Jtunestik sventa xijchanubtasvan-o li foyeto Lekil aʼyejetik
1. ¿Kʼu yelan pasbil li foyeto Lekil aʼyejetik[e]?
1 Jech kʼuchaʼal laj kiltik li ta Kabteltik sventa Dios ti lokʼ ta julioe, li jtos abtejebal ti toj jtunel yoʼ jchanubtastik-o yantik ta sventa li kʼusi melele jaʼ li foyeto Lekil aʼyejetik yakʼoj Dios. Li ta foyeto liʼe, muʼyuk te lokʼtabil tal li tekstoetike, taje jaʼ sventa skʼel ta Svivlia stuk li buchʼu chichʼ estudioe. Jutuk mu skotoluk li jvuntik pasbile jaʼ sventa xchan stuk li krixchanoetike, akʼo mi jech, li foyeto taje laj yichʼ pasel sventa oyuk buchʼu xkoltaatik ta xchanel. Jaʼ yuʼun, kʼalal mi oy buchʼu laj kakʼbetik li foyetoe, kakʼbetik yilik kʼu yelan li estudioe, vaʼun te chakʼik venta ti toj kʼupil sba ta chanel li lekil aʼyejetike (Mat. 13:44).
2. Kʼalal ta xijvulaʼanvan ta sba veltae, ¿kʼuxi xuʼ jtunestik li foyeto Lekil aʼyejetik[e]?
2 Li ta sba velta vulaʼale. Xuʼ xi xavale: «Ta skoj li kʼusitik chkaʼitik ta notisiae ep buchʼutik tsvul yoʼontonik ta sventa li kʼusi chkʼot ta pasel ta jelavele. Kʼusi chanop li voʼote, ¿mi ta van xlekub xanaʼ li jkuxlejaltike? [Akʼo stakʼ.] ¿Mi anaʼoj ti chakʼ spatobil koʼontontik li Vivliae? Li foyeto liʼe chakʼ ta ilel kʼuxi tstakʼ Vivlia li kʼusitik ta jakʼbe jbatike». Akʼbo li foyetoe xchiʼuk akʼo stʼuj junuk li sjakʼobil ti te chvinaj ta spat li foyetoe. Vaʼun akʼbo iluk kʼu yelan li estudioe xchiʼuk jaʼ xatunes li baʼyel parafo li ta xchanobil ti bu la stʼuje. Li yan kʼusi xuʼ jpastike, jaʼ ti voʼotikuk jtʼujtik junuk xchanobil li ta foyetoe, vaʼun kakʼbetik iluk kʼuxi tstakʼ li Vivliae. Mi oy junuk Video ta jw.org ti chalbe skʼoplal li xchanobil atʼujoje, xuʼ xatunes sventa xalikes-o aloʼil.
3. Albo smelolal kʼuxi xuʼ xkakʼtik-o estudio li foyeto Lekil aʼyejetik[e].
3 Kʼuxi xuʼ jtunestik kʼalal chkakʼtik estudioe. 1) Tuneso li sjakʼobiltak ti ikʼik xvinaj xchiʼuk ti yichʼoj snumeroal sventa xkom ta sjolik li kʼusitik mas tsots skʼoplale. 2) Ta tsʼakale, kʼelo li parafoe. 3) Kʼelo li tekstoetik ti ta kursiva xvinaje xchiʼuk oyuk kʼusi yan xajakʼbe yoʼ xakolta ta stabel stakʼobil ta Vivlia li sjakʼobil ti ta ikʼ xvinaje. 4) Mi maʼuk noʼox jun parafo yichʼoj li ta jujun sjakʼobile, jech xapas kʼuchaʼal laj yichʼ alel tal li ta punto 2 xchiʼuk 3. Mi oy junuk video ti tstakʼ li sjakʼobil taje, xuʼ me xavakʼbe yil kʼalal mi la chanunajik mi muʼyuk to avakʼojbe yile. 5) Ta slajebe, albo akʼo stakʼ tal li sjakʼobile, vaʼun te chavakʼ venta mi laj yaʼibe smelolal li kʼusi la achanike.
4. ¿Kʼusi tskoltautik sventa xijtojob lek stunesel li foyetoe?
4 Tojoban stunesel li lekil abtejebal taje xchiʼuk akʼo persa stunesel bu kʼalal xuʼ avuʼune. Kʼalal muʼyuk to chbat avakʼ estudioe nopo ta stojolal li avaj-estudioe xchiʼuk ti kʼuxi xuʼ xatunes li tekstoetik sventa xarasonaj xchiʼuke (Prov. 15:28; Ech. 17:2, 3). Kʼalal mi mas latojob stunesel li foyetoe, mas me tstij avoʼonton ta stunesel yoʼ xachanubtas yantik ta sventa li kʼusi melele.