Oxib kʼakʼal ti chakʼ kuxob oʼontonale

1. ¿Kʼusi xuʼ jtatik li ta mukʼta tsobajel ta oxib kʼakʼal sventa li jabil liʼe?

¹ Li ta balumil ti bu ep taki tiʼil ta mantal ta skoj ti jaʼ oy ta skʼob Satanase, li Jeovae yakal chakʼbe ep voʼ li yajtuneltake, sventa siketuk noʼox yoʼontonik ta mantal (Isa. 58:11). Jtos ti kʼuyelan tspase jaʼ ti chakʼ oyuk mukʼta tsobajeletik ta oxib kʼakʼal jujun jabile. Ta skoj ti nopol xa li mukʼta tsobajel sventa li jabil liʼe, ¿kuxi xuʼ jchapan jbatik sventa ta jpatbe jba koʼontontik ta mantal? (Pro. 21:5.)

2. ¿Kʼusi skʼan xa noʼox jchapantik?

² Mi muʼyuk to achapanoj abae, nopo kʼuyelan chachʼakbe yorail li kʼusitik chapase xchiʼuk kʼelo kʼusi xuʼ xapas ta sventa avabtel yoʼ xuʼ xabat yoxibal kʼakʼal. ¿Mi laj xa avakʼ venta kʼu sjalil chichʼ batel avuʼun jujun kʼakʼal ti bu ch-echʼ tsobajel sventa xasaʼ bu chachoti kʼalal skʼan toʼox xlik li mantaletike? ¿Mi mu jechuk ti ta jkʼan ta jkʼupintik yoxibal kʼakʼal li veʼlil ta mantal xchapanojbutik li Jeovae? Ta melel tana (Isa. 65:13, 14). ¿Mi laj xa akʼel kʼuxi chabat xchiʼuk ti bu chavaye?

3. ¿Kʼusi xuʼ jpastik sventa jtabetik lek sbalil ta jujuntal xchiʼuk ta kutsʼ kalaltik li mukʼta tsobajele?

³ ¿Kʼusi xuʼ jpastik sventa mu jecheʼuk noʼox kʼusitik xlik jnoptik kʼalal jaʼo yakal li mantaletike? Sventa lek akuxoj chabate skʼan sob noʼox chavay mi xuʼ avuʼune. Jaʼ kʼelo batel li buchʼu tsjelubtas mantale, saʼo li tekstoetik ta Vivliae xchiʼuk tsako ta vun li kʼusitik chtun avuʼune. Li totil-meʼiletike skʼan koʼol xchoti xchiʼuk yalab xnichʼnabik sventa tskʼelik mi yakal chaʼiik li mantale (Pro. 29:15). Li ta akʼobaltike xuʼ van xaloʼiltaik xchiʼuk avutsʼ avalalik jun-chibuk li kʼusitik lek laj avaʼiike. Jech xtok, xuʼ xachʼakbeik yorail kʼalal chavichʼik ta mukʼ Dios ta avutsʼ avalalik sventa xachanbeik skʼoplal li kʼusitik chakʼan chapasik batel ta akuxlejalike, taje jaʼ chaskoltaoxuk sventa tstsatsub-o avoʼontonik li mukʼta tsobajele.

4. ¿Kʼusi xuʼ jpastik sventa tspat yoʼontonik ta mantal li yantik eke?

⁴ Kʼuxi xuʼ jkoltatik li yantike. Jech xtok, oy ta koʼontontik ti tspat yoʼontonik ta mantal li yantik eke. ¿Mi oy van mol-meʼeletik xchiʼuk buchʼutik chtun yuʼunik koltael sventa chbatik ta tsobajel li ta atsobobbaile? ¿Mi xuʼ van xakolta? (1 Juan 3:17, 18.) Li moletik ta tsobobbaile, mas to li jkʼelvanejetik ta jtsop jcholmantale, skʼan me skʼelik kʼusitik chtun yuʼunik li jcholmantaletik taje.

5. ¿Kʼu yelan chichʼ pukel li uni vunetike? (Kʼelo xtok li rekuadroe.)

