¿Mi xaʼibe xkʼuxul jvokoltik li Diose?

¿KʼUSI CHAKʼ JCHANTIK LI KʼUSITIK PASBILE?

Li yaʼibel xkʼuxul svokol yantike jaʼ skʼan xal ti chkaʼi ta koʼontontik ti kʼu yelan chaʼi sbaike. Li doktor Rick Hanson, ti xchanojbe skʼoplal li jnopbentike, chal ti «te onoʼox la tikʼil ta ADN li yaʼibel xkʼuxul svokol yantike».

NOPO TA SVENTA LIʼE: ¿Kʼu yuʼun xuʼ xkaʼibetik xkʼuxul svokol yantik ti mu jechuk chaʼiik li chonbolometike? Li Vivliae chal ti jaʼ ta skoj ti la spasutik ta slokʼol stuk li Diose (Génesis 1:26). Taje jaʼ skʼan xal ti xuʼ jchanbetik ti kʼu yelan stalelale xchiʼuk ti jechuk xkakʼtik ta ilele. Jaʼ yuʼun, kʼalal oy buchʼu xaʼibe xkʼuxul svokol li yantike jaʼ me yakal chakʼ ta ilel ti kʼu yelan stalelal li Jpasvanej kuʼuntik ti jaʼ li Jeovae (Proverbios 14:31).

¿KʼUSI CHCHANUBTASUTIK VIVLIA TA SVENTA TI XAʼIBE XKʼUXUL JVOKOLTIK LI DIOSE?

Li Diose xaʼi ti kʼu to xkʼuxul li jvokoltike xchiʼuk muʼyuk lek chil ti jech ta jnuptantike. Kʼalal chalbe skʼoplal ti kʼu yelan laj yil svokolik ta mosoinel ta Ejipto li j-israeletike xchiʼuk ti te xanavik 40 jabil ta taki xokol balumile, xi chal li Vivliae: «Scotol li svocolic toʼoxe jaʼ la svocolin stuc scotol» (Isaías 63:9). Jech kʼuchaʼal chkiltike, maʼuk noʼox ti snaʼoj ti chil svokol li steklumale, yuʼun kʼux ta xaʼi ek. Xi chal stuk li Diose: «Bochʼouc noʼox ta xutsʼinta li jteclumale, jaʼ ta xutsʼintabun o li yuninal jsate» (Zacarías 2:8, 9). Jaʼ yuʼun, kʼalal oy buchʼu chilbajinutike xkoʼolaj ti jaʼ yakal tspasbat li Diose.

Akʼo mi oy bakʼintik ti mu jta-o chkaʼitik li xkʼuxul yoʼonton Diose o ti oy jmul chkaʼi jbatike, xi chalbutik ta jamal li Vivliae: «Yuʼun mas to toyol skʼoplal li Diose, jaʼ mu sta li koʼontontike xchiʼuk xojtikin skotol li kʼusitike» (1 Juan 3:19, 20). Li Diose mas to xojtikinutik kʼuchaʼal li voʼotike. Snaʼoj li kʼusi ta jnuptantike, li kʼusi ta jnoptike xchiʼuk ti kʼu yelan chkaʼi jbatike, vaʼun jech chaʼi sba kʼuchaʼal chkaʼi jbatike.

Xi jamal chal li Vivliae:

• «Cʼalal chacʼanbicun vocole, ta xcaʼay li acʼopique; cʼalal xavocoletic ta jtojole, ‹Liʼ oyune, ¿cʼusi chacʼanic?›, xacutoxuc» (ISAÍAS 58:9).

• «Vuʼun jnaʼoj jtuc li cʼusi chapal cuʼun ta aventaique; chapal cuʼun sventa alequilalic, maʼuc sventa avocolic. Tsʼacal chacacʼboxuc li cʼusi amalaojic onoʼoxe. Chlic acʼanbicun vocol, chlic acʼopanicun, jech ta xcaʼiboxuc acʼopic» (JEREMÍAS 29:11, 12).

• «Tsobo me ti cʼu xa yepal ilocʼ yaʼlel jsate; yuʼun te xa atsʼibaoj ta vun scotol» (SALMO 56:8).

LI DIOSE LEK XOJTIKINUTIK, XAʼIBE SMELOLAL TI KʼU YELAN CHKAʼI JBATIKE XCHIʼUK JECH CHAʼI SBA EK

¿Mi ta van skoltautik kʼalal jnaʼojtik ti xaʼibe smelolal jvokoltik li Diose? Jkʼeltik li kʼusi kʼot ta stojolal li Mariae.

«Toj echʼ noʼox kʼux laj kaʼi kʼalal laj kil ti kʼu yelan laj yil svokol chib jabil ta kanser li jkerem ti yichʼoj 18 jabile xchiʼuk ti jaʼ cham-oe. ¿Kʼu yuʼun ti jech chkil jvokoltike xchiʼuk ti jech chkʼot ta pasele? Solel li ilin ta stojolal Jeova ta skoj ti muʼyuk la skoltae.

»La jnop ti muʼyuk skʼanojun li Jeovae. Pe kʼalal echʼem xa ox vakib jabile laj kalbe jun kamiga ta jtsobobbail ti toj lek yoʼonton xchiʼuk ti toj lek xaʼibe smelolal ti kʼu yelan chkaʼi jbae. Lek jal te la xchikintabun, vaʼun la svulesbun ta jol jun teksto ti kʼot ta koʼontone, jaʼ li 1 Juan 3:19, 20 ti jaʼ te chal ti ‹mas to toyol skʼoplal li Diose, jaʼ mu sta li koʼontontike xchiʼuk xojtikin skotol li kʼusitike›. Ta tsʼakal une laj yalbun ti xaʼibe smelolal Jeova li jvokoltike.

»Pe li voʼone jech-o muʼyuk lek chkaʼi jba ta stojolal li Jeovae. Vaʼun la jkʼel li Salmo 94:19 ti xi chale: ‹Cʼalal ilubtsaj xa jol ta scoj ti toj ep chloʼilaj coʼntone, voʼot laj amuqʼuibtasbun coʼnton; laj avacʼbun xcuxetel coʼnton›. Taje jaʼ li kʼusi ta jkʼan xa onoʼox chkaʼie. Jech oxal ta sjunul xa koʼonton laj kalbe Jeova li jvokole, yuʼun jnaʼoj xa lek ti oyun ta yoʼontone xchiʼuk ti xaʼi ti kʼu yelan chkaʼi jbae, vaʼun jun xa koʼonton likom yuʼun».

¡Toj echʼ noʼox tspat koʼontontik ti xaʼibe smelolal Dios ti kʼu yelan chkaʼi jbatike xchiʼuk ti xaʼibe xkʼuxul li jvokoltike! Pe ¿kʼu yuʼun toj ep jvokoltik? ¿Mi yakal van chakʼbutik kastigo Dios ta skoj ti oy kʼusi chopol jpasojtike? ¿Mi chkʼot van skʼakʼalil ti chakʼbe slajeb vokoliletik li Diose? Li sjakʼobiltak liʼe chichʼ takʼel li ta yan mantaletik chtale.