Akʼik «persa ti muʼyucuc cʼop avuʼunic achiʼuquic scotol cristianoetique»
«Li cʼusi oy ta aventaic ti me xuʼe, jaʼ ti acʼo avaqʼuic persa ti muʼyucuc cʼop avuʼunic achiʼuquic scotol cristianoetique.» (ROM. 12:18)
1, 2. 1) ¿Kʼusi pʼijubtasel laj yakʼbe yajtsʼaklomtak li Jesuse? 2) ¿Bu xuʼ jtatik lekil tojobtaseletik sventa jnaʼtik kʼusi stakʼ jpastik kʼalal chkiltik kontrainele?
LI JESUSE la spʼijubtas li yajtsʼaklomtak ti chkontrainatik yuʼun li balumile, taj une la xchapbe lek smelolal kʼu yuʼun jech kʼalal jun xaʼox akʼobal skʼan xchame. «Ti coʼoluc to chapas achiʼuquic li cristianoetic ti oyic ta sventa banamile —xut li yajtakboltake—, lec chaʼyic ti jechuque, yuʼun jaʼ jech tscʼanic. Pero li voʼoxuque muʼyucoxuc xa ta sventa banamil, yuʼun laj xa jtʼujoxuc loqʼuel, jaʼ yuʼun bajbil chacʼotic.» (Juan 15:19.)
2 Li Pabloe laj yil stuk ti melel li kʼusi laj yal Jesuse. Li ta xchibal skarta ti la stakbe echʼel li skerem chiʼil ta chol mantal ti jaʼ li Timoteoe, xi laj yalbee: «Li voʼote, jaʼ achʼunoj ti cʼu xʼelan lichanubtasvane, ti cʼu xʼelan jtalele, li cʼusi oy ta coʼntone, ti cʼu xʼelan jchʼunoje, li smucʼul coʼntone, ti lec chicʼanvane, xchiʼuc ti chcuch cuʼun scotole, xchiʼuc ti cʼu xʼelan icuch cuʼun scotol utsʼintael xchiʼuc vocole». Vaʼun xi to laj yale: «Li bochʼo scotol yoʼnton chtun o yuʼun li Jesucristoe ta onoʼox xichʼ ep utsʼintael» (2 Tim. 3:10-12). Li ta kapitulo 12 ta skarta sventa Romanose te laj yal lekil tojobtaseletik sventa jnaʼtik kʼusi stakʼ jpastik kʼalal chkiltik kontrainele. Li tojobtaseletik taje xuʼ me toj jtunelik kuʼuntik ek li avi ta slajebal kʼakʼale.
«Aqʼuic persa spasel cʼusi lec»
3, 4. Li kʼusi chal Romanos 12:17, ¿kʼuxi xuʼ xichʼ pasel 1) li ta utsʼ-alaliletik ti maʼuk jchʼunolajel li malalil o li ajnilale? 2) ta sventa li jlakʼnatike?
3 (Kʼelo Romanos 12:17.) Li Pabloe laj yal ti mu stakʼ jpakbetik sutel li buchʼu chopol kʼusi tspasbutike. Li tojobtasel taje jaʼ mas toj jtunel yuʼun li yajtsʼaklom Cristo ti maʼuk yajrextiko Jeova li snup xchiʼile. Li yajtsʼaklom Cristoe skʼan me spajes sba ta yalel li kʼusitik kʼuxik ta aʼyele o li kʼusitik tspas ti chakʼ ta ilel ti mu sventa-o xchiʼile. Muʼyuk kʼusi chichʼ tael ti chichʼ pakel sutele, moʼoj, kʼajomal noʼox chlik-o mas kʼop.
