¿Mi xuʼ mas jcholtik mantal li ta yorail sNaʼobil slajel Cristoe?
1. ¿Kʼu yuʼun lek ti jkʼeltik mi xuʼ kuʼuntik jcholtik mas mantal li ta marso, avril xchiʼuk mayoe?
1 ¿Mi xuʼ van avuʼun mas xa chol mantal li ta marso, avril xchiʼuk mayoe? Ta epal lumetike jaʼo mas kʼepel xchiʼuk jaʼo snatil kʼakʼal. Junantik jcholmantale xuʼ stunes li svakasionik ch-akʼbatik ta yabtelik o ta chanune. Li ta 2 yuʼun avrile jaʼo chlik yichʼ takel ta ikʼel sventa chchiʼinutik ta sNaʼobil slajel Cristo ti ch-echʼ ta 17 yuʼun avril li krixchanoetik ti oy ta yoʼontonik mantale. Ta mas tsʼakale xuʼ xkakʼbetik yipal ti xbat jkʼeltik li krixchanoetik ti ayik li ta tsobajel taje, vaʼun jtaktik ta ikʼel sventa xbatik li ta mantal ti toj tsots skʼoplal ch-echʼ ta xemanail 25 yuʼun avrile. Jaʼ yuʼun, lek ti jkʼeltik mi xuʼ kuʼuntik jcholtik mas mantal li ta marso, avril xchiʼuk mayoe.
2. ¿Kʼuxi xuʼ xkepajestik li kabteltik ta chol mantale?
2 Prekursor auksiliar. Jtos kʼusi lek xuʼ jpastik sventa mas jcholtik mantale jaʼ ti xi j-och ta prekursor auksiliare. Ta skoj ti mu noʼox xi jxokobe, skʼan jkʼeltik kʼusi xuʼ jpastik xchiʼuk skʼan jchapanbetik lek yorail (Pro. 21:5). Yikʼaluk van oy xa kʼusi anopoj cha pas li uetik taje, pe mi mu masuk tsots skʼoplale xuʼ van jaʼ to xa pas ta tsʼakal (Fili. 1:9-11). ¿Kʼu yuʼun mu xavalbe yan jcholmantaletik ta atsobobbail ti oy ta avoʼonton cha och ta prekursor auksiliar sventa skʼelik mi xuʼ x-abtejik jech eke?
3. ¿Kʼusitik xuʼ spasik sventa mas x-abtejik ta chol mantal li utsʼ-alaliletike?
3 Li xtal Akʼobal sventa Yichʼel ta Mukʼ Jeova ta Kutsʼ Kalaltike, ¿kʼu yuʼun mu xa loʼiltaik li kʼusitik cha kʼan cha pasik xchiʼuk li avutsʼ avalale? (Pro. 15:22.) Mi jmoj cha kolta abaike, xuʼ van xa ochik ta prekursor jayvoʼuk li ta avutsʼ avalalike xchiʼuk xuʼ van xa tunik jech junuk o jayibuk u. Pe ¿kʼusi xuʼ xa pasik mi mu xuʼ chavilike? Xuʼ van xa kʼelik kʼusitik xuʼ xa pasik sventa mas ep cha abtejik li ta chol mantale; xuʼ van xa lokʼik ta mal kʼakʼal o mas jal xa komik li ta sabado xchiʼuk domingoe.
4. ¿Kʼusitik ta jtatik mi mas ta jcholtik mantal li ta yorail sNaʼobil slajel Cristoe?
4 Li Jeovae ep sbalil chil ti chi jtun ta stojolale xchiʼuk ti kʼuyelan chkakʼbetik yipale (Heb. 6:10). Mi cha tun ta stojolal Jeova xchiʼuk ta stojolal li krixchanoetike, jaʼ me xa muyubaj-o (1 Cró. 29:9; Hech. 20:35). ¿Mi xuʼ mas xa cholik mantal li ta yorail sNaʼobil slajel Cristoe? Mi jech cha pasike mas xa muyubajik xchiʼuk mas cha taik bendision.