Poʼot xa xlaj skotol li vokolile
«Jaʼ cʼotem ta jpojobbailtic; jun yutsil ti yabtel spasoje.» (DEUTERONOMIO 32:4, Ch.)
1, 2. 1) ¿Kʼu yuʼun jkʼuxubinojtik ta jyalel li spatobil oʼontonal sventa kuxlejal sbatel osile? 2) ¿Kʼusi chmakatik epal krixchanoetik sventa mu xchʼunik ti oy Dios ti chal chakʼ jun kʼupil kuxlejal ta tsʼakale?
¿MI CHA kʼupin snopel kʼu yelan li kuxlejal ta Paraisoe? Oyikʼal van cha nop ti yakal chavojtikin avaʼi li alakʼ sba Balumile xchiʼuk ti yakal chavojtikin li epal kuxlejaletik ti oy tee. O xuʼ van cha nop ti jun tajmek avoʼonton cha chabi li Balumile xchiʼuk ti cha kolta aba sventa chkʼataj ta jun kʼupil nichimaltike. O xuʼ van yakal xa xa chan batel spasel dibujo chavil, kʼuyelan ta vaʼanel na, stijel son o kʼusiuk yan stakʼ pasel ti mu spas avuʼun avi ta skoj ti mu noʼox xa xokobe. Kʼusiuk ti cha nope, li voʼote akʼuxubinoj tajmek li spatobil oʼontonal ta sventa li «mero [kuxlejal]» ti jaʼ jech tsbiiltas li Vivlia ti xuʼ xa tae, li kuxlejal ti tskʼan oyuk kuʼuntik li Jeovae, li kuxlejal sbatel osile (1 Timoteo 6:19).
2 ¿Mi mu jechuk ti kʼupil sba xchiʼuk ti jaʼ jun alakʼ sba matanal ti chkalbetik skʼoplal li spatobil oʼontonal chakʼ Vivliae? Akʼo mi jech, ep buchʼutik mu skʼanik, yuʼun chalik ti jaʼ noʼox la jun vaychil sventa li buchʼutik mu kʼusi xojtikinike. Jech xtok, vokol chaʼiik ta xchʼunel li Dios ti yaloj ta melel chakʼ kuxlejal sbatel osil ta Paraisoe. ¿Kʼu yuʼun? Yuʼun li jlome chalik ti mu la xaʼibeik smelolal kʼu yuʼun ti jech oy vokolil xchiʼuk choplejal ti oyuk la li Diose, ti skotoluk la xuʼ yuʼun xchiʼuk ti chkʼanvanuk lae. Jtos ti kʼusi jpʼel-o yoʼonton tsnopike jaʼ la ti mu xuʼ oy jun dios ti tstsʼik li choplejale, mi yuʼun la oye, maʼuk la jun dios ti skotol xuʼ yuʼune o yuʼun la muʼyukutik ta yoʼonton. Li kʼusi melele chaʼa jaʼ ti Satanase lek yakʼoj ta ilel ti lek pʼij ti jech smakojbe snopben li krixchanoetike (2 Corintios 4:4).
3. ¿Kʼusi sjakʼobil tsots ta takʼel ti xuʼ xi jkoltavanutik ta stakʼele, xchiʼuk kʼu yuʼun ti jaʼ noʼox voʼotik xtakʼ kuʼuntike?
