Kʼelbo sat li buchʼu chakʼopone

CHVINAJ ta jsatik li kʼu kelantike xchiʼuk li kʼusi oy ta koʼontontike. Xuʼ van xvinaj ta jsatik ti oy kʼusi labal sba chkaʼitike o ti oy kʼusi chijxiʼ yuʼune. Chvinaj mi oy buchʼu chkʼuxubaj ta koʼontontik o mi jkʼanojtik, bateltik xtoke chakʼ ta ilel mi xijnaʼet o mi oy kʼusi kʼux chkaʼitik. Xi laj yal jun vinik ti oy xa sjabilal ta sventa li krixchanoetik ti jmoj slumal xchiʼuke xchiʼuk ti snuptanoj tajek svokole: «Ta sbekʼ jsatkutik noʼox chiloʼilajkutik».

Ta skoj ti bu ta jkʼeltik batel kʼalal chijkʼopoje, xuʼ snaʼik yantik ti kʼu kelantike xchiʼuk ti kʼusi ta jkʼan chkaltike. Ta jlom lumetike mas chchʼunbeik kʼusi chal li buchʼu ta slekil yoʼontonik chkʼelvanike. Pe mi jaʼ noʼox skʼeloj yalel lum o yan kʼusi skʼeloje ti maʼuk skʼeloj li buchʼu tskʼopone, mu xchʼunik mi melel kʼusi chal o tsnopik ti mu xtojob ta yalele. Ta yan lumetik xtoke jaʼ skʼelobil ti muʼyuk xkʼexlal, ti ch-ilin o ti tsaʼvan yaʼi ta kʼop li buchʼu te kʼelvanem-o kʼalal chloʼilaje, mas to mi maʼuk xchiʼil ta vinikal o antsile o mi yajval ta abtel o mi mas tsots yabtel li buchʼu tskʼopone. Oy jlom xtoke, kʼalal jun kerem o tseb skʼelojbe lek sat tskʼopon li buchʼu oy xa sjabilale, jaʼ senyail chilik ti mu x-ichʼvan ta mukʼe.

Pe li ta lumetik ti bu mu chopoluk chilik ti jech chichʼ pasele, kʼalal tskʼelbeik sat li buchʼu tskʼoponike, xvinaj ti tsots skʼoplal li kʼusi chalike xchiʼuk ti xchʼunojik ta melele. Kʼelo avil kʼusi la stakʼ Jesus kʼalal oy kʼusi jakʼbat yuʼun li yajchankʼoptak ta skoj ti oy kʼusi labal sba laj yaʼiike, xi laj yalike: «¿Buchʼu xa noʼox xuʼ xkol ta melel?». Xi chal li Vivliae: «Kʼelbat lek satik yuʼun li Jesuse, vaʼun xi albatike: ‹Li krixchanoetike mu xuʼ yuʼunik spasel taje, pe li Diose xuʼ yuʼun spasel skotol›» (Mat. 19:25, 26). Li ta Vivlia xtoke chakʼ ta ilel ti tskʼel kʼu yelan chaʼi sbaik yantik li jtakbol Pabloe. Jun veltae te chchikintabat yuʼun jun vinik ti koxo onoʼox vokʼeme. Xi chal li Echos 14:9 xchiʼuk 10: «Li vinik taje yakal chaʼi li kʼusi chal Pabloe. Vaʼun kʼalal te skʼelojbe lek sat vinik li Pabloe xchiʼuk ti laj yil ti oy xchʼunel yoʼonton sventa xpoxtaje, xi tsots laj yale: ‹Likan, vaʼlan›».

Kʼusi skʼan xapas kʼalal chachol mantale. Ta slekiluk avoʼonton xakʼopon li krixchanoetik kʼalal chachol mantale. Mi sta-o chavile, oyuk kʼusi xajakʼbe sventa xlik avalbe skʼoplal ti kʼusi lek chavaʼi achaʼvoʼalike. Jech xtok, lik noʼox kʼelbo sat li buchʼu chakʼopone, pe ichʼvanan ta mukʼ xchiʼuk ta slekiluk avoʼonton xapas. Mas me chkʼot ta yoʼontonik mi stseʼet noʼox asat xchiʼuk mi xamuyubaj noʼoxe. Kʼalal chilik ti jech asate, chakʼik venta kʼu avelan xchiʼuk mas jun yoʼonton chchikintaik li kʼusi chavalbee.

