?
9 Jnoptik ta sventa li kʼusi la stsʼiba David ta Salmo 55:22: «Acʼbo sventain Mucʼul Dios scotol li avocole; jaʼ chascoltaot, jaʼ chayicoot. Yuʼun li stuque mu xacʼ yaluc ta lum li bochʼo chchʼunbe smantale». Jaʼo ep tajmek svokol David kʼalal la stsʼiba li salmo taje (Sal. 55:4). Yaʼeluke jaʼo kʼalal ikontrainat yuʼun li xnichʼone, li Absalone, xchiʼuk ti pojbat li ajvalilale. Jech xtok, li yajtojobtasvanej ti lek tajmek xil sba xchiʼuke, li Ahitofele, la skap sba ek li ta kontrainvaneje. Sventa mu xmilat li ajvalile, persa ijatav lokʼel ta Jerusalén (2 Sam. 15:12-14). Akʼo mi vaʼ yelan stsatsal svokol li Davide, la spat-o yoʼonton ta stojolal Jeova, xchiʼuk mu jechuk noʼox laj yakʼ svokol.
10. ¿Kʼusi skʼan jpastik kʼalal ta jnuptantik vokoliletike?
10 Jech kʼuchaʼal Davide, li voʼotik eke skʼan jkʼopontik Jeova sventa chkakʼbetik snaʼ kʼusiuk vokolal ti chilbajinutike. Jkʼeltik kʼusi chalbutik Pablo ti akʼo jpastik ta sventa taje (kʼelo Filipenses 4:6, 7). ¿Kʼusi chkʼot ta jtojolaltik mi xi jvokolet ta jkʼopontike? «Li jun oʼntonal chacʼ Diose echʼem to xjelov jech chac cʼu chaʼal ta jnop ta jcʼantic li vuʼutique, jaʼ [chchabi koʼontontik] xchiʼuc cʼusitic [ta jnoptik] ta sventa ti [kichʼojtik] ta mucʼ li Cristo Jesuse.»
11. ¿Kʼu yelan chchabi jnopbentik xchiʼuk koʼontontik «li jun oʼntonal chacʼ Diose»?
11 ¿Mi ta van xjel li kʼusitik ta jtojolaltik mi ta jpastik orasione? Xuʼ van tana, akʼo mi skʼan onoʼox me xkaʼibetik smelolal ti mu onoʼox jechuk tstakʼbutik Jeova kʼuchaʼal ta jkʼantike. Akʼo mi jech, li orasione jaʼ tskoltautik sventa mu kʼusi mas xbat-o ta koʼontontik xchiʼuk ti jech tsbikʼutik li at-oʼontone. «Li jun oʼntonal chacʼ Diose» chakʼ junuk koʼontontik xchiʼuk chchabi li jnopbentik xchiʼuk li koʼontontik kʼalal chkat koʼontontike, jech kʼuchaʼal chchabi jteklum li jtsop soltaroetik sventa mu x-ochik li jpoj osiletike. Li jun oʼontonal taje chakʼ akʼo jtam jbatik likel ta skoj li xiʼele, li kʼusitik mu jnaʼtike, li kʼusitik jecheʼ ta jnoptike, vaʼun tspajtsanutik me sventa mu aniluk xa kʼusi jpastik o ti ta jbolil ta jpastike (Sal. 145:18).
