¿KʼUXI XUʼ JTSALTIK LI PʼAJBAILE?
3 | Lokʼeso ta anopben li pʼajvaneje
Li kʼusi chal Vivliae:
«Jaʼ lek jelo anopbenik sventa xjel atalelalik, sventa xavakʼ venta atukik li kʼusi leke, li kʼusi chʼambile xchiʼuk li kʼusi tukʼ tskʼan yoʼonton Diose» (ROMANOS 12:2).
¿Kʼusi skʼan xal?
Li Diose oy ta yoʼonton li kʼusi ta jnoptike (Jeremias 17:10). Mu baluk noʼox ti jkʼeltik li kʼusi chkaltike xchiʼuk li kʼusitik ta jpastike. Skʼan jlokʼes ta jnopbentik xchiʼuk ta koʼontontik li pʼajvaneje, yuʼun te ch-ayan tal, vaʼun jech yakal ta jel jnopbentik xchiʼuk muʼyuk xa chijpʼajvan.
Paso liʼe:
Kʼelo li avoʼontone xchiʼuk li kʼusi chanop ta stojolal yantike, mas to ta stojolal li buchʼu yan-o stsʼunbal o slumale. Xiuk xa jakʼbe abae: ¿Kʼusi ta jnop ta stojolalik? ¿Mi jaʼ li kʼusi jnaʼoj ta stojolalike o mi jaʼ li kʼusi muʼyuk lek chalik yantike? Mu xakʼel li kʼusi chalik o tsmuyesik li ta redes socialese, li pelikulaetik o li yan chʼayob oʼontonaletik ti mas tstij oʼontonal ta sventa saʼkʼop xchiʼuk pʼajbaile.
Li Skʼop Diose tskoltautik sventa jlokʼestik ta jnopbentik xchiʼuk ta koʼontontik li pʼajbaile
Vokol chkaʼitik sventa xkakʼtik venta mi lek li kʼusi ta jnoptik xchiʼuk li kʼusi oy ta koʼontontike. Pe li Skʼop Diose tskoltautik, «yuʼun chchaj ta kʼelel li jnopbentik xchiʼuk li kʼusi oy ta koʼontontike» (Ebreos 4:12). Kʼelo mi jech yakal chanop kʼuchaʼal chchanubtasvan li Vivliae, mi laje akʼo avipal sjelel atalelal mi oy bu skʼan chavile. Yuʼun li Skʼop Diose xuʼ «tslilin li kʼusitik tsots yibeltak» ta koʼontontik xchiʼuk ta jnopbentike, jech kʼuchaʼal li pʼajvaneje (2 Korintios 10:4, 5).