Jelilanbo snukʼilal

KʼALAL chajelilanbe lek snukʼilal ti bu sta-oe, chaʼibeik lek smelolal li krixchanoetike. Pe mi chajelilan ti kʼu stsatsal chakʼopoje, mi anil o mi kʼunkʼun xchiʼuk ti kʼu yelan li yechʼomal avee, mas to me kʼupil sba chaʼiik. Jech xtok, jaʼ jech chavakʼ ta ilel ti oy ta avoʼonton li kʼusi yakal chavale. Teuk me ta ajol ti jaʼ jech chaʼi yantik ti kʼu yelan oy ta avoʼonton li mantal eke, akʼo mi jaʼ li buchʼutik te ta tsobobbaile o mi jaʼ li buchʼu chacholbe mantale.

Ti xuʼ xijkʼopoje jaʼ jun abtejebal ti toj kʼupil sbae, yuʼun ep kʼusitik x-al kuʼuntik. Mi xijtojob lek ta stunesele, kʼupil sba ta aʼiel li mantal chketʼestike, chkʼot ta yoʼontonik xchiʼuk tspasik li kʼusi chkaltike. Pe mu me persauk xkakʼbetik senyail ta jvoskejotik ti kʼu stsatsal skʼan xijkʼopoje, mi anil o mi kʼunkʼun xchiʼuk ti kʼu yelan li yechʼomal ketike. Mi jech ta jpastike, mu xa toj lekuk ti kʼu yelan chijkʼopoje, yuʼun mu xa xkʼot lek ta yoʼontonik li mantal chketʼestike xchiʼuk muʼyuk xa lek chaʼi sbaik. Yan mi lek ta jelilanbetik snukʼilal kʼalal lek sta-o chkiltike, chkakʼtik ta ilel ti chlokʼ ta koʼontontik li kʼusi chkaltike.

Mi xatojob lek ta sjelilanbel snukʼilale, muʼyuk chavakʼ ta ilel ti voʼot noʼox tsots akʼoplal chavaʼi abae, jaʼ chakolta-o yantik sventa xkʼot ta yoʼontonik li mantale.

Jelo ti kʼu stsatsal chakʼopoje. Sventa jeltik jutuk ti kʼu yelan chijkʼopoje, skʼan van jeltik ti kʼu stsatsal chijkʼopoje. Pe taje maʼuk me skʼan xal ti jujulikel xa tajek toj tsots o toj kʼun chakʼopoje, yuʼun xuʼ mu xa xaʼibeik smelolal li kʼusi chavale. Muʼyuk xa me lek chaʼiik xtok mi nopajtik noʼox chatoy li yechʼomal avee.

Sventa xanaʼ kʼu tsatsal skʼan xakʼopoje, skʼan xatsak ta venta li kʼusi yakal chavetʼese. Mi yakal chakʼel li mantaletik chal ta Apokalipsis 14:6 xchiʼuk 7 xchiʼuk li ta Apokalipsis 18:4, o mi jaʼ li kʼusi chal ta Éxodo 14:13 xchiʼuk 14, mas lek ti xatoy li yechʼomal avee. Mi yakal chakʼel junuk tojobtasel ti tsots skʼoplal jech kʼuchaʼal chal ta Jeremías 25:27 kʼalal ta 38, tsots skʼoplal xajelilan ti kʼu stsatsal chakʼopoje sventa chavakʼ ta aʼiel li jujupʼel kʼop ti mas tsotsik skʼoplale.

Tsako ta venta xtok li kʼusi oy ta avoʼonton akʼo xchanike. ¿Mi oy ta avoʼonton ti akʼo spasik li kʼusi chavale? ¿Mi chakʼan chavakʼ ta aʼiel li kʼusitik tsotsik skʼoplale? Mi oy noʼox smelolal ti kʼu stsatsal chakʼopoje, jaʼ tskoltaot spasel li kʼusitik taje. Pe mi muʼyuk chavakʼ ta ilel li kʼusitik oy ta avoʼonton ti jaʼ noʼox chatoy li yechʼomal ave kʼalal mu sta-oe, mu lekuk kʼusi chkʼot ta pasel. Ta jchanbetik mas skʼoplal li ta xchanobil 11.