12. Albo junuk skʼelobil ti chakʼ ta ilel kʼuxi xuʼ junuk koʼontontike.
12 ¿Mi xuʼ jun koʼontontik kʼalal chilbajinutik li vokoliletike? Kalbetik jun skʼelobil ti chakʼ ta ilel li kʼusi ta jtojolaltike. Jun j-abtele ventainbil yuʼun jun jkʼelvanej ta abtel ti ch-ilbajinat ta jyalele. Jun kʼakʼale, li j-abtele chil ti xuʼ chalbe yajval abtel li kʼusi chkʼot ta stojolale. Li yajval abtele jaʼ jun vinik ti lek yoʼontone xchiʼuk ti lek srasonaje. Tspatbe yoʼonton li j-abtele, chalbe ti chaʼibe smelolal kʼuyelan chaʼi sbae, xchiʼuk chalbe xtok ti poʼot xa chichʼ lokʼesel ta yabtel li jkʼel abtele. ¿Kʼu van yelan chaʼi sba li j-abtele? Kʼalal chil ti ch-aʼibat smelolal yuʼun li yajval abtele xchiʼuk ti poʼot xa xjel li kʼusitik ta stojolale, chakʼ ta yoʼonton ch-abtej-o, manchuk mi ta to stsʼik kʼuk yuni jalil jlomuk vokol. Veno, li voʼotike jnaʼojtik ti chaʼibe smelolal Jeova li kʼusitik yakal jnuptantike. Jech xtok, chalbutik ta melel ti poʼot xa «xichʼ jipel loqʼuel li banquilal jpasmantal liʼ ta banamile» (Juan 12:31). ¡Kʼu to noʼox yepal tspat koʼontontik!
13. ¿Kʼusi to skʼan jpastik manchuk mi jpasojtik xa orasion?
13 ¿Mi jaʼ skʼan xal ti mu xa kʼusi mas skʼan jpastik kʼalal kakʼojbetik xa snaʼ jvokoltik li Jeovae? Moʼoj. Kʼalal jpasojtik xa orasione, skʼan jechuk jpastik kʼuchaʼal la jkʼantike. Kʼalal la stak batel viniketik ta sna David li Saule, ti tskʼan tsmile, li Davide xi laj yal ta orasione: «Dios cuʼun, coltaun me ta sventa li cajcontrataque; acʼo me colcun ta scʼob li bochʼo liquemic ta jcontrainele. Coltaun me ta sventa li bochʼotic chopol yoʼntonique; pojun me ta sventa li jmilvanejetique», xi (Sal. 59:1, 2). Pe maʼuk noʼox la spas orasion li Davide, yuʼun la xchikinta xtok li kʼusi albat yuʼun yajnile, vaʼun ijatav (1 Sam. 19:11, 12). Li voʼotik eke xuʼ jkʼan jpʼijiltik sventa jnaʼtik kʼuxi ta stsalel li kʼusi ta jtojolaltike xchiʼuk ti xlekub batel li kʼusi ta jtojolaltike (Sant. 1:5).
¿Kʼuxi xuʼ jta kipaltik sventa xkuch kuʼuntik?
14. ¿Kʼusi xuʼ tskoltautik ta stsalel li vokoliletike?
14 Oyikʼal van mu ta aniluk noʼox x-echʼ li vokolile, xuʼ van chjalij. Mi jaʼ jeche, ¿kʼusi xuʼ tskoltautik sventa xkuch kuʼuntik? Baʼyel, jvules ta joltik ti kʼalal tukʼ chi jtun ta stojolal Jeova manchuk mi chkil jvokoltike chkakʼtik ta ilel ti jkʼanojtike (Hech. 14:22). Mu me jchʼay ta joltik ti xi la snopbe smul Job ta stojolal Dios li Satanase: «Muc jechuc noʼox ti lec yichʼojot ta mucʼ li Jobe. Jaʼ ta sventa ti lec asetuoj ta coral xchiʼuc yajnil xnichʼnabe xchiʼuc scotol li cʼusitic oy yuʼune. Yuʼun chavacʼbe lec bendición ta sventa scotol li yabtele, jaʼ yuʼun solel iʼepaj cʼusitic oy yuʼun ta banamil. Pero me chapojbe scotol li cʼusi oy yuʼune, te chavil me mu xlic chopolcʼopojuc ta atojol», xi (Job 1:9-11). Pe tukʼ laj yakʼ sba li Jobe, vaʼun jaʼ jech laj yakʼ ta ilel ti jecheʼ noʼox isabat smule. Mi chkuch kuʼuntik li vokoliletike, chkakʼtik ta ilel ek ti toj echʼ noʼox sjut kʼop li Satanase. Jech xtok, kʼalal chkuch kuʼuntike, tstsatsub li spatel koʼontontik ta stojolal Jeovae xchiʼuk li kʼusi jmalaojtike (Sant. 1:4).
