Yakal to chchʼiik ta mantal ta smalubelik
«Tsʼunbilic ta xchʼulna Mucʼul Dios [...,] acʼo me mol meʼelic xa, ta to satinic.» (SALMO 92:13, 14.)
1, 2. 1) ¿Kʼusi chtal ta joltik kʼalal malubel xi jchie? 2) ¿Kʼusi chalbutik Vivlia ta sventa li kʼusitik yakʼoj tal smul Adane?
MALUBEL. ¿Kʼusi chtal ta ajol kʼalal chavaʼi taje? ¿Mi jaʼ ti sotʼajtik xa abekʼtale? ¿Ti mu xa xavaʼi lek kʼoponele? ¿Ti muʼyuk xa lek yipal avok-akʼob chavaʼie? ¿O mi yakal van cha nop yan vokolil ti chtal ta skoj li «cʼusitic tsots ta xvul ta loqʼuele» ti jech kʼuchaʼal chal kaʼitik ta Eclesiastés 12:1-7 ta XChʼul Cʼop ti Jtotic Diose? Mi jaʼ jeche, toj tsots me skʼoplal ti oyuk lek ta joltik ti maʼuk me jech tskʼan ta jnuptantik kʼusitik chopol ta skoj malubel li Jpasvanej kuʼuntik Jeova Diose. Li kʼusitik chal ta kapitulo 12 yuʼun Eclesiastese, jaʼ me ta skoj li smul Adán ti jech chil svokol li jbekʼtaltike (Romanos 5:12).
2 Kʼalal ch-echʼ batel jabiletike maʼuk jun choplejal, yuʼun sventa chi jchʼiutik xchiʼuk chi jyijubutike —ti jech oy ta yoʼonton skotol li kʼusi kuxajtike— skʼan x-echʼ jabiletik. Ti oy xa tal ta vakmil jabil yakʼoj tal vokolil ta butikuk noʼox li mulil xchiʼuk ti chʼabal tukʼilale poʼot xa me xlaj skʼoplal. Skotol li krixchanoetik ti chchʼunbeik smantal Diose ta me skʼupinik li kuxlejal ti tskʼan onoʼox chakʼbutike, ti muʼyuk xa chkil jvokoltik ta skoj li malubel xchiʼuk lajelale (Génesis 1:28; Apocalipsis 21:4, 5). Vaʼun muʼyuk buchʼu jech ta xal: «Toj ipun» (Isaías 33:24). Li mol-meʼeletike «chlic sta jech chac cʼu chaʼal ta squeremal [o stsebal] onoʼox», jech noxtok li sbekʼtalike «chlic lecubuc yan velta» (Job 33:25). Li avie, jkotoltik to chkil jvokoltik ta skoj li mulil yakʼojbutik komel Adane. Akʼo mi jech, skotol li yajtuneltak Jeova ti yantik xa xmalubik batele ep alakʼ sba bendisionetik tstaik.
3. ¿Kʼusi smelolal ti «acʼo me mol meʼelic xa, ta to satinic» li yajtsʼaklomtak Cristoe?
3 Li sKʼop Diose chal kaʼitik ta melel ti buchʼutik «tsʼunbilic ta xchʼulna Mucʼul Dios[e] [...,] acʼo me mol meʼelic xa, ta to satinic» (Salmo 92:13, 14). Ta jun lokʼolkʼop, li jtsʼibajom yuʼun Salmoe oy kʼusi melel chal kaʼitik ti kʼalal «mol meʼelic xa» li yajtuneltak Diose, xuʼ to la chnichinik xchiʼuk chchʼiik ta mantal manchuk mi yakal xa chlaj batel li sbekʼtalike. Oy ep skʼelobiltak ta Vivlia xchiʼuk ta jkʼakʼaliltik ti jech li kʼusi laj yale.
«Scotol cʼacʼal tey ta xbatilan»
4. ¿Kʼuxi laj yakʼ ta ilel ti yichʼoj ta mukʼ Dios li j-alkʼop Anae, xchiʼuk kʼuxi akʼbat smoton yuʼun Jeova?
