Chanubtaseletik yuʼun Jesús

Kʼuxi xuʼ xi jmuyubaj ta melel

¿Kʼusi xuʼ jpastik sventa xi jmuyubaj?

▪ Kʼalal la slikes sloʼil Jesús li ta Mantaletik ta Vitse, xi laj yal ta sventa li muyubajele: «Xmuyubajik li buchʼutik oy ta sjol yoʼontonik ti chtun yuʼunik mantale» (Mateo 5:3, NM). ¿Kʼusi ti chtun kuʼuntik laj yalbe skʼoplale?

Skʼan xkichʼtik ikʼ, xi jveʼ xchiʼuk oy kʼusi chkuchʼtik sventa xuʼ xi jkuxie. ¡Kʼalal ta chonbolometik chtun yuʼunik ek! Pe sventa xi jmuyubaj li voʼotike oy to kʼusi skʼan jpastik: jaʼ ti jtabetik sbalil li jkuxlejaltike. Li buchʼu noʼox xuʼ skoltautik sventa stabel sbalil taje, jaʼ li Jpasvaneje. Jaʼ yuʼun xi laj yal li Jesuse: «Muc ta vajuc noʼox ta xcuxi li cristianoe. Jaʼ ta xcuxi ta sventa scotol li scʼop chlocʼ ta ye Diose» (Mateo 4:4). Jaʼ noʼox xi jmuyubajutik ta melel mi jnaʼojtik ti skʼan jpastike, sventa jech xkʼot ta pasele skʼan xi jnopajutik ta stojolal li «Dios ti echʼem slequile», jaʼ xkaltik, ti xmuyubaj noʼoxe (1 Timoteo 1:11). Jech xtok, oy to kʼusi chakʼbutik sventa xi jmuyubaj: jaʼ ti xuʼ jpat koʼontontik ti oy kʼusi ta jmalatik ti mas to leke.

¿Kʼuxi laj yakʼ spatobil oʼontonal li Jesuse?

▪ Li Jesuse xi laj yal xtoke: «Xcuxet noʼox yoʼnton li bochʼo mucʼ noʼox yoʼntonique, yuʼun jaʼ ch-acʼbat sventainic li banamil ti albil scʼoplale» (Mateo 5:5). Kʼalal la xpoxta li buchʼutik ipike xchiʼuk la xchaʼkuxes li animaetike, jech laj yakʼbutik jun alakʼ sba spatobil koʼontontik ti oy kʼusi ta jmalatike. Jech xtok toj ep chakʼ spatobil koʼontontik li kʼusi laj yale. «Yuʼun toj ep la xcʼuxubin scotol cristianoetic ta banamil li Diose —xi chanubtasvan li Jesuse—, jech laj yacʼ li jun noʼox Xnichʼon oye, yuʼun jech mu chʼayeluc chbat li bochʼotic ta xchʼunic ti jaʼ Jcoltavanej yuʼunique; jaʼ ta xcuxiic o sbatel osil.» (Juan 3:16.) Jaʼ yuʼun, sventa jkʼupintik li kuxlejal sbatel osil liʼ ta Balumile, skʼan oyuk xchʼunel koʼontontik ta stojolal li Diose xchiʼuk skʼan jchʼunbetik li smantaltake. ¿Mi xnop avuʼun ti te xa nakalot xchiʼuk krixchanoetik ti mu snaʼ saʼik kʼope, xchiʼuk ti muʼyuk xa chi jmalube? Jaʼ yuʼun xi chal li Vivliae: «Cuxetuc noʼox avoʼntonic ta sventa ti oy cʼusi amala-malaique» (Romanos 12:12). Akʼo mi jech, li Jesuse laj yal junantik kʼusitik stakʼ jpastik sventa xi jmuyubaj li avie.

¿Kʼusitik tojobtasel laj yal Jesús sventa xi jmuyubaj noʼoxe?

▪ Li Jesuse laj yal kʼuyelan skʼan xkil jbatik xchiʼuk li yantike, ta sventa li nupunele, li saʼel kʼulejale xchiʼuk li talelaletike jech kʼuchaʼal ti bikʼit skʼan xkakʼ jbatike, xchiʼuk yan kʼusitik (Mateo 5:21-32; 6:1-5, 19-34). Melel onoʼox, jaʼ me xi jmuyubaj mi chkakʼ ta jkuxlejaltik li tojobtaseletike.

Kalbetik skʼoplal li kʼusi laj yal ta sventa li yakʼel ta ilel slekil oʼontonale (Hechos 20:35). Jun veltae xi laj yale: «Cʼalal ta xapas qʼuine, jaʼ icʼo talel ta veʼel ti buchʼutic abol sbaique, ti tuncoetique, ti coxovetique, ti maʼsatetique. Xamuyubaj unbi, yuʼun ti stuquique mu xqʼuex, mu xpac yuʼunic» (Lucas 14:13, 14, Ch). Lek jamal xvinaj, kʼalal jaʼ ta jkoltatik li yantik sventa xmuyubajike, ti maʼuk noʼox ta jsaʼ jmuyubajeltike, jaʼ te ta jtatik li muyubajele.

¿Kʼusi ti mas xi jmuyubaj yuʼune?

▪ Akʼo mi chakʼbutik tajek muyubajel kʼalal ta jkoltatik li yantike. Pe li muyubajel ta jtatik kʼalal chi jtun ta stojolal Jeovae muʼyuk kʼusi xkoʼolaj-o. Jech kʼuchaʼal laj yal jun velta li Jesuse, jaʼ xkom to li muyubajel chaʼi totil-meʼiletik kʼalal oy kʼusi lek chbat ta pasel yuʼunik li yol xnichʼonike. Jun velta kʼalal jaʼo yakal chchanubtasvane, «oy jun ants te ta epal cristianoetic, tsots iʼavan, jech laj yalbe li Jesuse: “Toj xcuxet noʼox yoʼnton li ameʼ ti la svoqʼuesote, xchiʼuc ti la xchuʼuntasote” [...]. Itacʼov li Jesuse: “Jaʼ toj xcuxet yoʼntonic ta melel li bochʼotic chaʼyic li scʼop Diose, ti ta xchʼunique”», xut (Lucas 11:27, 28).

Yuʼun li Jesuse xmuyubaj tajek la spasbe li kʼusi tskʼan yoʼonton sTote, ti te smakoj skʼoplal ti laj yal li spatobil oʼontonal ta sventa li kuxlejal sbatel osile. Jaʼ yuʼun, kʼalal la xchapbe yaʼi jun ants li spatobil oʼontonal taje, li Jesuse xi laj yale: «Li jveʼele jaʼ ti ta jpasbe cʼusi tscʼan li Bochʼo la stacun tale» (Juan 4:13, 14, 34). Jech me xi jmuyubaj ek mi ta jpastik li kʼusi lek chil li Diose: jaʼ ti ta jchanubtastik li krixchanoetik ta sventa li kʼusi chal Vivliae.

Mi cha kʼanbe to mas yaʼyejale, kʼelo ta kapitulo 1 li ta livro liʼe, ¿Kʼusi chchanubtasvan ta melel li Vivliae?, ti pasbil yuʼun yajrextikotak Jeovae.

[Lokʼol ta pajina 16]

Sventa xi jmuyubaj ta melele skʼan jtabetik sbalil li jkuxlejaltike