¿Mi xuʼ xa-och ta prekursor auksiliar?

1. ¿Kʼuxi xuʼ mas xij-abtej ta cholmantal li ta yorail Snaʼobil slajel Cristoe?

¹ Li ta yorail Snaʼobil slajel Cristoe xuʼ mas xlokʼ jcholtik mantal, jaʼo ta jnopbetik skʼoplal ti toj ep skʼanoj krixchanoetik li Jeovae, jaʼ yuʼun laj yakʼ Xnichʼon sventa tspojutik (Juan 3:16). Taje jaʼ tstij koʼontontik sventa xkalbe jchiʼiltaktik li slekilal Jeovae xchiʼuk li kʼusi yakal tspas ta stojolal li krixchanoetike (Is. 12:4, 5; Luc. 6:45). Jech ta jkʼupintik ti chlik jun kampanya sventa ta jtaktik ta ikʼel ta Snaʼobil slajel Cristo li jlakʼnatik, kutsʼ kalaltik xchiʼuk li buchʼutik xkojtikintike. Jech xtok, skʼan jchʼiesbetik ta yoʼonton Skʼop Dios li buchʼutik ayik li ta Snaʼobil slajel Cristoe. ¿Mi xuʼ xa-och ta prekursor auksiliar ta marso, avril o mayo?

2. ¿Kʼu yuʼun sta-o xijtun ta prekursor ta marso?

² Abtejkutik li ta marsoe. Li xtal marsoe xuʼ jnoptik xij-och ta prekursor auksiliar yuʼun jaʼ noʼox chichʼ kʼanel 30 o 50 ora. Mi jaʼo yorail chvulaʼanvan li jkʼelvanej ta sirkuito ta yuilal marsoe li prekursor auksiliaretike xuʼ xbatik li ta tsobajel sventa prekursor regularetik xchiʼuk espesialetike, xuʼ te xkomik ti kʼu sjalil li tsobajele. Li Snaʼobil slajel Cristoe chkʼot ta pasel ta 26 yuʼun marso ta 2013. Li kampanya sventa jtaktik ta ikʼel li krixchanoetike chlik ta 1 yuʼun marso, kʼuchaʼal chkiltike mas xa chjalij li kampanyae. Jech xtok, li marsoe yichʼoj tal voʼob sabado xchiʼuk domingo. Ta melel, xuʼ me oy kʼusi tsots skʼoplal jpastik ta marso mi laj kakʼtik persa xcholel mantale.

3. ¿Kʼusitik xuʼ xlik noʼox achapan sventa mas jal xuʼ xalokʼ ta cholmantal?

³ Chapano xa noʼox aba. Jaʼ xa yorail xakʼel kʼusitik skʼan xapas ta akuxlejal sventa xuʼ xatun ta prekursor. Sventa taje skʼan skolta sbaik skotolik li ta utsʼ alalile. Jech oxal, li xtal Akʼobal sventa Yichʼel ta Mukʼ Jeova ta Kutsʼ Kalaltike loʼiltaik kʼusi chakʼan chapasik ta jujuntal xchiʼuk loʼiltaik kʼusitik kʼakʼalil chakʼan chacholik mantal (Prov. 15:22). Mu me xachibaj mi mu xuʼ chatun ta prekursor auksiliare. ¿Mi xuʼ van mas jal xalokʼ ta cholmantal? ¿Mi xuʼ van xalokʼ ta yan kʼakʼal, ti maʼuk noʼox ta sabado xchiʼuk domingoe?

4. ¿Kʼusi bendisionetik xuʼ jtatik mi mas ta jcholtik mantal ta marso, avril xchiʼuk mayoe?

⁴ Mi mas ta jcholtik mantal ta marso, avril xchiʼuk mayoe ta me jkʼupintik ti chijtun ta stojolal Jeova xchiʼuk ta jchiʼiltaktike (Juan 4:34; Hech. 20:35). Pe li kʼusi mas tsots skʼoplale jaʼ ti lek chil Jeova ti ta xkakʼtik persa xcholel mantale (Prov. 27:11).