MANTAL TA SLIKEBALTIK PAJINA

Li kʼusi spasoj Dios ta atojolale

«Yuʼun toj ep la xcʼuxubin scotol cristianoetic ta banamil li Diose, jech laj yacʼ li jun noʼox Xnichʼon oye, yuʼun jech mu chʼayeluc chbat li bochʼotic ta xchʼunic ti jaʼ Jcoltavanej yuʼunique; jaʼ ta xcuxiic o sbatel osil.» (Juan 3:16)

Taje jaʼ li jun teksto mas ojtikinbil ti te lokʼem ta Vivliae. Albil ti muʼyuk bu yan versikulo «ti chalbe lek smelolal ti kʼu yelan xil sba Dios xchiʼuk li krixchanoetike xchiʼuk ti kʼuxi xuʼ jta jkolebaltike». Ta skoj taje, oy junantik lumetik ti chalbeik skʼoplal li «Juan 3:16» kʼalal oyik ta stojolal epal krixchanoetike, tspakʼ ta skaroik, tspasik divujar ta buyuk noʼox xchiʼuk yantik.

Li buchʼutik jech tspasik taje chakʼik ta ilel ti xchʼunojik ta melel ti tsta skolebalik ta sbatel osil ta skoj li kʼanelal chakʼ ta ilel li Diose. Pe li voʼote, ¿kʼu yelan chavil li kʼanelal yuʼun Diose? ¿Kʼusitik spasoj Dios xanaʼ yoʼ chakʼ ta ilel ti skʼanojote?

«TOJ EP LA XCʼUXUBIN SCOTOL CRISTIANOETIC TA BANAMIL LI DIOSE»

Epal krixchanoetik ta sjunul yoʼonton chchʼamik ti jaʼ la spas Dios li vinajelbalumile, li kʼusitik oye xchiʼuk li krixchanoetike. Solel toj ep ta tos li kʼusitik kuxajtike xchiʼuk toj lek pasbil, jaʼ yuʼun li buchʼu la spase ta melel toj echʼ noʼox spʼijil. Ep krixchanoetik ti skotol kʼakʼal tstojbeik ta vokol Dios ta skoj li matanal akʼbilik ti jaʼ li xkuxlejalike. Jech xtok, yoʼ chkuxiike yakʼojik venta ti chtun yuʼunik li koltael yuʼun Diose. Yuʼun jaʼ ch-akʼbatik li ikʼe, li voʼe, li veʼlile xchiʼuk yan kʼusitik yoʼ xkuxiik-o xchiʼuk skʼupinik li kʼusitik tspasike.

Lek ti jtojbetik ta vokol Dios ta skoj li kʼusitik chakʼbutik taje, yuʼun jaʼ Jpasvanej kuʼuntik xchiʼuk jaʼ chchabi li jkuxlejaltike (Salmo 104:10-28; 145:15, 16; Hechos 4:24). Kʼalal ta jnopbetik skʼoplal skotol li kʼusitik tspas Dios yoʼ xijkuxie, oy me sbalil chkiltik li kʼanelal oy yuʼun ta jtojolaltike. Li jtakbol Pabloe xi laj yale: «Li [Diose] jaʼ ta xacʼ chijcuxiutic, xchiʼuc jaʼ ta xacʼ quichʼtic icʼ. Jaʼ ta xacʼbutic scotol. Yuʼun jaʼ ta sventa ti cuxulutique xchiʼuc ti ta jpastic cʼusi ta jpastique xchiʼuc ti liʼ oyutic ta sba banamile» (Hechos 17:25, 28).

Pe, li Diose maʼuk noʼox te chakʼ ta ilel ti skʼanojutik kʼalal chakʼbutik li kʼusitik chtun kuʼuntik ta jkuxlejaltike. Yuʼun mas tsots jkʼoplaltik la spasutik, ti jaʼ mu sta li chonbolometike. La spasutik ti oy kʼusi chtun kuʼuntik ta mantal xchiʼuk ti oy jpʼijiltik yoʼ jmakʼlin jbatik li ta mantale (Mateo 4:4). Vaʼun, xuʼ jech jmoj chijkʼot li ta yutsʼ yalal Diose, li xnichʼnabtake (Romanos 8:19-21).

Jech kʼuchaʼal chal ta Juan 3:16, kʼalal la stak tal ta Balumil Xnichʼon li Diose, li Jesuse, laj yakʼ ta ilel ti skʼanojutike. Yuʼun tal chanubtasvanuk ta sventa Stot xchiʼuk tal yakʼ xkuxlejal ta jtojolaltik. Akʼo mi jech, ep buchʼutik chalik ti mu xaʼibeik lek smelolal ti kʼu yuʼun persa cham ta stojolal krixchanoetik li Jesuse xchiʼuk ti kʼu yuʼun jaʼ svinajeb ti skʼanojutik Dios kʼalal cham li Jesuse. Jkʼeltik kʼuxi chalbe srasonal Vivlia ta sventa ti kʼu yuʼun cham li Jesuse xchiʼuk ti kʼuxi ta jtabetik sbalile.

