Li jkʼel vunetike tskʼan tsnaʼik

¿Mi persa skʼan jchʼuntik Trinidad sventa xi jpas ta yajtsʼaklom Cristo?

▪ Jun livro sventa jchanunetik ta sekundaria ti laj yichʼ pasel ta Dinamarca ta 2007, laj yal ti yajrextikotak Jeovae, jaʼ la jun relijion ti toj jutukike xchiʼuk ti slokʼesojik ta Vivlia li kʼusitik xchʼunojike (Danske Verdensreligioner: Kristendom [Relijionetik ta spʼejel Balumil te ta Dinamarca: Li yajtsʼaklomtak Cristoe]). Pe li yajrextikotak Jeova ta jteklum taje te nitil skʼoplalik li ta yoxibal relijion ti mas ojtikinbilik ta skotolal relijionetik tee.

Manchuk mi jech, li buchʼu la stsʼiba ta slivro ta sventa li yajrextikotak Jeova taje, la sta tsatsal labanel yuʼun jun ovispo ti te ch-abtej ta Iglesia Nacional de Dinamarca. «Mu xkojtikin mi junuk buchʼu chchanbe skʼoplal Dios (teólogo) ti chal ti jaʼik yajtsʼaklom Cristo» li yajrextikotak Jeovae, xi laj yal li ovispo taje. ¿Kʼu yuʼun jech laj yal? Li stuke chal ti jaʼ la ta skoj «ti mu xchʼunik li Trinidade, ti jaʼ jtos kʼusi mas tsots skʼoplal skʼan xchʼun li jun yajtsʼaklom Cristoe», xi.

Li Annika Hvithamar, ti jaʼ jun socióloga ti lek chanem ta sventa relijionetik xchiʼuk ti jaʼ yajval li livroe, la stakʼbe batel. Laj yal ti kʼalal oy buchʼu chichʼ jakʼbel ti kʼu yuʼun jaʼ yajtsʼaklom Cristo chaʼi sbae muʼyuk la mas buchʼu ta stakʼ: «Yuʼun jchʼunoj li Trinidade», mu la xiuk. Jech xtok, ta jvokʼ slivro ti jaʼ sbi «¿Eres cristiano?» («¿Mi yajtsʼaklomot Cristo?»), xi chale: «Li Trinidade jaʼ jun chanubtasel ti toj vokol ta chapbel skʼoplal ta teología Cristiana». Chal xtok: «Buchʼuuk yajtsʼaklom Cristo ti muʼyuk xchanoj teología vokol ta xaʼibe skʼoplal kʼu yuʼun oy oxib dios ta jun noʼox Dios li ta sDiosik yajtsʼaklomtak Cristoe».

Pe ta melel, mu tsotsuk xchiʼuk mu vokoluk chalbe skʼoplal ta Vivlia buchʼu jaʼ li Diose xchiʼuk buchʼu jaʼ li Jesuse. Mi jotuk bu tstunes li jpʼel kʼop trinidade, mi jaʼuk chakʼ ta aʼyel ti oy oxvoʼ krixchanoetik ta jun Diose. Li te ta sKʼop Diose jamal chal ti Jesucristoe jaʼ li baʼyel xNichʼon Diose (Colosenses 1:15). Jech xtok chal ti jaʼ «bochʼo chcʼopoj cuʼuntic ta stojol Dios, vuʼutic li cristianoutique» (1 Timoteo 2:5). Xi chal ta sventa li Totile: «Voʼot noʼox atuc [ti] Mucʼul Diosote, ti voʼot noʼox atuc te oyot ta vinajele, ti oy ta acʼob scotol li banamile» (Salmo 83:18).

Li yajrextikotak Jeovae tsots skʼoplal chilik ti skʼan chʼunel li Jesuse (Juan 3:16). Jech oxal ta xchʼunik li smantal Jesús ti xi laj yale: «Jech tsʼibabil ta scʼop Dios: “Jaʼ noʼox xavichʼic ta mucʼ stuc li Cajvaltique, jaʼ li Dios avuʼune, jaʼ noʼox xaquejan aba ta stojol”», xi (Mateo 4:10). Jech ta melel, li buchʼu chakʼbe yipal spasel li kʼusi laj yal Jesuse lek sta-o xbiiltasat ta yajtsʼaklom Cristo.

[Lokʼol ta pajina 11]

«Li Trinidade jaʼ jun chanubtasel ti toj vokol ta chapbel skʼoplal ta teología cristiana»