Mas xa me oy ta yoʼontonik xchikintael li kʼusi to chkaltik batel kʼalal mas kʼun chijkʼopoj ti bu sta-oe. Jutuk mu skotoluk velta mas xa tsots skʼan alel li kʼusi to chkaltik batele. Manchuk mi muʼyuk tsots chakʼopoj, pe mi jtos-o xa li yechʼomal avee, xuʼ van xlik xiʼikuk-o yuʼun li kʼusi chavale. Jech xtok, xuʼ chakʼ ta aʼiel ti mu masuk tsots skʼoplal kʼalal kʼun noʼox chijkʼopoj ti bu sta-oe. Pe mi jech-o kʼun chijkʼopoje, xuʼ tsnopik ti mu jnaʼtik lek li kʼusi chkaltike, ti muʼyuk lek jchʼunojtike o ti muʼyuk ta koʼontontike. Jaʼ yuʼun chaʼa, oyuk noʼox me smelolal ti kʼu yelan kʼun chijkʼopoje.

Anil o kʼunkʼun xakʼopoj ti bu sta-oe. Kʼalal chijloʼilaj jujun kʼakʼale, ta ora noʼox chlokʼ tal ta koʼontontik li kʼusi chkaltike. Kʼalal xijmuyubaje, mas anil chijkʼopoj. Pe kʼalal oy ta koʼontontik ti xkom ta sjolik li kʼusi chkaltike, mas kʼunkʼun chijkʼopoj.

Oy jlom buchʼutik achʼ to lik sjelubtasik mantale muʼyuk bu tsjelilanik ti anil o kʼunkʼun skʼan xkʼopojike. Ti jech tspasike jaʼ ta skoj ti jaʼ noʼox tsnopik kʼuxi chalik jujupʼel kʼope, bakʼintike tstsʼibaik ta vun ta jujupʼel kʼop li kʼusi chalike. Akʼo mi muʼyuk tskʼelik o chaptaik ta jujupʼel kʼop li sparteike, pe ta skoj ti skomtsanoj ta sjolik jutuk mu skotoluke, muʼyuk bu tsjelilanik li kʼu stsatsal chkʼopojike. Sventa mu jechuk spasik taje, skʼan xchanik stunesel junuk voskejo.

Mu me toj aniluk xlik kʼopojan, yuʼun mi jech chapase, xkoʼolaj kʼuchaʼal jkotuk bolom ti jun toʼox yoʼonton te kotole, pe ti xpʼitluj xa lokʼel mi laj yil jkotuk tsʼiʼe. Jech ek, mi solel anil chakʼopoje, xuʼ van muʼyuk xa xpʼejlajet li kʼusi chavale.

Sventa lek chajelilan mi anil o mi kʼunkʼun chakʼopoje, maʼuk noʼox ti jujulikel jech skʼan xapase. Yuʼun xuʼ xchʼaybe sbalil li mantal chavetʼese. Kʼalal ta jelulantik ti kʼu stsatsal chijkʼopoje, skʼan me jtsaktik ta venta mi sta-o li kʼusi yakal chkaltike, ti kʼu yelan ta jkʼantik akʼo yaʼi sbaike xchiʼuk li kʼusi oy ta koʼontontik akʼo xchanike. Kʼelo mi kʼunkʼun o mi anil skʼan xakʼopoj kʼalal chavetʼes mantale. Mas anil skʼan xakʼopoj mi xamuyubaje, jech kʼuchaʼal nopem xavaʼi chaloʼilaj jujun kʼakʼale. Jech xtok, mas anil skʼan xakʼopoj mi oy kʼusitik chaval ti mu masuk tsots skʼoplale. Mi jech chapase, mas kʼupil sba ta aʼiel li kʼusi chavale xchiʼuk lek ta aʼiel. Jech xtok, mu me toj aniluk xakʼopoj kʼalal oy kʼusi jamal chavalbe skʼoplale, kʼalal tsotsik skʼoplal li kʼusi chavale xchiʼuk kʼalal tstsuts li aloʼile.

