Vuleso me ta ajol li yajnil Lote

Li Lote jmoj toʼox nakalik ta Kanaan xchiʼuk li sjuntot ti jaʼ li Abraane. Epaj batel li xchonbolomike, jaʼ yuʼun mu xa x-och skotolik li ta osil bu oyike. Jaʼ yuʼun, li Abraane xi laj yalbe li Lote: «Jaʼ lek jvokʼ jbatik batel, avokoluk, tʼujo bu jotukal chakʼan chabat, mi voʼot chabat ta xokon slokʼeb kʼakʼal ta nortee, voʼon chibat ta xokon smaleb kʼakʼal ta sur». ¿Mi mu jechuk ti toj lek yoʼonton echʼ li Abraane?

Li Lote la sta ta kʼelel ta nom ti oy jsep osil ti toj kʼupil sbae, yuʼun oy lek voʼ xchiʼuk naka yaxal tsʼiʼleletik te. Jaʼ yuʼun, jaʼ te bat nakiuk li Lot xchiʼuk yutsʼ yalale ti te nopol xil li lum Sodomae.

Pe li krixchanoetik ta Sodoma xchiʼuk ta Gomorrae, toj echʼ noʼox chopolik tajek. Jaʼ yuʼun, li Jeovae la snop tslajes li chib lum taje. Pe li Jeovae mu skʼan ti te xchamik li Lot xchiʼuk yutsʼ yalele. Jaʼ yuʼun, la stak batel chaʼvoʼ anjeletik ta stojolal Lot sventa xi xalbeike: «¡Lokʼanik batel, yuʼun li Diose ta slajes li lum liʼe!».

Pe li Lote muʼyuk bu lokʼ batel ta anil, jaʼ yuʼun nitatik lokʼel yuʼun li anjeletike. Xi albatike: «¡Batanik ta anil, yuʼun jech mu xachamik, mu me xakʼel sutel apatik!».

Kʼalal kʼotik li ta lum Soare, li Jeovae laj yakʼ tal kʼokʼ xchiʼuk asufre li ta lum Sodoma xchiʼuk Gomorrae. Li chib lum taje lajem tajek kom. Pe li yajnil Lote muʼyuk bu la xchʼun li kʼusi laj yal Jeovae, yuʼun la skʼel sutel svalopat, jech kʼataj ta tanal atsʼam. Yan li Lot xchiʼuk stsebetake kuxul komik ta skoj ti la xchʼunik mantale. Laj onoʼox yat yoʼonton Lot ti muʼyuk la xchʼun mantal li yajnile xchiʼuk laj yat yoʼonton li stsebetake. Akʼo mi jech, jun yoʼonton laj yaʼi sbaik ti la xchʼunbeik smantal li Jeovae.