15. ¿Buchʼu stalelal ti xuʼ stsatsubtas koʼontontike?
15 Xchibal, oyuk-o ta joltik ti «jaʼ jech chichʼic vocol ec li jchʼunolajeletic [kermanotaktik] ti buyuc noʼox oyic ta sbejel banamile» (1 Ped. 5:9). Jaʼ jech, «muʼyuc to bu chtal ta [jtojolaltik] tsots preva ti muʼyuc bochʼo cʼotem ta stojol jeche» (1 Cor. 10:13). Jaʼ yuʼun maʼukuk xbat ta koʼontontik snopel li jvokoltike, jaʼ jnoptik kʼuyelan kuchem yuʼunik li yantik ermanoetike. Jaʼ jech ta jta kipaltik xchiʼuk stsatsal koʼontontik ti chtun kuʼuntike (1 Tes. 1:5-7; Heb. 12:1). ¿Mi oy buchʼu xkojtikintik ti tukʼ kuch yuʼun akʼo mi laj yil svokoltake? Jnoptik kʼusi xuʼ jchanbetik. ¿Mi jsaʼojtik ta vunetik sloʼil xkuxlejal ermanoetik ti jech staoj svokolik kʼuchaʼal voʼotike? Xuʼ me tstsatsubtas koʼontontik mi ta jkʼeltike.
16. ¿Kʼuxi tstsatsubtasutik Dios kʼalal chkil jvokoltike?
16 Li yoxibal koltael sventa tstsal kuʼuntik li prevaetike jaʼ ti jvules ta joltik ti Jeovae jaʼ «li Totil ti ep chcʼuxubinvane, jaʼ li Dios ti chispatbutic coʼntontique. Jaʼ chispatbutic coʼntontic ta sventa scotol jvocoltic, yuʼun jech xuʼ ta jpatbetic yoʼnton ec li bochʼotic oy cʼusiuc noʼox vocolal chaʼyique, yuʼun stsatsubtasojbutic xa coʼntontic ec li Diose» (2 Cor. 1:3, 4). Jech, li Jeovae te oy ta jxokontik sventa tspat xchiʼuk tstsatsubtas koʼontontik, maʼuk noʼox li ta yorail vokoliletike, yuʼun skotol ora ta «scotol jvocoltic». Taje jaʼ chakʼ jpatbetik yoʼonton ta «cʼusiuc noʼox vocolal» li yantike. Li Pablo ti jaʼ buchʼu la stsʼiba taje, snaʼoj lek, yuʼun laj yil ta xkuxlejal stuk (2 Cor. 4:8, 9; 11:23-27).
17. ¿Kʼuxi xuʼ tskoltautik li Vivlia sventa stsal kuʼuntik li vokoliletik ta jkuxlejaltike?
