KʼUXI XUʼ XAPAS AREVISITA
XCHANOBIL 9
Aʼibo smelolal k’u yelan chaʼi sba
Beiltasel ta Vivlia: «Kuxetuk me avoʼonton achiʼukik li buchʼutik xkuxet yoʼontonike; okʼan me achiʼukik li buchʼutik ch-okʼike» (Rom. 12:15).
¿Kʼuxi laj yakʼ ta ilel li Jesuse?
1. Kʼelo li VIDEOE o kʼelo Markos 6:30 kʼalal ta 34. Laje, nopbo skʼoplal liʼe:
¿Kʼu yuʼun tskʼan chbat Jesus xchiʼuk yajtakboltak «ti bu stsʼijlan sventa stuk te oyike»?
¿Kʼusi tijbat-o yoʼonton Jesus sventa xcholbe mantal li epal krixchanoetike?
¿Kʼusi chakʼ jchantik li kʼusi la spas Jesuse?
2. Mi chkaʼibetik smelolal ti k’u yelan chaʼi sbaike, ch-ayan me ta koʼontontik skoltael, maʼuk noʼox ta jkʼan ta jcholbetik mantal.
Paso li kʼusi la spas Jesuse
3. Tsʼet chikintao li kʼusi chale. Mi lik loʼilajuke, mu xatuchʼbe ta be sloʼil. Tsako me ta mukʼ mi laj yal li kʼusi muʼyuk lek chaʼie o li kʼusi ta svul-o yoʼontone. Jaʼ me jech chakʼ venta ti tsots skʼoplal chavaʼi li kʼusi tsnope.
4. Nopbo skʼoplal kʼu yelan xkuxlejal. Teuk ta ajol li kʼusi la sloʼiltabote xchiʼuk jakʼbo aba:
«¿Kʼu yuʼun skʼan xojtikin li mantale?».
«¿Kʼuxi tstabe sbalil avi xchiʼuk ta jelavel mi la xchan li Vivliae?».
5. Jaʼuk xavalbe skʼoplal li kʼusi chtun yuʼune. Akʼbo noʼox yil ti xuʼ stabe sbalil xchiʼuk ti te tstabe stakʼobil li kʼusitik tsjakʼbe sba mi lik yichʼ chanubtasel ta Vivliae.