Oy xkʼuxul yoʼonton li mero Bankilal Pale kuʼuntike

1, 2. 1) ¿Kʼu yuʼun la stak tal ta balumil Xnichʼon li Jeovae? 2) ¿Kʼusi ta jkʼeltik batel li ta xchanobil liʼe? (Ebreos 5:​7-9).

LEʼTIK xa van ta chaʼmil jabile, li Jeovae la stak tal ta balumil li skʼanbil Nichʼone. ¿Kʼu yuʼun? Jtose, jaʼ sventa spoj lokʼel ta mulil xchiʼuk ta lajelal li krixchanoetike xchiʼuk sventa slilinbe li yabteltak Satanase (Juan 3:16; 1 Juan 3:8). Li Jeova xtoke snaʼoj ti mi tal ta balumil li Jesuse jaʼ chchapanat-o sventa xkʼot ta mero Bankilal Pale. ¿Kʼuxi taje? Jaʼ sventa masuk to xijkʼuxubaj ta yoʼonton xchiʼuk ti xaʼibe smelolal ti kʼu yelan chkaʼi jbatike. Li Jesuse lik tunuk ta mero Bankilal Pale kʼalal laj yichʼ voʼ li ta sjabilal 29.a

² Li ta xchanobil liʼe, ta jkʼeltik batel kʼusitik la xkuxlebin Jesus kʼalal ay ta balumil ti jaʼ chapanat sventa xkʼot ta mero Bankilal Pale ti oy xkʼuxul yoʼontone. Tsots skʼoplal ti xkaʼibetik smelolal taje, yuʼun jaʼ tskoltautik sventa mu vokoluk xkaʼitik ti xijnopaj ta stojolal Jeovae xchiʼuk ti mu xijxiʼ ta skʼoponele, mas to kʼalal chijchibaj ta skoj ti ta jsaʼ jmultike o ti oy kʼusitik vokol chkaʼitik stsalele (kʼelo Ebreos 5:​7-9).

TAL TA BALUMIL LI SKʼANBIL NICHʼON DIOSE

3, 4. ¿Kʼusitik jel ta xkuxlejal Jesus kʼalal tal ta balumile?

³ Eputik onoʼox ti oy kʼusitik chjel ta jkuxlejaltike, jech kʼuchaʼal ti ta jel jnailtik xchiʼuk ti chkiktatik komel li kutsʼ kalaltik xchiʼuk kamigotaktike. Vokol onoʼox maʼ taje, yuʼun jun toʼox van koʼontontik ti te nakalutike. Pe li kʼusitik jel ta xkuxlejal Jesuse mu xkoʼolaj jsetʼuk xchiʼuk li kʼusitik chjel ta jkuxlejaltike. Akʼo mi oy ep xnichʼnabtak Dios li ta vinajele, li Jesuse jaʼ baʼyel laj yichʼ pasel xchiʼuk mas tsots yabtel yichʼoj. Kʼanbil tajek yuʼun li Jeovae xchiʼuk xmuyubaj noʼox te chtun ta sbatsʼikʼob Stot (Sal. 16:11; Prov. 8:30). Akʼo mi jech, li ta Filipenses 2:7 chal ti ta sjunul yoʼonton «laj yikta komel skotol li kʼusi oy yuʼune», vaʼun tal ta balumil sventa xchiʼin ta naklej jpasmulil krixchanoetik.

⁴ Jech xtok, jnopbetik skʼoplal kʼu yelan xkuxlejal Jesus kʼalal jaʼtik toʼox svokʼele. Li yutsʼ yalale abol noʼox sbaik. ¿Kʼuxi jnaʼojtik taje? Yuʼun kʼalal vokʼ li Jesuse, jaʼ noʼox chaʼkot tortola laj yakʼik ta chikʼbil matanal (Lev. 12:8; Luk. 2:24). Jech xtok, kʼalal laj yaʼi ajvalil Erodes ti vokʼ xa li Jesuse, tskʼan xa ox tsmil. Vaʼun, jatavik batel ta Ejipto xchiʼuk te komik kʼuk sjalil (Mat. 2:​13, 15). ¡Solel jel tajek xkuxlejal li Jesuse!

