¡Muyubajkutik li ta yorail Snaʼobil slajel Cristoe!
1. Li ta yorail Snaʼobil slajel Cristoe, ¿kʼusi skʼan jpastik yoʼ mas xijmuyubaje?
1 ¿Mi chakʼan chamuyubaj mas li ta yuilal marso, avril xchiʼuk ta mayoe? Jtos li kʼusi xuʼ jpastik yoʼ xijmuyubaj mase jaʼ ti xkepajestik li kabteltik ta cholmantale xchiʼuk mi xuʼ kuʼuntike, lek ti xijtun ta prekursor auksiliare. ¿Kʼuxi chakʼbutik mas muyubajel taje?
2. ¿Kʼu yuʼun chakʼbutik mas muyubajel kʼalal chkepajestik li kabteltik ta cholmantale?
2 Ti kʼuxi xuʼ xijmuyubaj mase. Yoʼ xijmuyubaj noʼoxe: skʼan xkichʼtik ta mukʼ li Jeovae xchiʼuk ti jsaʼtik li kʼusitik chtun kuʼuntik ta mantale, yuʼun jaʼ jech la spasutik li Jeovae (Mat. 5:3, TNM). Li Jeova xtoke, laj yakʼ ta koʼontontik ti kʼalal ta jkoltatik li yantike chakʼbutik muyubajel (Hech. 20:35). Li cholmantale tskoltautik spasel xchaʼtosal: chkichʼtik-o ta mukʼ Jeova xchiʼuk ta jkoltatik-o krixchanoetik. Jaʼ yuʼun, kʼalal mas ta jcholtik mantale mas xijmuyubajutik, tskoltautik yoʼ mas xijtojob li ta cholmantale xchiʼuk sventa mu masuk xijxiʼ. Ta yan xtoke, tskoltautik yoʼ jcholbetik mantal mas krixchanoetik xchiʼuk ti jlikestik chanubtaseletik ta Vivliae. Skotol taje jaʼ tskoltautik yoʼ jkʼupintik mas li cholmantale.
3. ¿Kʼu yuʼun toj lek ti xij-och ta prekursor auksiliar li ta marso xchiʼuk avrile?
3 Li ta yuilal marso xchiʼuk avrile toj lek ti xij-och ta prekursor auksiliare, yuʼun xuʼ jtʼujtik mi ta jkʼan ta jsaʼtik 30 o 50 ora. Jech xtok, ta jlikestik li kampanya sventa ta jtaktik ta ikʼel krixchanoetik li ta Snaʼobil slajel Cristo, ta sabado 22 yuʼun marso kʼalal ta lunes 14 yuʼun avril. Jkotoltik «coʼol» xijmuyubaj chij-abtej li ta tsobobbaile sventa xlaj noʼox ta yorail ti bu chichʼ cholel mantale (Sof. 3:9).
4. Mi chakʼan cha-och ta prekursor auksiliare, ¿kʼusi skʼan xapas?
4 Lik xa noʼox chapano aba. Mi muʼyuk to achapanoj abae, nopo lek kʼusi xuʼ xapas yoʼ xachʼak lek akʼakʼal sventa xavepajes li avabtel ta cholmantal junuk u o mas. Albo Jeova ta orasion (Sant. 1:5). Loʼiltao xchiʼuk avutsʼ avalal xchiʼuk yan ermanoetik ta tsobobbail (Prov. 15:22). Akʼo mi ipot noʼox chavaʼi o cha-abtej skotol kʼakʼal, pe mi la och ta prekursor auksiliare xuʼ xakʼupin li muyubajel chakʼe.
5. ¿Buchʼu chmuyubaj kuʼuntik mi laj kepajestik li kabteltik ta cholmantal li ta yorail Snaʼobil slajel Cristoe?
5 Li Jeovae tskʼan ti xmuyubajuk noʼox li yajtuneltake (Sal. 32:11). Mi laj kakʼtik persa yepajesel li kabteltik ta cholmantal li ta yorail Snaʼobil slajel Cristoe, maʼuk noʼox ti chakʼbutik mas muyubajele, yuʼun ta jmuyubtabetik yoʼonton li Jtotik ta vinajele (Prov. 23:24; 27:11).