3 Li yajrextikoutik Jeovae jaʼ noʼox voʼotik ti lek xuʼ jkoltatik li buchʼutik sloʼlaoj li Satanase xchiʼuk li spʼijil balumil liʼe (1 Corintios 1:20; 3:19). Jnaʼojtik ti ep buchʼutik mu xchʼunik li kʼusitik chal ta melel li Vivliae, yuʼun mu xojtikinik li Jeovae. Oyikʼal van mu xojtikinbeik li sbie xchiʼuk li kʼusi smakoj batele, xchiʼuk mu van xojtikinbeik mi jsetʼuk li stalelaltake mi jaʼuk snaʼik xtok ti kʼuyelan lek kʼotem ta pasel yuʼun li kʼusi chale. Yan li voʼotike, oy matanal kuʼuntik yuʼun xkojtikintik maʼ taje. Jaʼ yuʼun bateltike, jaʼ lek ti jnoptik kʼuxi xuʼ jkoltatik li buchʼutik «oy ta icʼ osil» sjol yoʼontonik sventa tstabeik stakʼobil li jun sjakʼobil ti toj tsots ta takʼele: ¿Kʼu yuʼun yakʼoj to oyuk choplejal xchiʼuk vokolil li Diose? (Efesios 4:18.) Sventa lek ta jtakʼtike, li kʼusi baʼyel ta jpastike jaʼ ti jkʼeltik kʼusi oy ta yoʼontonike. Te une ta jkʼeltik kʼuxi yakʼoj ta ilel stalelaltak Jeova ta sventa li jtos kʼope, jaʼ xkaltik, ti kʼu yuʼun yakʼoj to oyuk vokolile.
Jkʼeltik li kʼusi oy ta yoʼontonike
4, 5. ¿Kʼusi skʼan baʼyel jpastik kʼalal oy buchʼu tsjakʼ ti kʼu yuʼun yakʼoj to oyuk vokolil li Diose? Chapo kaʼitik.
4 ¿Kʼu yelan chkaʼitik kʼalal oy buchʼu tsjakʼ kʼu yuʼun ti yakʼoj to oyuk vokolil li Diose? Li kʼusi anil noʼox van chtal ta joltike jaʼ ti lek van xcholet noʼox chkalbetik smelolale, ti jaʼ chlik kaltik li kʼusi kʼot ta pasel ta Edene. Bateltike lek ti jaʼ jech ta jtakʼtike, pe lek xtok ti baʼyel jkʼeltik li kʼusi oy ta yoʼontonike (Proverbios 25:11; Colosenses 4:6). Jkʼeltikik oxtosuk kʼusitik ti skʼan oyuk ta joltik kʼalal mu to jtakʼtike.
5 Baʼyel, kichʼtik ta venta liʼe: mi chat-o yoʼonton ta skoj choplejal li krixchanoe, yuʼun van xuʼ yiloj-o svokol li stuke o li yutsʼ yalaltake. Jech oxal chaʼa, skʼan chkakʼtik ta ilel ti kʼux chkaʼibetik li svokole. Li jtakbol Pabloe xi la stojobtas li yajtsʼaklomtak Cristoe: «Ocʼan achiʼuquic li bochʼo ch-oqʼuique», xi (Romanos 12:15). Kʼalal kʼux chkaʼibetik li svokolike xchiʼuk ti ta jkʼuxubintike, xuʼ van jtsatsubtasbetik yoʼontonik (1 Pedro 3:8). Mi chakʼik venta ti oy ta koʼontontike, mas van oy ta yoʼonton chaʼiik li kʼusi chkalbetike.
6, 7. ¿Kʼu yuʼun lek ti ta jkʼupil kʼoptatik jun krixchano ti ta sjunul yoʼonton tsjakʼ kʼusiuk ta sventa Vivlia ti chat-o yoʼontone?
6 Xchibal, jkʼupil kʼoptatik li krixchano ti ta sjunul yoʼonton jech tsjakʼe. Oy buchʼutik chalik ti yuʼun la muʼyuk xchʼunel yoʼontonik o yuʼun la mu xichʼik ta mukʼ Dios ti jech tsjakʼbe sbaike. Jech xtok, xuʼ van jaʼ jun jbeiltasvanej ta relijion ti buchʼu jech laj yale. Pe taje mu meleluk skotol, yuʼun oy tukʼil krixchanoetik ta voʼne ti jech la sjakʼik eke. Jech kʼuchaʼal liʼe, li jkʼejimol Davide xi la sjakʼe: «Mucʼul Dios, ¿cʼu yuʼun ti nom chavacʼ aba ta jtojole? ¿Cʼu yuʼun chanacʼ aba ti cʼalal yorail oy jvocole?», xi (Salmo 10:1). Jech ek li j-alkʼop Habacuque xi la sjakʼe: «Mucʼul Dios[,] ¿[b]aqʼuin to chavaʼibun jcʼop ti liʼ xiʼavet o ta atojol, ti yoquel mu xatacʼbun oe? ¿Baqʼuin to chacoltavan ti liʼ chicʼopoj ta scoj ti oy ep utsʼintaele? ¿Cʼu yuʼun ti chavacʼbun quil puru vocole? ¿Cʼu yuʼun ti lec noʼox chavil li puru utsʼintaele? Yuʼun liʼ xa setel ta jtojol li ilbajinele xchiʼuc li lajel chamesele; jaʼ noʼox yochel ta epajel puru cʼop xchiʼuc pleito», xi (Habacuc 1:2, 3).