⁵ Jech kʼuchaʼal onoʼox ta jpastike, kʼalal oxib xemana toʼox skʼan li mukʼta tsobajele chlik jpuktik li vunetik sventa ta jtaktik ta ikʼel li krixchanoetike. Jujun tsobobbail skʼan xakʼ ta yoʼontonik spukel li kʼuyepal uni vunetik chichʼik akʼbele xchiʼuk skʼan xakʼik persa xcholik mantal ta skotolal li yosilal chol mantal yuʼunike. Pe mi oy to sovrail yuʼun avutsʼ avalal kʼalal mi laj xaʼox li kampanyae, ichʼik noʼox batel ti bu ch-echʼ li mukʼta tsobajele, yuʼun xuʼ xatunesik kʼalal chacholik mantal ta buyuk noʼox li ta jteklum taje. Pe mi ep to tajeke, xuʼ xavichʼ batel ta mukʼta tsobajel ta viernes sventa xavakʼbe jun jcholvanej ti kʼuyepal mu xa xpuk avuʼun chavaʼie. Te xa ta mukʼta tsobajel chichʼ alel kʼuyelan chichʼ tunesel. Vuleso me ta ajol ti skʼan xavichʼ komel jlikuke yuʼun li ta slajeb mantal ta domingoe jaʼ me chichʼ albel skʼoplal.

6. ¿Kʼuxi xuʼ xkakʼtik ta ilel lek jtalelaltik li ta mukʼta tsobajele?

⁶ Tstij oʼontonal kʼalal lek noʼox jtalelaltike. Ta skoj ti «jaʼ noʼox tspasic cʼusi tscʼan stuquic» li krixchanoetik avie, jaʼ xkaltik, ti mu sventaikuk kʼuyelan chaʼi sba li yantike, jaʼ jun muyubajel ti joyobtabilutik ta yajtsʼaklomtak Cristo ti jaʼ kʼotemik ta kermanotaktik ti oy ta yoʼontonik tstsakik ta venta kʼuyelan chaʼi sbaik li yantike (2 Tim. 3:2). ¿Kʼuxitik xuʼ xkakʼtik ta ilel jlekil talelaltik? Kʼalal mi la sjamik ta sob li stiʼ bu chichʼ pasel li mukʼta tsobajele, skʼan lek jcholoj jbatik xij-och xchiʼuk ti mu jnetʼnetʼ jbatik xij-oche, jech xtok kʼajomal noʼox me xuʼ jmakbetik xchotleb li buchʼutik jmoj jkaroaltik jchiʼuktike, mi koʼol nakalutike o li buchʼutik ta jchanubtastik ta Vivliae. Yan ti kʼusi xuʼ jpastike jaʼ ti jchʼuntik kʼalal chalbutik ti skʼan xa xijchotiutik sventa chlik kaʼitik son li buchʼu tslikes li tsobajele. Jech xtok skʼan jkʼeltik ti mu xchʼay oʼontonal li jselulartik o localizador kʼalal yakal li mantaletike. Yan xtoke jaʼ ti mu jecheʼuk noʼox xijloʼilaj, jtaktik batel mensaje, xijveʼ o ti jecheʼuk noʼox xijxanav kʼalal yakal li mantale.

7. ¿Kʼuxi xuʼ jpatbe jba koʼontontik ta jujuntal kʼalal ta jchiʼin jbatik ta loʼile?

⁷ Jkʼupintik xchiʼinel ta loʼil li kermanotaktike. Li mukʼta tsobajeletike jaʼo lek yorail sventa xuʼ jkʼupintik xchiʼinel ta loʼil li yan yajtuneltak Jeovae (Sal. 133:1-3). ¿Kʼu yuʼun mu xlik asaʼ achʼ avamigotak xchiʼuk xlik avojtikin yan ermanoetik xchiʼuk ermanaetik ti yan-o stsobobbailike? (2 Cor. 6:13.) Xuʼ van xavakʼbe yipal sventa chavojtikin jun krixchano o jun utsʼ-alalil jujun kʼakʼal. Taje jaʼo xuʼ jpastik li ta oʼlol kʼakʼale. Jech oxal, ichʼo batel aveʼel sventa te noʼox xaveʼ li bu chichʼ pasel li mukʼta tsobajele xchiʼuk ti xachiʼin ta loʼil li ermanoetike, jaʼ lek mu xlokʼ aman aveʼel o xbat veʼan ta restaurante ti nopol oy li bu ch-echʼ li mukʼta tsobajele. Xuʼ van xata bendisionetik ta skoj ti oy buchʼutik yan chlik avojtikinan xchiʼuk chapas ta avamigotake.

