Spatobil oʼontonal ta sventa li buchʼutik chamemike li chaʼkuxesele

¿Mi achʼunoj ta sventa li chaʼkuxesel chal ta Vivliae?a Kʼalal ta jnoptik ta sventa ti ta jchaʼkʼeltik yan velta li kutsʼ kalaltik ti chamemike toj yan sba yutsil. Pe, ¿mi xuʼ van jpat koʼontontik ta sventa taje? Sventa jtakʼtik taje, baʼyel jkʼeltik ta sventa li yajtakboltak Jesucristoe.

Li jtakboletike xchʼunojik lek ti chchaʼkuxiik talel li buchʼutik chamemike. ¿Kʼu yuʼun? Yuʼun oy van chibuk srasonaltak. Li baʼyel srasonal ti kʼu yuʼun xchʼunojik lek li jtakboletike jaʼ ti laj yichʼ chaʼkuxesel stuk li Jesuse. Li jtakboletik xchiʼuk li «jchʼunolajeletic ti echʼem ta voʼob ciento (500) stsoboj sbaique» laj yilik ti chaʼkuxiem xaʼox li Jesuse (1 Corintios 15:6). Jech xtok, li xchaʼkuxesel li Jesuse laj yichʼ ilel ti melel jech kʼot ta pasele xchiʼuk ti la xchʼamik li krixchanoetike, jech kʼuchaʼal te chvinaj li ta chanib Evanjelioetike (Mateo 27:62–28:20; Marcos 16:1-8; Lucas 24:1-53; Juan 20:1–21:25).

Li xchibal srasonale jaʼ ti laj yilik kʼuxi la xchaʼkuxes oxib krixchanoetike, li baʼyele jaʼ ta Naín, laje ta Capernaum, ta slajebale jaʼ ta Betania (Lucas 7:11-17; 8:49-56; Juan 11:1-44). Li ta slajeb chaʼkuxesel ti laj kalbetik skʼoplal ta slikebaltik li revista liʼe te tsakal skʼoplal jun utsʼ alalil ti lek xil sbaik xchiʼuk li Jesuse. Jkʼeltik mas ta sventa li kʼusitik kʼotanuk ta pasel taje.

«VUʼUN JCHAʼCUXESVANEJUN»

Li Jesuse xi laj yalbe Marta ti oy xaʼox ta chanib kʼakʼal xchamel li xchiʼil ta vokʼel ti Lázaro sbie: «Ti achiʼil ta voqʼuele, ta xchaʼcuxi talel». Li Martae muʼyuk laj yaʼibe smelolal ti kʼusi la skʼan laj yal li Jesuse. Li Martae xi la stakʼe: «Jnaʼoj ti ta xchaʼcuxi[e]», pe yaloj mi jaʼ to chchaʼkuxi li ta jelavele. Nopo noʼox avaʼi kʼu to yelan labal sba laj yaʼi Marta kʼalal laj yal Jesús «vuʼun jchaʼcuxesvanejun, xchiʼuc vuʼun jʼacʼcuxlejalun» xie, ¡li stuke laj yil ti chaʼkuxesbat li xchiʼil ta vokʼele! (Juan 11:23, Ch; 11:24, 25.)

¿Bu toʼox ay Lázaro kʼalal cham chanib kʼakʼale? Li Lazaroe muʼyuk laj yal ti oy van bu ay kʼalal cham chanib kʼakʼale. Moʼoj, muʼyuk xchʼulel ti mu snaʼ xcham ti bat ta vinajele. Kʼalal chaʼkuxi li Lazaroe, li Jesuse muʼyuk laj yikʼ tal yan velta ta Balumil sventa xikta komel skʼupinel li xkuxlejal ta vinajel ti te xa xchiʼuk li Diose. Jaʼ yuʼun chaʼa, ¿bu toʼox van ay li Lazaroe? Yakal chvay toʼox ta mukinal (Eclesiastés 9:5, 10).

