Jelbat-o xkuxlejalik yuʼun li Vivliae
¿KʼUXI la stabe sbalil xkuxlejal jun tseb ti laj yil tajek svokol ta xkʼoxale? ¿Kʼuxi pas ta jun lekil jcholmantal jun vinik ti ven x˗iline? Kaʼitik akʼo yalik.
«Ta jkʼan toʼox tajek kʼanel xchiʼuk kʼuxubinel» (INNA LEZHNINA)
KʼUSI ORA VOKʼ: 1981
SLUMAL: RUSIA
KʼU TOʼOX YELAN XKUXLEJAL: LAJ YIL SVOKOL TA XKʼOXAL
LI JKUXLEJAL TOʼOXE: Li jtot jmeʼe pakʼchikinetik, jaʼ jech livokʼ ek. Pe li jtot jmeʼe la xtuchʼ snupunelik, akʼo mi kʼoxun toʼox xkaʼibe xa onoʼox smelolal taje, vaʼun kʼux tajek laj kaʼi. Li jtot xchiʼuk jbankile komik ta Troick. Li jmeʼe laj yikʼun batel ta Cheliabinsk. Ta tsʼakale, nupun yan velta. Li jchaʼtote jyakubel xchiʼuk nopajtik noʼox tsmajunkutik xchiʼuk li jmeʼe.
Li ta 1993, jikʼav li kuni bankile. Taje kʼux tajek laj kaʼi jkotolkutik. Li jmeʼe lik yuchʼ pox xchiʼuk lik yilbajinun ek. Ta jkʼan ox ti lekuk jkuxlejale, ti jamal xkaltike, ta jkʼan toʼox kʼanel xchiʼuk kʼuxubinel. Jaʼ yuʼun, la jsaʼ spatobil koʼonton ta jayibuk relijionetik, pe muʼyuk bu la jta.
TI KʼU YELAN LA SJEL JKUXLEJAL LI VIVLIAE: Kʼalal 13 toʼox jabilale, oy jun jchiʼil ta chanun ti jaʼ stestigo Jeovae, laj yalbun jayibuk loʼiletik ta Vivlia. Ta jkʼupin tajek xchikintael li sloʼilal Noe xchiʼuk Jobe ti tunik ta stojolal Dios akʼo mi tsots laj yil svokolik. Ta tsʼakale, lik jchan Vivlia xchiʼuk li stestigotak Jeovae xchiʼuk libat ta stsobajelik.
Ep kʼusitik kʼupil sba lik jchan li ta Skʼop Diose. Kʼot ta koʼonton kʼalal la jnabe sbi li Diose (Salmo 83:18). Labal sba tajek laj kil ti oy albil kʼopetik ti yakal xa chkʼot ta pasel avi ta sventa li «slajebal xa kʼakʼale» (2 Timoteo 3:1-5). Labal tajek laj kaʼi li spatobil oʼontonal ta sventa li chaʼkuxesele. ¡Nopo xa noʼox avaʼi, ta jchaʼkʼel yan velta li jbankile! (Juan 5:28, 29).
Akʼo mi jech, muʼyuk xmuyubajik ta jtojolal li jmeʼ xchiʼuk jchaʼtote, yuʼun kontra chilik li stestigotak Jeovae xchiʼuk tsujikun ti akʼo xkikta xchanel li Vivliae. Pe muʼyuk lichibaj, yuʼun ta jkʼupin tajek li kʼusi ta jchane.
Mu kʼunuk laj kaʼi ti laj kichʼ kontrainel yuʼun li kutsʼ kalale, pe oy to yan kʼusi tsots kʼot ta pasel xtok, li jmuk ti jaʼ toʼox chchiʼinun batel ta tsobajeletik yuʼun li stestigotak Jeovae, jikʼav ek. Pe li testigoetike muʼyuk laj yiktaikun jtuk. Jaʼ to te la jta li kʼanel xchiʼuk li kʼuxubinel ti oy toʼox tajek ta jkʼan ta jtae. Jpʼel ta koʼonton ti jaʼ melel relijione, jaʼ yuʼun laj kichʼ voʼ li ta 1996.
KʼUSITIK SBALIL JTAOJAN: Oy xa vakib jabil nupunemun xchiʼuk jun lekil vinik ti Dmitry sbie. Jmoj te chitunkutik li ta Betel yuʼun stestigotak Jeova ta San Petersburgoe. Li jtot jmeʼ ta tsʼakale, mu xa toj chopol chilik li kʼusitik jchʼunoje.
¡Ta jtoj tajek ta vokol ti laj kojtikin li Jeovae! Oy xa sbalil chkaʼi jkuxlejal ti chitun ta stojolale.
«Oy toʼox kʼusitik ta jkʼan ta jnabe skʼoplal» (RAUDEL RODRÍGUEZ RODRÍGUEZ)
KʼUSI ORA VOKʼ: 1959
SLUMAL: CUBA
KʼU TOʼOX YELAN XKUXLEJAL: SKONTRAINOJ AJVALIL
LI JKUXLEJAL TOʼOXE: Livokʼ ta La Habana (Cuba). Toj abol sba ti bu lichʼie, buyuk xa noʼox xvinaj majbail ta kaye. Ta jkeremale la jkʼupin li yudoe xchiʼuk yan tajimol ta majbail.
