MANTAL TA SLIKEBALTIK PAJINA: ¿KʼUSI TSPAS TA ATOJOLAL LI AJVALILAL YUʼUN DIOSE?

¿Kʼu yuʼun tsots skʼoplal laj yaʼi Jesús li ajvalilal yuʼun Diose?

Kʼalal ay ta Balumil li Jesuse solel ep kʼusitik laj yalbe skʼoplal. Jech kʼuchaʼal liʼe, laj yalbe yajtsʼaklomtak kʼuxi xuʼ spasik orasion, kʼuxi xuʼ slekubtasbeik yoʼonton Dios xchiʼuk kʼuxi xuʼ xmuyubajik (Mateo 6:5-13; Marcos 12:17; Lucas 11:28). Akʼo mi jech, li kʼusi mas laj yalbe skʼoplale —xchiʼuk li kʼusi mas la skʼupin yalele— jaʼ ta sventa li Ajvalilal yuʼun Diose (Lucas 6:45).

Jech kʼuchaʼal laj kiltik li ta yan mantale, li Jesuse laj yakʼ ta yoʼonton xcholel «li Lequil Aʼyej ta sventa ventainel yuʼun Diose» (Lucas 8:1). Solel tsots laj yakʼ yip ta spasel, yuʼun ta sienal noʼox kilometro xanav ta sjunul yosilal Israel sventa chalbe krixchanoetik li Ajvalilal yuʼun Diose. Jech xtok, li ta xchanibal Evanjelioetike te chal li cholmantal la spas Jesuse xchiʼuk te chalbe skʼoplal mas ta sien ta velta li Ajvalilale. Jutuk mu skotoluk jaʼ laj yal li Jesuse. Pe taje jaʼ noʼox jun yuni kʼelobil li kʼusitik laj yal ta sventa li Ajvalilale (Juan 21:25).

¿Kʼu yuʼun toj tsots skʼoplal laj yaʼi Jesús li Ajvalilale? Li baʼyele, jaʼ ti jaʼ tʼujbil yuʼun Dios sventa ch-och ta ajvalil li ta Ajvalilal taje (Isaías 9:6; Lucas 22:28-30). Pe maʼuk mas tsots skʼoplal chaʼi ti chichʼ sjuʼel xchiʼuk ichʼel ta mukʼe (Mateo 11:29; Marcos 10:17, 18). Yuʼun oy to mas srasonal ti kʼu yuʼun laj yakʼ ta ojtikinel li Ajvalilale. Li Jesuse snaʼoj xa onoʼox ti oy kʼusi tspas li Ajvalilal yuʼun Dios ta stojolal li buchʼutik mas skʼanoje: li Stote xchiʼuk li yajtsʼaklomtake.a

LI KʼUSI TSPAS TA STOJOLAL STOT JESÚS LI AJVALILAL YUʼUN DIOSE

Li Jesuse skʼanoj ta sjunul yoʼonton li Stote (Proverbios 8:30; Juan 14:31). Toj labal sba chil li stalelaltak Stot ti kʼupilik sbae, jech kʼuchaʼal li kʼanelale, li xkʼuxul yoʼontone xchiʼuk li stukʼilale (Deuteronomio 32:4; Isaías 49:15; 1 Juan 4:8). Jaʼ yuʼun solel chopol chil ti tikʼbil smul li Stote. Jech kʼuchaʼal liʼe, yalojik ti mu la kʼusi sventa-o Dios li svokoltak krixchanoetike, pe maʼuk noʼox taje, yuʼun la jaʼ chakʼ li vokolile. Taje jaʼ jun srasonal ti tsots skʼoplal sventa laj yakʼ tajek ta yoʼonton xcholel «li Lequil Aʼyeje, jaʼ ti chlic xa ventainvanuc li Diose», yuʼun li Ajvalilale jaʼ tslekubtasbe skʼoplal li Stote (Mateo 4:23; 6:9, 10). ¿Kʼuxi van tspas taje?