17 Xchanibal, oy kuʼuntik li sKʼop Diose, li Vivliae, ti «lec chtun ta sventa chanubtasel, ta sventa taqʼuiel, ta sventa tuqʼuibtasel, xchiʼuc ta sventa bijubtasel ta spasel cʼusi tucʼ. Jech chijbijub vuʼutic ti jchʼunolajelutic yuʼun Diose, jech lec chapalutic ta spasel scotol lequil abtel» (2 Tim. 3:16, 17). Li sKʼop Diose maʼuk noʼox «chijbijub» yuʼun xchiʼuk «lec chapalutic ta spasel scotol lequil abtel», yuʼun chakʼ akʼo stsal kuʼuntik vokolil ta jkuxlejaltik xtok. Li sbatsʼi melolal li jpʼel kʼop ta griego ti chichʼ jelubtasel kʼuchaʼal «lec chapalutic» ti xie, jaʼ skʼan xal «lek nojem ta kʼusitik» o «lek xa chapal». Li ta voʼnee, li jpʼel kʼop taje xuʼ chichʼ tunesel sventa chichʼ albel skʼoplal jun varko ti chichʼ tikʼbel skotol li kʼusitik chtun yuʼun sventa chbat ta xanbale o jun makina ti lek xa chapal sventa tspas li kʼusi jaʼ stu-o pasbile. Jaʼ jech ek, li Jeovae yakʼojbutik ta sKʼop skotol li kʼusitik chtun kuʼuntik sventa ta jtsaltik skotol li kʼusitik ta jnuptik ta bee. Jaʼ yuʼun xuʼ xi xkaltike: «Mi jech to chakʼ Diose, chkuch kuʼun, yuʼun tskoltaun».
Pojelal ta skotol li jvokoltike
18. ¿Kʼusi skʼan jaʼuk oy ta koʼontontik sventa tukʼ chkuch kuʼuntik?
18 Li svoʼobal koltaele jaʼ liʼe: mu me xchʼay-o ta joltik li kʼusi kʼupil sba yaloj Diose, ti poʼot xa tskolta lokʼel ta svokol li krixchanoetike (Sal. 34:19; 37:9-11; 2 Ped. 2:9). Pe maʼuk noʼox tspojutik lokʼel li ta jvokoltik avie, yuʼun chakʼ xi jkuxiutik sbatel osil, mi ta vinajel xchiʼuk Jesucristo o mi ta Paraiso balumil.
19. ¿Kʼusi skʼan jpastik sventa tukʼ xkuch kuʼuntik?
19 ¡Kʼu to noʼox yepal oy ta koʼontontik ti akʼo xkʼot skʼakʼalil ti chʼabal xa li kʼusitik toj chopol chkiltik liʼ ta chopol balumile! (Sal. 55:6-8.) Pe yoʼ to mu xkʼot taje, skʼan xkuch batel kuʼuntik. Tukʼuk xkuch kuʼuntik, vaʼun jaʼ jech chkakʼtik ta ilel ti jaʼ jun jut kʼop li Satanase. Mu xkikta jbatik ta spasel orasion xchiʼuk jnopbetik skʼoplal li ermanoetik ti chil svokolik kʼuchaʼal voʼotike, yuʼun jaʼ jech ta jta kipaltik ti chtun kuʼuntike. Jchantik li sKʼop Diose sventa jech lek chapalutik. Xchiʼuk mu xkikta jbatik ta spatel koʼontontik ti kʼux ta yoʼonton chchabiutik li «Dios ti chispatbutic coʼntontique». Mu me jchʼay ta joltik: «Li Mucʼul Diose jaʼ te oy o sat ta stojol li bochʼo tucʼ yoʼntonique; lec tstucʼulanbe scʼop ti cʼalal chcʼopanate» (Sal. 34:15).
¿Mi xa nabe li stakʼobile?
• ¿Kʼu yelan laj yaʼi sba David kʼalal oy kʼusitik tsots la snuptane?
• ¿Kʼusi spatoj-o yoʼonton ta melel li ajvalil Salomone?
• ¿Kʼusi tskoltautik sventa xkuch batel kuʼuntik li kʼusitik chakʼ to kʼotuk ta pasel Jeovae?
[Lokʼol ta pajina 13]
Li Salomone spatoj yoʼonton ta melel ti Jeovae tskolta li yajtuneltak ti chil svokolike
[Lokʼol ta pajina 14]
[Lokʼol ta pajina 15]
Maʼuk noʼox la skʼopon xchiʼuk laj yakʼbe sventain Jeova li svokol Davide, yuʼun la spas kʼuchaʼal la skʼan ta s-orasione