4 Nopo avaʼi ta stojolal li j-alkʼop Anae. Akʼo mi oy xaʼox 84 sjabilal, «scotol cʼacʼal tey ta xbatilan ta yamaqʼuil templo. Ta cʼacʼal ta acʼubal tey ta xtun yuʼun Dios yuʼun ta xicta ixim, ta scʼopan Dios». Ta skoj ti maʼuk stseb jun jlevitae, ti yuʼun «jaʼ smoltot ta voʼone li Asere», mu stakʼ xbatsʼi naki li ta chʼulnae. Jnoptik xa noʼox ti kʼu to van yepal chakʼ yipal Ana ti chkʼot skotol kʼakʼal ta chʼulnae, ti te oy kʼalal chakʼik matanal ta sobe xchiʼuk ti te oy kʼalal to mal kʼakʼal ti kʼalal chakʼik matanal xtoke. Pe ti tsots laj yakʼbe yipal ta yichʼel ta mukʼ Diose la staʼo smoton, yuʼun jaʼo te oy kʼalal yikʼojik batel neneʼ Jesús li José xchiʼuk María sventa chakʼik ta stojolal Jeova jech kʼuchaʼal chal li Mantale. Kʼalal laj yil Jesús li Anae, «la stojbe ta vocol ec li Diose yuʼun ital xa li Jcoltavaneje. Tsʼacal to lic spucbe scʼoplal li olole, laj yalbe scotol xchiʼiltac tey ta Jerusalén, jaʼ li bochʼotic smalaoj ti chcolique» (Lucas 2:22-24, 36-38, Achʼ Testamento, ta skʼop Chenalhó; Números 18:6, 7).
5, 6. ¿Kʼuxi chakʼ ta ilel epal ermanoetik avi ti oy xa sjabilalik ti jech yoʼontonik kʼuchaʼal Anae?
5 Li avi eke oy ep ermanoetik ti oy xa sjabilalik kʼuchaʼal Ana ti chkʼotilanik ta tsobajele, ti ta sjunul yoʼonton tspasik orasion ta sventa li yichʼel ta mukʼ Jeovae xchiʼuk ti oy tajmek ta yoʼontonik xcholel li lekil aʼyeje. Jun ermano ti x-echʼ xa 80 sjabilal ti yakʼojbe yipal tsobajel xchiʼuk yajnile, xi chale: «Nopem xa xkaʼikutik ti chi kʼotilankutik ta tsobajele, mu jkʼan yan bu xi batkutik. Ta jkʼan te oyunkutik ti bu oy li yajtuneltak Jeovae. Jaʼ te ti bu jun koʼonton chkaʼikutike», xi. ¡Jun skʼelobil ti tstij tajmek koʼontontike! (Hebreos 10:24, 25.)
6 «Mi jaʼ sventa mantal xchiʼuk mi xuʼ kuʼune, persa onoʼox chi bat.» Jaʼ onoʼox jech chal jun jchʼunolajel meʼonal ants ti Jean sbie, ti 80 xa sjabilale. «Veno, ta onoʼox xkat koʼonton bakʼintik, pe ¿kʼu yuʼun chkakʼbe yat yoʼonton yantik ta skoj ti chkat koʼontone?», xi. Vaʼun, xmuyubaj noʼox sat chkʼelvan, yuʼun chakʼ ta ilel ti xmuyubaj ta svulaʼanel yantik lumetike sventa chbat ta tsobajeletik ta sventa mantal ti tstsatsubtas oʼontonale. Ta jun xanbal ti jaʼ to aye, xi laj yalbe li buchʼutik tee: «Mu xa jkʼan jkʼel li kʼusitik kʼupilik sba ta ojtikinele. ¡Li kʼusi ta jkʼane jaʼ ti chi lokʼ ta chol mantale», xi. Manchuk mi mu snabe skʼop li krixchanoetik tee, la stijbe yoʼonton ta mantal jlom. Jech noxtok, manchuk mi persa la xchan yan kʼop xchiʼuk ti jun ora chjalij sventa chkʼot li ta tsobajeletike xchiʼuk ti jun ora tsut-o xtoke ep jabiletik la skolta jun tsobobbail ti tskʼan koltaele.
