MANTAL TA SLIKEBALTIK PAJINA: ¿KʼUSI TSPAS TA ATOJOLAL LI AJVALILAL YUʼUN DIOSE?

¿Kʼu yuʼun skʼan oyuk ta koʼontontik li Ajvalilal yuʼun Diose?

Ta smiyonal noʼox krixchanoetik spatoj yoʼontonik ta stojolal li Ajvalilal yuʼun Diose. Jaʼ yuʼun tspasik li kʼusi laj yalbe komel yajtsʼaklomtak li Jesuse, albatik ti akʼo xi skʼanike: «Acʼo sta yorail chapas mantal, acʼo pasuc cʼusi tscʼan avoʼnton liʼ ta banamil jech chac cʼu chaʼal te ta vinajele» (Mateo 6:10).

Akʼo mi ep buchʼutik ti oy ta yoʼontonik li Ajvalilal yuʼun Diose, jutuk mu skotoluk li relijionetike muʼyuk mas tsots skʼoplal chaʼiik. Li j-al-loʼil H. G. Wells solel labal sba laj yil ti toj tsots skʼoplal laj yaʼi Jesús li «Ajvalilal yuʼun Dios ta vinajele», pe li Ajvalilal taje muʼyuk mas chalbeik skʼoplal «jutuk mu skotoluk li relijionetik ti xchʼunojik Cristo kʼalal chchanubtasvanike».

Pe li stestigotak Jeovae mu jechikuk kʼuchaʼal li relijionetik taje, yuʼun li stukike skotol ora chalbeik skʼoplal li Ajvalilal yuʼun Diose. Jun skʼelobile, li jrevistakutik atsakoje, ti jaʼ li mas ojtikinbile, chichʼ lokʼesel ta 220 kʼopetik. Jech xtok, li jujulik revista chlokʼe ta xichʼ pasel imprimir jutuk mu 46 miyon ta lik, jaʼ yuʼun jaʼ li mas ep chichʼ pukel ta spʼejel Balumile. ¿Kʼusi ti mas chalbe skʼoplal li revistae? Kʼelo noʼox avil li baʼyel pajinae: Li Jkʼel osil ta toyole. Yakal chalbe skʼoplal li Ajvalilal yuʼun Jeovae.a

¿Kʼu yuʼun chkakʼkutik tajek persa yalbel skʼoplal li Ajvalilal yuʼun Diose? Yuʼun jaʼ li kʼusi mas chalbe skʼoplal li livro ti mas ojtikinbile, li Vivliae. Jech xtok, jpatoj koʼontonkutik ti jaʼ noʼox stuk xuʼ slajesbe svokol krixchanoetik li Ajvalilal yuʼun Diose.

Ti melel xkaltike jaʼ noʼox chkakʼkutik persa spasel li kʼusi laj yakʼ ta ilel Jesuse. Yuʼun li stuke jaʼ mas tsots skʼoplal laj yaʼi li Ajvalilal yuʼun Dios kʼalal ay ta Balumile xchiʼuk jaʼ li kʼusi mas laj yalbe skʼoplal kʼalal la xchol mantale (Lucas 4:43). ¿Kʼu yuʼun toj tsots skʼoplal laj yaʼi? ¿Kʼusi xuʼ spas ta atojolal li Ajvalilal yuʼun Diose? Ta jtijkutik avoʼonton sventa xakʼel li stakʼobil chakʼ Vivlia li ta yan mantaletik chtale.

[Tsʼib ta yok vun]