5. ¿Kʼusitik laj yil Jesus kʼalal ay ta balumile, xchiʼuk kʼuxi chapanat sventa xkʼot ta mero Bankilal Pale? (Kʼelo xtok li lokʼole).

⁵ Kʼalal jaʼo liʼ oy ta balumil li Jesuse, laj yil kʼu to yelan chil svokol li krixchanoetike. Laj yaʼibe xkʼuxul kʼalal oy buchʼu chcham kuʼuntike, yuʼun yileluke laj yil cham li stot ti Jose sbie. Kʼalal la xchol mantale, laj yil krixchanoetik ti ipik ta leprae, ti maʼsatetike, ti alubem sbekʼtalike xchiʼuk ti oyik ta meʼonal ta skoj ti cham skerem o stsebike, vaʼun kʼuxubaj ta yoʼonton li krixchanoetik taje (Mat. 9:​2, 6; 15:30; 20:34; Mar. 1:​40, 41; Luk. 7:13). Yiloj xa onoʼox tal ta vinajel ti chil svokol li krixchanoetike, pe kʼalal tal ta balumil xchiʼuk ti kuxi kʼuchaʼal jun krixchanoe, mas to laj yaʼibe smelolal li xkʼuxul svokolike (Is. 53:4). Li kʼusitik la xkuxlebine jaʼ koltaat sventa xaʼibe smelolal kʼu yelan chaʼi sbaik li krixchanoetike, li kʼusi tsvul-o yoʼontonike xchiʼuk li vokolil tsnuptanike. Laj yaʼi kʼu yelan li lubele, li vul oʼontone xchiʼuk ti kʼu to xkʼuxul li vokolile.

LI JESUSE XAʼIBE XKʼUXUL SVOKOL LI YANTIKE

6. ¿Kʼusi chakʼ jchantik li kʼusi laj yal Isaiase? (Isaias 42:3).

⁶ Ti kʼu sjalil la xchol mantal li Jesuse, laj yaʼibe xkʼuxul svokol li buchʼutik kʼunike xchiʼuk ti muʼyuk tsakbilik ta ventae. Vaʼun, jaʼ jech kʼot ta pasel jun albil kʼop ti laj yal Isaiase. Bakʼintike, li Tsʼibetik ta Ebreo Kʼope oy kʼusi tskoʼoltas-o li krixchanoetik ti jkʼulejik xchiʼuk ti lek tsotsike, chal ti xkoʼolajik ta nichimaltik ti lek atʼesbile xchiʼuk ta mukʼtikil teʼetik ti lek natike (Sal. 92:12; Is. 61:3; Jer. 31:12). Yan li buchʼutik abol sbaik xchiʼuk ti muʼyuk tsakbilik ta ventae chichʼik koʼoltasel ta aj ti vochʼeme xchiʼuk ta jun mecha ti smelol xa te xleblune, taje chʼabal sbalil chilik li krixchanoetike (kʼelo Isaias 42:3). ¿Kʼusi la skʼan laj yal li Isaiase? Jaʼ ti tstsakanan ta venta krixchanoetik li Jesuse xchiʼuk ti chkʼuxubin li buchʼutik muʼyuk sbalil ch-ilatik yuʼun li yantike.

7, 8. ¿Kʼuxi kʼot ta stojolal Jesus li albil kʼop laj yal Isaiase?

⁷ Li Mateoe laj yakʼ venta ti kʼot ta pasel ta stojolal Jesus li kʼusi laj yal Isaiase, jaʼ yuʼun xi laj yale: «Muʼyuk bu tskʼas ta jyalel junuk aj ti kʼasem xa jutuke xchiʼuk muʼyuk bu tstupʼ junuk mecha ti smelol xa te xleblune» (Mat. 12:20). Li skʼelobiltak juʼelal la spas Jesuse la stabeik sbalil li buchʼutik chichʼik ilbajinele o li buchʼutik chʼabal xa spatobil yoʼonton laj yaʼiike. Kalbetik junchibuk skʼelobil, jech kʼuchaʼal li vinik ti ip ta leprae. ¿Mi yalojbe xa ox van yoʼonton ti muʼyuk xa chpoxtaje, ti muʼyuk xa chchiʼin yutsʼ yalal xchiʼuk li yamigotake? (Luk. 5:​12, 13). Jnopbetik skʼoplal xtok li jun vinik ti pakʼchikin xchiʼuk ti mu xkʼopoj leke. ¿Kʼu van yelan chaʼi sba ti mu xuʼ stikʼ sba ta loʼil kʼalal chil ti chloʼilaj li yantike? (Mar. 7:​32, 33). Pe maʼuk noʼox te laj-o li svokolike.

