La skʼel sutel svalopat li yajnil Lote

LI LOT xchiʼuk yutsʼ yalale jmoj toʼox nakalik xchiʼuk Abraham ta Canaán. Jun kʼakʼal ti Abrahame xi la jyalbe ti Lote: Liʼe muʼyuk bu lek jamal balumil sventa li jtsʼunob chontike. Jchʼak jbatik, avokoluk. Mi xi cha bat ta jote, voʼone xi chi bat ta jote.

Li Lote la skʼel batel li lumetike. La jyil jsep osil ta mukʼta lum ti oy lek voʼe xchiʼuk ti lek yox sventa li stsʼunob chontake. Jaʼ Yosilal Jordán. Jech oxal, li Lote te la jyikʼ batel yutsʼ yalal xchiʼuk li stsʼunob chontake. Vaʼun te la spas snaik ta Sodoma.

Li krixchanoetik ta Sodomae toj chopolik. Li Lote muʼyuk lek ta xil, yuʼun li stuke lek stalelal. Jech ti Diose muʼyuk lek ta xil ek. Jaʼ yuʼun ti Diose la stak batel chaʼvoʼ anjeletik sventa chalbe yaʼi Lot ti ta xakʼbe slajeb li Sodomae xchiʼuk li jun jteklum ti te noʼox nopole, jaʼ li Gomorrae, yuʼun li krixchanoetik tee toj chopolik.

Li Lote xi albat yuʼun li anjeletike: ¡Anil! ¡Ikʼo lokʼel li avajnile xchiʼuk li chaʼvoʼ atsebetake! Li Lot xchiʼuk li yutsʼ yalale mu suj sbaik, jech oxal li anjeletike la snitanbe skʼob vaʼun jech la jyikʼan lokʼel li ta jteklume. Li jun anjele xi la jyale: ¡Anilajanik sventa cha poj akuxlejalik! Mu xa kʼel avalopatik. Anilajanik batel ta teʼtik sventa mu xa chamik.

Li Lot xchiʼuk li stsebetake la xchʼunik mantal, vaʼun lokʼik batel li ta Sodomae. Muʼyuk bu pajik mi jlikeluk mi jaʼuk la skʼelik sutel svalopatik. Pe li yajnil Lote muʼyuk la xchʼun mantal. Kʼalal natnat xaʼox slokʼelik batel ta Sodomae, ivaʼi, la skʼel sutel svalopat. Vaʼun li yajnil Lote kʼataj ta tanal atsʼam. ¿Mi xa vil ti te xvinaj ta lokʼole?

Ta sventa liʼe oy kʼusi lek xuʼ jchantik: Ta jchantik ti Diose ta spoj li buchʼutik ta xchʼunbe smantale, pe li buchʼutik mu xchʼunbe smantale ta xchʼay xkuxlejalik.