«LAJ YACʼ LI JUN NOʼOX XNICHʼON OYE»

Skotol krixchanoetik snaʼ xchamik, ch-ipajik xchiʼuk chmalubik. Pe mu jechuk onoʼox la skʼan Jeova Dios ta slikebal maʼ taje. Li baʼyel krixchanoetike akʼbatik ti xuʼ ox chkuxiik ta sbatel osil ta jun Balumil ti kʼatajem ta paraisoe. Pe oy kʼusi skʼan spasik: jaʼ ti skʼan xchʼunbeik smantal li Diose. Mi muʼyuk jech la spasike, albatik yuʼun Dios ti chchamike (Génesis 2:17). Li baʼyel vinike la stoy sba ta stojolal Dios, vaʼun jech la saʼ slajel stuk xchiʼuk slajel li snitilulaltake. Li jtakbol Pabloe xi laj yalbe smelolale: «Ta sventa jun vinic iʼoch li mulil liʼ ta banamile, xchiʼuc ti jaʼ ta sventa mulil iʼoch li lajele, jech scotol cristiano chchamic, yuʼun scotol cristiano jpasmulil icʼotic» (Romanos 5:12).

Akʼo mi jech, li Diose skʼanoj li tukʼilale (Salmo 37:28). Akʼo mi mu xuʼ ti te noʼox xchʼaybe smul li baʼyel vinike, li Diose muʼyuk laj yal ti chil svokol xchiʼuk ti chchamik ta sbatel osil skotol krixchanoetik ta skoj noʼox li jun vinik ti muʼyuk la xchʼun mantale. Moʼoj, ta skoj ti jaʼ chakʼ kʼotuk ta pasel li Mantal ti skʼan akʼel «kuxlejal ta kuxlejal[e]», jaʼ yakʼoj ti oyuk tukʼilale xchiʼuk ti xuʼ xkuxiik sbatel osil yan velta li jchʼunej mantal krixchanoetike (Éxodo 21:23, TNM). Pe ¿kʼuxi xuʼ chichʼ chaʼtael li tukʼil kuxlejal la xchʼay li Adane? Persa skʼan oy buchʼu xakʼ jun matanal, jun tukʼil kuxlejal jech kʼuchaʼal la xchʼay li Adane.

Melel onoʼox ti mu junuk snitilulal Adán xuʼ xakʼik li matanal taje yuʼun jpasmuliletik, pe li Jesuse xuʼ xakʼ (Salmo 49:6-9). Ta skoj ti muʼyuk xkuchoj mulil vokʼ li Jesuse, jaʼ toʼox jun tukʼil krixchano, jech kʼuchaʼal li Adán kʼalal tukʼ toʼoxe. Jaʼ yuʼun, kʼalal laj yakʼ ta matanal xkuxlejal li Jesuse, jaʼ jech la spoj lokʼel ta mulil ti mosoinbilik toʼox li krixchanoetike. Kʼalal jech la spas taje, laj yakʼ ti akʼo staik yan velta kuxlejal li snitilulal baʼyel vinik xchiʼuk antse (Romanos 3:23, 24; 6:23). ¿Mi oy van kʼusi skʼan jpastik yoʼ jtabetik sbalil li mukʼta kʼanelal taje?

«LI BOCHʼOTIC TA XCHʼUNIC TI JAʼ JCOLTAVANEJ YUʼUNIQUE»

Mi la jchaʼkʼeltik li Juan 3: 16, te chkakʼtik venta ti xi chale: «Yuʼun jech mu chʼayeluc chbat li bochʼotic ta xchʼunic ti jaʼ Jcoltavanej [yuʼunik li Jesuse]; jaʼ ta xcuxiic o sbatel osil». Taje jaʼ skʼan xal ti oy kʼusi skʼan jpastik yoʼ jtatik li kuxlejal sbatel osile. Mi ta jkʼan chijkuxi sbatel osile, skʼan jchʼuntik ta stojolal Jesús xchiʼuk jchʼunbetik smantal.

