Muʼyuk xchʼayojun-o ta yoʼonton li Jeovae

LI JKUXLEJAL TOʼOXE

: Livokʼ ta Bilbao ta jun uni lum ti lek noʼox sba li kuxlejal tee, te xkom ta snorteal España. Chanvoʼ tsebunkutik ta vokʼel, ta xchibal oyun li voʼone. Li kutsʼ kalale jaʼik katolikoetik xchiʼuk chibat jujun kʼakʼal ta mixa. Kʼalal 23 toʼox jabilale li-och ta jchanubtasvanej, solel la jkʼupin li abtelal taje xchiʼuk 40 jabil li-abtej jech. Ep kʼusitik chkakʼ ta chanel, pe mas ximuyubaj tajek kʼalal chichanubtasvan ta sventa li relijion katolikae, li ta jujun mal kʼakʼale chitun kʼuchaʼal katekista xchiʼuk ta jchanubtas tsebetik sventa spasik li sprimera komunionike.

Kʼalal lajcheb xaʼox jabil jun koʼonton li ta jnupunele, cham li jmalale, vaʼun jtuk likom sventa ta jchabi li chanvoʼ jtsebetake. ¡Kʼajomal toʼox 33 jabilal! Laj kakʼ persa saʼel spatobil koʼonton li ta kʼusi jchʼunoj ta katolikae, pe ep kʼusitik lik jakʼbe jba. Xi ta jakʼbe jbae: «¿Kʼu yuʼun chchamik krixchanoetik ti laj xa spojutik li Cristoe? Mi chbatik ta vinajel li lekil krixchanoetike, ¿kʼusi van stu ta jkʼantik ta j-orasiontik yoʼ xtal li Ajvalilal yuʼun Diose?». Pe li kʼusi mas la jakʼbe jbae jaʼ liʼe: «¿Mi chkichʼtik chapanel yuʼun Dios kʼalal mi lijchamutike, kʼu yuʼun skʼan xkiktatik komel vinajel, purgatorio o kʼatinbak sventa xkichʼtik li slajeb chapanele?».

Li sjakʼobiltak taje, la jakʼbe junantik paleetik ti laj kojtikinane. Li june xi la stakʼbune: «Mu jnaʼ, jaʼ lek jakʼbo li ovispoe. Mu xavul avoʼonton ta sventa li kʼusi chakʼan chanaʼe, ¿mi mu achʼunojuk ta stojolal Dios chaʼa?». Pe muʼyuk laj kikta jba saʼel li stakʼobiltake. Ta tsʼakale, bat kaʼi mantaletik xchiʼuk jesuitas, jpentekostesetik xchiʼuk gnostikoetik. Akʼo mi jech, mu junuk koʼonton chkom ti kʼu yelan tstakʼbeikune.

TI KʼU YELAN LA SJEL JKUXLEJAL LI VIVLIAE:

Kʼalal echʼtik xa jutuk ta 60 jabilale, oy jun kajchanun ti vukub sjabilal ti laj yalbun ti xibat ta jun tsobajel yuʼun stestigotak Jeovae. La jkʼupin li kʼusi laj kaʼie xchiʼuk li kʼusi laj kile. Akʼo mi jech, ta skoj ti mu noʼox xixokobe muʼyuk xa bu la jchiʼin ta loʼil yan velta li stestigotak Jeovae. Chib jabil ta mas tsʼakale, jun nupultsʼakal ti jaʼik stestigotak Jeova ti Juan xchiʼuk Maite sbiike ay stijik stiʼ jna. Oxib u naka noʼox la stakʼbeikun li kʼusitik la jakʼbeike. Vaʼun jaʼ to la jchʼam jun chanubtasel ta Vivlia.

¡Solel ta jkʼupin kʼalal chkichʼ chanubtasel jujukoje! Ta jsabe lek smelolal baʼyuk xchiʼuk oxlik to Vivlia ta jtunes sventa jnaʼ mi melel li kʼusi chchanubtasvanik li stestigotak Jeovae. Ta anil noʼox laj kakʼ venta ti ep kʼusitik mu xkaʼibe smelolal li kʼusitik jchanoj ta jrelijion ti ep xaʼox jabil te oyune. Laj kat koʼonton kʼalaluk laj kakʼ venta ti jelel li kʼusi jchʼunoj toʼoxe xchiʼuk li kʼusi yakal ta jchan ta Vivliae. Mu xa jnaʼ kʼusi ta jpas laj kaʼi, yuʼun xkoʼolaj kʼuchaʼal yibel teʼ laj kil li kʼusitik toʼox jchʼunoj ti yakal chichʼ bulel lokʼele.

