¿KʼUXI XUʼ JTSALTIK LI PʼAJBAILE?

4 | Kʼanbo koltael li Diose

Li kʼusi chal Vivliae:

«Li talelaletik chakʼ chʼul espiritue jaʼ liʼe: kʼanelal, kuxetel oʼontonal, jun oʼontonal, smalael, yutsil oʼontonal, slekil oʼontonal, xchʼunel oʼontonal, manxoal xchiʼuk pajesejbail» (GALATAS 5:22, 23).

¿Kʼusi skʼan xal?

Li Diose tskoltautik sventa jlokʼes ta koʼontontik li pʼajbaile. Li xchʼul espiritue xuʼ tskoltautik xtok sventa xakʼ chʼiuk talelaletik ti mu spas kuʼun ta jtuktike. Jaʼ yuʼun, ta skoj ti mu xuʼ kuʼun ta jtuktike, jkʼanbetik koltael Dios sventa jlokʼes ta koʼontontik li pʼajbaile. Mi jech ta jpastike, jech me chkaʼi jbatik kʼuchaʼal li jtakbol Pablo ti xi la stsʼibae: «Oy jtsatsal sventa jpas skotol ta skoj li buchʼu chakʼbun juʼele» (Filipenses 4:13). Vaʼun, xuʼ me xi xkaltike: «Te chlik tal ta stojolal Jeova li jkoltaele» (Salmo 121:2).

Paso liʼe:

«Simaron vinikun toʼox, pe li Jeovae la skʼatajesun ta jun manxo vinik» (WALDO).

Ta sjunuluk avoʼonton xakʼanbe Jeova ti akʼo xakʼbot li xchʼul espiritue xchiʼuk kʼanbo ti akʼo skoltaot sventa xlekub atalelale (Lukas 11:13). Junantik li talelaletik taje, jaʼ li kʼanelal, jun oʼontonal, smalael xchiʼuk pajesejbail. Li talelaletik taje tskoltautik sventa jlokʼes ta koʼontontik li pʼajbaile. Sabo mas skʼoplal ta Vivlia li talelaletik taje xchiʼuk kʼelo kʼuxi xuʼ xavakʼ ta akuxlejal. Jech xtok, tsots skʼoplal ti jaʼuk noʼox xachiʼin li buchʼutik chakʼ yipalik sventa jechuk stalelalik kʼuchaʼal taje, yuʼun xuʼ stij avoʼonton sventa xakʼanvan xchiʼuk xapas li kʼusitik toj leke (Ebreos 10:24).

Sloʼil xkuxlejal: WALDO

La stsal li saʼkʼope xchiʼuk li pʼajbaile

Ta skoj li kʼusi la snuptan ta sbikʼtal li Waldoe, lik ayanuk ta yoʼonton li pʼajvaneje. Xi chalbutike: «Nopolik noʼox te kapal jkʼoplal ta majbail ta kaye xchiʼuk li jchon drogaetike [...]. Jun veltae, li pandiya ti jkontrakutike la stojik jun jmilvanej sventa tsmilun, vaʼun la jpoj jba sventa xijatav batel kʼalal jmoj to noʼox xenojbun kuchilue».

Li Waldoe ilin˗o tajek kʼalal lik xchan Vivlia xchiʼuk stestigotak Jeova li yajnile. Xi chale: «Ta jpʼaj toʼox li stestigotak Jeovae xchiʼuk ep ta velta laj kalbeik kʼusitik toj chopol. Pe ta slekil onoʼox yoʼontonik la stakʼbeikun, ti mu jechuk jnopoje».

Ta tsʼakale, lik xchan Vivlia li Waldo eke. Xi to chale: «Muʼyuk bu kʼun laj kaʼi chkakʼ ta jkuxlejal li kʼusi yakal ta jchane. Jpʼel-o ta koʼonton kaloj ti mu xuʼ kuʼun ta jpajtsan jba ti toj simaronune». Akʼo mi jech, jelbat˗o tajek xkuxlejal li kʼusi la xchan ta Vivliae.

Xi to chale: «Jun veltae, li Alejandro ti jaʼ chchanubtasun ta Vivliae laj yalbun ti akʼo jkʼel li kʼusi chal Gálatas 5:22, 23 [...]. Li Alejandroe laj yalbun ti maʼuk ta kipal jtuk ti chchʼi-o batel ta jkuxlejal li talelaletik taje, moʼoj, jaʼ koliyal li xchʼul espiritu Diose. ¡Li kʼusi melel taje la sjelbun tajek li jnopbene!».

Ta skoj ti la skʼanbe koltael Dios li Waldoe, la slokʼes ta yoʼonton li pʼajvaneje. Xi chale: «Li kutsʼ kalaltak xchiʼuk li kamigotak toʼoxe mu xchʼunik ti kʼu to yelan jeloj jtalelale». Xi to chale: «Simaron vinikun toʼox, pe li Jeovae la skʼatajesun ta jun manxo vinik».