CHLOʼILAJ XCHIʼUK SLAKʼNA JUN STESTIGO JEOVA

¿Mi xchʼunojik Jesús li stestigotak Jeovae?

Jkʼelbetik jun skʼelobil ti kʼu yelan chchiʼin sbaik ta loʼil jun stestigo Jeova xchiʼuk slakʼnae. Jnoptik noʼox ti Antonio sbi li stestigo Jeova ti tsvulaʼan jun vinik ti Pedro sbie.

TOJ TSOTS SKʼOPLAL TI OYUK XCHʼUNEL KOʼONTONKUTIK TA STOJOLAL LI JESUSE

Antonio: ¿Mi liʼote, Pedro?

Pedro: Liʼ une.

Antonio: Toj lek ti liʼ la jtaote. Laj kichʼbot tal li achʼ revista ¡Despertad! xchiʼuk Li Jkʼel osil ta toyole. Jnaʼoj ti lek tajek chavaʼi li kʼusi chale.

Pedro: Kolaval. Lek ti tal avulaʼanune, yuʼun oy onoʼox kʼusi ta jkʼan ta jakʼbot.

Antonio: Lek oy. ¿Kʼusi ti chakʼan chajakʼe?

Pedro: Yuʼun oy kʼusi laj kalbekutik skʼoplal xchiʼuk jun jchiʼil ta abtel. Laj kalbe ti toj lekik kʼusi chal li vunetik avakʼojbune. Pe laj yalbun ti muʼyuk la lek ti ta jkʼel li avunike, yuʼun muʼyuk la achʼunojik ta sventa li Jesuse. ¿Mi melel taje? Laj kalbe ti ta jakʼbot mi tal avulaʼanune.

Antonio: Toj lek chkaʼi ti chajakʼbune. Mas onoʼox lek ti voʼon chajakʼbunkutike, sventa xanaʼ ti kʼusi jchʼunojkutik ta melele.

Pedro: Jaʼ jech la jnop.

Antonio: Ti jamal xkaltik avaʼie oy xchʼunel koʼontonkutik ta stojolal Jesús li stestigounkutik Jeovae. Yuʼun jnaʼojkutik lek ti skʼan oyuk xchʼunel koʼontonkutik ta stojolal sventa jtakutik li kolebale.

Pedro: Jaʼ jech maʼ kaloj eke, pe lik jnopilan mi jech onoʼox van ta melel ta skoj li kʼusi laj yalbun li jchiʼil ta abtele. Yuʼun muʼyuk bu xkalbetik-o skʼoplal mi achʼunojik li Jesuse.

Antonio: ¿Kʼu xachi ti jkʼeltik jayibuk teksto ti chakʼ ta ilel ti toj tsots skʼoplal ti skʼan oyuk xchʼunel koʼontontik ta stojolal li Jesuse? Jaʼ li tekstoetik ti mas ta jtuneskutik ta cholmantale.

Pedro: Lek chaʼa.

Antonio: Jkʼeltik baʼyel li kʼusi laj yal stuk Jesús ta Juan 14:6. Liʼe jaʼo kʼalal yakal chchiʼin ta loʼil jun yajtakbole. Xi chal li tekstoe: «Li Jesuse jech laj yal: “Vuʼun li beune, vuʼun li melelune, vuʼun li cuxlejalune. Muʼyuc bochʼo xuʼ chbat ta stojol Jtot ti me mu xtal ta jtojole”». Jech kʼuchaʼal chal li teksto liʼe, ¿kʼuxi la xuʼ xijkʼot ta stojolal li Stote?

Pedro: Jaʼ noʼox la ta stojolal li Jesuse.

Antonio: Jech taje. Jaʼ jech jchʼunoj ta sjunul koʼontonkutik li stestigounkutik Jeovae. Jaʼ yuʼun kʼalal ta jpaskutik orasione ta jtakutik ta alel li sbi Jesús eke.

Pedro: A..., vaʼ yelan.

Antonio: Jkʼeltik avil xtok kʼusi chal li Juan 3:​16. Toj tsots skʼoplal li kʼusi chale, jaʼ yuʼun uni bikʼit Evanjelio sbi yuʼunik. Yuʼun ta jun noʼox versikulo ochem sloʼilal xkuxlejal Jesús xkaltik kʼalal ay ta Balumile xchiʼuk ti la xchol mantale. ¿Mi xakʼan xakʼel kʼusi chal?

Pedro: Lek oy, xi chale: «Yuʼun toj ep la xcʼuxubin scotol cristianoetic ta banamil li Diose, jech laj yacʼ li jun noʼox Xnichʼon oye, yuʼun jech mu chʼayeluc chbat li bochʼotic ta xchʼunic ti jaʼ Jcoltavanej yuʼunique; jaʼ ta xcuxiic o sbatel osil».

