¿Mi xuʼ van xijlokʼ ta cholmantal ta bat kʼakʼal?

1. Jech kʼuchaʼal chal jlik livroe, ¿ta jayib la ora chchol mantal ta naetik li jtakbol Pabloe?

¹ Jlik livro chal ti kʼalal chchol mantal ta naetik li jtakbol Pabloe, «chlik onoʼox ta chanib ora ta bat kʼakʼal jaʼ to chikta mi och xaʼox akʼobale» (Daily Life in Bible Times). Akʼo mi mu xuʼ xkaltik ta melel ti jech xchʼakojbe yorail li cholmantal la spase, li kʼusi jnaʼojtike jaʼ ti la spas bu kʼalal xuʼ yuʼun «ta sventa li Lequil Aʼyeje» (1 Cor. 9:19-23). Liʼe jaʼ van skʼan xal ti lek chchapan li kʼusitik tspase, vaʼun chbat chchol mantal ta naetik kʼalal jaʼo te oyike xchiʼuk xuʼ xchiʼin ta loʼil li krixchanoetike.

2. ¿Kʼu yuʼun lek ti xijlokʼ ta xcholel mantal li ta bat kʼakʼale?

² Ta epal lumetike, li jchol mantaletike ta sob nopem xaʼiik chcholik mantal ta naetik sjunul xemana. Vaʼun chaʼa, ¿mi jaʼ noʼox van jech yorail xuʼ jtatik li krixchanoetik bu ta jcholtik mantal eke? Xi laj yal jun prekursore: «Mu toj masuk ta jtakutik ta snaik li krixchanoetik ta kʼakʼaltike, jaʼ mas ta jtakutik li ta akʼobaltike». Li vaʼ ora taje mas xa xkuxoj yoʼontonik xchiʼuk mas xa lek chaʼi chloʼilajik. Jech noxtok, xuʼ mas jcholbetik mantal li viniketike. Mi jech sta-o chilike, li moletik ta tsobobbaile skʼan spasik tsobajeletik sventa cholmantal ta bat kʼakʼal.

3. ¿Kʼuxi chkakʼtik ta ilel jpʼijiltik kʼalal ta jcholtik mantal ta akʼobaltike?

³ Oyuk me jpʼijiltik. Skʼan me oyuk jpʼijiltik kʼalal ta jcholtik mantal ta akʼobaltike. Mi lijkʼot ta jpʼej na kʼalal yakalik ta veʼele, jaʼ mas lek kalbetik ti jaʼ to chijtal ta tsʼakale. Mi toj ikʼ osil li bu ta jcholtik mantale, jaʼ lek kakʼ jbatik ti bu xilutik li krixchanoetike, kalbetik noʼox ta anil li jbitike xchiʼuk kalbetik ti kʼu yuʼun ta jvulaʼantike. Jech noxtok, skʼan me oyuk jchiʼiltik kʼalal ta jcholtik mantale, ti nopol xkiltik li yan jcholmantaletike, ti lek sak jamanuk li kayee xchiʼuk ti mu toj tsʼijiluke. Muʼyuk me chkakʼtik ta ilel jpʼijiltik mi toj nax xa akʼobal ta jtijtik li tiʼ nae, yuʼun xuʼ van chlik xa vayikuk li krixchanoetike (2 Cor. 6:3). Jech noxtok, jaʼ me lek ti xbat jcholtik mantal kʼalal sak toʼox osil ti bu xibal sba ta akʼobaltike (Prov. 22:3).

4. ¿Kʼusi sbalil xuʼ jtatik mi ta jcholtik mantal ta bat kʼakʼale?

⁴ Kʼusi sbalil ta jtatik. Mas ta jkʼupintik cholmantal kʼalal chijloʼilaj xchiʼuk li krixchanoetike. Kʼalal mas ta jcholtik mantale, xuʼ mas ep krixchanoetik xkʼot ta yoʼontonik yojtikinel li kʼusi melel sventa xkolike (1 Tim. 2:3, 4). ¿Mi xuʼ van jchʼakbetik yorail sventa jcholtik mantal ta bat kʼakʼal?