7 Li tukʼil viniketik taje yichʼojik tajmek ta mukʼ li Diose. ¿Mi utatik ti jech la sjakʼike? Muʼyuk, yuʼun li Jeovae lek laj yil ti tsʼibabiluk komel ta sKʼop li kʼusitik la sjakʼik ta sjunul yoʼontonike. Li avie, li buchʼu chat-o yoʼonton choplejale oyikʼal chviʼnaj ta melel ta smantal Dios, jaʼ xkaltik, ti oy tajmek ta yoʼonton tsta li stakʼobil ti jaʼ noʼox xuʼ chakʼ li Vivliae. Jvules ta joltik ti Jesuse la skʼupil kʼopta li buchʼutik chviʼnajik ta smantal Diose, yuʼun xi laj yale: «Xcuxet yoʼntonic ta melel li bochʼotic chaʼyic li scʼop Diose, ti ta xchʼunique», xi (Lucas 11:28). Jaʼ jun mukʼta matanal ti ta jkoltatik li krixchanoetik sventa tstaik li muyubajel ti laj yal ta melel li Jesuse.
8. ¿Kʼusi chanubtaseletik kapijem yuʼun epal krixchanoetik xchiʼuk ti yakʼojbe xchʼunik ti jaʼ chakʼ vokolil li Diose? ¿Kʼuxi xuʼ jkoltatik li krixchanoetik taje?
8 Yoxibal, xuʼ van chkakʼbetik yil li krixchano ti maʼuk smul Dios li choplejal ti chakʼbe svokol krixchanoetike. Epal krixchanoetike chanubtasbilik ti jaʼ la yakal ch-ajvalilaj ta balumil li Diose, ti voʼne xa onoʼox la tajmek yaloj li kʼusi chkʼot ta jtojolaltike o ti mukajtik la yuʼun xchiʼuk ti mu la nabajuk skʼoplal ti kʼu yuʼun chakʼ jvokoltike. ¡Jaʼ jun mukʼta loʼlael! Li chanubtaseletik taje chchopol kʼopta li Diose xchiʼuk jaʼ chakʼbe smulin li choplejal xchiʼuk vokolile. Jech oxal chaʼa, xuʼ van persa ta jtunestik li sKʼop Dios sventa chkalbetik smelolal taje (2 Timoteo 3:16). Li Jeovae maʼuk yakal ch-ajvalilaj li ta chopol balumil liʼe, jaʼ oy ta skʼob li Diabloe (1 Juan 5:19). Li Jeovae muʼyuk onoʼox bu yaloj li kʼusi chkʼot ta stojolal li jujun kʼusitik pʼij spasojane, yuʼun yakʼojbe snopben stukik sventa tstʼujik li kʼusi leke xchiʼuk li kʼusi chopole (Deuteronomio 30:19). Jech xtok, li Jeovae maʼuk ta stojolal chlik tal li choplejale, moʼoj, tspʼaj li choplejale xchiʼuk chat-o yoʼonton ta stojolal li buchʼutik jech noʼox chil svokolike (Job 34:10; Proverbios 6:16-19; 1 Pedro 5:7).
9. Li «jʼabtel ti jun [«tukʼ», NM] yoʼnton [...], ti lec bije», ¿kʼusi kabtejebtik yakʼojbutik sventa chkalbetik smelolal kʼu yuʼun yakʼoj to oyuk vokolil li Jeova Diose?