Antonio: Kolaval. ¿Mi oy xa onoʼox avabinoj kʼusi chal li teksto liʼe?

Pedro: Oy, oy xa onoʼox kabinoj ep ta velta ta jtemplo.

Antonio: Jaʼ jun teksto ti solel lek ojtikinbile. Kʼalal ta jchanbetik lek smelolal li tekstoe, chkakʼtik venta ti laj yal Jesús ti ta jtatik kuxlejal sbatel osil ta skoj li xkʼuxul yoʼonton Diose, ¿pe kʼusi skʼan jpastik ek un?

Pedro: Jaʼ ti skʼan xkakʼ xchʼunel koʼontontike.

Antonio: Jaʼ jech, «li bochʼotic ta xchʼunic ti jaʼ Jcoltavanej [yuʼunik]» li Jesucristoe ta sta xkuxlejalik. Jech onoʼox, li ta pajina 2 li ta revista kichʼojbot tale te chal ti jaʼ ta jtatik-o kuxlejal sbatel osil mi chkakʼ xchʼunel koʼontontik ta stojolal li Jesuse. Xi chal jtuchʼ ti kʼu yuʼun chichʼ pasel Li Jkʼel osil ta toyole: «Chal ti oyuk xchʼunel koʼontontik ta stojolal li Jesucristoe, ti cham sventa xuʼ jta jkuxlejaltik sbatel osile, xchiʼuk ti jaʼ xa Ajvalil li ta Ajvalilal yuʼun Diose».

Pedro: Jech kaʼuk, te chal ta arevistaik ti oy xchʼunel avoʼontonik ta stojolal li Jesuse.

Antonio: Jaʼ jech taje.

Pedro: Vaʼun chaʼa, ¿kʼu yuʼun chal krixchanoetik ti muʼyuk achʼunojik li Jesuse?

Antonio: Oy van jayibuk srasonal ti kʼu yuʼun jech chal li krixchanoetike. Jaʼ jech chalik jlom ta skoj ti jaʼ jech yaʼiojike. O jaʼ van ta skoj ti jaʼ jech akʼbil xchanik yuʼun li jbabe ta srelijionike.

Pedro: ¿Mi mu jaʼuk van ta skoj ti chavalik ti jaʼoxuk stestigo Jeovae, ti maʼuk stestigooxuk Jesuse?

Antonio: Xuʼ van jaʼ ta skoj avaʼuk.

Pedro: ¿Kʼu yuʼun chavalbeik tajek skʼoplal li Jeovae?

«ICHʼBILUC TA MUCʼ LI ABIE»

Antonio: Yuʼun toj tsots skʼoplal chkaʼikutik ti jtunesbekutik sbi li Diose, jaʼ jech kʼuchaʼal toj tsots skʼoplal laj yaʼi li Jesuse, li Xnichʼon Diose. Kʼelavil kʼusi laj yalbe Stot ta jun orasion. Te oy ta Juan 12:​28. ¿Mi xakʼan xakʼel kʼusi chal?

Pedro: Lek, xi chale: «Jaʼ yuʼun jech noʼox la scʼopan Dios li Jesuse: “Tati, ichʼbiluc ta mucʼ li abie”, xut. Jech oy bochʼo icʼopoj ta vinajel, jech laj yal: “Laj xa cacʼ ta ichʼel ta mucʼ ta aventa li jbie, pero ta to xcacʼ ta ichʼel ta mucʼ yan velta”».

Antonio: Kolaval. Kʼuchaʼal chavakʼ ventae toj tsots skʼoplal laj yaʼi Jesús li sbi Diose. ¿Kʼu yuʼun tskʼan ti akʼo snaʼik krixchanoetike?

Pedro: Mu jnaʼ yaʼel.

Antonio: Jkʼeltik avil yan teksto ti chalbe mas smelolale. Jaʼ Hechos 2:​21 ta Traducción del Nuevo Mundo. Xi chale: «Skotol li buchʼu tskʼan vokol ta sbi Jeovae jaʼ chkol». Kʼuchaʼal chkiltike toj tsots skʼoplal ti jkʼantik vokol ta sbi Jeova sventa jtatik li kolebale. Jpʼel skʼoplal ti jaʼ jech laj yil li Jesús eke.

Pedro: Jech avaʼuk.

Antonio: Jaʼ yuʼun chaʼa, jun srasonal ti kʼu yuʼun toj tsots skʼoplal laj yil Jesús ti akʼo snabeik sbi Dios xchiʼuk ti akʼo stunesbeik li yajtsʼaklomtake jaʼ ti sta skolebalike. Jech oxal chkalbekutik tajek sbi li Jeova eke. Li kʼusi toj tsots skʼoplal chkaʼikutike jaʼ ti snabeik sbi Dios li krixchanoetike xchiʼuk ti akʼo stunesbeike.