Akʼo abtejuk-o li anopbene
7. ¿Kʼuxi laj yakʼ ta ilel ta syijubel Moisés ti oy ta yoʼonton chnopaj batel mas ta stojolal Diose?
7 Ch-echʼ jabiletik sventa ta jchantik li kʼusitik ta jkuxlejaltike (Job 12:12). Pe li chʼiel ta mantale, mu jechuk noʼox chtal stuk manchuk mi mol-meʼelutik xa. Jech oxal chaʼa, mu jaʼuk noʼox jtojobtas-o jbatik echʼel ta jkuxlejaltik ta sventa li kʼusi jchanojtik ta voʼne kʼuchaʼal tukʼil yajtunelutik Diose, moʼoj, yuʼun skʼan ti x-epajuk batel jpʼijiltik kʼalal ch-echʼ batel jabilaltike (Proverbios 9:9). Oy xaʼox 80 sjabilal li Moisés kʼalal vaʼanat yuʼun Jeova ta skoltael li steklumale (Éxodo 7:7). Li ta skʼakʼalil taje, mu skotolikuk tsta jech sjabilalik, yuʼun xi la stsʼiba li Moisese: «Jaʼ noʼox lajuneb xchanvinic (70) jabil ti xuʼ chicuxicutique; li bochʼo toj lec tsotsique xuʼ chcʼotic cʼalal ta chanvinic (80) jabil», xi (Salmo 90:10). Akʼo mi jech, li Moisese muʼyuk bu toj mol laj yaʼi sba, ti mu xa kʼusi xchan chaʼie. Kʼalal echʼ jaylajunebuk jabil ti la spasbe yabtel Diose, ti la skʼupin ep matanaletike xchiʼuk ti tsots kʼusitik la sbain spasele, xi la skʼanbe vokol li Jeovae: «Albun caʼay scotol li cʼusitic chapanbil avuʼune yuʼun jech ta jpat coʼnton ta atojol», xi (Éxodo 33:13). Li Moisese oy onoʼox-o ta yoʼonton chnopaj batel mas ta stojolal li Jeovae.
8. ¿Kʼuxi laj yakʼ abtejuk-o snopben Daniel ti mas xaʼox ta 90 jabil yichʼoje, xchiʼuk kʼusi kʼot ta pasel ta skoj?
8 Li loʼil ta Vivliae chal kaʼitik ti j-alkʼop Daniele, solel yakal to chchan batel li chʼul tsʼibetike, manchuk mi mas xaʼox van ta 90 sjabilal. Li kʼusi laj yil li ta «jpoc vun» tskʼele —ti te van skʼoplal Levítico, Isaías, Jeremías, Oseas xchiʼuk Amós— jaʼ tijbat-o yoʼonton ta skʼoponel Jeova ta sjunul yoʼonton (Daniel 9:1, 2, Ch). La stakʼ li Diose, laj yalbe skʼoplal svuleb Mesías xchiʼuk li kʼusi chkʼot ta pasel ta stojolal li yichʼel ta mukʼ Jeova ta tsʼakale (Daniel 9:20-27).
9, 10. ¿Kʼusi spasoj jlom ermanoetik sventa x-abtej-o li snopbenike?
