SLOʼIL XKUXLEJAL

Tsotsun noʼox akʼo mi kʼunibem li jbekʼtale

Jaʼ tsloʼilta Maite Morlans

Kʼalal chilik ti te chotolun ta siya de rueda ti kʼajomal 29 kilo kalale, muʼyuk buchʼu tsnop ti tsotsune. Pe kʼalal chkʼunib xa batel yip li jbekʼtale, oy kʼusi ti tsots svuʼel ti chakʼbun jtsatsale. Chkalboxuk avaʼiik kʼuxi ti tsotsun noʼox akʼo mi kʼunibem li jbekʼtale.

Kʼalal ta jvules ta jol kʼalal bikʼitun toʼoxe, chtal ta jol ti kʼu toʼox yelan ximuyubaj li ta jnakutik ti te xkom ta sural Franciae, ti te toʼox nakalik li jtot jmeʼe. Li jtote la spasbun jtsʼuyubajeb xchiʼuk ta jkʼupin tajek ti chi-anilaj li ta spat xokontak ti bu jtsʼunoj jnichimkutike. Li ta 1966, ay svulaʼanunkutik ta jnakutik li stestigotak Jeovae, solel jal loʼilajik xchiʼuk li jtote. Kʼalal jaʼtik toʼox vukub u yechʼele li jtote la snop ti ch-och ta stestigo Jeovae. Mu jaluk echʼ ti och ta stestigo Jeova li jmeʼ eke. Xchaʼvoʼalik lek la stsʼitesikun ta jun utsʼ alalil ti xmuyubajik noʼoxe.

Jaʼo lik jvokoltak kʼalal jaʼtik toʼox li sutkutik tal ta Españae, ti jaʼ li lum ti bu likemik li jtot jmeʼe. Lik ipajuk laj kaʼi li stsʼakbenaltak jkʼobe xchiʼuk li kakane. Kʼalal echʼ xaʼox chib jabil ti ep xaʼox doktoretik ay jkʼelkutike, la jtakutik jun doktor ti lek ojtikinbil ti jaʼ reumatólogo sbi li yabtele, ti xi laj yale: «Mu xa kʼusi stak pasel, toj echʼ xa ora laj avikʼik tal». Lik okʼuk li jmeʼe. Li ta konsulta taje laj kaʼi chalbeik skʼoplal jtos chamel ti toj chopole xchiʼuk ti chʼabal xpoxil ti «poliartritis infantil crónica» sbie.a Ta skoj ti kʼajomal toʼox lajuneb jabilale mu xkaʼibe lek smelolal li kʼusi chalike, pe jnaʼoj ti chopol li kʼusi chalbeik skʼoplale.

Li doktoretike laj yalik ti jaʼ la lek ti xibat ta poxtael ta jun ospital sventa ololetike. Kʼalal li kʼote lik ipajkun ta at-oʼonton, yuʼun solel muʼyuk kʼusi x-ayan li tee. Solel ep tajek mantaletik yakʼojik, li monjaetike la slokʼbeikun jol xchiʼuk laj yakʼbeikun jlap jtos kʼuʼil pokʼil ti lek noʼox sbae. Xi-okʼolet xi laj kalbe jbae: «¿Kʼuxi xa onoʼox chkuch kuʼun ti liʼ oyune?».

LAJ KAʼI KUXI LA SKOLTAUN LI JEOVAE

Ta skoj ti xchanubtasojikun xa onoʼox ti akʼo xitun ta stojolal Jeova li jtot jmeʼe, muʼyuk la jpas li kʼusi nopem xaʼiik spasel ta ospital li jkatolikoetike. Pe li monjaetike mu xaʼibeik smelolal ti kʼu yuʼun muʼyuk ta jpas taje. La jkʼanbe vokol Jeova ti akʼo mu xiktaune, vaʼun ta anil noʼox laj kaʼi ti la xchabiune, jech kʼuchaʼal jun jkʼanvanej totil ti chchabivane.

Li jtot jmeʼe xuʼ xbat svulaʼanikun jlikeluk li ta jujun sabadoe. Kʼalal chkʼot svulaʼanikune chichʼbeikun batel vunetik ti lokʼem ta Vivlia yoʼ jkʼele, sventa jech tsotsuk-o li xchʼunel koʼontone. Jutuk mu skotoluk li ololetik ti te oyike chʼabal slivro stukik, pe li monjaetike laj yakʼik ti xkichʼ komel li jlivrotake xchiʼuk li Jvivliae, ti skotol kʼakʼal ta jkʼele. Jech xtok, chkalbe yan tsebetik ta sventa li spatobil koʼonton ti chikuxi sbatel osil ta Balumil ti kʼatajem xaʼox ta jun paraisoe, ti bu chʼabal xa buchʼu ch-ipaje (Apocalipsis 21:3, 4). Akʼo mi chkat koʼonton bakʼintik xchiʼuk jtuk chkaʼi jba, pe chakʼbun muyubajel kʼalal yantik xa xchʼi batel li xchʼunel koʼonton xchiʼuk ti kʼu yelan jpatoj koʼonton ta stojolal li Jeovae.