Pedro: Manchuk mi mu snabeik sbi Dios li krixchanoetike xchiʼuk ti muʼyuk tskʼoponik ta sbie, snaʼojik onoʼox buchʼu jaʼ ta melel.

Antonio: Yikʼaluk van snaʼojik buchʼu. Pe laj yakʼ jnaʼtik kʼusi sbi li Diose, yuʼun tskʼan ti mu vokoluk xkaʼitik xijnopaj ta stojolale.

Pedro: ¿Kʼuxi? Mu xkaʼibe lek smelolal chkaʼi.

Antonio: Jnoptik avaʼi liʼe: jutuk mu jkotoltikuk jnaʼojtik ti oy buchʼu la xchʼak ta oʼlol li Tsajal Nabe xchiʼuk ti akʼbat li Lajuneb Mantaletike, ¿mi mu jechuk? Jnaʼojtik xtok ti oy buchʼu la spas jun arka sventa mu xcham li yutsʼ yalale xchiʼuk li chonbolometike. ¿Kʼu van yelan chavaʼi ti muuk jnabetik li sbiike? Xkaltik yaʼele muʼyuk mas tsots skʼoplal. ¿Mi mu jechuk chavaʼi xtok ti mu masuk tsots skʼoplal ti jnabetik sbi li buchʼu tal chamuk ta skoj jmultike?

Pedro: Jech yaʼel.

Antonio: Pe oy ta yoʼonton Dios ti akʼo jnabetik sbi li viniketik taje: Moisés, Noé xchiʼuk Jesús. Yuʼun akʼo mi muʼyuk laj kojtikintik jnaʼojtik lek ti jpʼel skʼoplal echʼik ta balumil ta skoj ti jnaʼojbetik li sbiike.

Pedro: Muʼyuk bu jnopoj jech maʼ taje, pe jech avaʼuk.

Antonio: Jaʼ yuʼun chkalbekutik tajek sbi li Jeovae: yuʼun oy ta koʼontonkutik ti akʼo spat yoʼontonik ta stojolal Jeova li krixchanoetike, ti akʼo batsʼi kuxuluk xilike xchiʼuk ti xkʼot ta yamigoike. Pe jnaʼojkutik xtok ti skʼan oyuk xchʼunel koʼontonkutik ta stojolal Jesús sventa jta jkolebalkutike. ¿Mi xakʼan xakʼel yan teksto ti chalbe skʼoplal taje?

Pedro: Lek.

Antonio: Laj xa onoʼox jkʼeltik li Juan 14:6. Vuleso ta ajol ti xi laj yal li Jesuse: «Vuʼun li beune, vuʼun li melelune, vuʼun li cuxlejalune». Li avi une, jkʼeltik avil Juan 14:1. ¿Mi xakʼan xakʼel li kʼusi chal ta slajebe?

Pedro: Lek oy, xi chale: «Chʼunic ti chascoltaoxuc li Diose, jech chʼunic ti chajcoltaoxuc eqʼue».

Antonio: Kolaval. Vaʼun chaʼa, ¿kʼusi chanop: mi jaʼ noʼox skʼan xkakʼ xchʼunel koʼontontik ta stojolal li Diose, ti jaʼ mu persauk xkakʼ xchʼunel koʼontontik ta stojolal li Jesuse?

Pedro: Mu jechuk, yuʼun laj yal Jesús ti skʼan xkakʼ xchʼunel koʼontontik ta stojolal li Diose xchiʼuk ta stojolal li stuk eke.

Antonio: Jech taje. Ta melel, jaʼ van jech chanop ek ti skʼan xvinaj ta jkuxlejaltik ti oy xchʼunel koʼontontike, ti maʼuk noʼox chkaltike.

Pedro: Jech onoʼox ta melel.

Antonio: ¿Kʼusi van skʼan jpastik sventa xkakʼtik ta ilel taje? ¿Kʼu xachi ti jaʼ to xkalbetik skʼoplal mi tal jvulaʼanot ta yan veltae?a

Pedro: Lek oy.

¿Mi oy kʼusi chakʼan chajakʼ ta sventa jtosuk li kʼusi chal Vivliae? ¿Mi oy kʼusi labal sba chavil tspas o kʼusi xchʼunoj li stestigotak Jeovae? Mi jeche, mu xamak avoʼonton, jakʼbo mi oy bu avil li stestigotak Jeovae. Yuʼun toj lek xaʼiik ta xchiʼinel ta loʼil krixchanoetik ta sventa li kʼusi xchʼunojike.

[Ts’ib ta yok vun]

[Ts’ib ti muk’tik sletraile ta pajina 9]

Muʼyuk me ta jta jkolebaltik mi muʼyuk chkakʼ xchʼunel koʼontontik ta stojolal li Jesuse