4 Xi chal mantal li Pabloe: «Aqʼuic persa spasel cʼusi lec ta stojol scotol cristianoetic». Mi chopol kʼusitik chal li jun vinik ti maʼuk jchʼunolajel ta sventa li kʼusitik xchʼunoj yajnile, xuʼ mu xlik tsots kʼop mi ta slekil yoʼonton tstsak ta mukʼ smalal li ermanae (Pro. 31:12). Li Carlos ti chtun ta Betele, xvul to ta sjol ti kʼuxi tsal yuʼun smeʼ ti chkontrainvan li stote, laj yakʼ ta ilel slekil yoʼonton xchiʼuk laj yakʼ ta yoʼonton ta skʼelel lek li yut snae. «Li jmeʼkutike laj yalbunkutik ti skʼan xkichʼ ta mukʼ li jtotkutike —xi chal li Carlose—. Xchiʼuk chalilanbun ti akʼo xi tajin xchiʼuk ta jtos tajimole. Veno, pe muʼyuk bu toj lek chkil li tajimol taje, yan li jtote jaʼ chlekub-o yoʼonton.» Ta mas tsʼakal une lik xchan Vivlia li stot Carlose, vaʼun laj yichʼ voʼ. Li yajrextikotak Jeovae tsalem yuʼunik li kʼusi chopol tspasbatik ta skoj ti mu x-ojtikinatike, jaʼ koltavanem ti «[chakʼik] persa spasel cʼusi lec ta stojol scotol cristianoeti[ke]». Jech kʼuchaʼal liʼe, tskolta slakʼnaik kʼalal chil svokolik ta nojelal ta voʼ, nikel o yan kʼusitik.
«Chlic qʼuexovuc avuʼun» vaʼun jaʼ xa muʼyuk chkontrainvan-o
5, 6. 1) ¿Kʼuxi ti ta jtokanbetik «tsanal akʼaletik» ta sjol li buchʼu tskontrainutike? 2) Albo skʼoplal mi oy buchʼu la spas li kʼusi chal Romanos 12:20 xchiʼuk ti lek kʼusi kʼot pasel yuʼune.
5 (Kʼelo Romanos 12:20.) Kʼalal la stsʼiba Pablo li versikulo liʼe yikʼaluk van jaʼ yakal tsnopbe skʼoplal li kʼusi chal Proverbios 25:21, 22: «Me ta xviʼnaj li avajcontrae, acʼbo sveʼel; me taquin yoʼntone, acʼbo voʼ yuchʼ. Jech chlic qʼuexovuc avuʼun; jaʼ Mucʼul Dios chayacʼbot atojol». Ta sventa li yan tojobtaseletik chakʼ Pablo ta kapitulo 12 ta Romanose mu me stakʼ jnoptik ti skʼan xkakʼbetik yil svokol li buchʼu tskontrainutik ti kʼalal «te chlic qʼuexovuc avuʼun», ti xie. Li jpʼel kʼop «te chlic qʼuexovuc avuʼun» ti xie, ti jech jelubtasbil li ta versikulo taje, li ta griego kʼope jaʼ skʼan xal «cha tokanbe tsanal akʼaletik ta sjol», xi. Taje jaʼ jun lokʼolkʼop ti chalbe skʼoplal kʼuyelan chunijesik takʼin li krixchanoetik ta voʼnee. Li Charles Bridges ti chchanbe skʼoplal Vivlia ta siglo 19, xi la stsʼibae: «Maʼuk noʼox xa kajanik ta ba kʼokʼ li tsatsal takʼine; tokanbeik tsanal akʼaletik ta sba sventa xkʼakʼub ta olon xchiʼuk ta akʼol. Toj jutuk maʼ tsatsal oʼontonal ti mu x-unij ta xkʼixnal oʼontonal ta skoj li kʼanelal ti xmalaj yuʼune, ti oy kʼusi tstsʼik sba ta spasele xchiʼuk ti toj echʼ xa noʼox xtiltune».
6 Li kʼusitik ta jpastik ta slekil koʼontontike xkoʼolaj kʼuchaʼal «tsanal akʼaletik» ti xuʼ tskʼunijesbe yoʼonton li kajkontratike xchiʼuk xuʼ «chunijesbe» li simaronile. Xuʼ me xjel-o li kʼusi tsnop krixchanoetik ta sventa li steklumal Jeovae xchiʼuk ta sventa li aʼyej ta Vivliae. Xi la stsʼiba li jtakbol Pedroe: «Lecuc me cʼusi chapasic ta stojol li bochʼotic muʼyuc yichʼojic ta mucʼ Diose. Acʼo me chal acʼoplalic ti chopol cʼusi chapasique, pero cʼalal chilic ti lec cʼusitic chapasique, chalbeic slequilal Dios ti cʼalal chtal chapanvanuque» (1 Ped. 2:12).
Akʼik «persa ti muʼyucuc cʼop avuʼunic achiʼuquic scotol cristianoetique»
7. 1) ¿Kʼusi jun oʼontonal chakʼbe yajtsʼaklomtak li Jesuse? 2) ¿Kʼusi tstij koʼontontik ta spasel li jun oʼontonal taje?