Xuʼ van xi chajakʼbe abae: “¿Kʼu yuʼun persa skʼan jchʼunbe smantal li Jesuse? ¿Mi mu lajuk yal ti «bochʼotic ta xchʼunic ti jaʼ Jcoltavanej yuʼunique; jaʼ ta xcuxiic o sbatel osil»?”. Jech, ti jchʼuntik ti jaʼ jkoltavanej li Jesuse tsots skʼoplal. Akʼo mi jech, tsots skʼoplal skʼan jvules ta joltik ti kʼalal chalbe skʼoplal xchʼunel oʼontonal li Vivliae maʼuk noʼox skʼan xal ti jchʼuntik ti oy li Jesuse. Jech kʼuchaʼal chal li Diccionario expositivo de palabras del Antiguo y del Nuevo Testamento exhaustivo, de W. E. Vine sbie, li jpʼel kʼop ta voʼneal tsʼibetik la stunes li Juane jaʼ skʼan xal «ti jpatoj lek koʼontontike, maʼuk ti naka noʼox jchʼunojtike». Yoʼ lek xilutik li Diose, mu baluk noʼox ti jchʼamtik ti jaʼ Jkoltavanej li Jesuse. Yuʼun skʼan xkakʼtik persa yakʼel ta jkuxlejaltik li kʼusi laj yakʼ komel ta chanele. Mi muʼyuk jech la jpastike, muʼyuk sbalil li xchʼunel koʼontontike. Li Vivliae xi chale: «Li xchʼunojel coʼntontic me muʼyuc yabtelale, chamen chcom» (Santiago 2:26). Taje jaʼ skʼan xal ti skʼan xakʼ xchʼunel yoʼonton ta stojolal Jesús li jun jchʼunolajele, jaʼ xkaltik, ti xakʼ ta xkuxlejal li kʼusi xchʼunoje.

Li Pabloe xi chalbe smelolale: «Li epal cʼuxubinel yuʼun Cristoe jaʼ chiyicʼutic sventa chacʼ jnaʼtic lec ti jun noʼox Bochʼo icham cuʼuntic ta jcotoltique, [...] ta sventa ti icham ta jventatic jcotoltique, jech muc xa cuxuluc ta sventa stuc li bochʼotic cuxulique. Jaʼ xa cuxulic ta stojol li Cristo ti icham, ti ichaʼcuxi ta sventaique» (2 Corintios 5:14, 15). Ta skoj ti ta sjunul koʼontontik ta jtojtik ta vokol ti laj yakʼ sba ta matanal li Jesuse, jaʼ tstij koʼontontik yoʼ jel ti kʼu toʼox yelan li jkuxlejaltike. Maʼuk xa ta jsaʼtik li kʼusi ta jkʼan jtuktike jaʼ xa kuxulutik ta sventa Jesús, ti cham ta jtojolaltike. Jaʼ xkaltik, ti jaʼ baʼyel skʼan xkakʼ ta jkuxlejaltik li kʼusi ay yakʼ ta chanel li Jesuse. Taje ta me xjel li kʼusi mas tsots skʼoplal chkaʼitike, li kʼusi ta jnoptike xchiʼuk skotol li kʼusi ta jpastike. ¿Kʼusi matanal tstaik li buchʼutik chakʼ xchʼunel yoʼontonik ta stojolal li Jesuse?

«MU CHʼAYELUC CHBAT [...] JAʼ TA XCUXIIC O SBATEL OSIL»

Li slajeb jvokʼ ta Juan 3:16 chakʼ ta ilel li kʼusi ch-akʼbatik yuʼun Dios li buchʼutik chakʼ xchʼunel yoʼontonik li ta matanal laj yakʼ Jesuse xchiʼuk ti chakʼ ta xkuxlejalik li kʼusi chal Diose. Li Diose tskʼan ti mu ta chʼayeluk chbatike yuʼun tskʼan ti xkuxiik sbatel osile. Akʼo mi jech, oy chaʼtos spatobil oʼontonal ta jelavel ta sventa li buchʼutik tstabeik sbalil li kʼanelal yuʼun Diose.

Li Jesuse laj yalbe jtsop krixchanoetik ti chakʼbe kuxlejal sbatel osil te ta vinajele. Jamal laj yalbe yajtsʼaklomtak ti chbat xchapanbe yavilik yoʼ xuʼ jmoj ch-ajvalilajike (Juan 14:2, 3; Filipenses 3:20, 21). Li buchʼutik ta xchaʼkuxiik sventa chbatik ta vinajele chkʼotik ta «paleetic yuʼun Dios xchiʼuc Cristo [...]. Jech coʼol tspasic mantal jmil (1,000) jabil xchiʼuquic li Cristoe» (Apocalipsis 20:6).