Ep kʼusitik lek tspas ta stojolal li krixchanoetike. Ta stojolal li Ajvalilale, li Jeovae «[tskusbe] loqʼuel scotol yaʼlel satic» li krixchanoetike. Tslajesbe skʼoplal li kʼusitik chakʼ okʼkutike, «jech muʼyuc xa bochʼo chcham, muʼyuc xa bochʼo chat yoʼnton, [...] muʼyuc xa bochʼo cʼusi cʼux chaʼay» (Apocalipsis 21:3, 4). Koliyal li Ajvalilal yuʼun Diose, chlaj-o skʼoplal svokol li krixchanoetike.b

Jech oxal, mu labaluk ta aʼiel ti oy ta yoʼonton chakʼ ta ojtikinel Ajvalilal yuʼun Dios li Jesuse, yuʼun li Ajvalilal taje chakʼ ta ilel ta melel ti Stote jaʼ jun Dios ti chkʼuxubinvan xchiʼuk ti oy sjuʼele (Santiago 5:11). Pe li Ajvalilale maʼuk noʼox oy kʼusitik lek tspas ta sventa Dios, moʼoj, oy kʼusitik tspas ta stojolal yan krixchanoetik ti skʼanoj li Jesuse, ti jaʼ li yajtsʼaklomtake.

LI KʼUSI TSPAS LI AJVALILAL YUʼUN DIOS TA STOJOLAL LI YAJTSʼAKLOMTAK JESUSE

Kʼalal muʼyuk toʼox talem ta Balumil li Jesuse, solel jal xaʼox te kuxi ta vinajel xchiʼuk Stot. La skolta ta spasel skotol li kʼusitik x-ayane: li epal kʼanaletike xchiʼuk li epal galaxia ta vinajele, li Jbalumiltik ti kʼupil sbae xchiʼuk skotol li kʼusitik te kuxajtike (Colosenses 1:15, 16). Pe, li kʼusi mas la skʼan Jesús ta skotol li kʼusitik laj yichʼ pasele, jaʼ li krixchanoetike (Proverbios 8:31).

Li kʼanelal taje jaʼ jun srasonal ti tijbat-o yoʼonton ta xcholel mantale. Ta slikebal onoʼox laj yal ti tal ta Balumil sventa tal yalbe «Lequil Aʼyej li bochʼotic abul sbaique» (Lucas 4:18). Pe li Jesuse maʼuk noʼox la xcholbe mantal li krixchanoetike. Jun skʼelobile, kʼalal la stsob sbaik krixchanoetik sventa chaʼiik li kʼusi chale, «icʼuxubaj ta yoʼnton, la scoltaan scotol li jchameletic te xchiʼinojic tale» (Mateo 14:14). Ta yan velta xtoke, jun vinik ti tsakbil ta tsatsal chamele, xi laj yalbe li Jesuse: «Me chacʼan chacoltaune, xuʼ avuʼun chalecubtasun». Ta skoj ti oy kʼanelal yuʼun xchiʼuk ti oy xkʼuxul yoʼonton li Jesuse, xi laj yalbee: «Ta jcʼan ta jcoltaot. Colan chaʼe», vaʼun la xpoxta li vinike (Lucas 5:12, 13). Kʼalal laj yil Jesús ti yakal ch-okʼ María ta skoj ti cham li xchiʼil ta vokʼel, ti jaʼ li Lazaroe, «ep laj yat yoʼnton ec; toj chopol laj yaʼay» xchiʼuk «lic ocʼuc» (Juan 11:32-36). Vaʼun oy kʼusi toj labal sba la spas: la xchaʼkuxes li Lazaroe, akʼo mi oy xa ta xchanibal kʼakʼal slajel (Juan 11:38-44).

Li Jesuse snaʼoj ti oy noʼox kʼu sjalil tstabeik sbalil li skʼelobiltak juʼelal la spase. Yuʼun ipajik to onoʼox li buchʼutik la xpoxtaane xchiʼuk chaʼchamik li buchʼutik la xchaʼkuxesane. Pe, snaʼoj xtok ti jaʼ mu xlaj skʼoplal li kʼusitik tspas li Ajvalilal yuʼun Diose. Ta skoj taje, li Jesuse maʼuk noʼox la spas li skʼelobil juʼelale, yuʼun jaʼ mas laj yakʼ ta yoʼonton yalbel skʼoplal «li Lequil Aʼyeje, jaʼ ti yorail xa chventainvan li Diose» (Mateo 9:35). Li skʼelobiltak juʼelal la spase, jaʼ noʼox yuni kʼelobil li kʼusi poʼot xa tspas ta spʼejel Balumil li Ajvalilal yuʼun Diose. Jkʼeltik li kʼusitik chkʼot ta pasel jech kʼuchaʼal chal li Vivliae.

