Lekuk jtunestik li vunetik lokʼem ta Vivliae

Li Jesuse xi laj yale: «Ta moton la-akʼbatik, jaʼ jech ta moton xavakʼik ek» (Mt 10:8). Kʼalal muʼyuk ta jkʼanbetik stojol li Vivlia xchiʼuk li vunetik chkakʼtike jaʼ me jech yakal ta jchʼuntik li mantal taje (2Ko 2:17). Yuʼun li vunetik taje jaʼ chalbe skʼoplal li kʼusitik melel chal ta Skʼop Dios ti toj ep sbalile. Jech xtok ep takʼin chlaj kʼalal chichʼ pasel imprimir xchiʼuk kʼalal chichʼ takel batel li ta tsobobbailetik ta spʼejel Balumile. Jaʼ yuʼun jaʼuk noʼox me xkichʼtik batel ti kʼu yepal chtun kuʼuntike.

Ta smeloluk me xavakʼbe vunetik li krixchanoetike, jech xapas xtok kʼalal chachol mantal ta karitoe (Mt 7:6). Baʼyel chiʼino ta loʼil li krixchanoetik sventa xanaʼ mi oy ta yoʼonton mantale, mu ta jechuk noʼox xavakʼbe vunetik skotol li buchʼutik te chjelave. Kʼelo mi xtakʼ avuʼun junuk li kʼusi chichʼ jakʼel li ta rekuadroe. Mi xchibet noʼox yoʼonton chavile jaʼ lek ti xavakʼbe noʼox jlikuk tratadoe. Pe mi oy buchʼu tskʼan jlikuk revista o yan vune ta slekiluk me koʼonton kakʼbetik (Pr 3:27, 28).