Ta yorailuk me xlaj avuʼun xchiʼuk tojoban xchʼakbel yorail jujuvokʼ

MANCHUK mi jaʼ mas tsots skʼoplal ti kʼu yelan chijchanubtasvane, lek me xtok mi chichʼ kʼelel ti kʼu sjalikil chichʼ jelubtasele. Skʼan ta yorailuk chlik xchiʼuk ta yorailuk tstsuts li jtsobajeltike, sventa jechuk xkʼot ta pasele, skʼan stsuts ta yorail yuʼunik li buchʼutik staoj sparteike.

Li xkuxlejal krixchanoetik ta skʼakʼalil Vivliae toj jelel toʼox tajek, mu xa xkoʼolaj xchiʼuk li avie. Yuʼun li ora chalike jaʼ jechtik kʼuchaʼal liʼe: «Te van ta yoxibal ora» o «te xa van ta slajunebal ora» (Mat. 20:3-6; Juan 1:39). Jaʼ mas nopem xaʼiik ti muʼyuk chakʼbeik lek yorail li kʼusi tspasik jujun kʼakʼale, li ta jkʼakʼaliltik eke oy to bu jech nopem xaʼiik.

Li krixchanoetik ti muʼyuk chchʼakbeik lek yorail li kʼusi tspasike xuʼ van jaʼ ta skoj ti jech nopem xaʼiik ti bu nakalike o ti jaʼ jech tskʼan yoʼontonike, pe ta me jtabetik sbalil mi chkakʼ ta koʼontontik xchʼakbel lek yorail li kʼusi ta jpastike. Kʼalal oy jayvoʼ ermanoetik tsjelubtas sparteik ta tsobajele, skʼan me ta yorail stsuts yuʼunik. Ta sventa taje skʼan xkakʼ ta koʼontontik li beiltasel ta Vivlia liʼe: «Oyuk me smelolal skotol li kʼusitik chapasike xchiʼuk lekuk me xchapet avuʼunik skotol» (1 Kor. 14:40).

Ti kʼusi xuʼ jpastik sventa ta yorailuk noʼox xlaj kuʼuntike. Li kʼusi mas tsots skʼoplale jaʼ ti jchapan jbatike. Kʼalal muʼyuk chchapan sbaik li buchʼutik tsjelubtasik mantale, mas me vokol ti ta yorail chlaj yuʼun li sparteike, jaʼ van ta skoj ti spatoj noʼox tajek yoʼontonike o jaʼ ti ta yorail xa tajek chchapan sbaike. Li baʼyel kʼusi skʼan jpastik sventa ta yorailuk xlaj kuʼuntike skʼan me jaʼuk jun matanal xkil li jpartetike xchiʼuk ti jchapan jbatik leke.

¿Mi ataoj junuk aparte ta yaptael vun? Mi jeche, jaʼ chano baʼyel li xchanobil 4 kʼalal ta 7 li ta livro liʼe ti te chalbe skʼoplal ta sventa ti lekuk xcholet li kʼusi ta jkʼeltike, ti bu skʼan xijpaje xchiʼuk ti xkakʼbetik lek tsots snukʼilal ti bu sta-oe akʼo mi jaʼ noʼox jpʼeluk kʼop ti tsots skʼoplale o mi jaʼ ti bu tsotsik skʼoplal chichʼ alele. Mi laje, tsots xavapta batel xchiʼuk tsako ta venta li tojobtaseletike. Kʼelo ta kronometro mi xlokʼ yorail. ¿Mi mas van anil skʼan xakʼel sventa ta yorail stsuts avuʼun? Mi jeche, mas anil xakʼel batel ti bu muʼyuk mas tsots skʼoplale, pe skʼan xapaj xchiʼuk kʼunkʼun xakʼel mi tsots tajek skʼoplal li kʼusi chakʼele. Chanilano ep ta velta, vaʼun te chavakʼ venta ti ta yorail chlaj avuʼun ta skoj ti xcholet chakʼel batele.

¿Mi chavetʼes junuk mantal ti skʼan xatunes junuk voskejoe? Mi jaʼ chatunes li kʼusi atsʼibaoj ta avoskejo ti ta jujupʼel xa tajek chakʼel batele, maʼuk me tskoltaot yoʼ ta yorailuk xlaj avuʼun li apartee. Te la achan ta xchanobil 25 ti kʼusi skʼan xapase. Mu me xchʼay xavaʼi ti oy voʼtos kʼusi xuʼ skoltaote: 1) Xuʼ xasaʼ kʼusi chal ta jvuntik ti bu mas sta-o li mantal chavetʼese, pe mu me toj epuk xasaʼ. 2) Teuk me ta ajol li kʼusitik mas tsotsik skʼoplale, pe mu me xakomtsan ta ajol jujun orasion. 3) Akʼbo senyail ta avoskejo ti kʼu sjalikil skʼan xachʼakbe yorail jujuvokʼe o kʼelo kʼu sjalil skʼan xjelav avuʼun kʼalal mu to chlik aval li yane. 4) Kʼalal chachapan abae, te xakʼel kʼusi mu persauk xaval mi chavakʼ venta ti mu xa xlokʼ yorail chavil ta jujuvokʼ kʼalal chavetʼes xa li apartee. 5) Chanilano li apartee.

Tsots skʼoplal ti xachanilane. Kʼelo akronometro mi xlokʼ yorail kʼalal chachan jujuvokʼe. Chano ep ta velta skotol jaʼ to mi muʼyuk xa ch-echʼ yorail avuʼun ti kʼu sjalil akʼbilote. Mu toj epuk kʼusi xaval, jaʼ lek tsʼinbo o komtsanbo jutuk yorail, yuʼun xuʼ mas ch-echʼ yorail avuʼun kʼalal chavetʼes apartee jaʼ mu jechuk kʼalal la achan atuke.

Ti kʼuxi xuʼ xijtojob ta xchʼakbel lek yorail jujuvokʼe. Snitojbe sba skʼoplal ti ta yorailuk xlaj kuʼuntik xchiʼuk ti xijtojob xchʼakbel yorail jujuvokʼe. Li bu mas jal skʼan chʼakbel yoraile jaʼ li bu yichʼoj tal li kʼusitik mas tsotsik skʼoplale. Jaʼ muʼyuk jal li slikeb aloʼile, jaʼ noʼox venta mi kʼot ta pasel avuʼun li oxtos kʼusi laj yichʼ alel ta xchanobil 38 li ta livro liʼe. Jech xtok, mu me stakʼ xjalij ta mas li bu yichʼoj tal li kʼusitik mas tsotsik skʼoplale, yuʼun mi jeche, muʼyuk xa lek chbat kʼu yelan chatsutses aloʼil jech kʼuchaʼal laj yal li ta xchanobil 39.

Mi laj avakʼbe yipal yoʼ ta yorailuk xlaj li apartee, mas me chatojob lek ta yetʼesel li apartee, jech chavakʼ ta ilel ti chavichʼ ta mukʼ li yan ermanoetik ti tsjelubtas sparteik eke xchiʼuk li buchʼutik te oyik ta tsobobbaile.