Jvules ta joltik ti Jesuse laj yal ti xkoʼolaj chvay li buchʼu chameme, ti xuʼ xichʼ tijbel svayel li ta chaʼkuxesele. Xi chal li loʼile: «Li Lázaro ti lec chquil jba jchiʼuctique vayem xa. Pero ta xibat, chbat jtij liquel». Jaʼ yuʼun xi laj yal li yajtakboltake: «Cajval, me iʼoch xa svayele, yuʼun xa te ta xʼutsib [o ta xlekub]». Li Jesuse laj yalbe skʼoplal kʼalal cham li Lazaroe. Pe li yajtakboltake la snopik ti yakal chalbe skʼoplal ti chvay noʼoxe. Li Jesuse laj yalanbe ti chamem xa li Lazaroe (Juan 11:11-14). Kʼalal laj xaʼox xchaʼkuxes Lázaro li Jesuse, laj yakʼbe yan velta xkuxlejal xchiʼuk ti jmojuk xa oyuk xchiʼuk li yutsʼ yalale. ¡Jaʼ jun alakʼ sba matanal akʼbatik yuʼun Jesús li utsʼ alalil taje!

Li chaʼkuxesel la spas Jesús kʼalal ay ta Balumile jaʼ noʼox yuni kʼelobil li kʼusitik tspas kʼalal mi ch-ajvalilaj xaʼox ta Ajvalilal yuʼun Dios ta jelavele.b Kʼalal jaʼo ch-ajvalilaj te ta vinajel ti tsventain tal Balumil li Jesuse ta xchaʼkuxesan li buchʼutik yakal chvayik ta mukinale. Jaʼ yuʼun xi laj yal li Jesuse: «Vuʼun jchaʼcuxesvanejun». ¡Nopo noʼox avaʼi li muyubajel chavaʼi mi la avil yan velta li buchʼutik chamemik avuʼune! ¡Nopo avaʼi xtok kʼu to yelan chmuyubajik li buchʼutik chchaʼkuxiik talele! (Lucas 8:56.)

XCHʼUNEL OʼONTONAL TA SVENTA LI KUXLEJAL SBATEL OSILE

Li Jesuse xi laj yalbe li Martae: «Li bochʼo ta xchʼun ti vuʼun Jcoltavanejune, acʼo me ta xcham, pero ta xcuxiic sbatel osil. Scotol li bochʼotic cuxulic xa ta sventa ti xchʼunojicune, muʼyuc bu ta xchamic o sbatel osil» (Juan 11:25, 26). Skotol li buchʼutik ta xchaʼkuxes Jesús li ta Ajvalilal ta Jmil Jabil tspase xuʼ xkuxiik sbatel osil, pe jaʼ to mi laj yakʼ ta ilel xchʼunel yoʼontonik ta stojolale.

Kʼalal laj xaʼox yal ta sventa li chaʼkuxesele, li Jesuse xi la sjakʼbe li Martae: «¿Me jech achʼunoj?». Xi la stakʼ li Martae: «Jech Cajval. Jchʼunoj ti voʼot Cristoote, ti voʼot Xnichʼonot Dios talemot liʼ ta banamile» (Juan 11:26, 27). Li voʼot une, ¿mi oy van ta avoʼonton ti jechuk xchʼunel avoʼonton kʼuchaʼal Marta ta sventa li chaʼkuxesele? Li kʼusi skʼan pasel baʼyuke, jaʼ ti xachan ta sventa li kʼusi tskʼan yoʼonton Dios ta sventa li krixchanoetike (Juan 17:3; 1 Timoteo 2:4). Li yojtikinobil taje xuʼ x-ayan xchʼunel avoʼonton yuʼun. ¿Kʼu yuʼun mu xajakʼbe stestigotak Jeova ti akʼo xakʼ avil ta Vivlia ta sventa taje? Li stestigotak Jeovae ta sjunul yoʼontonik chalboxuk ta sventa li alakʼ sba spatobil oʼontonal ta sventa li chaʼkuxesele.