«Jaʼ noʼox ta jkʼanbot ti ximuyubajuk junuk jabil xchiʼuk ti junuk koʼontone»

LI JKUXLEJAL TOʼOXE.

Nakalunkutik toʼox ta Tellancourt, jun bikʼit lum ta snoroesteal Francia. Li jtote likem ta Francia xchiʼuk li jmeʼe ta Italia. Kʼalal vaxakib toʼox jabilale, libatkutik ta naklej ta Italia, ta jun uni lum ti toj abol sbaik ti te ch-abtejik ta spat xokon Roma li krixchanoetike. Li ta jnakutike toj ep jvokolkutik, li jtot jmeʼe toj echʼem saʼik kʼop ta skoj takʼin.

Kʼalal voʼlajuneb jabilale laj yalbun jmeʼ ti skʼan xilokʼ mas sventa jsaʼ kamigotake. Mas xa chilokʼilan xchiʼuk mu ta sjaliluke jaʼ lik jchiʼinan li chopol krixchanoetike. Jun veltae nopaj talel jun vinik ta jtojolal ti lek yoʼonton yilele. La jchʼam li droga laj yakʼbune, yuʼun ta jkʼan ti mukʼta krixchanoun xa yilele. Ta ora noʼox litsʼuj ta stunesel droga xchiʼuk ta mulivajel. Ep ta velta laj kichʼ ilbajinel ta chiʼinejbail ta vayel. Muʼyuk xa sbalil laj kaʼi li jkuxlejale, koʼol xa noʼox chkaʼi mi chicham o mi chikuxi. Jtuk xa tajek laj kaʼi jba. Kʼalal vaklajuneb xaʼox jabilale ta xaʼox jmil jba, laj kuchʼ jun limita pox xchiʼuk la jipba yalel ta voʼ o joʼ sventa ta jmil jba. Oxib kʼakʼal chamem likom yilel.

Laj kakʼ venta ti toj ep sbalil li kuxlejale, pe lipas ta simaron xchiʼuk ta jloʼlaan li krixchanoetike. Chkalbeik krixchanoetik mi tskʼanik chiʼinel ta vayel xchiʼuk kʼalal mi likʼot li ta snaike chkakʼbeik droga, vaʼun chkelkʼanbe skotol li kʼusitik toyol stojol oy yuʼunike. Mukʼtik chopol organisasionetik tstunesikun sventa spukel droga li ta Italiae. Nopoltik noʼox tsaʼikun ta kʼop li polisiaetike. Akʼo mi solel muʼyuk xa noʼox smelolal li jkuxlejale, pe jnaʼoj lek ti oy sbalile. Jaʼ yuʼun xi laj kalbe ta orasion li Diose: «Jaʼ noʼox ta jkʼanbot ti ximuyubajuk junuk jabil xchiʼuk ti junuk koʼontone».

TI KʼU YELAN LA SJEL JKUXLEJAL LI VIVLIAE.

Kʼalal 24 xaʼox jabilale libat ta naklej ta Inglaterra ta skoj ti tsaʼikun junantik jnarkotrafikanteetik sventa tsmilikune. Kʼalal skʼan toʼox xibate, bat jvulaʼan jmeʼ, labal to sba laj kil kʼalal te yakal xchiʼinel ta loʼil jmeʼ ta sventa Vivlia li Annunziato Lugaràe.a Jnaʼoj lek ti toj chopol toʼox xkuxlejale, jaʼ yuʼun lixiʼ xchiʼuk la jakʼbe kʼusi tspas te. Laj yalbun ti kʼusitik la spas sventa sjel xkuxlejal yoʼ xkʼot ta stestigo Jeovae, laj yalbun xtok ti akʼo xkal ta melel ti akʼo jsaʼ li stestigotak Jeova mi likʼot ta Inglaterrae. Akʼo mi laj kalbe ti tanae, kʼalal likʼote muʼyuk bu la jel li jkuxlejale.

Jun veltae laj kil jun stestigo Jeova ti te yakal yakʼel Li Jkʼel osil ta toyole xchiʼuk li ¡Despertad! ta jun kaye ti ep buchʼutik te chanavik li ta Londrese. Vaʼun te vul ta jol li kʼusi jamal laj kale, vaʼun la jakʼbe mi xuʼ van xchanubtasun ta Vivlia.

Labal sba tajek laj kaʼi li kʼusi la jchane. Jech kʼuchaʼal liʼe, la stij koʼonton li kʼusi chal 1 Juan 1:9 ta sventa li Diose: «Jaʼ yuʼun mi jamal chkal li jmultike tspasbutik perton jmultik xchiʼuk tsakubtasutik ta skotol». Li kʼusitik laj kaʼi taje, jaʼ la sjelbun li jkuxlejale, yuʼun toj ikʼ chkaʼi li jkuxlejal ta skoj li kʼusitik chopol jpasoje. Ta anil noʼox libat li ta Salon sventa Tsobobbail yuʼun stestigotak Jeova ti bu toj lek la xchʼamikune. Kʼalal laj kil ti toj lek xil sbaike xchiʼuk ti skʼanoj sbaike —ti jaʼ onoʼox li kʼusi oy tajek ta koʼontone—, ayan ta koʼonton ti chi-och li ta slumal Jeovae xchiʼuk li ta utsʼ alalil taje.

Muʼyuk bu toj tsots laj kaʼi yiktael li drogae xchiʼuk ti chimulivaj toʼoxe, pe li kʼusi toj tsots laj kaʼie jaʼ ti jel li jtalelale. Laj kil ti skʼan xi ichʼvan ta mukʼe xchiʼuk ti jtsak ta mukʼ ti kʼu yelan chaʼi sbaik li yantike. Melel onoʼox ti chkakʼbe to yipal sventa jel jtalelaltak ti toj chopolike. Pe koliyal li Jeovae jelem xa jutuk li jtalelale. Li ta 1997 kʼalal echʼem xaʼox vakib u likemun xchanel li Vivliae, laj kichʼ voʼ xchiʼuk likʼot ta stestigo Jeova.

KʼUSITIK SBALIL JTAOJAN.

Kʼalal laj kichʼ voʼe linupun xchiʼuk jun tseb ti Barbara sbie, ti mu toʼox jaluk yochel ta stestigo Jeovae. Jun kamigoe lik xchan Vivlia ta skoj ti laj yil kʼu yelan jel tajek li jkuxlejale. Li avie jaʼ xa stestigo Jeova xchiʼuk li xvixe. Jaʼ jech la spas li xvix jyaya eke; te xaʼox van 80 sjabilal kʼalal lik xchan li Vivliae xchiʼuk ta tsakale laj yichʼ voʼ.

Li avie chitun xa ta mol ta tsobobbail xchiʼuk jaʼ mas ta jchʼakbekutik yorail xchiʼuk kajnil sventa jcholbekutik mantal li buchʼutik chkʼopojik ta italiano li ta Londrese. Bakʼintike chkat to tajek koʼonton ta skoj ti kʼu toʼox yelan li jkuxlejale, pe li Barbarae persa onoʼox tspat koʼonton. Jaʼ to laj jta li kʼusi oy onoʼox tajek ta koʼontone: ti oyuk kutsʼ kalale xchiʼuk ti oyuk jtot ti skʼanojune. La jkʼanbe Jeova ti ximuyubajuk junuk jabil xchiʼuk ti junuk koʼontone, pe maʼuk noʼox jech yakʼojbun.