Lek tajek xkakʼbe yipal chanun, jaʼ yuʼun li jtot jmeʼe laj yalbeikun ti xibat ta universidade. Jaʼ te lik kakʼ venta ti skʼan jelel li politika ta jlumale xchiʼuk lik jtoy jba ta stojolal j˗abteletik. Chaʼvoʼunkutik xchiʼuk jun jchiʼil ta chanune bat jtsakutik ta kʼop jun polisia sventa jpojbekutik li stukʼe. Tsots la jyayijesbekutik li sjole. Ta skoj taje la kichʼkutik tikʼel ta chukel xchiʼuk li˗albatkutik ti chkichʼkutik milel ta tukʼe. ¡Naka to la 20 jabilal, pe poʼot xa ta smilikun!
Li ta yut chukinabe ta jchanilan ti kʼu yelan ta stukʼaikun li soltaroetike, taje jaʼ sventa mu xkakʼ ta ilel mi chixiʼ mi sta yoraile. Pe jech xtok, oy toʼox kʼusitik ta jkʼan ta jnabe skʼoplal, jech kʼuchaʼal liʼe: ¿Kʼu yuʼun ep tajek choplejal li ta balumile? ¿Mi muʼyuk xa van yan kʼusitik lek xuʼ jta li ta balumile?
TI KʼU YELAN LA SJEL JKUXLEJAL LI VIVLIAE: Ta tsʼakale, li˗albatkutik ti muʼyuk xa chkichʼkutik milele, ti jaʼ xa noʼox 30 jabil te chikomkutik ta chukele. Te laj kojtikin li stestigotak Jeova ti tikʼilik ta chukel ta skoj li kʼusi xchʼunojike. Labal tajek laj kil ti tsots yoʼontonike xchiʼuk ti tsʼijilik noʼoxe. Akʼo mi ta jech noʼox laj yichʼik tikʼel ta chukel, muʼyuk ti xkapet xa tajek sjolike o ti sokem yoʼontonike.
Li testigoetike la xchapbeikun smelolal ti oy kʼusi snopoj tspas Dios sventa li krixchanoetike. Laj yakʼbeikun kil ta Vivlia ti tsjel ta paraiso li balumil liʼe, ti ta stupʼ li letoe, ti oy xa tukʼilale xchiʼuk ti jaʼ xa noʼox te chnakiik sbatel osil li lekil krixchanoetike (Salmo 37:29).
Ta jkʼupin li kʼusi chakʼbeikun jchane, pe la jnop ti mu spas kuʼun jech jtalelale. La jnop ti muʼyuk tspas kuʼun ti muʼyuk ta jtikʼ jba ta politikae o ti xkakʼ ta majel li xokon jsate. Jaʼ yuʼun, lik jchan jtuk li Jvivliae. Kʼalal tsuts kuʼune, laj kakʼ venta ti kʼu yelan stalelal li stestigotak Jeovae jaʼ jech stalelal li baʼyel yajtsʼaklomtak Kristo eke.
Kʼalal lik jchan li Vivliae, laj kakʼ venta ti ep kʼusitik skʼan jel ta jkuxlejale. Skʼan jel li jkʼopojele, yuʼun naka bol kʼopetik ta xkal. Jech xtok, skʼan xkikta li sikʼolajele xchiʼuk ti mu xa jtikʼ jba li ta kʼusitik sventa li politikae. Mu kʼunuk ta pasel, pe jaʼ la skoltaun li Jeovae. Ta kʼunkʼun pas kuʼun.
Oy to kʼusi ti vokol chkaʼi yiktaele, jaʼ ti chi˗ilin ta anile. Avie jech˗o ta jkʼanbe koltael Jeova sventa jnaʼ jpajtsan jba. Oy ep tekstoetik ti skoltaojune, june jaʼ li ta Proverbios 16:32 ti xi chale: «Li buchʼu mu ta aniluk xlik skʼakʼal yoʼontone mas to lek kʼuchaʼal li tsatsal vinike xchiʼuk li buchʼu tspajes sbae mas to lek kʼuchaʼal li buchʼu tstsal jun jteklume».
Li ta 1991, laj kichʼ voʼ kʼuchaʼal stestigo Jeova, la snojesik voʼ ta jun barril li ta chukinabe. Kʼalal echʼ jun jabile, laj kichʼkutik lokʼesel ta chukel junantik, vaʼun laj kichʼkutik takel batel ta España, yuʼun jaʼ te oy kutsʼ kalalkutik. Kʼalal likʼote, te la jtsob jba xchiʼuk li stestigotak Jeovae, lek la xchʼamikun, xkoʼolaj ti oy xa jayibuk jabil xojtikinikune xchiʼuk la skoltaikun sventa jel˗o li jkuxlejale.
KʼUSITIK SBALIL JTAOJAN: Avie ximuyubaj tajek xchiʼuk kajnil xchiʼuk jtsebetak ti chitunkutik ta stojolal li Diose. Jaʼ jun mukʼta matanal chkaʼi ti xuʼ noʼox xixokob ta jcholbe mantal li krixchanoetike. Bateltike ta jnop ti jutuk xa mu laj kichʼ milel kʼalal ta jkeremal toʼoxe. Pe ta jtoj tajek ta vokol ti ep kʼusitik jkʼupinoj tale. Maʼuk noʼox kuxulun, yuʼun oy lek spatobil koʼonton xtok. Jmalaoj xa tajek ti xkʼot yorail ti spas ta paraiso li balumile, ti naka xa tukʼilal tee xchiʼuk ti muʼyuk xa lajelale (Apokalipsis 21:3, 4).
[Tsʼib ti mukʼtik sletraile]
«Kʼot ta koʼonton kʼalal la jnabe sbi li Diose»
[Lokʼol]
Li jmalal xchiʼuk voʼone ta jkʼupinkutik xchanubtasel ta Vivlia li buchʼutik makal xchikinike