MANTAL TA SLIKEBALTIK PAJINA: LI KʼUSI SPASOJ DIOS TA ATOJOLALE

Jun tsobajel ti mu stakʼ xachʼay abae

Kʼalal skʼan toʼox jun akʼobal xakʼ ta matanal xkuxlejal li Jesuse, laj yalbe yajtsʼaklomtak ti akʼo svules ta sjolik li slajele. Kʼalal la spas ta baʼyel velta Jesús li Veʼlil ta bat kʼakʼal yuʼun Kajvaltike o li Snaʼobil slajel Cristoe la stunes pan ti muʼyuk yichʼoj svolesobil xchʼute xchiʼuk tsajal yaʼlel tsʼusub ti te xa onoʼox oy yuʼunike. Vaʼun xi laj yalbe li yajtsʼaklomtake: «Jech me xapasilanic, yuʼun jech chanaʼilanicun o —xut» (Lucas 22:19).

Jujun jabil ta stsob sbaik ta spʼejel Balumil li stestigotak Jeova sventa tsvules ta sjolik li Snaʼobil slajel Cristoe. Li jabil liʼe chkʼot ta lunes 14 yuʼun avril ta 2014 kʼalal chʼayem xaʼox batel li Kʼakʼale.

Takbilot ta ikʼel sventa xabat li ta tsobajel taje, yuʼun te chichʼ albel mas skʼoplal ti kʼu yuʼun toj tsots skʼoplal ti cham li Jesuse. Muʼyuk tojbil xchiʼuk muʼyuk chichʼ kʼanel takʼin te. Li buchʼu laj yakʼbot li revista liʼe xuʼ xalbot bu ch-echʼ xchiʼuk jayib ora li Snaʼobil slajel Cristo ti bu nopol nakalote, o xuʼ xakʼel li ta jpajinakutik ta Internet ta jw.org. Avokoluk chʼakbo skʼakʼalil sventa xabat li ta tsobajel taje, ta jkʼankutik ti xakʼote.