9 Kʼalal laj xa kakʼtik venta kʼusi oy ta yoʼonton li krixchanoetike, tana un xuʼ xa van xlik kalbetik smelolal kʼu yuʼun yakʼoj to oyuk vokolil li Diose. Li «jʼabtel ti jun [«tukʼ», NM] yoʼnton [...], ti lec bije», yakʼoj ep kabtejebtik sventa tskoltautik (Mateo 24:45-47). Jech kʼuchaʼal liʼe, li ta mukʼtik tsobajeletik ta oxib kʼakʼal ti «Xchʼunbel smantal Dios» sbi ti laj yichʼ pasel ta 2005 xchiʼuk ta 2006, laj yichʼ akʼel li tratado ti jaʼ sbi Poʼot xa xlaj skotol li vokolile. ¿Kʼu yuʼun mu xa chanbe lek skʼoplal li kʼusi yichʼoj tale? Jech ek li livro ¿Kʼusi chchanubtasvan ta melel li Vivliae?, ti pasbil xa ta 157 kʼopetike, yichʼoj tal jun kapitulo ti chalbe skʼoplal taje. Jtunestik bu kʼalal xuʼ kuʼuntik li vunetik taje, yuʼun lek jamal chalbe smelolal li kʼusitik kʼot ta pasel ti chal Vivlia ta sventa li ajvalilal ta vinajel-balumil ti laj yichʼ chibal kʼoptael ta nichimaltik Edene xchiʼuk ti kʼu yuʼun jaʼ jech la xchapan tal Jeova ti kʼuyelan la pase. Teuk me ta joltik ti kʼalal chkalbetik skʼoplal taje, yakal me ta jambetik xchikinik ta sventa ti kʼusi mas tsots skʼoplal ta chanele: li yojtikinel Jeova xchiʼuk li skʼupil talelaltake.
Kalbetik mas skʼoplal li stalelaltak Jeovae
10. ¿Kʼusi ti vokol ta aʼibel smelolal chaʼiik ep krixchanoetike, xchiʼuk kʼusi xuʼ chkoltaatik sventa xaʼibeik lek smelolal?
10 Kʼalal chkalbetik smelolal kʼu yuʼun yakʼoj to Dios akʼo x-ajvalilajik ta skʼob Satanás li krixchanoetike, kakʼ kipaltik ta yalbel mas skʼoplal li kʼupil sba stalelaltak Jeovae. Ep buchʼutik snaʼojik ti oy sjuʼel li Diose, nopem xaʼiik ta xchikintael ti skotol xuʼ yuʼune. Akʼo mi jech, xuʼ van vokol chaʼibeik smelolal kʼu yuʼun mu stunes li smukʼta juʼel sventa tslajes ta ora noʼox li vokolil xchiʼuk li kʼusitik muʼyuk tukʼe. Oyikʼal van mu xaʼibeik smelolal li yan stalelaltak Diose, jech kʼuchaʼal li xchʼul talelale, li stukʼilale, li spʼijilale xchiʼuk li kʼanelale. Li Jeovae muʼyuk bu jyalel muyel chakʼ ta ilel li stalelaltake, jaʼ yuʼun lek tukʼ xi chal li Vivliae: «Jun yutsil ti yabtel spasoje», xi (Deuteronomio 32:4, Ch). ¿Kʼuxi xuʼ xkalbetik mas skʼoplal stalelaltak Jeova kʼalal ta jtakʼtik li kʼusi nopolik noʼox tsjakʼik ta sventa taje? Jkʼelbetik jlomuk skʼelobil.
11, 12. 1) ¿Kʼu yuʼun muʼyuk la staik perton kʼalal la spas smulik li Adán xchiʼuk Evae? 2) ¿Kʼu yuʼun muʼyuk bu tstsʼik sbatel osil Jeova li mulile?
