Tijbo yoʼontonik sventa stunesik Vivlia

TA JKʼANTIK ti oyuk ta yoʼontonik Vivlia skotol li krixchanoetike. Lokʼem ta Vivlia skotol li aʼyejetik ta jcholtike, jaʼ yuʼun oy ta koʼontontik ti akʼo snaʼik ti maʼuk kuʼun jtuktik li kʼusi chkakʼtik ta chanele, yuʼun te likem tal ta stojolal Dios. Skʼan spat yoʼontonik li ta Vivliae.

Li kʼusi skʼan jpastik ta cholmantale. Kʼalal chachapan aba sventa chabat ta cholmantale, tʼujo junchibuk teksto sventa xakʼelbe li buchʼu oy ta yoʼonton chchikintae. Akʼo mi jutuk noʼox kʼusi anopoj chaval ta cholmantal ti chatunes jlikuk vune, lek onoʼox mi chatunes junuk tekstoe. Li krixchanoetik ti bikʼit chakʼ sbaik kʼuchaʼal jkot chije mas me chkʼot ta yoʼontonik li Skʼop Diose, jaʼ mu sta li kʼusi noʼox chkalbe jtuktike. Mi mu stakʼ xakʼelbe o xavaptabe junuk tekstoe, xuʼ jaʼ noʼox xavalbe skʼoplal. Li krixchanoetik ta baʼyel sigloe chʼabal yuʼunik li balbalvunetike. Pe li Jesus xchiʼuk yajtakboltake ep ta velta laj yalbeik skʼoplal. Jaʼ yuʼun oyuk ta avoʼonton skomtsanel ta ajol jayibuk teksto ta Vivlia, vaʼun lek xatunes li ta cholmantale, akʼo mi jaʼ noʼox chavalbe skʼoplal.

Kʼalal chakʼel junuk tekstoe, akʼo venta ti sta ta kʼelel ek li yajval nae. Mi tskʼel ta Svivlia stuke, xuʼ van mas lek chaʼi li mantale.

Teuk me ta ajol ti junantik jelubtasej kʼopetike muʼyuk bu lek jamal sjelubtasojik li Vivlia kʼuchaʼal li orijinale. Epal Vivliaetik avie stupʼojbeik li sbi Diose, muʼyuk bu lek jamal ta aʼibel smelolal li tekstoetik ti bu chalbe skʼoplal ti kʼu yelan oy li animaetike xchiʼuk mu stakʼ aʼibel smelolal yuʼunik ta Vivlia li kʼusi tskʼan tspas Dios liʼ ta Balumile. Sventa chavakʼbe yil yajval na ti jelbil junantik tekstoe, xuʼ xatunes yantik Vivlia sventa xakoʼoltasik o xuʼ xatunes yantik Vivlia ti mas xa voʼne lokʼemike. Li ta livro Razonamiento a partir de las Escrituras tstunes ep ta tos Vivlia sventa tskoʼoltas junantik teksto kʼalal oy kʼusi chalbe skʼoplale. Skotol li buchʼu skʼanoj li kʼusi melele tstoj ta vokol mi laj yojtikin li kʼusitik taje.

Li kʼusi skʼan jpastik ta tsobobbaile. Skʼan xichʼ tijbel yoʼonton skotolik ti akʼo stunes Svivliaik li buchʼutik te oyik ta tsobobbaile. Junantik srasonal ti kʼu yuʼun skʼan tunesel li Vivliae: mas oy ta yoʼontonik chchikintaik mantal li buchʼutik teik ta tsobajele, mas chkʼot ta yoʼontonik ta skoj ti tskʼel stukike xchiʼuk li buchʼu achʼik toe mas chkom ta sjolik ti ta Vivlia lokʼem tal li kʼusitik jchʼunojtike.

Mi oy ta avoʼonton ti akʼo skʼel Svivliaik li buchʼutik te oyike, skʼan me xatijbe yoʼontonik. Jtos ti kʼusi mas lek xapase jaʼ ti xavalbe ti akʼo saʼ ta Svivliaik li tekstoetik chakʼele.

Voʼot me chatʼuj atuk li tekstoetik ti chavalbe akʼo saʼike. Tsots me skʼoplal ti jaʼ xakʼel li tekstoetik ti sta-o li kʼusitik mas tsotsik skʼoplal li ta mantal chavetʼese, mi oy to yorail chavile, xuʼ xakʼel yantik teksto ti chakʼ ta ilel ti melel li kʼusi chavale.

Mu me baluk noʼox mi jaʼ noʼox chavalbe ti akʼo saʼik li tekstoetike. Mi muʼyuk chavakʼbe yorail sventa staik li tekstoetike, chchibajik me xchiʼuk muʼyuk xa tsaʼik li yantik tekstoe. Jaʼ yuʼun kʼelo li buchʼutik te oyike. Vaʼun jaʼ to xakʼel li teksto mi ep xaʼox li buchʼu staojik ta saʼele.

Baʼyel alo li teksto chakʼele, yuʼun jaʼ tskoltaot sventa mu jaluk xamala kʼalal tsaʼik li tekstoetike. Akʼo mi mas jutuk kʼusi chavalbe skʼoplal ta skoj ti chamala tsaʼik li tekstoetike, mas oy sbalil.