Chlaj skʼoplal li chameletike.

«Jech ta xlic jamuc satic li maʼsatetique; ta xlic jamuc xchiquinic li coquetique. Li coxoetique xbitubajic noʼox liquel jech chac cʼu chaʼal teʼtical chij; xcuxet noʼox yoʼnton tsots chlic qʼuejinicuc li umaʼetique.» Jech xtok, «mu jbejuc ta na jech chal: ‹Toj ipun›» (Isaías 33:24; 35:5, 6).

Chlaj skʼoplal li lajelale.

«Li bochʼo tucʼ yoʼntonique jaʼ chuʼuninic o li yosilique, jech jun yoʼnton te chnaquiic o.» (Salmo 37:29.)

«[Li Diose] jʼechʼel ta slajesbe o scʼoplal li lajele; ta scusbe loqʼuel yaʼlel sat scotolic.» (Isaías 25:8.)

Chchaʼkuxiik li animaetike.

«[Tsta] scʼacʼalil ta xaʼibicun jcʼopojel scotol li bochʼotic oyic ta smuquinalique.» (Juan 5:28, 29.)

«Ta xchaʼcuxes animaetic li Diose.» (Hechos 24:15.)

Skotolik ch-ayan snaik xchiʼuk yabtelik.

«Chlic spas lec snaic, chlic naquiicuc stuquic; chlic stsʼunic lec stsʼusubic, ta sloʼbeic sat stuquic. Mu alticuc tspas lec snaic, mu yanuc bochʼo te chnaqui; mu alticuc tstsʼun lec stsʼusubic, mu yanuc bochʼo tsloʼbe sat. [...] Li bochʼotic tʼujbilic cuʼune ta to scʼupinic lec li yabtel yoc scʼobique.» (Isaías 65:21, 22.)

Muʼyuk xa paskʼop.

«[Li Diose] tspajes scotol li pleito cʼalal to ta jujujot stiʼ banamile.» (Salmo 46:9.)

«Muʼyuc xa tsmil sbaic ta espada li jujun mucʼtic banamile; muʼyuc xa bochʼo chchapan sba lec ta xchanel pleito.» (Isaías 2:4.)

Ta x-ayan epal veʼlil.

«Isatin xa li cʼusitic tsʼunbil ta banamile; li Dios cuʼuntique laj xa yacʼbutic bendición.» (Salmo 67:6.)

«Acʼo oyuc ep trigo liʼ ta banamil; acʼo nojuc batel ta trigo li joljolvitse.» (Salmo 72:16.)

Chlaj skʼoplal li povreale.

«Li bochʼotic abul sbaique mu xchʼayatic o ta oʼntonal.» (Salmo 9:18.)

«Tscolta li bochʼotic abul sbaique xchiʼuc li bochʼotic oy svocolic ti muʼyuc bochʼo chcoltaatique. Jaʼ chcʼuxubin li bochʼotic toj biqʼuit ch-ilatique, xchiʼuc tscolta cʼu chaʼal mu xlajic ta milel.» (Salmo 72:12, 13.)

Ti laj xa jchantik talel li kʼusitik albil chkʼot ta pasel taje, ¿mi xavaʼibe smelolal kʼu yuʼun toj tsots skʼoplal laj yaʼi Jesús ta yalbel skʼoplal li Ajvalilal yuʼun Diose? Li stuke laj yalbe skotol li buchʼutik oy ta yoʼonton chchikintaike, yuʼun snaʼoj ti jaʼ noʼox stuk xuʼ tslajes jvokoltik li Ajvalilal yuʼun Diose.

¿Mi chakʼupin li kʼusitik yaloj tspas Diose? Mi jaʼ jeche, ¿kʼuxi xuʼ xachan mas ta sventa li Ajvalilal yuʼune? ¿Kʼusi xuʼ xapas sventa xakʼupin li bendisionetik chichʼ talele? Li ta yan mantal chtale te chichʼ takʼel.

[Tsʼibetik ta yok vun]