Kʼalal echʼ xaʼox vakib u ti solel jal laj kaʼie, li doktoretike laj yalbeikun ti xuʼ xa xisut batel ta jnae. Akʼo mi muʼyuk bu kolem-o li jchamele, pe limuyubaj kʼalal te xa jchiʼuk yan velta li jtot jmeʼe. Li stsʼakalultak jbakile lik sokuk batel mas, jaʼ yuʼun mas xa lik kʼuxubuk laj kaʼi. Kʼalal chex jchʼielun xaʼoxe solel lik kʼunibuk li jbekʼtale. Akʼo mi jech, kʼalal chanlajuneb jabil kichʼoje laj kichʼ voʼ. Jpʼel ta koʼonton chitun ta stojolal li Jtot ta vinajel ti bu kʼalal xuʼ kuʼune. Pe, oy bakʼintik ti chopol chkaʼi jba ta stojolale. Xi chkalbe ta j-orasione: «¿Kʼu yuʼun ti voʼon jech chkʼot ta jtojolale? Avokoluk poxtaun. ¿Mi mu xavil ti chkil tajek jvokole?».

Kʼalal chex jchʼielune solel toj vokol laj kaʼi. Yuʼun skʼan jchʼun ti muʼyuk xa chikol-oe. Ta jkʼan ti jechukun kʼuchaʼal li kamigatak ti lekik noʼoxe xchiʼuk ti tskʼupin lek xkuxlejalike. Pekʼel jkʼoplal laj kaʼi jba xchiʼuk solel muʼyuk xa buchʼu ta jchiʼin ta loʼil. Akʼo mi jech, la skoltaikun li kamigotake xchiʼuk li kutsʼ kalale. Xvul ta jol ti kʼot ta jlekil amiga li Aliciae, ti mas ta jtob jabil vixil kuʼune. Li kamigae la skoltaun yoʼ maʼuk noʼox jnopilan ta sventa li jchamele, laj yalbun ti jnop ta stojolal li yantike.

LA JTA KʼUXI XUʼ OYUK SBALIL LI JKUXLEJALE

Kʼalal vaxaklajuneb xaʼox jabilale lik ipajkun mas, kʼalal chibat ta tsobajele solel chilub tajek. Akʼo mi jech, kʼalal teun ta jnae ta jtunes lek li jkʼakʼal sventa ta jchan lek li Jvivliae. Li slivroal Job xchiʼuk Salmose la skoltaun sventa xkaʼibe smelolal ti oyutik ta yoʼonton li Jeovae, pe li kʼusi mas oy ta yoʼontone jaʼ ti lekukutik li ta mantale. Li spasulanel orasione jaʼ laj yakʼbun li «svuʼel stuc li Diose ti muc ta jtsatsaluc [jtuke]» xchiʼuk «li jun oʼntonal chacʼ [Dios ti] echʼem to xjelov jech chac cʼu chaʼal ta jnop ta jcʼantic li vuʼutique» (2 Corintios 4:7; Filipenses 4:6, 7).

Kʼalal 22 xaʼox jabilale, persa la jchʼam ti jaʼ xa noʼox ta siya de rueda xuʼ xixanave. Pe, mu jkʼan ti kʼalal tskʼelikun li yan krixchanoetik ti jaʼ noʼox tsvules ta sjolik ti ipune. Akʼo mi jech, li siya de ruedae la skoltaun sventa xuʼ kʼusi jpas ta jtuk, akʼo mi laj toʼox kal ti chopole, pe oy sbalil la jtabe. Oy jun kamiga ti Isabel sbie laj yalbun ti xkakʼ ta koʼonton saʼel 60 ora ta u li ta cholmantale sventa jmoj jcholkutik mantal.

Ta slikebale la jnop ti mu spas kuʼune. Pe la jkʼanbe koltael Jeova, ta skoj ti la skoltaikun li kutsʼ kalaltake xchiʼuk li kamigotake pas kuʼun li kʼusi oy ta koʼontone. Li u taje solel anil echʼ laj kaʼi xchiʼuk te laj kakʼ venta ti muʼyuk xa chixiʼe xchiʼuk chikʼexave. Solel la jkʼupin tajek, jaʼ yuʼun li-och ta prekursora regular li ta 1996, ti skʼan ta jsaʼ 90 ora ta u li ta cholmantale. Jaʼ li kʼusi mas lek kʼot ta nopel kuʼun ta jkuxlejale. La skoltaun sventa xinopaj mas ta stojolal Dios xchiʼuk ti oyuk mas stsatsal li jbekʼtale. Epal krixchanoetik laj kalbe li kʼusi jchʼunoje xchiʼuk oy jlom ti la jkoltaik sventa xkʼotik ta yamigo li Diose.