11 ¿Mi xuʼ noʼox van ti lajuk spasbe perton Adán xchiʼuk Eva li Jeovae? Mu staʼo ti chichʼik pertone. Ti jech tukʼil krixchanoetike, yalel jaʼ la stʼujik ti tspʼajik li ajvalilal yuʼun Jeovae xchiʼuk jaʼ la skʼan chbeiltasatik yuʼun li Satanase. Jaʼ yuʼun muʼyuk bu vinaj mi jsetʼuk ti sutesoj yoʼontonik li jtoybaetike. Pe kʼalal oy buchʼu tsjakʼbe skʼoplal li pertone, ta melel jaʼ tsjakʼ ti kʼu yuʼun muʼyuk bu la syalesbe sbalil li smantaltak Jeovae xchiʼuk ti tsʼikuk yuʼun li mulil xchiʼuk li toybaile. Sventa ta jtabetik li stakʼobile, skʼan chkichʼtik ta venta jtos stalelal ti toj tsots skʼoplale: jaʼ ti chʼul li stuke (1 Pedro 1:16, Ch).
12 Li Vivliae ta sienal noʼox velta chal ti chʼul li Jeovae. Kʼux ta alel ti jutuk tajmek li krixchanoetik liʼ ta chopol balumil ti xaʼibeik smelolal li kʼusi smakoj batel taje. Sak xchiʼuk chʼul li Jeovae, xchiʼuk svokʼoj sba ta stojolal skotol li mulile (Isaías 6:3; 59:2). Ta sventa li mulile, li stuke oy kʼusi yakʼoj sventa tstupʼ o tslajesbe skʼoplal, muʼyuk bu tstsʼik ta sbatel osil. Ti oyuk ta yoʼonton tstsʼik sbatel osile, muʼyuk xa spatobil koʼontontik ta tsʼakal ti jechuke (Proverbios 14:12). Mi kʼot yoraile, tspas ta chʼul yan velta skotol li kʼusitik spasoje. Jaʼ jech chkʼot ta pasel, yuʼun jaʼ li kʼusi oy ta yoʼonton li Buchʼu toj echʼ noʼox chʼule.
13, 14. Li Jeovae, ¿kʼu yuʼun la snop ti muʼyuk tslajes li jtoybaetik ta Edene?
13 Li Jeovae, ¿mi xuʼ van la slajes jechuk li jtoybaetik ta nichimaltik Edene xchiʼuk ti lik ta achʼ yuʼun xtoke? Ta melel oy sjuʼel sventa la spas jechuk taje, xchiʼuk poʼot xa ta stunes sventa tslajes li buchʼutik chopolike. Ta skoj taje oy buchʼu xi tsjakʼbe sbaike: «¿Kʼu yuʼun muʼyuk bu la slajes kʼalal kʼajomal noʼox oxvoʼ jpas muliletik oy ta sjunul vinajel-balumile? ¿Mi mu van lajuk spajtsan jechuk li mulile xchiʼuk skotol li vokolil chkiltik ta balumile?», xiik. ¿Kʼu yuʼun mu jechuk la spas li Jeovae? Deuteronomio 32:4 ta XChʼul Cʼop ti Jtotic Diose xi chale: «Ti cʼusi ta spase, lec tucʼ ta jʼechʼel», xi. Jpʼel-o chkaltik ti oy stukʼilal li Jeovae. Jech, li stuke «lec ta xil ti tuqʼuil jol oʼntonale» (Salmo 37:28, Ch). Ta skoj ti skʼanoj li tukʼilale muʼyuk bu la slajes li jtoybaetik ta Edene. ¿Kʼu yuʼun ti jech chkaltike?
