Kʼotuk ta oʼontonal li kʼuyelan cha chanubtasvane
1. ¿Kʼusi skʼan jpastik sventa lek xi jtojob stunesel ta chol mantal li sKʼop Diose?
1 Li jcholmantaletik ti lek xtojobike, jech kʼuchaʼal li jtakbol Pabloe, chakʼik venta ti sventa «tucʼ xbat yalel [yuʼunik] li scʼop Dios ti jaʼ melele», maʼuk noʼox ti ta jkʼeltik junuk teksto ta Vivliae (2 Tim. 2:15). ¿Kʼuxi xuʼ xkʼot ta yoʼonton li buchʼutik ta jchanubtastike? (Hech. 28:23.)
2. ¿Kʼusi xuʼ jpastik sventa mas chichʼ ta mukʼ sKʼop Dios li buchʼutik ta jcholbetik mantale?
2 Kakʼtik jaʼ xkʼopoj li sKʼop Diose. Baʼyele, skʼan xkakʼbetik yil ta Vivlia sventa xlik skʼan mas li spʼijilal Dios te chale. Mi jpatoj lek koʼontontik li ta sKʼop Diose xuʼ jaʼ stijbe yoʼonton sventa xaʼi li buchʼutik ta jkʼelbetik junuk teksto li ta chol mantale (Heb. 4:12). Xuʼ xi noʼox xkaltike: «Li voʼone jaʼ skoltaojun snaʼel kʼusi tsnop Dios ta sventa liʼe. Kʼelo avil kʼusi chal li sKʼope». Mi xuʼe, kakʼtik jaʼ xkʼopoj li sKʼop Dios kʼalal ta jkʼelbetik junuk tekstoe.
3. Kʼalal mi laj xaʼox jkʼeltik junuk tekstoe, ¿kʼusi xuʼ jpastik sventa xaʼibe smelolal li buchʼu ta jchiʼintik ta loʼile?
3 Ta xchibale, skʼan xkalbetik smelolal li tekstoetike. Epal krixchanoetike mu xaʼibeik smelolal ta anil li teksto ta jkʼelbetik ta sba veltae. Jutuk mu skotoluk veltae, skʼan xkalbetik smelolal kʼu yuʼun jaʼ chalbe smelolal li kʼusi yakalutik sloʼiltaele (Luc. 24:26, 27). Skʼan jchaʼaltik li kʼusitik tsots skʼoplale. Jech xtok, kʼalal oy kʼusi ta jakʼbetike jaʼ te chkakʼtik venta mi laj yaʼibe smelolal li kʼusi ta jloʼiltatike (Pro. 20:5; Hech. 8:30).
4. ¿Kʼusi slajeb la jchantik sventa chkʼot ta oʼontonal kʼalal chi jchanubtasvane?
4 Jtunestik Vivlia sventa xi jrasonaj xchiʼuk. Ta yoxibale, skʼan kʼotuk ta sjol ta yoʼonton li buchʼu chaʼibutike. Jkoltatik sventa skʼel kʼuyelan xuʼ xakʼ ta xkuxlejal li tekstoe. Mi ta Vivlia ta jlokʼestik li kʼusi chkaltike, yikʼaluk van xkʼot ta yoʼonton xchiʼuk sjel li snopbene (Hech. 17:2-4; 19:8). Jech kʼuchaʼal liʼe, mi la jkʼeltik Éxodo 3:14 xchiʼuk li tsʼib ta yok vune, xuʼ van xkalbetik ti sventa lekuk xkil jbatik xchiʼuk jun krixchanoe toj tsots skʼoplal skʼan xkojtikinbetik li sbie. Vaʼun xuʼ xi jakʼbetike: «¿Mi xuʼ van mas xa yaʼibot aorasion Dios mi la tunesbe li sbie?». Kʼalal chkalbetik kʼuyelan xuʼ xakʼ ta xkuxlejal junuk krixchano li teksto ta jkʼelbetike, jaʼ te chvinaj ti ep sbalile. Li chanubtasel ti chkʼot ta yoʼonton krixchanoetik chal Vivliae jaʼ me tstijbe yoʼonton krixchanoetik ti tukʼ yoʼontonik sventa xichʼik ta mukʼ li melel kuxul Diose, li Jeovae (Jer. 10:10).