Xuʼ xamuyubaj li avie
NOPO noʼox avaʼi ti chʼabaluk xa chameletik, muʼyuk xa chijmalub xchiʼuk muʼyuk xa chijcham li ta jelavele. Xuʼ me xata li kʼupil sba kuxlejal taje. Akʼo mi jech, li avie ep tajek vokoliletik, pe ¿mi xanaʼ kʼuxi xuʼ xamuyubaj li avie? Li Vivliae yichʼoj tojobtaseletik ti xuʼ skoltaot sventa xamuyubaje xchiʼuk chakʼ ti oyuk sbalil li akuxlejale. Jkʼeltik kʼu yelan tskoltautik li Skʼop Dios kʼalal oy kʼusi ta jnuptan ta jkuxlejaltike.
MUYUBAJKUTIK MI OY LI KʼUSI CHTUN KUʼUNTIKE
Xi chtojobtasvan li Vivliae: «Maʼukuk me batem ta avoʼontonik skʼanel takʼin ti kʼu yelan kuxuloxuke, muyubajanik noʼox me ta skoj ti kʼusi oy avuʼunik avie» (Evreos 13:5).
Li krixchanoetike ep tajek kʼusitik tsmeltsanik xchiʼuk tspasik ti mu toj masuk tsots skʼoplal li ta jkuxlejaltike. Pe li Vivliae chal ti xuʼ onoʼox xijmuyubaj mi oy li kʼusi chtun kuʼuntike. ¿Kʼusi xuʼ jpastik?
Mu xbat ta koʼontontik saʼel li takʼine. «Li skʼanel takʼine» jaʼ ch-ipajik-o epal krixchanoetik, chil svokol yutsʼ yalalik, yamigotakik, chjel stalelalik xchiʼuk mu xa x-ichʼatik-o ta mukʼ (1 Timoteo 6:10). ¡Ep tajek kʼusi jpʼel ta yoʼontonik spasel! Jech xtok, «mu noʼox xpaj ta xaʼi» skʼanel takʼin li buchʼu jaʼ batem yoʼonton ta saʼele (Eclesiastés 5:10).
Teuk ta joltik ti jaʼ mas oy sbalil li krixchanoetike. Jtunel onoʼox kuʼuntik li kʼusi chlokʼanuk tale, pe mu xuʼ skʼanutik jech kʼuchaʼal tskʼanutik junuk krixchanoe. Kʼalal oy junuk kamigotik ta melele jaʼ mas xijmuyubaj-o (Proverbios 17:17).
CHIJMUYUBAJ ME MI TA JCHʼUNTIK LI TOJOBTASELETIK CHAKʼ VIVLIAE
KʼALAL STSAKOJUTIK JTOSUK CHAMELE
Xi chtojobtasvan li Vivliae: «Me xcuxet noʼox coʼntontique jaʼ lequilal sventa jbecʼtaltic» (Proverbios 17:22).
Kʼalal xijmuyubajutik noʼoxe xkoʼolaj kʼuchaʼal poxil mi stsakojutik jtosuk chamele. Pe ¿kʼuxi xuʼ xijmuyubaj mi iputike?
Jtojtik ta vokol. Kʼalal jaʼ noʼox ta jnop li ta jvokoltike, naka «vocol noʼox oy» chkaʼitik jujun kʼakʼal (Proverbios 15:15). Pe xi chalbutik li Vivliae: «Tojik ta vokol» (Kolosenses 3:15). Skʼan jtojtik ta vokol li kʼusitik lekik ta jkuxlejaltike, akʼo mi jsetʼ juteb noʼox. Jech kʼuchaʼal ti kʼu yelan kʼupil sba chmak batel li kʼakʼale, kʼalal sikiket chtal ikʼ chkaʼitike o kʼalal stseʼet sat li buchʼu jkʼanojtike xijmuyubaj noʼox yuʼun.
Jkoltatik li yantike. «Jaʼ mas xmuyubaj li buchʼu chakʼe, jaʼ mu sta li buchʼu chichʼe», taje jaʼ me jech chkaʼitik akʼo mi iputik (Echos 20:35). Kʼalal tstojbutik ta vokol li yantik ta skoj ti oy kʼusi la jpastik ta stojolalike, xijmuyubaj xchiʼuk chchʼay ta joltik li jvokoltike. Mi lek chaʼi sba li yantik ta skoj li kʼusi ta jpastike, lek me oyutik ek.
JTSATSUBTASTIK LI JNUPUNELTIKE
Xi chtojobtasvan li Vivliae: Jaʼ xatʼujik «li kʼusi mas tsots skʼoplale» (Filipenses 1:10).
Li nupultsʼakaletik ti mu masuk jmoj oyike xuʼ me xnamajik ta jujuntal. Jaʼ yuʼun lek ti masuk tsots skʼoplal xil snupunel li malalil xchiʼuk ajnilale, ti jaʼuk li kʼusi mas tsots skʼoplal xil li ta xkuxlejalike.
Oyuk kʼusi jmoj xapasik. Li Vivliae chal ti «me chibutique jaʼ lec» (Eclesiastés 4:9). Mu jaʼuk xapas li kʼusi lek chavaʼi atuke, nopo li kʼusi xuʼ jmoj xapasike. Xuʼ jmoj xapas aveʼelik, xalokʼik ta xanbal, chbat avuchʼik kafe o xuʼ yan kʼusi xachʼay-o avoʼontonik.
Akʼbo abaik ta ilel ti akʼanoj abaike. Li Vivliae chal ti akʼo skʼan sbaik xchiʼuk ti xichʼ sbaik ta mukʼ li malalil xchiʼuk ajnilale (Efesios 5:28, 33). Xuʼ me stsatsub ti kʼu yelan lek xil sbaik mi stseʼet tskʼel sbaike, ti tsmey sbaike o ti oyuk kʼusi skʼelanbe sbaike. Pe teuk me ta joltik ti jaʼ noʼox xuʼ xchiʼin sbaik ta vayel li buchʼu nupunemike (Evreos 13:4).