⁸ Li ta skʼakʼalil Jesuse, ep judaetik xchʼunojik ti kʼalal oy buchʼu ch-ipaj o ti oy svokol chvokʼe jaʼ ta smul stuk o ta smul stot smeʼ (Juan 9:2). Jaʼ yuʼun, li buchʼutik ipik o li buchʼutik oy svokol chvokʼike pʼajbilik xchiʼuk ch-ilbajinatik yuʼun li yantike. Pe li Jesuse la xpoxtaan xchiʼuk laj yakʼanbe snaʼ ti kʼanbilik yuʼun li Diose, vaʼun jaʼ jech kʼot ta pasel li albil kʼop laj yal Isaiase. ¿Kʼusi chakʼ jchantik taje?

9. Li Ebreos 4:15 xchiʼuk 16, ¿kʼuxi chakʼ ta ilel ti oy xkʼuxul yoʼonton li mero Bankilal Pale kuʼuntike?

⁹ (Kʼelo Ebreos 4:​15, 16). Xuʼ jpʼel ta koʼontontik ti kʼuxutik ta yoʼonton li Jesuse. Kʼalal chal «xijkʼuxubaj ta yoʼonton» xie, li ta griego kʼope jaʼ chalbe skʼoplal kʼalal oy buchʼu xaʼibe xkʼuxul svokol li yantike. Li ta Ebreos 10:​34, li Pabloe jaʼ jech laj yal ek kʼalal laj yalbe skʼoplal ti skʼan xkʼuxubaj ta koʼontontik li buchʼutik tikʼajtik ta chukele. Li skʼelobiltak juʼelal la spas Jesuse jamal chakʼ ta ilel ti kʼux tajek laj yaʼibe svokol li krixchanoetike. Maʼuk noʼox la xpoxtaan ta skoj ti jaʼ jech oy ta sba chaʼie, yuʼun oy ta yoʼonton ta melel li krixchanoetike xchiʼuk tskʼan tskoltaan. Kalbetik skʼoplal liʼe, xuʼ ox ta nom to la xpoxta batel li vinik ti ip ta leprae, pe mu jechuk la spas, yuʼun la spik sventa xpoxtae. Yikʼaluk van oy xa ox ta sjayibaluk jabil ti muʼyuk buchʼu skʼan spik li vinike. Jech xtok, laj yakʼ ta ilel xkʼuxul yoʼonton ta stojolal li pakʼchikine, yuʼun parte bu laj yikʼ batel sventa xpoxta. Jun velta xtoke, oy jun jfariseo la spʼaj ta yoʼonton jun ants ti sutesoj xa ox yoʼonton xchiʼuk ti la spokbe yakan Jesus ta yaʼlel sat xchiʼuk ti la stakijesbe ta stsotsil sjole, pe li Jesuse ta sjunul yoʼonton la spakbe skʼoplal (Mat. 8:3; Mar. 7:33; Luk. 7:44). Maʼuk ti mu xa skʼan xchiʼin o ti la spʼaj li buchʼutik ipik o li buchʼutik tsots saʼoj smulike, yuʼun ta sjunul yoʼonton la skoltaan xchiʼuk laj yakʼbe ta ilel xkʼuxul yoʼonton. Xuʼ jpʼel ta koʼontontik ek ti chakʼbutik ta ilel xkʼuxul yoʼonton li Jesuse.

JCHANBETIK STALELAL LI MERO BANKILAL PALE KUʼUNTIKE

10. ¿Kʼuxi ta jkoltatik ta mantal li pakʼchikinetik xchiʼuk maʼsatetike? (Kʼelo xtok li lokʼoletike).