Li yajtsʼaklomtak Cristo ti tstaik li matanal taje oy noʼox jayvoʼ. Yuʼun xi onoʼox laj yal li Jesuse: «Acʼo me muʼyuc epoxuc, cunin chijtac, pero mu me xaxiʼic. Yuʼun li Jtotic Diose slequil yoʼnton laj yacʼboxuc li ventainel yuʼune» (Lucas 12:32). ¿Kʼu van yepal li uni juteb chijetik taje? Li ta Apocalipsis 14:1, 4 xi chale: «Tsʼacal laj quil te oy ta jol vits Sión [ta vinajel] li Chʼium Chije [ti jaʼ li Jesús ti chaʼkuxiem xae]. Te xchiʼuc chanib xvaxacvinic ta mil (144,000) cristianoetic, jaʼ li bochʼotic tsʼibabil ta stiʼbaic sbi li Chʼium Chije xchiʼuc sbi li Stote. [...] Yuʼun icoltaatic xa loqʼuel ta stojol li cristianoetique, jaʼ jech icʼotic ta stojol Dios xchiʼuc ta stojol Chʼium Chij jech chac cʼu chaʼal li sba sat cʼusi chichʼ aqʼuel ta smoton Diose». Li uni juteb chijetike mi jaʼuk xkoʼolaj yepal ti ta smiyonal xa noʼox krixchanoetik kuxieme, yuʼun kʼajomal 144,000. Li uni juteb chijetike taje chichʼ albel skʼoplal ti jaʼik ajvaliletike, pe ¿buchʼu van tsventainik?

Li Jesuse laj yalbe skʼoplal li ta xchaʼvokʼal tukʼil krixchanoetik ti tstabeik sbalil li Ajvalilal yuʼun Dios ta vinajele. Li Jesuse xi laj yal ta Juan 10:16: «Jech noxtoc oy to yantic jchijtac ti muc liʼuc oyic ta corale. Leʼe ta onoʼox xquicʼan tal ec. Ta xaʼibicun jcʼop; jun noʼox scoralil chcʼot scotol, xchiʼuc jun noʼox jchabivanej chcʼot yuʼunic». Li yan chijetik taje spatoj yoʼontonik chkuxiik sbatel osil liʼ ta Balumile, jech kʼuchaʼal li spatobil yoʼontonik toʼox li Adán xchiʼuk Evae. ¿Kʼuxi jnaʼojtik ti liʼ chkuxiik ta Balumil li yan chijetike?

Li Vivliae ep ta velta chal ti chkʼataj ta jun paraiso li Balumile. Mi chakʼan chakʼel li kʼusi chal Vivlia ta sventa taje, kʼelo li tekstoetik liʼe: Salmo 37:9-11; 46:8, 9; 72:7, 8, 16; Isaías 35:5, 6; 65:21-23; Mateo 5:5; Juan 5:28, 29; Apocalipsis 21:4. Li tekstoetik liʼe chal ti chlaj li paskʼopetike, li viʼnale, li chameletike xchiʼuk li lajelale. Jech xtok, chal ti tsmeltsan sna stukik li lekil krixchanoetike, tstsʼunolajik ta yosil stukik xchiʼuk tstsʼites yalab xnichʼnabik ti bu chʼabal xa choplejale.a ¿Mi muʼyuk stij avoʼonton li kʼusi chtal ta jelavel taje? Oy lek srasonal kuʼuntik ti jnoptik ti poʼot xa xkʼot ta pasel li kʼusitik albil taje.

LI DIOSE EP KʼUSITIK SPASOJ

Mi la anopbe skʼoplal skotol li kʼusitik spasoj Dios ta atojolale xchiʼuk ta stojolal li krixchanoetike, lek jamal xvinaj ti toj ep xa kʼusitik spasoj li Diose. Yuʼun kuxulutik, oy jpʼijiltik, lek noʼox oyutik, xchiʼuk chakʼ li kʼusi chtun kuʼuntik sventa xijkuxie. Pe maʼuk noʼox taje, li matanal laj yakʼ Dios, ti jaʼ li pojelal laj yakʼ li Jesuse, xuʼ jtatik-o mas bendisionetik, jech kʼuchaʼal la jchantik li ta Juan 3:16.

Ta jtatik epal bendisionetik, yuʼun jun koʼonton chijkuxiutik, xijmuyubajutik noʼox, chʼabal chij-ipajutik xchiʼuk chʼabal paskʼopetik. Voʼot me chanop atuk mi chakʼan chata li bendisionetik taje. Li sjakʼobil ti skʼan to jtakʼtike jaʼ, ¿kʼusi van yakal chapas ta stojolal Dios li voʼote?

[Tsʼib ta yok vun]

[Lokʼol ta pajina 4]

Koliyal li matanal pojelal laj yakʼ li Jesuse xuʼ xa xkolik lokʼel ta mulil xchiʼuk ta lajelal li krixchanoetike