¿Mi x-akʼ yuʼunik jun oʼontonal ta spʼejel balumil li organisasionetike?

Yantik noʼox x-epaj xchiʼuk stsatsaj li milbail o paskʼopetik ta spʼejel balumile. Jech oxal, li Naciones Unidas xchiʼuk li yantik organisasionetike oy kʼusitik tspasik sventa oyuk-o jun oʼontonala. Jtos li kʼusi tspasike jaʼ ti tstakik batel sviniktakik o yajsoltaroik ti butik oy paskʼope. Li kʼusi oy ta yoʼontonike jaʼ ti x-akʼ jun oʼontonal li ta lumetik taje. Xi chal li secretario general yuʼun Naciones Unidase: «Jpatoj koʼontonkutik ta stojolal li buchʼutik te ch˗abtejik o tskoltaik li Naciones Unidas sventa x-ayan yuʼunik jun oʼontonal li ta spʼejel balumile».

Voʼne xa onoʼox ti oy kʼusitik spasojik tal sventa oyuk jun oʼontonale. Oy kʼusitik lek pasem tal yuʼunik. Jech kʼuchaʼal liʼe, xchabiojik li krixchanoetik kʼalal chlik junuk paskʼope, skoltaojik sventa sut ta slumalik li buchʼutik jatavemik lokʼele, yakʼojbeik kʼusitik chtun yuʼunik li buchʼutik yiloj svokolike xchiʼuk svaʼanojik jlom li kʼusitik jinemik toʼoxe. Pe oy onoʼox kʼusitik mu spas yuʼunik. ¿Mi ta van x-ayan yuʼunik ta melel jun oʼontonal li ta spʼejel balumile? ¿Kʼusi van chal Vivlia ta sventa taje?

Li kʼusitik chmakvan sventa oyuk jun oʼontonale xchiʼuk li xchapanobil chal Vivlia

Li kʼusi chmakvane: mu stsak sba skʼopik. Mu skotoluk velta stsak sba skʼopik li organisasionetik o li jaychop soltaroetik ti jelel slumalike, yuʼun mu koʼoluk li kʼusi tsnopik xchiʼuk li kʼusi tskʼan tstaike. Jaʼ yuʼun, vokol chaʼiik ti koʼol x-abtejike.

Li xchapanobil chal Vivlia: «Li Dios te oy ta vinajele tsvaʼan jun ajvalilal ti [...] tslajesbe skʼoplal skotol li ajvalilaletik taje [li ajvalil krixchanoetike], vaʼun stuk xa noʼox te chkom sbatel osil» (Daniel 2:44).

Li kʼusi chmakvane: muʼyuk mas kʼusi x-ayan yuʼunik xchiʼuk oy noʼox spajeb li kʼusi spas yuʼunike. Kʼalal oy kʼusi tspasik li ajvaliletik xchiʼuk organisasionetik sventa oyuk jun oʼontonale jutuk mu skotoluk velta muʼyuk buchʼu mas xkoltavanik, muʼyuk mas stakʼinik xchiʼuk yan kʼusitik. Ta skoj taje mu spas yuʼunik li kʼusi tskʼanike. Jech xtok mas xa vokol xchiʼuk xibal sba ti bu skʼan xchapanik junuk kʼope.

Li xchapanobil chal Vivlia: «Li Totil ti oy smukʼulale, ti jaʼ li Sdios Kajvaltik Jesukristoe [...] la xchotan ta sbatsʼikʼob te ta vinajele, jaʼ mas toyol kʼot skʼoplal kʼuchaʼal li yantik ajvaliletike, li buchʼutik oy yabtele, li buchʼutik oy sjuʼele» (Efesios 1:17, 20, 21).