14 Ti jech la stoy sba li Satanase la xchibal kʼopta li tukʼil ajvalilal yuʼun Diose. Ta sventa ti jpʼel-o stukʼilal li Jeovae persa skʼan lek tukʼ chichʼ takʼbel li kʼusi la xchibal kʼopta Satanase. Ti jech chichʼik lajesel ta ora noʼox li jtoybaetike —akʼo mi staik-o—, muʼyuk bu la stakʼ jechuk li kʼusi taje. Laj yakʼ ta ilel jechuk li sjuʼel Jeova ti mu kʼusi xkoʼolaj-oe, pe maʼuk laj yichʼ chibal kʼoptabel li sjuʼele. Jech xtok, yalojbe xaʼox li Adán xchiʼuk Eva li kʼusi tskʼan tspase: ti akʼo xil yalab xnichʼnabik xchiʼuk akʼo snojesik li Balumile, ti akʼo xchabiik xchiʼuk akʼo sventainik li kʼusitik pasbil ta Balumile (Génesis 1:28). Ti lajuk noʼox slajes li Adán xchiʼuk Eva li Jeovae, xkoʼolaj kʼuchaʼal ta jatal koxtal la stikʼ yaʼeluk li kʼusi laj yal ta sventa li kʼusi tskʼan tspas ta stojolal li krixchanoetike. Li stukʼilal Jeovae mu xakʼ kʼotuk ta pasel jech maʼ taje, yuʼun ta onoʼox xkʼot ta pasel li kʼusi chale (Isaías 55:10, 11).
15, 16. ¿Kʼuxi xuʼ jkoltatik kʼalal oy buchʼu chal kʼu yelan ta «chapanel» li kʼusi laj yichʼ chibal kʼoptael ta Edene?
15 ¿Mi oy van buchʼu ta vinajel-balumil ti mas pʼij kʼu yelan chchapan li toybaile ti jaʼ tsalbil li Jeovae? Oy buchʼu ta xalik kʼuyelan ta «chapanel», pe kʼalal jech tspasike, ¿mi mu meleluk ti jaʼ tskʼan chalik ti yuʼun jaʼ mas lek ti kʼu yelan tsnop chchapanik li kʼope? Oyikʼal van mu ta xchopolil yoʼontonik ti jech tspasike, pe ti kʼusi melele jaʼ ti mu xojtikinik li Jeovae mi jaʼuk li spʼijilal ti toj labal sbae. Li ta skarta ti la stakbe batel yajtsʼaklomtak Cristo ta Romae, li jtakbol Pabloe la sabe to mas skʼoplal li spʼijilal Diose. Laj yalbe skʼoplal li «cʼusi [...] mucul [toʼox]» yuʼun Jeova ta sventa ti snopoj tstunes li Ajvalilal yuʼun Mesías sventa tspoj li tukʼil krixchanoetike xchiʼuk ti chchʼultajes li sbie. ¿Kʼusi la snop Pablo ta sventa li spʼijilal Dios, ti jaʼ li buchʼu laj yal taje? Li jtakbole xi la stsutses li skartae: «Ti stuc noʼox jech ti Diose, ti jelavem ti sbijile, ichʼbiluc ta mucʼ sbatel osil ta sventa ti Jesucristoe. Jechuc», xi (Romanos 11:25; 16:25-27, Ch).
16 Li Pabloe laj yaʼibe smelolal ti Jeovae «stuc noʼox jech [...] ti jelavem ti sbijile», jaʼ xkaltik, li buchʼu mas pʼij ta sjunul vinajel-balumile. ¿Buchʼu jpas mulil krixchanoal xuʼ mas pʼij ti chal kʼu yelan ta chapanel kʼusiuk kʼopal, mas to ti jaʼ li chibal kʼoptael mas tsots skʼoplal ti yichʼoj pasbel li spʼijilal Diose? Jech oxal chaʼa, skʼan chkakʼbetik ta yoʼonton ek li jchiʼiltaktik ti kʼuyelan chkichʼtik ta mukʼ Diose, yuʼun li stuke «toj ep sbijil» (Job 9:4). Mi mas to chkaʼibetik smelolal li spʼijilal Jeovae, mas to me ta jpat koʼontontik ti yuʼun jaʼ mas lek ti kʼuyelan chchapan li kʼopetike (Proverbios 3:5, 6).
Jkʼuxubintik li stalelal Jeova ti mas lek xvinaje
17. Li buchʼutik chat-o yoʼontonik ta skoj ti yakʼoj to oyuk vokolil li Diose, ¿kʼuxi cha kolta sventa chaʼibeik lek smelolal ti skʼanojutike?
