Komtsano ta ajol li kʼusi chakʼele
LI Jeovae jaʼ la smeltsan li jchinabtike, jaʼ yuʼun xtojob lek ta skʼejel li kʼusitik ta jchantike. Ta skoj ti oy ta yoʼonton chijkuxiutik sbatel osile, la smeltsan sventa epuk kʼusi xkʼej yuʼun li jchinabtike, akʼo mi ta jtunestik tajek li aʼyejetik te nakʼbile, pe mu xlaj-o skʼoplal (Sal. 139:14; Juan 17:3).
Akʼo mi ep kʼusi te nakʼbil li ta jchinabtike, ep ta velta ti mu xa xvul ta joltik kʼalal jaʼo chtun kuʼuntike. ¿Kʼuxi xuʼ xakomtsan ta ajol li kʼusi chakʼele?
Akʼo ta avoʼonton
Tsots skʼoplal ti xkakʼ ta koʼontontik jkomtsan ta joltike. Mi ta jkʼeltik xchiʼuk mi oy ta koʼontontik li krixchanoetike xchiʼuk li kʼusi yakal chkʼot ta pasele, jaʼ tskoltautik ta snopel. Jaʼ yuʼun kʼalal ta jkʼeltik o chkaptatik jlikuk vun o kʼalal chkaʼitik kʼusi tsots skʼoplale, mas me chkakʼ ta koʼontontik xchikintael.
Ep ta veltae mu kʼunuk chkaʼitik ti chvul ta joltik li sbi yantike. Pe li yajtsʼaklomutik Kristoe tsots skʼoplal chkaʼitik li krixchanoetike, li kermanotaktike, li buchʼutik ta jcholbetik mantale o mi jaʼ li buchʼutik ta jtatik ta chiʼinel ta loʼil jujun kʼakʼale. ¿Kʼusi skʼan jpastik sventa mu xchʼay ta joltik li sbiike? Li jtakbol Pabloe laj yalbe skʼoplal 26 ermanoetik ta jun tsobobbail kʼalal la stakbe batel kartae. Jamal xvinaj ti oy ta yoʼontone, yuʼun maʼuk noʼox snaʼ li kʼusi sbiike, yuʼun oy to kʼusitik laj yal xtok ta sventa li xkuxlejalike (Rom. 16:3-16). Junantik jkʼelvanejetik ta sirkuito ta jkʼakʼaliltike chkom ta sjolik li sbi yantike, manchuk mi yantik-o tsobobbail tsvulaʼanik jujun xemana. ¿Kʼusi chutik? Nopem xaʼiik ti ep ta velta chalbeik sbi li ta sba velta chojtikinike xchiʼuk chakʼik persa tskomtsan ta sjolik kʼu yelan sat sventa xvul ta sjolik li sbie. Jech xtok, chchiʼinik kʼuk sjalil ta cholmantal o ta veʼel li ermanoetike. Kʼalal oy buchʼu chavojtikine, ¿mi xvul van ta ajol kʼusi sbi? Nopo kʼu yuʼun ti tsots skʼoplal ti skʼan mu xchʼay ta ajole, mi laje, akʼo persa spasel li kʼusi laj yichʼ alele.
Toj tsots skʼoplal xtok ti xavules ta ajol li kʼusi chakʼele. ¿Kʼusi tskoltaot sventa spas avuʼun taje? Jaʼ tskoltaot mi chavakʼ ta avoʼonton xchiʼuk mi chavaʼibe smelolal li kʼusi chakʼele. Sventa x-ayan ta avoʼontone toj jtunel ti tsotsuk skʼoplal xavaʼi li kʼusi yakal chakʼele, yuʼun mi yan-o bu oy li anopbene muʼyuk me chkom ta ajol. Mas me chavaʼibe smelolal mi chakoʼoltas xchiʼuk li kʼusi oy xa onoʼox jech akʼeloje o ti xanaʼ xa onoʼox li kʼusi yakal chale. Xi xajakʼbe abae: «¿Kʼuxi xchiʼuk bakʼin xuʼ xkakʼ ta jkuxlejal li kʼusi chale? ¿Kʼuxi xuʼ jtunes sventa jkolta li yantike?». Jech xtok mas me chavaʼibe smelolal mi jaʼ chakʼel li jujuchol tsʼibe ti mu jaʼuk chakʼel li jujupʼel kʼope, chavaʼibe lek smelolal li kʼusi mas tsotsik skʼoplale xchiʼuk mas me chvul ta ajol.