9 Jech kʼuchaʼal li Moisés xchiʼuk Daniele, abtejuk-o me kuʼuntik li jnopbentik kʼalal chkakʼ ta koʼontontik li kʼusitik ta sventa Dios yoʼ to xi jtojobe. Jaʼ me jech yakal tspas ep ermanoetik. Worth, jun jkʼelvanej yajtsʼaklom Cristo ti 80 xa sjabilale, yakʼoj ta yoʼonton slajesel li veʼlil ta mantal ti chakʼ li «jʼabtel ti jun [tukʼ, NM] yoʼnton [...] ti lec bije» (Mateo 24:45). Xi chal kaʼitike: «Ti kʼusie, yuʼun toj lek chkil li mantale, solel xmuyubaj noʼox koʼonton kʼalal chkil ti yantik xakʼ batel mas xojobale», xi (Proverbios 4:18). Fred, ti mas xa ta 60 jabil chtun ta tsʼakal orae, toj lek chaʼi ti chloʼilaj xchiʼuk yan ermanoetik ta sventa Vivlia. «Skʼan lek kuxul ta jol li Vivliae, xi. Kʼalal kuxul chkiltik li Vivliae, jaʼ xkaltik, ti oy sbalil chkiltike, ti chkiltik kʼuxi stsakoj skʼoplal xchiʼuk li “lequil chanubtasel” ta jchantike, toj lek me, yuʼun maʼuk noʼox jecheʼ kʼusi oy ta joltik. Chkiltik kʼuchaʼal kʼupil tonetik ti tstsʼak sba sventa tspas ta jun alakʼ sba natsʼile», xi (2 Timoteo 1:13.)
10 Maʼuk me smelolal ti mu xa kʼusi xuʼ jchantik kʼusi tsotsik ta aʼyel ti kʼalal malubemutik xae. Oy krixchanoetik ti yichʼojik xa 60, 70 o ti 80 xa sjabilalike, vaʼun xchanojik to skʼelel xchiʼuk stsʼibael vun. Yantike xchanojik yan kʼop, jech kʼuchaʼal spasoj jlom yajrextikotak Jeova sventa chalbeik lekil aʼyej li krixchanoetik ti yantik-o slumalike (Marcos 13:10). Li Harry xchiʼuk yajnile yichʼojik xaʼox 70 jabil ti kʼalal la snop chcholik mantal ta portugués kʼope. «Ti xkaltik ta jamale —xi chal—: mas xa onoʼox tsots ta pasel kʼusiuk abtelal ti kʼalal yijutik xae», xi. Manchuk mi jech, laj yakʼbeik yipal xchiʼuk tsots kuch batel yuʼunik, vaʼun chakʼik xa chanubtasel ta Vivlia xchaʼvoʼalik li ta portugués kʼope. Jech noxtok, li ermanoe oy xa sjabilal ti chetʼes mantal ta mukʼta tsobajel ta oxib kʼakʼal li ta kʼop taje.
11. ¿Kʼu yuʼun chkalbetik skʼoplal ti kʼusi kʼotem ta pasel yuʼun jlom ermanoetik ti yijik xae?
11 Ta melel, mu jkotoltikuk ti mu masuk jnaʼ xi j-ipajutike xchiʼuk ti lek noʼox jkuxlejaltik sventa jpastik taje. ¿Kʼu yuʼun yakal chkalbetik skʼoplal chaʼa ti kʼusi kʼotem ta pasel yuʼun jlom ermanoetik ti yijik xae? Maʼuk ta jkʼan ta xkaltik ti yuʼun persa skʼan jech jpastik eke, moʼoj. Li kʼusie chaʼa, jaʼ ti jtamtik echʼel li kʼusi la stsʼiba jtakbol Pablo ta stojolal li j-hebreoetik ti jaʼ yajtsʼaklomtak Cristoe, ti jaʼ skʼoplal li tukʼil jkʼelvanejetike: «Qʼuelo avilic cʼusi lec la staic ta sventa li cʼusi lec la spasique. Jaʼ chanbeic cʼu xʼelan li xchʼunojel yoʼntonique» (Hebreos 13:7). Kʼalal chkiltik ti oy lek ta yoʼontonik mantal li ermanoetik ti oy xa sjabilalike, solel ta jkʼan ta jchanbetik li xchʼunel yoʼontonik ti lek tsotse ti jaʼ ti kʼusi chtijbat-o yoʼonton chtunik ta stojolal Diose. Harry ti yichʼoj xa 87 jabile, chal kaʼitik ti kʼusi tijbat-o yoʼontone: «Ta jkʼan lek ta jtunes ti jayib to jabil kuxulun ta spasbel yabtel li Jeovae», xi. Fred, ti laj xa onoʼox kalbetik skʼoplale, jun yoʼonton tspas yabtel ta Betel. «Skʼan me jkʼeltik kʼuxi xuʼ lek chi jtun ta stojolal Jeova xchiʼuk ti mu me xi jsut ta valopate», xi chal kaʼitik.