7 (Kʼelo Romanos 12:18.) Xi laj yalbe yajtakboltak li Jesús kʼalal slajeb xaʼox akʼobal te xchiʼuke: «Ta xcacʼboxuc comel jun avoʼntonic. Li jun oʼntonal oy cuʼune jaʼ ta xcacʼboxuc comel» (Juan 14:27). Li jun oʼontonal chakʼbutik Cristoe jaʼ skʼoplal ti mu noʼox kʼusi xal koʼontontik ta skoj ti jnaʼojtik ti skʼanojutik xchiʼuk sTote xchiʼuk ti lek chilutike. Ti jun oʼontonal taje jaʼ me tskoltautik ti muʼyukuk kʼop kuʼuntik xchiʼuk li buchʼutik ta jpat jxokontike. Li melel yajtsʼaklomutik Cristoe maʼuk noʼox jkʼanojtik ti chʼabaluk kʼope, moʼoj, yuʼun ta jkʼeltik kʼusi stakʼ jpastik sventa ta jsaʼtik li lekilale (Mat. 5:9).
8. ¿Kʼusi stakʼ jpastik sventa jsaʼtik lekilal li ta kutsʼ kalaltik xchiʼuk ta tsobobbaile?
8 Jtos ti kʼuyelan stakʼ jpastik sventa jsaʼtik li lekilale jaʼ ti jchapantik ta anil li kʼopetik chlik ta kutsʼ kalaltike, taje jaʼ me chkoltavan sventa mu stsatsaj li kʼope (Pro. 15:18; Efe. 4:26). Taje jaʼ me jech skʼan jpastik li ta tsobobbaile. Li jtakbol Pedroe laj yal ti persa skʼan jpajes ketik sventa chʼabaluk kʼop kuʼuntike (1 Ped. 3:10, 11). Li Santiago eke pʼijubtasvan ti xibal sba kʼalal chopol ta jtunes li kokʼtike, xchiʼuk laj yalbe skʼoplal xtok ti mu xi j-itʼixaje xchiʼuk ti mu xkutilan jbatike. Laje xi to laj yale: «Li jbijiltic chlic tal ta stojol Diose, lec scotol cʼusitic ta jpastic yuʼun. Jech noxtoc mu jliquestic cʼop, oy ta coʼnton jchiʼiltic, oy slequil coʼntontic; chijcʼuxubinvanutic, muc tʼujbiluc noʼox bochʼo chquichʼtic ta mucʼ, xchiʼuc muc jaʼuc noʼox ta jmactic satil. Li bochʼotic chacʼ persa ch-abtejic ta sventa acʼo muʼyucuc cʼope, jun yoʼnton scʼajbe sat li yabtelique, jaʼ li cʼusi tuqʼue» (Sant. 3:17, 18).
9. ¿Kʼusi skʼan oyuk ta joltik akʼo mi ta jkʼantik ti «muʼyucuc cʼop [kuʼuntik xchiʼuk] scotol cristianoetique»?
9 Li ta Romanos 12:18 te chal Pablo ti mu la jaʼuk noʼox chʼabaluk kʼop kuʼuntik li ta kutsʼ kalaltik xchiʼuk ta tsobobbaile. Yuʼun laj yal ti skʼan jechuk jpastik ta «scotol cristianoetique», ti jaʼik li jlakʼnataktike, li jchiʼiltaktik ta abtel, ta chanun xchiʼuk li krixchanoetik ti ta jcholbetik mantale. Pe li jtakbole la sjambe lek smelolal kʼalal xi laj yale: «Ti me xuʼe» xchiʼuk «li cʼusi oy ta aventai[ke]». Taje jaʼ skʼan xal ti akʼo mi xkakʼtik tajek persa ti bu kʼalal xuʼ kuʼuntik sventa «muʼyucuc cʼop [kuʼuntik xchiʼuk] scotol cristianoetique», maʼuk me skʼan xal ti muʼyuk xa bu ta jtsaktik ta venta li tukʼil beiltasel chakʼbutik Dios sventa oyuk lekilal kuʼuntike.
Jaʼ noʼox xuʼ spak jkʼoplaltik li Jeovae
10, 11. ¿Kʼu yuʼun sta-o ti jaʼ akʼo «spac sutel stuc li Diose»?