8. Alo kʼu yuʼun skʼan xijkoltavan ta abtel ta mukʼta tsobajel xchiʼuk butik xuʼ xijkoltavan.

⁸ Kʼalal koʼol chij-abtej xchiʼuk li jchiʼil jbatik ta chʼunolajele jaʼ jun muyubajel. Jaʼ yuʼun xuʼ van xlokʼ ta avoʼonton chakoltavan ta abtel ta buyuk junukal departamento o chakʼan chakolta ta smesel li bu sparte staoj li atsobobbaile (Sal. 110:3). Mi muʼyuk to avabtel akʼbilote bat kʼelo kʼusi xuʼ cha-akʼbat ta Departamento sventa Buchʼu Oy ta Yoʼonton Chkoltavan ta Abtel (Departamento de Servicio Voluntario). Kʼalal ep buchʼutik chkoltavan li ta kʼusitik chichʼ pasele, mas kʼun ta pasel xchiʼuk mas chakʼ muyubajel.

9. ¿Kʼu yuʼun skʼan jkʼeltik lek kʼuyelan jtalelaltik xchiʼuk kʼuyelan xvinaj jpat jxokontik li ta yorail mukʼta tsobajele?

⁹ Kʼusitik chkʼot ta pasel kʼalal lek jtalelaltike. Skʼan lek xvinaj jtalelaltik yoxibal kʼakʼal li ta mukʼta tsobajele, maʼuk noʼox kʼalal ch-echʼ mantaletike. Jech oxal, buchʼuuk noʼox krixchanoal ti chilutik li ta jteklume skʼan sta ta ilel ti mu koʼolutik kʼuchaʼal yantike (1 Ped. 2:12). Li jkʼuʼ jpokʼtike xchiʼuk ti kʼuyelan ta jmeltsan jbatike skʼan slekil kʼopta li Jeovae, manchuk mi teutik li bu ch-echʼ kuʼuntik akʼobale, ta veʼebal o li ta yut snailal tsobajele (1 Tim. 2:9, 10). Mi kichʼojtik batel li tarjeta de solapae, li krixchanoetike jaʼ jech chakʼik venta ti jaʼutik yajrextiko Jeovae, vaʼun xuʼ van jech xlik-o kalbetik skʼoplal li mukʼta tsobajele xchiʼuk xlik jcholtik-o mantal.

10. ¿Kʼusi xuʼ jpastik sventa lek chkʼopojik ta sventa mukʼta tsobajel li buchʼutik ch-abtej ta otel o ta jun restaurantee?

¹⁰ ¿Kʼusitik skʼan jpastik sventa lek xilutik li buchʼutik ch-abtejik ta otel o ta jun restaurantee? Skʼan mu jecheʼuk jmaktik kuartoetik ta otel mi muʼyuk ta jtunestike, yuʼun mi jech ta jpastike xuʼ mu sta skuartoik li yan buchʼutik chbatik ta mukʼta tsobajele, jech xtok xuʼ ep chchʼay skanalik li yajval oteletike. Mi ep krixchanoetik kʼalal jaʼo ta jtsak jbitik o ta jtupʼ jbitike, skʼan vinajuk slekil koʼontontik xchiʼuk smalael kuʼuntik (Col. 4:6). Skʼan me xichʼ iktabel yuni moton takʼin li buchʼu chichʼbutik tal jveʼeltik ta restaurantee, li buchʼutik chkuch batel li kʼusitik kuʼuntike, li buchʼu tsmes jkuartotike o li yan buchʼutik tskoltautike.