¹⁰ Ta jkʼan ta jtsʼaklibetik batel li yav yok Jesuse, jaʼ yuʼun chkakʼ kipaltik sventa masuk to jkʼantik li yantike, ti xkaʼibetik smelolal ti kʼu yelan chaʼi sbaike xchiʼuk ti xkakʼtik ta ilel ti kʼuxik ta koʼontontike (1 Ped. 2:21; 3:8). Melel onoʼox ti mu xpoxtaj kuʼuntik li pakʼchikinetik xchiʼuk maʼsatetike, pe xuʼ jkoltatik ta mantal. Kalbetik skʼoplal liʼe, li jvuntike chichʼ jelubtasel ta mas ta sien jeltos senya kʼopetik. Jech xtok, chichʼ pasel ta braile kʼop ta mas ta 60 jeltos kʼopetik xchiʼuk chichʼ pasel videoetik ti oy s-audioal ti chal kʼusi te xvinaje, taje oy mas ta sien jeltos kʼopetik. Vaʼun, jaʼ jech xuʼ xnopajik ta stojolal Jeova xchiʼuk Jesus li pakʼchikinetik xchiʼuk maʼsatetike.

11. ¿Kʼuxi chchanbe stalelal Jesus li s-organisasion Jeovae? (Echos 2:​5-7, 33; kʼelo xtok li lokʼoletike).

¹¹ Kʼalal chaʼkuxiem xa ox li Jesuse, laj yakʼbe tal chʼul espiritu li yajchankʼoptak sventa xcholbeik mantal ta skʼop stukik li krixchanoetik ti kʼotik ta Skʼinal Pentekostese (kʼelo Echos 2:​5-7, 33). Li s-organisasion Jeova avi eke yakʼoj ta yoʼonton ti skolta ta mantal li krixchanoetik ti jeltos skʼopike. Yuʼun li jvuntike chichʼ jelubtasel ta mas ta 1,100 jeltos kʼopetik akʼo mi oy junantik kʼop ti muʼyuk buchʼu mas jech chkʼopojike. Kalbetik skʼoplal li batsʼi kʼopetik ti jaʼ jech chkʼopojik li ta continente americanoe. Sventa xaʼiik lekil aʼyej li krixchanoetik taje, li s-organisasion Jeovae tsjelubtas ta mas ta 160 jeltos kʼopetik li jvuntike. Jech xtok, chichʼ jelubtasel ta mas ta 20 ta chop li romaní kʼope. Ti jech chichʼ pasele, ta smilal xa noʼox krixchanoetik kʼotem ta yoʼontonik li mantale.

12. ¿Kʼusi to mas tspas li s-organisasion Jeovae?

¹² Li s-organisasion Jeovae maʼuk noʼox tskolta ta mantal li krixchanoetike, yuʼun oy buchʼutik svaʼanoj sventa skoltaik li ermanoetik ti chil svokolik ta nikel, nojelal ta voʼ o yan kʼusitike. Ta smilal xa noʼox ermanoetik chlokʼ ta yoʼonton tskolta sbaik ek. Jech xtok, svaʼanoj salonetik sventa teuk xichʼik ta mukʼ Jeova li krixchanoetike xchiʼuk ti xakʼik venta ti kʼanbilik tajeke.

TSKOLTAUTIK TA JUJUNTAL LI MERO BANKILAL PALE KUʼUNTIKE

13. ¿Kʼutik yelan tskoltautik li Jesuse?

¹³ Li Jesuse jaʼ li Lekil jchabichij kuʼuntike xchiʼuk chakʼbutik li kʼusitik chtun kuʼuntik ta jujuntal sventa lek tsotsutik ta mantale (Juan 10:14; Efes. 4:7). Bateltike, jaʼ van jech chkaʼi jbatik kʼuchaʼal li aj ti vochʼeme o li mecha ti smelol xa te xleblun ta skoj ti oy jvokoltike. Yikʼaluk van smelol xa te tsakal chkaʼi jbatik ta skoj ti stsakojutik jtosuk tsatsal chamele, ti oy kʼusi chopol la jpastike o ti muʼyuk lek xkil jbatik xchiʼuk junuk ermanoe. Kʼalal jech ta jnuptantike, xuʼ van jaʼ xa noʼox chbat ta koʼontontik ti kʼu yelan chkaʼi jbatike xchiʼuk ti mu xa stsʼik chkaʼi li jvokoltike, vaʼun ti jaʼ xa chchʼay ta joltik li spatobil koʼontontike. Pe teuk ta joltik ti te sat ta jtojolaltik li Jesuse, yiloj li kʼusitik ta jnuptantike xchiʼuk xaʼibe smelolal ti kʼu yelan chkaʼi jbatike. Ta skoj ti oy xkʼuxul yoʼontone, tskoltautik, yuʼun xuʼ xakʼbutik chʼul espiritu sventa oyuk kipaltike (Juan 16:7; Tito 3:6). Jech xtok, sventa spat koʼontontik xchiʼuk ti skoltautike, xuʼ stunes li moletik ta tsobobbail ti akʼbilik kʼuchaʼal matanale xchiʼuk xuʼ stunes yan ermanoetik (Efes. 4:8).

