¿Mi xvul ta ajol?

¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

• ¿Kʼusi vokolil tsnuptanik li yajtsʼaklomtak Cristo ti jaʼ to nupunemike, xchiʼuk kʼusi skʼan spasik?

Jlome chakʼik venta ti mu parejoikuk xchiʼuk li xchiʼilike. Pe skʼan xakʼbeik yipal ti mu me sokes li snupunelike, yuʼun maʼuk me slekil chapanobil kʼop li xtuchʼel nupunel mi mu jechuk kʼuchaʼal chal li Vivliae (15/4, pajina 17).

• ¿Kʼusi vokolil tsnuptanik li ermanoetik ti te nakalik ta snail mol-meʼeletike?

Yikʼaluk van ti bu xkom li snail mol-meʼeletike jaʼ te ti bu chcholik mantal yan tsobobbaile. Jech xtok, li ta snail mol-meʼeletike yikʼaluk van ep krixchanoetik ti yan-o kʼusitik xchʼunojik ta sventa relijione, jaʼ yuʼun yikʼaluk van ch-akʼbat spasik li kʼusitik sventa yan relijione. Li yutsʼ yalalik ti jaʼik yajtsʼaklomtak Cristoe xchiʼuk li buchʼutik te ta tsobobbail te noʼoxe, skʼan me oyuk ta sjolik li vokoliletik taje xchiʼuk ti skoltaik li mol-meʼeletike xchiʼuk ti xchabiike (15/4, pajina 25-27).

• ¿Kʼusi chantos tojobtasel xuʼ xkoltaatik ta xchapanel skʼopik li nupul-tsʼakaletike?

Sabo yorail sventa xa loʼiltaik li akʼopike (Ecl. 3:1, 7). Lekuk jamal xaval li kʼusi cha nope xchiʼuk ichʼvanan me ta mukʼ (Efe. 4:25). Chikintao li kʼusi chal achiʼile xchiʼuk akʼo persa ta yaʼibel smelolal li kʼusi oy ta yoʼontone (Mat. 7:12). Nopik kʼuxi xuʼ xa chapanik xchiʼuk jmoj xa abtejik ta sventa taje (Ecl. 4:9, 10) (wp 07-09, pajina 10-12).

• ¿Kʼusi ti vakib komiteetik yuʼun Jtsop Jbeiltasvaneje?

Bankilal yuʼun Komiteetik, Komite ti tskʼelbe skʼoplal Buchʼutik chtunik ta Betele, Komite sventa Vunetik, Komite sventa Chol mantal, Komite sventa Chanubtasel xchiʼuk Komite Sventa stsʼibael vunetik (15/5, pajina 29).

• ¿Buchʼutik la spas li kʼusi chal Romanos 1:24-32? ¿Jaʼ li judioetike o mi jaʼ li yan krixchanoetike?

Xuʼ jaʼ skʼoplal xchaʼvokʼalik, pe li Pabloe jaʼ laj yalbe skʼoplal ta melel li j-israeletik ta voʼne ti oy jayibuk siglo ti muʼyuk la xchʼunik Mantale. «Acʼo me snaʼic ti yaloj Dios chʼayel chbatic li bochʼotic jech tspasique», pe muʼyuk laj yakʼ ta xkuxlejalik li Mantale (15/6, pajina 29).

• ¿Kʼu yuʼun jaʼ ta jkʼupintik-o mas spasbel yabtel Dios ti kʼalal jaʼ noʼox ta jpastik ti kʼu yepal xuʼ kuʼuntike?

Mi ta jkʼan ta jtatik ta jyalel li kʼusi mu onoʼox jtatike ta me xlik jvul-o koʼontontik. Melel onoʼox xtok un, taje maʼuk me skʼan xal ti chkichʼ jbatik ta jyalel ta kʼuxe. Ti jaʼ xa ta jtunes jvokoltik sventa ta jpak-o jkʼoplaltik sventa mu xa masuk xi jlokʼ ta chol mantal ti akʼo mi xuʼ to kuʼuntik jutukuke (15/7, pajina 29).