Vuleso ta ajol
Li buchʼutik xchanojbeik lek skʼoplal li chanubtasele chalik ti toj ep sbalil mi ta jvules ta joltike. Kʼalal la xchanbe skʼoplal jun jchanubtasvanej ta universidade, laj yal ti chib to velta chkom ta joltik mi ta jvules ta joltik uni junuk minuto li kʼusi jchanojtike. Jaʼ yuʼun mi la akʼel li vune o mi la achan jvokʼuk mantale, vuleso ta ajol li kʼusi tsotsik skʼoplale xchiʼuk komtsano ta ajol. Nopo kʼuxi chachapbe smelolal ta akʼop atuk li kʼusi la achane. Mi chanopbe skʼoplal li kʼusi la achane, mas me jal chkom ta ajol.
Mi echʼ jayibuk kʼakʼale, xuʼ xavalbe kʼusitik achanoj li buchʼutik ta atsobobbaile, li avutsʼ avalale, li achiʼil ta chanune, li achiʼil ta abtele, li alakʼ nae o li buchʼu chacholbe mantale. Maʼuk noʼox xachaʼal li kʼusi kʼot ta pasele, chaʼalo xtok li srasonal chal Vivlia ti jech kʼot ta pasele. Mi jech chapase, chkom ta ajol li kʼusi mas tsots skʼoplale xchiʼuk tstabeik sbalil li yantik eke.
Nopbo skʼoplal li kʼusi tsots skʼoplale
Maʼuk noʼox skʼan xavules ta ajol li kʼusi la akʼele o ti chaloʼiltabe yantike, lek xtok mi chanopbe skʼoplal li kʼusi tsotsik skʼoplal la achan jech kʼuchaʼal la spasik li Asaf xchiʼuk Davide. Xi laj yal li Asafe: «Ta to jnaʼ cʼu xʼelan yabtel li Bochʼo te oy ta vinajele; ta to jnaʼilan ti ep sqʼuelubiltac la spas ta voʼonee. Ta to xvul ta coʼnton, ta to jnopilan li cʼusitic toj tsotsic, toj mucʼtic la spase» (Sal. 77:11, 12). Xi la stsʼiba li David eke: «Sbejel acʼubal ta jnopilan cʼu xʼelan avoʼnton». «Ta to jnaʼ ti cʼu xiʼelan ta voʼonee; ta jnopilan scotol cʼu xʼelan li avabtel apasoje.» (Sal. 63:6; 143:5.) ¿Mi jaʼ jech chapas ek?
Nopbo lek skʼoplal li kʼusitik spasoj Jeovae, li stalelaltake xchiʼuk li kʼusitik tskʼan yoʼontone, mi jech chapase, maʼuk noʼox chkom ta ajol li kʼusi tsotsik skʼoplale, yuʼun chkʼot ta avoʼonton xtok xchiʼuk tsjelbot akuxlejal. Li kʼusitik chvul ta ajole te me chkom-o ta anopben (Sal. 119:16).
Chkoltavan li xchʼul espiritu Diose
Oy kʼusi tskoltautik kʼalal ta jkʼan ta jvules ta joltik li kʼusitik spasoj Jeova xchiʼuk li kʼusitik laj yal Jesukristoe. Kʼalal jun xaʼox akʼobal skʼan xcham li Jesuse, xi laj yalbe li yajtsʼaklomtake: «Jech ta xkalboxuk li kʼusitike, yoʼ to liʼ jchiʼinojoxuke. Pe li jkoltavanej ti jaʼ li chʼul espiritue, ti jaʼ tstak tal ta jbi li Totile, jaʼ chchanubtasoxuk skotol xchiʼuk jaʼ tsvules ta ajolik skotol li kʼusi kalojboxuke» (Juan 14:25, 26). Taje jaʼo te oyik ek li Mateo xchiʼuk Juane. ¿Mi koltaatik yuʼun li chʼul espiritue? Ta melel koltaatik. Te van vaxakibuk jabil ta mas tsʼakale, li Mateoe tsuts yuʼun stsʼibabel skʼoplal xkuxlejal Jesus li ta baʼyel Evanjelioe, li ta livro taje la stsʼiba li kʼusi xvul ta sjol ta sventa li Mantaletik ta Vitse o li senyailtak laj yal Kristo ta sventa ti liʼ xa oye xchiʼuk li kʼusi chkʼot ta pasel kʼalal poʼot xa xlaj skotol li kʼusitik oy ta balumile. Li jtakbol Juane la stsʼiba S-evanjelio kʼalal 65 jabil xaʼox slajel li Kajvaltike, lek xcholet la stsʼiba li kʼusi laj yalbe yajtakboltak kʼalal jun xa akʼobal skʼan xchame. Akʼo mi xvul lek ta sjolik li Mateo xchiʼuk Juan li kʼusi laj yal xchiʼuk li kʼusitik la spas li Jesuse, jaʼ koltaatik yuʼun chʼul espiritu sventa mu xchʼay ta sjolik li kʼusitik tskʼan Jeova ti tsʼibabiluk xkom li ta Vivliae.
