¿Mi xuʼ to jcholtik mantal jlikeluk?

Oy jlom jcholmantaletike oy lek yorail yuʼunik bu to kʼalal chcholik mantal, xuʼ van jaʼ noʼox ta oʼlol kʼakʼal. Jlom xtoke oy lek yorail yuʼunik ta skoj ti oy kʼusi tspasike. Pe xuʼ xi jakʼbe jbatike: ¿mi jech ora chkikta cholmantal ta skoj ti jech nopem xaʼiik spasel li bu nakalune? ¿Mi chkiktatik cholmantal ek kʼalal chkiltik ti chlik xa batikuk li yantike? ¿Mi xuʼ to van jcholtik mantal jayibuk minuto ta kayetik o ti bu oy krixchanoetike? ¿Mi xuʼ van xbat jchaʼvulaʼantik jun o chibuk krixchano kʼalal skʼan toʼox xijsut ta jnatike? Nopbo skʼoplal kʼusitik toj lek xuʼ xkʼot ta pasel ti xata yan velta junuk krixchano ti chkʼot ta yoʼonton mantale o mi laj avakʼbe revistaetik junuk jxanvil krixchanoe. Mi lijkom to ta cholmantal jlikeluke, mas to ch-epaj li «smoton Dios [...] chlocʼ ta [ketike]» (Heb. 13:15).