Tukʼik-o manchuk mi chjel li kʼusitik ta xkuxlejalike
12, 13. ¿Kʼuxi laj yakʼ ta ilel Barzilai ti yichʼoj ta mukʼ Dios manchuk mi jel li kʼusitik ta xkuxlejale?
12 Tsots onoʼox ta tsʼikel batel ta jkuxlejaltik li vokolaletik ta skoj malubele. Manchuk mi jech, xuʼ me chkakʼtik ta ilel ti kichʼojtik ta mukʼ li Diose. Li Barzilai jgalaad vinike, toj lek me kʼusi xuʼ jchantik ta stojolal ta sventa li kʼusi laj kaltike. Kʼalal 80 jabil xaʼox yichʼoj li vinik taje, laj yakʼ ta ilel ep slekil yoʼonton ta stojolal David xchiʼuk yajsoltarotak; laj yakʼanbe sveʼel xchiʼuk bu xuʼ chvayik ti kʼalal jaʼo tsaʼ kʼop li Absalone. Kʼalal yakal tsut batel ta Jerusalén li Davide, li Barzilaie la xchiʼin batel li David xchiʼuk li sviniktake, te to ta yukʼumal Jordán bat yakʼ, jaʼ te ti bu albat yuʼun li ajvalil ti akʼo xbate xchiʼuk ti xkʼot ta yaj-abtel li ta snail pasobmantal yuʼune. Li Barzilaie xi la stakʼe: «Quichʼoj xa chanvinic (80) jabil ta ora. Ichʼay xa smuil li cʼusi ta jtune. Mu xa xuʼ chcal me mu, me muc muuc. Jech noxtoc mu xa xcaʼay lec cʼalal chqʼuejinic li vinic antsetique [...]. [Pe] liʼ oy li jnichʼon Quimame. Jaʼ bat chiʼino, acʼo tunuc avuʼun. Acʼbo spas li cʼusi oy ta avoʼntone», xi (2 Samuel 17:27-29; 19:31-40).
13 Manchuk mi jel xa batel xkuxlejal li Barzilai ta skoj li malubele, la spas skotol ti kʼuyepal xuʼ yuʼun ta skoltael li ajvalil biiltasbil yuʼun Jeovae. Manchuk mi mu xa xaʼibe smuil li kʼusi tslajese xchiʼuk ti mu xa xaʼi lek kʼoponele, muʼyuk bu xat yoʼonton, moʼoj, yuʼun ti kʼusie ta slekil yoʼonton la stak batel li Quimame sventa jaʼ xichʼ li kʼusi ox ch-akʼbate, vaʼun jaʼ jech laj yakʼ ta ilel ti kʼuyelan stalelale. Oy ep mol-meʼeletik ti jech yoʼontonik kʼuchaʼal taje, ti chakʼ kʼusi oy yuʼunik xchiʼuk ti muʼyuk bu smalaojbeik xkʼexole. Ti bu kʼalal xuʼ yuʼunike, tskolta sbaik ta spasel li kʼusitik ta sventa yichʼobil ta mukʼ Jeovae, snaʼojik ti «yuʼun jaʼ li matanal toj lec chil Diose». ¡Jaʼ jun mukʼta bendision ti oy ta jtojolaltik tukʼil ermanoetike! (Hebreos 13:16.)