¿Mi tskoltautik li chʼul espiritu eke? Ta melel tskoltautik. Pe muʼyuk chakʼ ta joltik li kʼusitik muʼyuk bu jchanojtike, jaʼ noʼox tsvules ta joltik li kʼusi tsots skʼoplal jchanojtike (Luk. 11:13; 1 Juan 5:14). Kʼalal chtun kuʼuntike, tskoltautik sventa xijtojob snopel yoʼ «[xvul ta joltik] li kʼusi yalojik xa onoʼox li chʼul j-alkʼopetike xchiʼuk li smantal Kajvaltik ti jaʼ Jkoltavanej» kuʼuntike (2 Ped. 3:1, 2).
«Mu me xchʼay ta avoʼntonic»
Li Jeovae ep ta velta laj yalbe j-israeletik ti akʼo mu ‹xchʼay ta yoʼontonike›, pe taje maʼuk skʼan xal ti persa skʼan svules ta sjolik skotole, moʼoj, li kʼusi tskʼan chale jaʼ ti maʼukuk xbat ta yoʼontonik li kʼusi tskʼan stukike ti jaʼ chchʼay ta sjolik li kʼusi spasoj Jeovae. Skʼan teuk ta sjolik ti kʼalal koltaatik yuʼun Jeova kʼalal milbat sba xnichʼonik yuʼun anjel li j-ejiptoetike, kʼalal la xchʼak Tsajal Nab sventa xjelavik li j-israeletike xchiʼuk kʼalal la xchaʼmak sventa tsmuk ta voʼ li Faraon xchiʼuk yajsoltarotake. Skʼan teuk ta sjolik ti akʼbatik yuʼun Dios li Mantal ta Vits Sinaie, ti beiltasatik li ta takixokol balumile xchiʼuk ti ikʼatik batel ta Albil Balumile. Mu stakʼ xchʼay ta sjolik, yuʼun jujun kʼakʼal skʼan teuk-o ta snopbenik li kʼusitik kʼot ta pasele (Deut. 4:9, 10; 8:10-18; Éx. 12:24-27; Sal. 136:15).
Skʼan me mu xchʼay ta joltik ek. Kʼalal oy kʼusi ta jnuptantik ta jkuxlejaltike, skʼan me jvules ta joltik li Jeovae xchiʼuk ti toj lek yoʼontone, jech xtok skʼan jvules ta joltik ti laj yakʼ ta ilel ti skʼanojutik kʼalal la stak talel li Xnichʼone, ti jaʼ la spojutik lokʼel li ta mulil xchiʼuk ti chakʼbutik kuxlejal sbatel osil ti lek xa tukʼe (Sal. 103:2, 8; 106:7, 13; Juan 3:16; Rom. 6:23). Mi ta jkʼeltik li Vivliae, mi lek baxbolutik ta tsobajeletik xchiʼuk ta cholmantale, jaʼ me tskoltautik sventa te oyuk ta koʼontontik li kʼusitik taje.
Kʼalal oy kʼusi chanop chapas ta akuxlejale, akʼo mi tsots o mi jutuk noʼox tsots skʼoplal, vuleso me ta ajol li kʼusitik chal Vivlia ta sventa taje xchiʼuk akʼo sjel li anopbene. Mu me xchʼay xavaʼi. Kʼanbo Jeova ti akʼo sbeiltasote. Maʼuk me xapas li kʼusi tskʼan avoʼontone o ti xapat noʼox avoʼonton ta atuke, jaʼ lek jakʼbo aba kʼusi tojobtasel o beiltasel ta Vivlia ti xuʼ xavakʼ ta akuxlejal kʼalal oy kʼusi chanop chapase (Prov. 3:5-7; 28:26). Pe mu onoʼox me kʼusi xvul ta ajol mi muʼyuk akʼeloj o mi muʼyuk avaʼioje. Mi laj avojtikin xchiʼuk mi la akʼan mas li Jeovae, ta me xavakʼ ta akuxlejal li kʼusi chachane xchiʼuk xuʼ tskoltaot chʼul espiritu sventa xvul ta ajol. Jaʼ jech ta melel, mi mas chavojtikin xchiʼuk mi mas chakʼan li Jpasvanej avuʼune, mas me chapʼijub.