Jelo li yechʼomal avee. Nopo noʼox avaʼi ti oy buchʼu tstij vob junuk ora ti muʼyuk tsjelbe jsetʼuk li yechʼomale. Baʼyele tsots tstij, laje chkʼunij batel; mi laj xtok une, anil tstij batel, mi laj une, kʼunkʼun xa tstij... Manchuk mi chjelilaj ti kʼu stsatsale xchiʼuk mi kʼunkʼun o mi anil tstije, mu toj lekuk ta aʼiel li musika mi jtos noʼox li yechʼomale. Jaʼ jech kʼalal chijkʼopoj eke, mu toj lekuk ta aʼiel mi muʼyuk ta jelilantik li yechʼomal ketike.

Ti kʼu yelan ta jelulantik li yechʼomal ketike, mu koʼoluk tstunesik li ta yantik kʼope. Jech kʼuchaʼal li ta chino kʼope chjel smelolal jujupʼel kʼop mi yan-o yechʼomal chakʼbeike. Pe li ta yantik kʼope ti muʼyuk chjel smelolal yuʼunike, tsjel onoʼox yechʼomal yeik sventa chakʼik ta aʼiel ti tsots skʼoplal li kʼusi chalike, tsjel yechʼomal yeik kʼalal chakʼik ta aʼiel ti oy kʼusi mukʼ o bikʼite, ti kʼu snamale o ti oy kʼusi tsjakʼike.

Skʼan mas jtoy yechʼomal ketik kʼalal xijmuyubaj noʼoxe. Pe kʼalal chkat noʼox koʼontontik o ta jvul koʼontontike, kʼun skʼan li yechʼomal ketike. Mi chakʼ ta ilel kʼu yelan chaʼi sba li buchʼu tsjelubtas mantale, mas chkʼot ta yoʼontonik li buchʼutik te chaʼiike. Mi jech oy ta avoʼonton spasel taje, maʼuk noʼox me xaval li jujupʼel kʼope. Akʼo vinajuk ta yechʼomal ave ti chlokʼ ta avoʼonton li kʼusi chavale.

Aʼibo baʼyel lek smelolal. ¿Kʼusi skʼan xapas sventa xajelbe lek snukʼilal? Akʼo venta kʼusitik ti mas tsotsik skʼoplal yichʼoj li mantal chavetʼese xchiʼuk li yan kʼusitik chavale. Mi jaʼ noʼox chatʼuj li jujupʼel kʼop chatunes sventa chatij oʼontonale, mas me vokol chavaʼi sventa chajel li yechʼomal avee. Jaʼ yuʼun chano lek li avoskejoe yoʼ xavakʼ venta mi yichʼoj li kʼusitik chtun avuʼun kʼalal chavetʼes aparte sventa stabeik sbalil li yantike.

Kaltik noʼox ti chavakʼ venta ti oy kʼusi skʼan xajel ta skoj ti yakal xa chchʼajubik kʼalal yakal chajelubtas mantale. ¿Kʼusi xuʼ xapas? Sabo yan smelolal kʼu yelan xuʼ xaval. Jaʼ lek alo ti akʼo sjam li Svivliaike sventa koʼol xakʼelik junuk versikulo. Jech xtok mi anopoj xaʼox ti naka noʼox chavale, jaʼ lek jakʼo, mi laj une, malao jlikeluk sventa xavakʼ ta aʼiel li kʼusi tsots skʼoplale. Li kʼusi xuʼ xapas xtoke jaʼ ti xaval jlikeluk lokʼolkʼope. Li buchʼutik xchanojik xa lek yetʼesel mantale jaʼ jech spasojik ek, jaʼ yuʼun xuʼ me jech xapas kʼalal chachapan aba eke, mu ventauk mi voʼne xa o mi achʼ to ti chajelubtas mantale.

Jaʼ yatsʼamil mantal chkʼot kʼalal ta jelilanbetik snukʼilale. Mi lek ta jelilanbetik snukʼilal ti bu sta-oe, mas to kʼupil sba ta aʼiel li mantale xchiʼuk mas tstabeik sbalil li buchʼutik te chaʼiike.