11. ¿Kʼusitik lek kʼotem ta pasel ta skoj ti lek jtalelaltike?

¹¹ ¿Kʼusi chvinaj ta skoj jtaleltik li ta mukʼta tsobajele? Jech kʼuchaʼal laj yal jun periodikoe, xi laj yal jun j-abtel ti jaʼ sbainoj ti bu laj yichʼ pasel jun mukʼta tsobajele: «Toj lek stalelalik. Xi muyubajkutik kʼalal chtalik jujun jabile». Li echʼ jabile oy jun krixchano ti maʼuk yajrextiko Jeovae, chʼay yav stakʼin ta jun otel ti jaʼ te ikomik li buchʼutik i-ayik ta mukʼta tsobajele. Lek tsʼakal sutesbat li kʼusitik oy ta yavil stakʼine, kʼalal laj yichʼ akʼbele, xi albat yuʼun li buchʼu sbainoj otele: «Toj lek ti liʼ nopol yakal tspas smukʼta tsobajelik li yajrextikotak Jeovae xchiʼuk ti noj ta yajrextiko Jeova li otele. Manchuke, xuʼ van chʼay-o li atakʼine».

12. ¿Kʼusi skʼan xkakʼ ta koʼontontik spasel ti skʼan to xkʼot li mukʼta tsobajele, xchiʼuk kʼu yuʼun?

¹² Mu xa jaluk xtok li mukʼta tsobajel ta oxib kʼakʼal li jabil liʼe. Sventa lek junuk noʼox koʼontontik xchiʼuk sventa lek jkʼupintik li mantaletike, toj ep kʼakʼal laj yichʼ sventa xichʼ chapanel. Jaʼ yuʼun akʼo ta avoʼonton chabat yoxibal kʼakʼal xchiʼuk chapano aba sventa cha chʼam li kʼusitik xchapanojbot Jeova xchiʼuk s-organisasione. Akʼo persa xapatbe yoʼonton yantik ta skoj ti lek chapas atalelale xchiʼuk ti lek xachiʼinvan ta loʼile. Jech taje, xuʼ van jech chkaʼi jbatik kʼuchaʼal jun krixchano li echʼ jabil ti xi laj stsʼibae: «¡Muʼyuk bu jech xkaʼi-o jba!».

[Tsʼib ti mukʼtik sletraile ta pajina 4]

Jech kʼuchaʼal onoʼox ta jpastike, kʼalal oxib xemana toʼox skʼan li mukʼta tsobajele chlik jpuktik li vunetik sventa ta jtaktik ta ikʼel li krixchanoetike

[Tsʼib ti mukʼtik sletraile ta pajina 6]

Li jkʼuʼ jpokʼtike xchiʼuk ti kʼuyelan ta jmeltsan jbatike skʼan slekil kʼopta li Jeovae, manchuk mi teutik li bu ch-echʼ kuʼuntik akʼobale, ta veʼebal o li ta yut snailal tsobajele

[Tsʼib ti mukʼtik sletraile ta pajina 7]

Akʼo persa xapatbe yoʼonton yantik ta skoj ti lek chapas atalelale xchiʼuk ti lek xachiʼinvan ta loʼile

[Rekuadro ta pajina 5]

¿Kʼusi chkaltik kʼalal chkakʼtik li uni vune?

Sventa xkakʼbetik skotol krixchanoetik li ta yosilal bu ta jcholtik mantale, skʼan me mu xijalijutik. Xuʼ van xi noʼox xkaltike: «Ta spʼejel balumil yakal chichʼ pukel li vun liʼe. Tsako, liʼe jaʼ avuʼun. Te chatabe mas skʼoplal». Li kʼusitik chal ta yelovale tstij oʼontonal, jech oxal akʼo sta ta kʼelel avuʼun kʼalal chavakʼbe li krixchanoe. Muyubajan noʼox. Mi jaʼo chlokʼ apuk ta sabado o domingoe xchiʼuk mi jech sta-o chavile xuʼ xavakʼ ek li revistaetike.