Kʼotuk ta oʼontonal ti kʼuyelan ta jcholtik mantale
1. ¿Kʼusi chakʼ jchantik ti jelel kʼuyelan la xcholik mantal li baʼyel yajtsʼaklom Cristoe?
1 Li buchʼutik la xcholbeik lekil aʼyej li baʼyel yajtsʼaklom Cristoe jelel tajek xkuxlejalik xchiʼuk kʼusitik xchʼunojik (Col. 1:23). Akʼo mi jaʼ laj yalbeik skʼoplal Ajvalilal yuʼun Dios kʼalal la xcholik mantale, jeltos ti kʼuyelan laj yalbeik li krixchanoetike. Jech kʼuchaʼal liʼe, kʼalal la xchiʼin ta loʼil judioetik li Pedroe jaʼ lik yalbe skʼoplal j-alkʼop Joel kʼalal la slikes li sloʼile, yuʼun li judioetike tsots skʼoplal chilik li Skʼop Diose (Hech. 2:14-17). Pe jech kʼuchaʼal chkakʼtik venta ta Hechos 17:22-31 li Pablo eke jelel kʼuyelan la xchiʼin ta loʼil jtsop jgriegoetik. Li bu ta jcholtik mantal avi eke, ta jtatik krixchanoetik ti tsots skʼoplal chilik li Vivliae, mi jech taje xuʼ jkʼelbetik Vivlia kʼalal ta jcholtik mantal ta naetike. Pe mi jaʼ la jtatik li buchʼutik mu xchʼunik ta sventa Cristo o ti mu tsotsuk skʼoplal chilik Vivlia o relijione, jaʼ van mas lek ti mu aniluk xkalbetik skʼoplal li kʼusi chal Vivliae.
2. Sventa jkoltatik li buchʼutik tsots skʼoplal chilik Vivlia xchiʼuk li buchʼutik muʼyuke, ¿kʼusi vunal xuʼ jtunestik ti chichʼ akʼel ta cholmantale?
2 Jtunestik lek li vunetik sventa chichʼ akʼel ta cholmantale. Li kabteltik chlik ta septiembre yuʼun 2012 kʼalal ta agosto yuʼun 2013, ta chabchab u chjel echʼel li vunetik chkakʼtik ta cholmantale, xuʼ xkakʼtik revistaetik, tratadoetik xchiʼuk foyetoetik. Li buchʼutik ta jcholbetik mantal ti mu xkʼot ta yoʼonton chloʼilajik ta Vivliae, xuʼ xkalbetik skʼoplal li kʼusi mas chkʼot ta yoʼontone. Manchuk mi muʼyuk laj kalbetik ta sventa Vivlia o muʼyuk la jkʼelbetik junuk teksto, mi kʼot ta yoʼonton li buchʼu la jchiʼintik ta loʼile, skʼan sut jkʼeltik sventa jkoltatik yoʼ xchʼunik ta stojolal li Jpasvaneje xchiʼuk li ta Skʼope. Pe mi jaʼ ta jchiʼintik ta loʼil li buchʼutik tsots skʼoplal chilik Vivliae, xuʼ jtunestik kʼalal ta jchiʼintik ta loʼile xchiʼuk xuʼ xkakʼbetik vunetik ti lokʼemik skʼoplal ta Vivliae. Xuʼ jtunestik li livro Chchanubtasvane xchiʼuk li foyeto Chikintao kʼusi chal Dios o Chikintao kʼusi chal Dios sventa chakuxi sbatel osil, manchuk mi muʼyuk albil skʼoplal chichʼ akʼel li u taje. Li kʼusi mas tsots skʼoplale, jaʼ ti xkʼotuk ta oʼontonal ti kʼuyelan ta jcholtik mantale.
3. ¿Kʼuxi xuʼ xkoʼolaj-o ta jun osil ti bu xuʼ xij-ovolaj li yoʼonton krixchanoetike?
3 Jchapanbetik yoʼonton li krixchanoetike. Li yoʼonton krixchanoetike xkoʼolaj kʼuchaʼal osil ti bu xuʼ xij-ovolaje (Luc. 8:15). Kʼuchaʼal jlom osiletike, oy oʼontonal ti skʼan mas xichʼ chapanel yoʼ stsak lek yibel xchiʼuk xchʼi li sbekʼ kʼusi melele. Li jcholmantaletik ta baʼyel sigloe lek kʼusitik kʼot ta pasel yuʼunik kʼalal la stsʼunbeik sbekʼ kʼusi melel o Skʼop Dios ta yoʼonton epal krixchanoetik ti jelel stsʼunbalike, ta skoj taje toj xkuxet yoʼontonik (Hech. 13:48, 52). Xuʼ jech spas kuʼuntik ek mi ta jkʼeltik kʼuxi xuʼ xkʼot ta oʼontonal ti kʼuyelan ta jcholtik mantale.