10 (Kʼelo Romanos 12:19.) Li jun yajtsʼaklom Cristoe «tscʼan tstsʼic yuʼun» ta spasel li kʼusi chopole xchiʼuk oyuk «slequil yoʼnton» ta stojolal li «jtoybaetique», jaʼ xkaltik, li buchʼu mu skʼan xaʼiik li kʼusi chkalbetike o ti tspʼajik ta jyalel li abtel ta jpastike (2 Tim. 2:23-25). Kʼalal laj xaʼox yalbe yermanotak Pablo ti mu spak skʼoplalike, xi laj yalbe mantale: «Acʼbeic spac sutel stuc li Diose». Jaʼ yuʼun li yajtsʼaklomutik Cristoe mu stakʼ jchapan jkʼoplal jtuktik. Xi laj yal li jtsʼibajom yuʼun salmoe: «Comtsanic li ilinele xchiʼuc li scʼacʼal avoʼntonique; mu me xaʼilin, yuʼun xuʼ chopol chbat avuʼun» (Sal. 37:8). Xchiʼuk xi tojobtasvan li Salomone: «Mu me xaval ti voʼot chapac acʼoplal atuque; malao cʼu xʼelan chascoltaot stuc li Mucʼul Diose» (Pro. 20:22).
11 Mi chopol kʼusi tspasbutik li kajkontratike, jaʼ me lek ti akʼo xkakʼbetik ta skʼob Jeova ti akʼo xakʼbe kastigo ti kʼusi ora tskʼane, mi jech oy ta yoʼontone. Xi to laj yal li Pabloe: «Jech tsʼibabil ta scʼop Dios: “Vuʼun oy ta jventa ta xcacʼbe spacol; vuʼun jtuc ta xcacʼbe stoj”, xi li Cajvaltic Diose» (koʼoltaso xchiʼuk Deuteronomio 32:35). Kʼalal voʼotik ta jpak jkʼoplaltike jecheʼ me ta jtikʼ jbatik, yuʼun me jaʼ ta jkʼan ta jtsakbetik li sderecho Jeovae. Jech xtok, jaʼ me skʼan xal ti muʼyuk xchʼunel koʼontontik ta sventa li kʼusi xi yaloje: «Vuʼun jtuc ta xcacʼbe stoj».
12. ¿Kʼuxi xchiʼuk bakʼin chvinaj ti ch-ilin Jeovae?
12 Li ta slikebal skarta sventa Romanose, xi xa onoʼox yaloj li Pabloe: «Lec xvinaj ti ch-ilin tal Dios ta vinajel ta scoj smulic, ta scoj xchopolilic li cristianoetic ti tscʼan tsmaquic ta be cʼusi melel ta scoj li xchopolilique» (Rom. 1:18). Ti ch-ilin li Jeovae te chvinaj tal ta vinajel ta stojolal xNichʼon kʼalal mi tal li «tsots [vokole]» (Apo 7:14, Ch). Taje jaʼ me «svinajeb ti tucʼ cʼusi tspas li Diose», jech kʼuchaʼal laj xa onoʼox xchapbe smelolal Pablo ta yan skartae: «Xlocʼ venta ta xʼacʼbat svocolic yuʼun Dios ti buchʼutic yacal ta xilboxuc avocolic avi tana liʼe. Ti yacaloxuc ta vocol avi tana liʼe, oy bu ta xcʼot scʼacʼalil ta xacʼ acux avoʼntonic xchiʼuc ti vuʼuncutique. Taje, jaʼto mi sta scʼacʼalil ta xchaʼsut talel ti Cajvaltique, xchiʼuc ti yajʼánjeltac ti jelavem xuʼ yuʼunic ti ta xvinaj ta vinajel ti volibil ta leb cʼocʼ ta xyal talele. Ta xtal stsits ti buchʼutic mu laj sbicʼtajes sbaic ta stojol ti Diose, xchiʼuc ti muʼyuc laj xchʼunic ti lequil achʼ cʼop yuʼun ti Cajvaltic Jesucristoe» (2 Tes. 1:5-8, Ch).
Jtsaltik ta sventa kʼusi lek li kʼusi chopole
13, 14. 1) ¿Kʼu yuʼun mu labaluk chkiltik ti chkontrainvan li krixchanoetike? 2) ¿Kʼusi jtos xuʼ jpastik sventa chkakʼbetik bendision li buchʼutik tskontrainutike?
