Kʼusi chopol chichʼ nopel ta anil ta stojolal yantik: Oy ta spʼejel balumil

LI Jonathan ti nakal ta Estados Unidos xchiʼuk ti Corea slumal stot smeʼe, kʼalal bikʼit toʼoxe oy kʼusi chopol nopbat ta anil ta stojolal ta skoj ti jelel stsʼunbale. Kʼalal chʼie bat ta jun lum ti bu muʼyuk chichʼ pʼajel ta skoj ti jelel xvinaj xchiʼuk ti jelel stsʼunbale. Kʼot ta jpoxtavanej xchiʼuk bat ta naklej ta jun jteklum ta snorteal Alaska (Estados Unidos), yuʼun xkoʼolaj stsʼunbal xchiʼuk li buchʼutik chpoxta tee. Akʼo mi toj sik li tee, la snop ti mu sta jech chil svokol ta skoj ti kʼuyelan chopol kʼusi chnopbat ta anil ta stojolale.

Akʼo mi jech, kʼalal yakal chpoxta jun tsebal ants ti mu xa xbakʼ xchiʼuk ti yichʼoj 25 sjabilale, oy kʼusi kʼot ta pasel ti mu jechuk snopoj chkʼot ta stojolale. Kʼalal julav li antse la sta ta kʼelbel sat li Jonathane, vaʼun la xchopol kʼopta ta skoj ti spʼajoj tajek li buchʼu ta Corea slumale. Li kʼusi kʼux kʼot ta stojolal Jonathane te laj yakʼ venta ti jecheʼ laj yakʼ svokol ti jatav batel ta yan lum ta skoj ti chichʼ nopel ta anil kʼusi chopol ta stojolale.

Li kʼusi kʼot ta xkuxlejal Jonathane oy kʼusi chakʼ iluk: ti chichʼ nopel ta anil kʼusi chopol ta stojolal yantike oy ta spʼejel Balumil, akʼo mi nom to tajek nakal li krixchanoetike. Yaʼeluk ti bu oy krixchanoetike oy onoʼox ti chichʼ nopel ta anil kʼusi chopol ta stojolal yantike.

Akʼo mi epajem ti chichʼ nopel ta anil kʼusi chopol ta stojolal yantike, jutuk mu skotolikuk mu lekuk chilik ti jech chichʼ pasele. Taje mu jechuk chkʼot ta pasel jechuke. ¿Kʼuxi xa noʼox epajem ti mu lekuk chilike? Jamal ta aʼiel ti jutuk mu skotoluk li buchʼu chopol chilik ti chichʼ nopel ta anil kʼusi chopol ta stojolal yantike mu xakʼik venta ti jech tspasik eke. ¿Mi jech kʼotem ta atojolal? ¿Kʼuxi chatakʼ li sjakʼobil taje?

TI KʼUYELAN CHKILTIK TA JUJUNTALE

Mu kʼunuk sventa jnaʼtik mi oy kʼusi chopol ta jnoptik ta anil ta stojolal yantik. ¿Kʼu yuʼun? Xi chchapbe smelolal li Vivliae: «Li oʼntonale [...] jaʼ noʼox ven jloʼlavanej ta scotol» (Jeremías 17:9). Ta melel, xuʼ jloʼla jbatik mi muʼyuk kʼusi chopol ta jnoptik ta anil ta stojolal yantik kalojtike o ti oy srasonal kuʼuntik sventa mu lekuk xkiltik yantike.

Yoʼ xkiltik ti mu aniluk xuʼ jnaʼtik mi oy kʼusi chopol ta jnoptik ta anil ta stojolal yantike, xi jkoʼoltastike: nopo ti chaxanav ta jun kaye ti ikʼ xa osile xchiʼuk ti muʼyuk buchʼu te chanave. Jaʼ to chavile oy chaʼvoʼ viniketik te xtal ta aveloval ti mu xavojtikine. Lek mukʼtik xchiʼuk oy kʼusi stsakoj tal yileluk li june.

¿Mi chanop van ti oy kʼusi chopol tspasbot li viniketik taje? Xuʼ van ta skoj ti oy kʼusi kʼotem ta atojolale mas van chakʼel aba, pe, ¿mi oy srasonal sventa chanop ti xibalik sbae? Jnoptik to liʼe: ¿bu van slumalik xanaʼ? Ti kʼuyelan chatakʼe, xuʼ oy kʼusi chavakʼ venta yuʼun. Jaʼ ti te onoʼox ta koʼontontik ta jnoptik ta anil kʼusi chopol ta stojolal yantike.

Mi ta jkʼan ta jnaʼ kʼu kelantik ta melele, skʼan me xkakʼtik venta ti te onoʼox ta koʼontontik ti ta jnoptik ta anil kʼusi chopol ta stojolal yantike. Li Vivliae chal jtos ti kʼusi nopem xkaʼitik spasele, xi chale: «Li cristianoetique jaʼ noʼox tsqʼuel ti bu lec chil[be]» spat xokon jun krixchanoe (1 Samuel 16:7). Jech ta melel, jkotoltik oy onoʼox jech ta jpastik, pe bateltike mu lekuk kʼusi chkʼot ta pasel yuʼun. ¿Mi xuʼ jlokʼes ta koʼontontik ti ta jnoptik ta anil kʼusi chopol ta stojolal yantike? ¿Mi xuʼ slokʼes ta yoʼontonik skotol li krixchanoetik eke?