14. ¿Kʼusi skʼan jvules ta joltik kʼalal mu xa xuʼ chkaʼitike?

¹⁴ Mi smelol xa te tsakal chkaʼi jbatik o ti chʼabal xa jsetʼuk kipaltike, jnopbetik skʼoplal ti jaʼ mero Bankilal Pale kuʼuntik li Jesuse. Teuk ta joltik ti maʼuk noʼox tal ta balumil sventa spojutike, yuʼun tal sventa masuk to xaʼibe smelolal li xkʼuxul jvokoltike. Kʼalal mu xa xuʼ chkaʼitik o ti chijyal xa ta lum chkaʼitik ta skoj ti oy kʼusi chopol la jpastik o ti oy kʼusi vokol chkaʼitik stsalele, li Jesuse te xa syeʼoj skʼob «sventa skoltautik kʼalal jaʼo» chtun kuʼuntike (Ebr. 4:​15, 16).

15. ¿Kʼusi koltaat jun ermano sventa sut ta mantale?

¹⁵ Li Jesus xtoke tstunes yajtsʼaklomtak sventa saʼik xchiʼuk skoltaik li buchʼutik namajemik ta stojolal Jeovae (Mat. 18:​12, 13). Kalbetik skʼoplal li Stefanob ti laj yichʼ lokʼesel ta tsobobbail xchiʼuk ti jaʼ to bat ta tsobajel kʼalal echʼem xa ox 12 jabile. Xi chale: «Mu junuk koʼonton laj kaʼi kʼalal libat yan velta ta salone, pe oy ta koʼonton ti xikʼot ta yutsʼ yalal Jeova yan veltae. Li moletike la xchiʼinikun ta loʼil xchiʼuk lek la xchʼamikun. Bakʼintike, chopol tajek chkaʼi ti linamaj ta stojolal Jeovae xchiʼuk chichibaj xa ox. Pe li ermanoetike la svulesbeikun ta jol ti oy ta yoʼonton Jeova xchiʼuk Jesus ti mu xilubtsaje. Kʼalal lisut ta mantale, skotol li ermanoetike lek la xchʼamunkutik xchiʼuk li kutsʼ kalale. Ta mas tsʼakale, lik xchan Vivlia li kajnile, avie jmoj xa chitunkutik ta stojolal Jeova». Li mero Bankilal Pale kuʼuntik ti kʼuxutik ta yoʼontone xmuyubaj tajek kʼalal oy buchʼutik tsutes yoʼontonike xchiʼuk ti chichʼik koltael sventa sutik tal ta stojolal Jeovae.

16. ¿Kʼu yuʼun ep sbalil chkiltik ti kʼuxutik ta yoʼonton li mero Bankilal Pale kuʼuntike?

¹⁶ Ti kʼu sjalil ay ta balumil li Jesuse, la skolta epal krixchanoetik ti jaʼo chtun tajek yuʼunike. Li avi eke, xuʼ jpʼel ta koʼontontik ti muʼyuk onoʼox chiktautik kʼalal jaʼo chtun tajek kuʼuntik koltaele. Li ta achʼ balumile, tskoltautik lokʼel ta yok skʼob li mulile xchiʼuk chijpas ta tukʼil krixchano. Ta jtojbetik tajek ta vokol Jeova ti skʼanojutike, yuʼun la svaʼan ta mero Bankilal Pale li Xnichʼon ti kʼuxutik ta yoʼontone.