13 (Kʼelo Romanos 12:14, 21.) Ta skoj ti lek jpatoj koʼontontik ti tspas Jeova li kʼusi yaloje, xuʼ me jun noʼox koʼontontik xchiʼuk ti jaʼ xkakʼ ta koʼontontik li abtelal akʼbilutik yuʼun Jeovae: xcholel li «lequil achʼ cʼop scʼoplal ti ventainel yuʼun ti Diose», ti chichʼ pasel «ta sbejel banomil[e]» (Mat. 24:14, Ch). Jnaʼojtik ti tsabe sjol kajkontratik li chol mantal ta jpastike, yuʼun xi onoʼox yaloj li Jesuse: «Bajbil chacʼotic yuʼun scotol cristianoetic ta scoj ti acuchojbicun jbie» (Mat. 24:9). Jaʼ yuʼun mu labaluk chkiltik xchiʼuk muʼyuk bu chi jchibaj-o ti tskontrainutik li krixchanoetike. Xi la stsʼiba li jtakbol Pedroe: «Voʼoxuc ti lec jcʼanojoxuque, mu me chʼayeluc chcʼot avoʼntonic ta sventa li tsatsal vocol chavichʼique, yuʼun jaʼ sventa chichʼ qʼuelel avoʼntonic. Mu me xanopic ti atuquic xa noʼox jech chavichʼic vocole. Jaʼ tscʼan cuxetuc noʼox avoʼntonic, yuʼun coʼol chavichʼic vocol jech chac cʼu chaʼal laj yichʼ vocol li Cristoe» (1 Ped. 4:12, 13).
14 Muʼyuk me te xtiʼet koʼontontik yuʼunik li buchʼutik tskontrainutike, moʼoj, yuʼun ta jkʼan chkakʼbetik xchanik li mantale, yuʼun jnaʼojtik ti junantike mu snaʼik ti kʼusi tspasike (2 Cor. 4:4). Stekel ora ta jchʼuntik li tojobtasel chal Pablo liʼe: «Cʼanbeic bendición li bochʼo chascontrainoxuque. Cʼanbeic slequilalic; mu xacʼanbeic slajel xchamelic» (Rom. 12:14). Jtos ti kʼuxi ta jkʼanbetik bendision li buchʼutik tskontrainutike jaʼ ti jpastik orasion ta stojolalike. Xi laj yal Jesús li ta Mantaletik ta Vitse: «Cʼanic me li avajcontraique. Pasbeic cʼusi lec li bochʼo chayilintaoxuque. Cʼanbeic slequilal li bochʼo ta xchopolcʼoptaoxuque. Cʼopanbeic Dios ta stojol li bochʼo chopol cʼusi chaspasboxuque» (Luc. 6:27, 28). Li jtakbol Pabloe yiloj ta xkuxlejal stuk ti xuʼ spas ta jun tukʼil yajtsʼaklom Cristo li jun jkontrainvaneje xchiʼuk ti xuʼ xkʼot ta jun yajtunel Jeova ti ta sjunul yoʼonton chtune (Gál. 1:13-16, 23). Xi laj yalbe li yermanotak ta Corintoe: «Puru chopolcʼoptael chquichʼcutic, pero li vuʼuncutique puru bendición ta jcʼanbecutic. Ep chquichʼcutic utsʼintael, pero ta jtsʼiccutic. Chopol chiyalbun jcʼoplalcutic, pero ta lequil cʼop ta jcʼopancutic» (1 Cor. 4:12, 13).
15. ¿Kʼusi mas lek xuʼ jpastik sventa jtsaltik ta sventa kʼusi lek li kʼusi chopole?
15 Li melel yajtsʼaklomutik Cristo xtoke chkakʼbetik yipal ti jchʼuntik li tojobtasel chal ta slajeb versikulo ta kapitulo 12 sventa Romanose: «Mu me jaʼuc xastsaloxuc li cʼusi chopole. Jaʼ tsalic ta sventa cʼusi lec li cʼusi chopole». Ti bu chlik talel li choplejale jaʼ ta stojolal li Diabloe (Juan 8:44; 1 Juan 5:19). Li kʼusi akʼbat yil yuʼun Jesús li jtakbol Juane, te laj yal ti tsal xa yuʼunik Diablo li yermanotak tʼujbil chbatik ta vinajele, taje jaʼ «ta sventa xchʼichʼal li Chʼium Chije, xchiʼuc ta sventa ti jamal chali[ke]» (Apo 12:11). Jech kʼuchaʼal chkiltike, ti kʼuxi xuʼ stsal kuʼuntik li Satanás xchiʼuk li kʼusitik chopol chakʼ ta chanel liʼ ta balumile jaʼ ti jcholtik li lekil aʼyeje, taje jaʼ jtos ti kʼusi lek xuʼ jpastike.