14. ¿Kʼu yuʼun chakʼbe mas sbalil li kʼusi chal Salmo 37:23-25 ti jech ta smalubel xa la stsʼiba li Davide?
14 Ti jech echʼ batel li jabiletike, li David eke ep ta velta jel li kʼusitik ta xkuxlejale. Pe oy kʼusi tsots la spat-o yoʼonton: snaʼoj onoʼox ti muʼyuk chjel stalelal li Jeovae ti oy onoʼox ta yoʼonton ta xchabi li tukʼil yajtuneltake. Kʼalal poʼot xaʼox xcham li Davide, la smeltsan li kʼejimol te ta jtatik ta Salmo 37. Nopo avaʼi taje. Li Davide yakal snopbe skʼoplal Jeova xchiʼuk yakal stijel yarpa kʼalal xi laj yale: «Li Mucʼul Diose jaʼ tstuqʼuibtasbe batel yacan ta xanubal li cristianoetique; jaʼ sventain batel ta sbe xanebic. Cʼalal chjachʼe, muc teuc mochol chcom o, yuʼun te tsacbil yuʼun li Mucʼul Diose. Queremun toʼox, pero tana chimalub xa. Muʼyuc bu laj quil ti oy tscomtsanat stuc li bochʼo tucʼ yoʼntone; muʼyuc bu laj quil ti ch-ochic ta cʼan limosna li yalab xnichʼnabe», xi (Salmo 37:23-25). Li Jeovae lek laj yil ti akʼo xichʼ albel skʼoplal smalubel David li ta Salmo taje, jech oxal toj ep sbalil chkʼot li kʼusi laj yal ta sjunul yoʼontone.
15. ¿Kʼusi xuʼ jchanbetik Juan ti tukʼ laj yakʼ sba kʼalal jel kʼusitik ta xkuxlejale xchiʼuk ti kʼalal imalube?
15 Li jtakbol Juane toj lek ta chanbel stalelal ek, yuʼun tukʼ laj yakʼ sba kʼalal jel li kʼusitik ta xkuxlejale xchiʼuk kʼalal imalube. Kʼalal tun xaʼox van jutuk mu 70 jabil ta stojolal Diose, ikʼe batel ta bikʼit balumil ti kakal ta nabe, Patmos sbi, chuke «ta scoj li scʼop Diose, xchiʼuc ta scoj ti laj [y]albe scʼoplal li Jesucristoe» (Apocalipsis 1:9). Pe muʼyuk toʼox bu lajem li yabtele. Jech, skotol li kʼusitik la stsʼiba Juan ti kʼotemik ta stsʼak Vivliae jaʼo la stsʼiba ti kʼalal mol xaʼox tajmeke. Kʼalal jaʼo te oy ta Patmose, akʼbat yil li kʼusitik toj labal sba ta Apocalipsise, vaʼun lek la stsʼibaan komel (Apocalipsis 1:1, 2). Jech kʼuchaʼal chʼunbile, li ajvalil ta Roma ti Nerva sbie, laj la skolta li Juane, vaʼun leʼ xa van ta 98 ti oy xaʼox van ta 90 o ta 100 batel sjabilale la stsʼiba li Evanjelioe xchiʼuk li oxib kartaetik ti yichʼoj sbie.
Mu xtupʼ skʼoplal ti kuchem tal yuʼunike
16. ¿Kʼuxi xuʼ chakʼik ta ilel ti yichʼojik ta mukʼ Jeova li buchʼutik mu xa xuʼ xkʼopojik leke?