Ti bu sta-o chavile, kʼelbo sat li krixchanoe, yuʼun xuʼ te chavakʼ venta kʼu yelan skʼan xakʼopon. Xuʼ te xavakʼ venta mi ch-ilin, mi oy ta yoʼonton li mantale o mi mu xaʼibe smelolal. Te chavakʼ venta xtok mi chchʼajub o mi oy tajek ta yoʼonton chchikinta li kʼusi chavale. Ta sat noʼox chavakʼ venta xtok mi skʼan mas kʼunkʼun xakʼopoj o mas anil, mi tskʼan van chloʼilaj ek, mi skʼan xa noʼox xatsutses li aloʼile o ti xavakʼ ta ilel kʼu yelan ta chanel li Vivliae.

Akʼo persa ti xa-ichʼvan ta mukʼ kʼalal chakʼelbe sat li buchʼu chakʼopone, manchuk mi chachol mantal o mi chavakʼ estudio. Pe mu me jaluk tajek xakʼel, yuʼun xuʼ xkʼexav avuʼun mi jech chapase (2 Rey. 8:11). Jaʼ lek jechuk xakʼel kʼuchaʼal onoʼox nopem xavaʼi ta xakʼelvane xchiʼuk ta slekiluk avoʼonton xapas, ta junantik lume jaʼ senyail ti oy ta yoʼontonik ta melel li buchʼu tskʼoponike. Mi yakal chakʼel Vivlia o chavapta yan vune, skʼan onoʼox jaʼ akʼeloj, pe skʼan onoʼox xakʼelbe sat jlikeluk li buchʼu chakʼopon mi chakʼan chavakʼ ta aʼiel ti oy kʼusi tsots skʼoplale. Mi chatoy asat bakʼintike, te chavil xtok kʼu yelan chaʼi sbaik yuʼun li kʼusi yakal chakʼele.

Mu xachibaj mi tsots chavaʼi ta slikebal ti chakʼelbe sat li buchʼu chakʼopone. Mi chachanilan ti chakʼelvan kʼuchaʼal onoʼox nopem xavaʼie, tskoltaot sventa mas xatojob ti kʼu yelan chaloʼilaje.

Kʼusi skʼan xapas kʼalal chavetʼes mantale. Li Vivliae chal ti kʼalal chlik xaʼox yal Mantaletik ta Vits li Jesuse «la stoy muyel sat ta stojolal li yajchankʼoptake» (Luk. 6:20). Jech xapas ek. Kʼalal skʼan toʼox xlik ajelubtas mantale, kʼelo jlikeluk li buchʼutik te chaʼiike. Ta jlom lumetike mu chopoluk mi tskʼelbeik sat jayvoʼuk li buchʼutik te oyike. Li uni jlikel taje jaʼ tskoltaot sventa xchʼay batel avuʼun li xiʼele. Jech xtok tskolta li buchʼutik chchikintaik yoʼ xakʼik venta ta asat ti kʼu yelan chavaʼi abae. Yan sbalil xtoke jaʼ ti ch-akʼbat snaʼik ti skʼan xchotiik lek xchiʼuk ti xchapan sbaik sventa stsʼet chikintaik lek li kʼusi chavale.

Kʼelo li buchʼutik te oyik ti kʼu sjalil chajelubtas mantale. Mu jmojuk xakʼel skotolik, jaʼ lek ta jujuntal xakʼel. Jutuk mu skotoluk lumetik jaʼ lek chilik ti chkʼelvan jutukuk li buchʼu tsjelubtas mantale.