Muyubajkutik-o me li spatobil koʼontontike
16, 17. Jech kʼuchaʼal chal kapitulo 12 sventa Romanose, ¿kʼu yelan skʼan 1) xi jkuxi? 2) jpas jtalelaltik ta tsobobbail? 3) jpas jbatik ta stojolal li buchʼutik tspʼajik li abtel ta jpastike?
16 Li kʼusi la jkʼelbetik skʼoplal ta kapitulo 12 ta karta sventa Romanose, ep tajek kʼusitik la svules ta joltik. Te laj kiltik ti ta sjunul koʼontontik ta jtsʼik jvokoltik ta jkuxlejaltik kʼuchaʼal yajtunelutik Jeovae, yuʼun jaʼ tstij koʼontontik li xchʼul espiritu Diose xchiʼuk ti kʼuyelan xi jtojob ta snopele jaʼ laj yakʼ jchʼuntik ti jaʼ jech tskʼan yoʼonton Diose. Jech xtok, ta sjunul koʼontontik chi jtun ta sventa li chʼul espiritue xchiʼuk baxbolutik kʼuyelan ta jtunestik ti kʼusi xi jtojob spasele. Bikʼit chkakʼ jbatik xchiʼuk jnaʼtik ti mu spas kuʼuntik skotol kʼalal chi jtun ta stojolal Diose xchiʼuk chkakʼtik persa ti jmojuk oyutik li ta tsobobbaile. Lek jnaʼ xi jchʼamvan xchiʼuk chkakʼtik persa ti jechuk xkaʼi jbatik kʼuchaʼal chaʼi sba yantike.
17 Li ta kapitulo 12 sventa Romanos xtoke chchanubtasutik kʼusi stakʼ jpastik kʼalal ta jnuptantik kontrainele. Muʼyuk bu ta jpak jkʼoplaltik; moʼoj, lek kʼusi ta jpastik. Chkakʼtik persa ti chʼabaluk kʼop kuʼuntik xchiʼuk skotol krixchanoetike, pe maʼuk skʼan xal ti muʼyuk xa bu ta jchʼuntik li beiltaseletik ta Vivliae. Ta jsaʼtik lekilal ta kutsʼ kalaltik, ta tsobobbail, ta jlakʼnataktik, ta abtelal, ta chanob vun xchiʼuk kʼalal ta jpasbetik yabtel Diose. Akʼo mi tsots tajek li kontrainel ta jnuptantike chkakʼtik persa ti jtsaltik ta sventa kʼusi lek li kʼusi chopole xchiʼuk mi jaʼuk bu ta jchʼay ta joltik ti jaʼ tspak jkʼoplaltik li Jeovae.
18. ¿Kʼusi oxtos mantaletik chalbutik Pablo li ta Romanos 12:12?
18 (Kʼelo Romanos 12:12.) Pe maʼuk noʼox li pʼijil xchiʼuk jtunel tojobtaseletik taje, oy to oxtos mantal chal li Pabloe. Chalbutik ti skʼan «[jkʼopontik] Dios scotol ora[e]», yuʼun mi moʼoje mu xuʼ kuʼuntik xchʼunel skotol li tojobtaseletik ta kapitulo 12 sventa Romanos mi muʼyuk bu tskoltautik Jeovae. Li orasion xtoke tskoltautik ta xchʼunel li xchibal mantal laj yal Pabloe: «Me oy avocolique, oyuc stsatsal avoʼntonic». Ta slajebale tstij koʼontontik ti teuk oy-o jsatik ta stojolal li kʼusi xchapanojbutik Jeova ta jelavele. Jaʼ me jech «cuxetuc noʼox [koʼontontik] ta sventa ti oy cʼusi [jmalaojtik]» ta sventa li kuxlejal sbatel osile, mi ta vinajel o mi ta Balumil.
Svulesobil ta joltik
• ¿Kʼu yelan skʼan xkiltik li kontrainele?
• ¿Butik ta jkuxlejaltik skʼan jsaʼtik li lekilale, xchiʼuk kʼu yelan skʼan jpastik?
• ¿Kʼu yuʼun mu stakʼ jpak jkʼoplaltik?
[Lokʼol ta pajina 8]
Kʼalal ta jkoltatik yan krixchanoetike ta me skoltautik ta stsalel li chopol kʼoptael chkichʼtik ta skoj ti mu xojtikinutike
[Lokʼol ta pajina 9]
¿Mi chavakʼ persa ta spasel li kʼusi ta jsaʼtik-o lekilal ta tsobobbaile?