¿Mi oy atunesoj li slajebal pajinae?

Kʼalal tstsakik jlikuk revista li krixchanoetike stalel onoʼox ti baʼyel ta skʼelik li slikeb pajinae, vaʼun mu xakʼik venta kʼuyelan tsvalkʼunik ta anil sventa tskʼelbeik li slajeb pajinae. ¿Mi oy jech aviloj? Li revista Li Jkʼel osil ta toyole ti jaʼ sventa skotol krixchanoetike, oy junantik sjakʼobiltak ta slajeb pajina ti chakʼbe kʼusi snop li buchʼutik tskʼele, te chal xtok bu pajinail chichʼ tael li yaʼyejale.

Xuʼ te jtatik kʼusi xuʼ jakʼtik sventa jlikes jloʼiltik li ta chol mantale. Jaʼ yuʼun, manchuk mi nopolik noʼox ta jcholtik mantal li bu yosilal chol mantale, xuʼ jelulantik ti kʼuyelan ta jlikes jloʼiltike xchiʼuk li sjakʼobiltak ta jtunestik ta yoxibal ue. Jech xtok, akʼo mi muʼyuk xokol li yajval nae, xuʼ jaʼ noʼox xkakʼbetik yil junuk li sjakʼobiltak ta slajeb pajina li ta revistae xchiʼuk ti xi xkalbetike: «Mi cha kʼan cha nabe li stakʼobile, cha kiktabot li revistaetike xchiʼuk xuʼ jaʼ to xi jloʼilaj ta tsʼakal kʼalal xokolote». Kʼalal tslikes sloʼilik junantik jcholmantaletike jaʼ chakʼik ta ilel li slajebal pajina revistae xchiʼuk chalbeik ti akʼo stʼuj junuk sjakʼobil ti oy ta yoʼonton li krixchanoe. Vaʼun chalbeik bu xuʼ xichʼ tael li stakʼobile xchiʼuk tskʼelbeik junuk teksto ti baʼyel xa onoʼox stʼujojike. Sventa xkʼot ta oʼontonal li revista Li Jkʼel osil ta toyole, ¿mi xtal ta ajol yan kʼuxi xuʼ xa tunes li sjakʼobiltak ta slajebal pajinae?