Ti ta jkʼeltik li buchʼutik te oyike maʼuk me skʼoplal ti jecheʼ noʼox xjoyet ta jujujot ta jpas li joltike. Kʼelo junuk li buchʼu te chaʼi mantale, albo sjunul orasion mi sta-o chavile xchiʼuk ichʼvanan ta mukʼ kʼalal jech chapase. Mi laje, yan xa-o buchʼu xakʼel xchiʼuk albo junchibuk orasion xtok. Mu me toj jaluk ti jun noʼox buchʼu chakʼele, yuʼun xuʼ xkʼexav avuʼun xchiʼuk mu jayvoʼuk noʼox ti chavakʼ ta avoʼonton skʼelel xtoke. Jech xajelilan batel ti buchʼu chakʼele, pe kʼalal chakʼel junuke, chiʼino ta loʼil ta melel xchiʼuk akʼo venta kʼu yelan chaʼi sba, laje jaʼ to xlik akʼel yan.

Teuk me kajal avuʼun ta atril li avuntake, ti atsakojuke o ti teuk avakʼoj ta Avivliae, taje jaʼ sventa mu persauk xatoy ajol kʼalal chakʼel li buchʼutik te chaʼiik mantale. Mi persa chanijan aba sventa chakʼel li avune, jaʼ xa me muʼyuk chakʼel li buchʼutik te chaʼiik mantale. Akʼo venta bakʼin xchiʼuk kʼu sjalikil chakʼel li avune. Mi jaʼo chakʼel avun kʼalal chaval li kʼusi tsots skʼoplale, muʼyuk chavil ti kʼu yelan chaʼi sbaik li buchʼutik te oyike xchiʼuk chchʼaybe yip li mantal chavetʼese. Jech xtok, mi nopajtik chakʼel li avune, jaʼ muʼyuk xa mas chakʼel li buchʼutik te oyike.

Kʼalal oy buchʼu chajipbe batel jpʼejuk pelotae, chakʼel mi stsak yuʼun. Ti kʼu sjalil chavetʼes mantale xkoʼolaj kʼuchaʼal chajip batel pelota kʼalal oy kʼusitik chavalbe skʼoplale. Mi chakʼik ta ilel ti lek chaʼiike, mi stseʼet satike o mi skʼelojoxuk leke, jaʼ skʼelobil ti laj yaʼibeik smelolale, xkoʼolaj ti tsak yuʼunik li pelotae. Kʼalal akʼeloj lek li buchʼutik te oyike, te chavakʼ venta mi xaʼibeik lek smelolal li kʼusi chavalbe batel skʼoplale.

¿Mi persa chakʼel li buchʼutik te oyik mi yakal chakʼel vune? Muʼyuk van chakʼik venta mi chatoy asat o mi muʼyuk li buchʼutik te chaʼiik mi tskʼelik batel li teksto yakal chakʼel eke; pe jaʼ tskoltaot sventa kʼupiluk sba ta aʼiel mi chakʼel bakʼintike, yuʼun te chavakʼ venta kʼu yelan chaʼi sbaik ta sventa li kʼusi chakʼele. Mi oy xa jlom chʼayem yoʼontonik xchiʼuk muʼyuk xa tskʼel batel li Svivliaike, xuʼ jaʼ xtijbat yoʼontonik sventa xlik skʼelik yan velta mi chakʼelbe satike. Melel onoʼox ti jlikel tajek skʼan xakʼelbe batel satik sventa mu xamak ta skʼelel li Vivliae. Jech oxal mas lek ti toyol xatsak li Vivliae sventa mu persauk xaniji.

Bakʼintik li moletik ta tsobobbaile ch-albatik ti akʼo sjelubtasik mantal ta asamblea rejional ti jaʼ tstunesik li voskejo ti kʼelbil noʼox ch-echʼe. Sventa lek xetʼesike, skʼan ti lek xa onoʼox snaʼike, ti xchapan sbaike xchiʼuk ti xchanilanik jayibuk veltae. Melel onoʼox ti mu masuk stakʼ skʼel buchʼutik te oyik li buchʼu tsjelubtas mantal mi kʼelbil chetʼese, pe mi chchapan sba leke, muʼyuk chchʼay ta skʼelel kʼalal tstoy sat bakʼintike. Chchikintabat lek kʼalal jech tspase, vaʼun jech lek tstabeik sbalil li mantal ch-echʼe.