16 Jelajtik stsatsal li vokolaletik ta jnuptantik ti mu xakʼ kʼusitik jpastike. Jech kʼuchaʼal jlom ermanoetike mu xa xuʼ xkʼopojik lek, pe taje maʼuk me skʼan xal ti mu xa xichʼik ta kʼux li svinajeb ti kʼanbilik tal yuʼun li Jeovae xchiʼuk ti yilojbeik slekil yoʼontone. Manchuk mi mu epuk kʼusi x-al yuʼunik li ta yeike, xi chalbeik ta yoʼontonik li Jeovae: «Li vuʼune toj lec jcʼanoj ta jyalel li amantaltaque; jaʼ batem o coʼnton snopilanel sbejel cʼacʼal», xiik (Salmo 119:97). Li Jeova eke xojtikin li buchʼutik «jaʼ noʼox [ch-ichʼat] ta muqʼue» xchiʼuk chil ti jelelik ta jutuk mu skotoluk li krixchanoetik ti mu jutebuk oy ta yoʼontonik li smantale (Malaquías 3:16; Salmo 10:4). ¡Toj echʼem xa noʼox tspat koʼontontik snaʼel ti xmuyubaj noʼox Jeova ta sventa li kʼusi ta jnop ta koʼontontike! (1 Crónicas 28:9; Salmo 19:14.)
17. ¿Kʼusi stuk noʼox jech matanal staojik li buchʼutik jal xa tunemik tal ta stojolal Diose?
17 Skʼan me jnaʼtik ti buchʼutik oy xa ta sjaylajunebal jabil tukʼ tunemik tal ta stojolal Jeovae, oy jun mukʼ smoton staojik ti mu stakʼ tael ta jech noʼoxe: jaʼ ti mu xtupʼ skʼoplal ti kuchem tal yuʼunike. Xi laj yal li Jesuse: «Me jun avoʼnton chcuch avuʼunique, chacolic», xi (Lucas 21:19). Toj tsots skʼoplal ti xkuchuk kuʼuntike yoʼ jech jtatik li kuxlejal sbatel osile. Li voʼoxuk ti «chapasic cʼusitic tscʼan li Diose» xchiʼuk ti tukʼ-o avoʼonton avakʼoj abaik ta sjunul akuxlejalike, xuʼ me ta sjunul avoʼonton xa malaik ti «cʼusi yaloj [ta melel] Dios [chakʼboxuke]» (Hebreos 10:36).
18. 1) ¿Kʼusi alakʼ sba chil Jeova ta stojolal li buchʼutik malubemik xae? 2) ¿Kʼusi ta jkʼeltik li ta yan xchanobile?
18 Li Jeovae toj ep sbalil chil li abtelal tspas ta sjunul yoʼontonik li buchʼutik malubemik xae, mu ventauk mi ep o mi jutuk. Kʼusiuk ti tsnuptan «li jbecʼtal[tike], pero li coʼnton[tike] yantic ch-ayin stsatsal ta jujun cʼacʼal» (2 Corintios 4:16). Lek jnaʼojtik ti ep tajmek sbalil chil Jeova li kʼusi apasojik ta voʼnee, pe lek jamal ta kʼelel xtok ti ep sbalil chil li kʼusi yakal cha pasik avi ta sventa li sbie (Hebreos 6:10). Li ta yan xchanobile ta jkʼeltik ti chjalij sbalil kʼalal to ta jelavel li atukʼilalike.
¿Kʼusi cha takʼ?
• ¿Kʼusi toj lek xuʼ xchanik ta stojolal Ana li yajtsʼaklomtak Cristo avi ti oy xa sjabilalike?
• ¿Kʼu yuʼun mu persauk jaʼ tsmakutik ta spasel kʼusitik li malubele?
• ¿Kʼuxi xuʼ chakʼilanik ta ilel ti yichʼojik ta mukʼ Dios li buchʼutik oy xa sjabilalike?
• ¿Kʼu yelan chil Jeova li yabtel tspasik li buchʼutik oy xa sjabilalike?
[Lokʼol ta pajina 23]
Mol xaʼox li Daniel ti kʼalal laj yil ta «jpoc vun» ti kʼu sjalil chlokʼesatik ta Judá li judioetike
[Lokʼol ta pajina 25]
Ep mol-meʼeletike toj lek ta chanbel stalelalik, yuʼun yakʼojbeik yipal tsobajel, xcholel mantal ta sjunul yoʼontonik xchiʼuk oy ta yoʼontonik xchanel mas