17 «Li Diose jaʼ stalel ta xcʼanvan o.» (1 Juan 4:8.) Li chaʼoxpʼel kʼop ti toj tsots skʼoplal taje, li Vivliae chal kaʼitik kʼusi jaʼ li stalelal Jeova ti mas lek xvinaje, li stalelal ti mas kʼupil sba xchiʼuk ti tspatbe yoʼonton skotol li buchʼutik chat-o yoʼontonik ta skoj li choplejale. Li Jeovae yakʼoj ta ilel li kʼanelal yuʼun ta skotol li kʼusitik spasoj sventa tslajes li chopol ikatsil yakʼoj talel mulil ta stojolal li spasbentake. Ta skoj ti chkʼanvane, laj yakʼbe spatobil yoʼonton li jmulavil snitilultak Adán xchiʼuk Evae (Génesis 3:15). Li Diose laj yakʼ ti akʼo xnopajik ta stojolal ta orasione xchiʼuk laj yakʼ ti akʼo lekuk oyik ta stojolale. Ta skoj ti chkʼanvan li Diose, laj yakʼ jun matanal pojelal ti tstupʼbe ta j-echʼel skʼoplal li mulile xchiʼuk ti chichʼ tael xtok li tukʼil kuxlejale (Juan 3:16). Ta skoj ti chkʼanvane, yakʼoj ta ilel smukʼul yoʼonton ta stojolal krixchanoetik ti kʼuyepal xuʼe, yakʼojbe to yorail sventa akʼo spʼajik li Satanase xchiʼuk ti akʼo stʼujik kʼuchaʼal Ajvalil yuʼunik li Jeovae (2 Pedro 3:9).
18. ¿Kʼu yuʼun xuʼ xkaltik ti jtaojtik jun matanale? ¿Kʼusi ta jchantik li ta yan xchanobile?
18 Ta sventa ti lokʼ ta jabil li kʼusi toj chopol kʼot ta pasel ta skoj li terrorismoe, jun pastore xi laj yalbe li jtsop krixchanoetike: «Mu jnaʼtik kʼu yuʼun ti yakʼoj to oyuk vokolil xchiʼuk choplejal li Diose», xi. ¡Kʼux ta alel! ¿Mi mu jaʼuk batsʼi matanal jtaojtik ti xkojtikinbetik li stakʼobil li sjakʼobil taje? (Deuteronomio 29:29.) Ta sventa ti oy stukʼilal, oy spʼijilal xchiʼuk ti chkʼanvan li Jeovae, jnaʼojtik ta melel ti poʼot xa tslajes skotol li vokolile. Jech, li stuke yaloj ta melel ti tslajese (Apocalipsis 21:3, 4). Pe, ¿kʼusi xuʼ xkaltik ta sventa li buchʼutik chamemik leʼ xa ta voʼne xtale? ¿Mi muʼyuk van spatobil yoʼontonik ta skoj ti kʼu yelan la xchapan tal Jeova li kʼusi laj yichʼ chibal kʼoptael ta nichimaltik Edene? Oy. Ta skoj li kʼanelal yuʼun Diose, oy kʼusi skʼejojbe ta sventaik ek: li chaʼkuxesele. Taje jaʼ li kʼusi chichʼ chanbel skʼoplal ta yan xchanobile.
¿Kʼuxi cha takʼ?
• ¿Kʼusi xuʼ xkalbetik li buchʼu tsjakʼ kʼu yuʼun yakʼoj to oyuk vokolil li Diose?
• Ti kʼuyelan la xchapan Jeova li toybail kʼot ta Edene, ¿kʼu yelan chvinaj-o te li stukʼilal xchiʼuk ti chʼule?
• ¿Kʼu yuʼun skʼan ta jkoltatik li krixchanoetik sventa chaʼibeik lek smelolal li kʼanelal yuʼun Jeovae?
[Lokʼol ta pajina 13]
Kakʼ kipaltik ta skoltael li buchʼutik chat-o yoʼontonik ta skoj li vokolil oy ta balumile
[Lokʼol ta pajina 15]
Li tukʼil viniketik kʼuchaʼal David xchiʼuk Abacuque oy kʼusi ta sjunul yoʼonton la sjakʼbeik li Diose