Li Jeovab Dios ti skotol xuʼ yuʼune la sbiiltas Jesus sventa x-ajvalilaj li ta Ajvalilal yuʼun Diose xchiʼuk laj yakʼbe skotol li kʼusitik chtun yuʼun sventa xakʼ jun oʼontonale (Daniel 7:13, 14).c Li Diose laj yakʼbe ep sjuʼel li Jesuse, laj yakʼbe yojtikinobil yuʼun, spʼijil xchiʼuk ti xaʼibe lek smelolale, ti jaʼ mu jechuk li ajvaliletik xchiʼuk organisasionetik avie (Isaias 11:2). Li Jesus eke oy ep yajsoltarotak ta vinajel ti ep sjuʼelike (Apokalipsis 19:14). Jech oxal, muʼyuk kʼusi ti vokol chaʼi xchapanele.

Li kʼusi chmakvane: oy smantaltak ajvalil ti mu x-akʼbat tspasike. Jutuk mu skotoluk velta li buchʼutik ch˗abtejik ta junuk organisasion ti tskʼanik ti oyuk jun oʼontonale mu spas yuʼunik skotol li kʼusi oy ta yoʼontonik ta skoj ti oy smantal ajvalil ti mu x-akʼbat spasike o ti chʼabal lek jamal smantalil li kʼusitik tspasike. Jaʼ yuʼun, mu xchabij yuʼunik li krixchanoetik kʼuchaʼal oy ta yoʼontonike o ti spasik li kʼusi snopojike.

Li xchapanobil chal Vivlia: «Nopaj batel ta stojolalik li Jesuse xchiʼuk xi albatike: ‹Akʼbil jventain skotol li kʼusitik ta vinajel xchiʼuk ta sba balumile›» (Mateo 28:18).

Li Diose jamal yalojbe Jesus kʼusitik skʼan spas venta xakʼ jun oʼontonal ta spʼejel balumile. Yakʼojbe xtok ta yok skʼob skotol sventa spas yuʼun (Juan 5:22). Li Jesuse tukʼ ta xchapanvan xchiʼuk muʼyuk ta xloʼlavan (Isaias 11:3-5). Jaʼ yuʼun, sta’o ti xi chalbe skʼoplal li Vivliae: «Bankilal J-akʼ-jun-oʼontonal». Jech xtok, lek xchiʼuk tukʼ ti kʼu yelan ch˗ajvalilaje (Isaias 9:6, 7).

Jaʼ no’ox xuʼ xakʼ jun oʼontonal li Ajvalilal yuʼun Diose

Li organisasionetik ti tskʼanik ti oyuk jun oʼontonale xuʼ van xpaj stsʼiji yuʼunik jutuk li paskʼop ta junuk jteklume xchiʼuk ti jun yoʼontonik xkom k’uk sjalile. Pe li kʼusi mu xlaj skʼoplal yuʼunike jaʼ li pʼajbaile ti jaʼ ta skoj ti oy tajek paskʼopetike, yuʼun yakʼoj tajek yibel ta yoʼonton li krixchanoetike.

«Li kʼusi vokole jaʼ ti mu xa kʼusi stak’ pasel sventa oyuk to jun oʼontonale» (Dennis Jett, embajador to’ox yuʼun Estados Unidos).

Jelel tajek li Ajvalil yuʼun Diose yuʼun xuʼ yuʼun slokʼesbe ta yoʼonton krixchanoetik li pʼajbaile sventa x-ayan li jun oʼontonale. K’alal ay ta balumil li Jesuse la xchanubtas yajtsʼaklomtak ta skʼopojel xchiʼuk ta stalelal ti skʼan manxoikuke xchiʼuk ti skʼan sbaik ta jujuntale. Jkʼeltik jun chibuk skʼelobil:

Li Jesuse laj yal ti skʼanojan sbaik ta jujuntal li krixchanoetik ti chventainatik yuʼun li Ajvalilal yuʼun Diose. Jech xtok, muʼyuk onoʼox lek chil li buchʼutik chpʼajvanike. Li tekstoetik ta Vivlia liʼe jamal chakʼ ta ilel taje:

Ta skoj ti jaʼ spasoj krixchanoetik li Jeovae snaʼoj kʼuxi xuʼ x˗ayan jun oʼontonal liʼ ta balumile. Muʼyuk juʼem yuʼunik li ajvaliletik xchiʼuk organisasionetik ti xakʼik jun oʼontonale, pe li Ajvalilal yuʼun Diose persa chakʼ kʼotuk ta pasel.