Ta mas tsʼakale li ta xchaʼvoʼal xa jmalale ipaj xchiʼuk cham. Jaʼtik xa onoʼox la jpas juvilar xtok, vaʼun li lokʼ batel kʼuk sjaliluk li ta Bilbaoe. Li Juan xchiʼuk Maitee lokʼik batel ta Bilbao ek. Kʼux ta alel pe laj kikta xchanel li Vivliae. Pe akʼo mi jech, jnaʼoj onoʼox ti jtaoj xa jun meʼ takʼine. Taje muʼyuk xchʼay-o ta jol.

Te van jtobuk jabil ta tsʼakale, kʼalal 82 xaʼox jabilale, li Juan xchiʼuk Maitee sutik tal ta Bilbao, vaʼun ay svulaʼanikun. ¡Solel limuyubaj tajek kʼalal la jkilik yan veltae! Laj kakʼ venta ti muʼyuk xchʼayojun-o ta yoʼonton li Jeovae, vaʼun lik jchan yan velta li Vivliae. Li Juan xchiʼuk li Maitee laj yakʼik ta ilel smalael yuʼunik ta jtojolal, yuʼun ep xa onoʼox ta velta jech la jakʼbeik. Yuʼun ta jkʼan chkaʼibe srasonaltak ta Vivlia sventa jchʼay ta koʼonton li kʼusitik toʼox jchʼunoje. Jech xtok, ta jkʼan lek chapalun sventa xkalbeik kamigotak xchiʼuk kutsʼ kalaltak li kʼusitik melel ta Vivliae.

Jaʼ to laj kichʼ voʼ kʼalal 87 xaʼox jabilale. Limuyubaj tajek li vaʼ kʼakʼale. Ti bu laj kichʼ voʼe, jaʼ ta jun mukʼta tsobajel yuʼun stestigotak Jeova. Jun mol ta tsobobbail la sjelubtas jun mantal ti lokʼem ta Vivlia ti jaʼ sventa li buchʼutik ta xichʼik voʼe. Li mantal la sjelubtase li-okʼ-o yuʼun. Xkoʼolaj ti jaʼ chalbun stuk laj kaʼi li Jeovae. Kʼalal laj xaʼox kichʼ voʼe ep stestigotak Jeova nopajik tal ta jtojolal xchiʼuk la skʼupil kʼoptaikun, akʼo mi mu xkojtikin skotolik.

KʼUSITIK SBALIL JTAOJAN:

Jnaʼoj onoʼox ti jaʼ be li Cristoe (Juan 14:6). Pe li xchanel Vivliae jaʼ laj yakʼ ti akʼo xkojtikin li Jeovae xchiʼuk ti xkojtikin Jesús ti jaʼ tsbeiltasutik batel ta stojolal li Jeovae. Li avie xuʼ xa jkʼopon kʼuchaʼal Jtot xchiʼuk Kamigo li Jeovae. Li kʼusi la sjel jkuxlejal xtoke jaʼo kʼalaluk la jkʼel li livro Acerquémonos a Jehová sbie.a Li ta sba veltae la jkʼel sliklej ta jun noʼox akʼobal. Kʼalal la jchan ta sventa xkʼuxul yoʼonton Jeovae, solel kʼot ta koʼonton.

Kʼalal ta jvules ta jol ti kʼu yelan jal la jsaʼ li kʼusi melele, chtal ta jol li kʼusi laj yal Jesús liʼe: «Cʼanilanic; chaʼacʼbatic. Saʼilanic, chataic. Cʼopojanic, chajambatic» (Mateo 7:7). Li avi ti jtaoj xa stakʼobiltak li kʼusitik ta toʼox jsaʼe, ximuyubaj chkalbe batel li yantik eke.

Akʼo mi 90 xa jabilal ep to kʼusitik skʼan jchan ta stojolal Jeova. Kʼalal chibat jujukoj ta tsobobbaile toj tsots skʼoplal chkaʼi, ta skoj li kʼusitik ta jchan ta Vivliae xchiʼuk kʼalal ta jchiʼinan li kermanotake. Xchiʼuk oy ta koʼonton xikʼot ta jchanubtasvanej yan velta li ta albil paraiso liʼ ta Balumile (Apocalipsis 21:3, 4). Li kʼusi mas oy ta koʼontone jaʼ ti jkʼel yan velta li kutsʼ kalaltak ti chamemike xchiʼuk ti jchanubtasan ta sventa li kʼusi chal Vivliae (Hechos 24:15). ¡Oy tajek ta koʼonton ta yalel li kʼupil matanal yakʼojbun Jeova li ta jyijil xae!