LI JEOVAE LAJ YAKʼBUN JTSATSAL

Li ta yorail kʼepelal ta 2001, lilaj ta karo xchiʼuk kʼas xchibal li sbakil koktake. Kʼalal jaʼo te oyun ta ospitale solel kʼux tajek chkaʼi, la jpas jun orasion ta koʼonton: «Avokoluk Jeova mu xaviktaun». Kʼalal naka toʼox jech laj kal taje, jun ants ti te oy stem ta jxokone, xi la sjakʼbune: «¿Mi jaʼot stestigo Jeova?». Ta skoj ti chʼabal xa kipe jaʼ noʼox laj kakʼbe senyail ta jol ti jaʼe. Xi laj yalbun li antse: «Li voʼone xakojtikinoxuk xchiʼuk ta onoʼox jkʼel li arevistaike». Li kʼusi laj yalbun taje la spatbun-o tajek koʼonton. Akʼo mi jaʼo solel tsots tajek jvokol, laj kakʼ ta ojtikinel li Jeovae. ¡Jaʼ jun mukʼta matanal!

Kʼalal likol jutuke la jnop ti ta jchol mas mantale. Li jmeʼe ta xujun ta siya de rueda ta yut ospital kʼalal jaʼo pixil ta yeso li koktake. Li ta jujun kʼakʼale, ta jvulaʼankutik li buchʼutik ipike xchiʼuk ta jakʼbekutik kʼu yelan oyik, mi laje ta xkakʼbekutik komel jlikuk vun ti lokʼem ta Vivliae. Ti vaʼ yelan chivulaʼanvankutike solel chilub-o yuʼun, pe li Jeovae jaʼ laj yakʼbun jtsatsal.

Pe kʼalal echʼ batel li jabiletike, solel lik tsatsubuk batel li jchamele xchiʼuk toj kʼux laj kaʼi kʼalal cham li jtote. Akʼo mi jech, pe chkakʼ persa ti junuk noʼox koʼontone. ¿Kʼuxi chkut taje? Jaʼ ti chkakʼ persa ti teuk oyun xchiʼuk kutsʼ kalaltak xchiʼuk kamigotak kʼalal mi xuʼ kuʼune, taje jaʼ tskoltaun yoʼ mu jaʼuk jnop li ta jvokoltake. Kʼalal jaʼo jtuk oyune, ta jkʼel xchiʼuk ta jchan Jvivlia o ta jcholmantal ta telefono.

Jech xtok, ta jkʼupin li kʼusitik oye, jech kʼuchaʼal li ikʼ ti xjaxet ch-echʼ ta jsate o li smuil nichimetike. Li kʼusitik taje jaʼ tstij koʼonton sventa jtoj ta vokol. Jech xtok, tskoltaun sventa ximuyubaj noʼox. Oy jun kʼakʼal kʼalal jaʼo ta jcholkutik mantale, li jun kamiga ti jaʼ xujoj li jsiya de ruedae, paj uni jlikel sventa oy kʼusi tstsak ta vun. Pe jaʼ toe, muʼyuk laj yakʼ venta ti lik xanavuk batel stuk ta yalobaltik li jsiya de ruedae, jaʼ to te lipaj kʼalal jluchoj kʼotel jkot karo ti te kotole. Lixiʼkutik tajek jchaʼvoʼalkutik, pe kʼalal laj kilkutik ti muʼyuk kʼusi chopol kʼot ta pasele, lik tseʼinkunkutik.

Oy ep kʼusitik ti mu spas kuʼun li avie. Taje chkakʼ be sbiin, li kʼusitik oy ta koʼonton ti skʼan to xkʼot ta pasele. Nopolik noʼox ta jmutsʼ li jsate, vaʼun ta jnop ta sventa li jun achʼ balumil ti yaloj chakʼ li Diose (2 Pedro 3:13). Ta jnop ti chʼabal xa ipune, ti chixanav xae xchiʼuk ti ta jkʼupin li jkuxlejale. Xvul ta jol li kʼusi laj yal li ajvalil Davide: «Tsotsan me, paso ta tsots avoʼnton. Ta melel junuc avoʼnton malao chascoltaot li Mucʼul Diose» (Salmo 27:14). Akʼo mi solel kʼunibem li jbekʼtale, pe li Jeovae yakʼojbun jtsatsal. Tsotsun-o akʼo mi kʼunibem li jbekʼtale.

[Tsʼib ta yok vun]

[Tsʼib ti mukʼtik sletraile ta pajina 9]

Nopolik noʼox ta jmutsʼ li jsate, vaʼun ta jnop ta sventa li jun achʼ balumil ti yaloj chakʼ li Diose

[Lokʼol ta pajina 9]

Ta jkʼupin xcholel mantal ta telefono

[Lokʼol ta pajina 7]

Kʼalal chanib toʼox jabilale

[Lokʼol ta pajina 9]

Te oyun xchiʼuk jtot jmeʼ ta 2003