Talelal ti chichʼ ta mukʼ li Diose

1. ¿Kʼu yuʼun anil chkichʼtik ojtikinel kʼalal chijbat ta mukʼta tsobajele?

¹ Kʼalal chijbat li ta mukʼta tsobajeletike, anil chkichʼtik ojtikinel. Ta epal jteklumetike chlokʼ ta notisia ti te oyutik ta mukʼta tsobajele. Yuʼun li ta oteletik xchiʼuk ta veʼebaletike chnoj ta stestigo Jeova xchiʼuk li ta kayeetike ep ermanoetik ti oy sgafeteike. Liʼe chkaltik batel li kʼusitik skʼan jpastik sventa xkichʼtik ta mukʼ Dios ta jtalelaltik li ta jteklum bu ch-echʼ li mukʼta tsobajele (1 Ped. 2:12).

2. ¿Kʼuxi chkichʼtik ta mukʼ Dios mi lek noʼox sba jkʼuʼ jpokʼtik kʼalal te oyutik li ta jteklum bu ch-echʼ mukʼta tsobajele?

² Lekuk noʼox sba li jkʼuʼ jpokʼtike. Ti lek noʼox sba jkʼuʼ jpokʼtik kʼalal jaʼo li mukʼta tsobajele labal sba chilik. Akʼo mi jech, mi lek jlapoj jkʼuʼ jpokʼtik kʼalal chijkʼot ta otele, kʼalal chijbat ta veʼele o kʼalal chijbat ta manolajele, mas lek kʼusi tsnopik ta jtojolaltik li jlome. Manchuk mi mu persauk ti koʼol ta jlap batel jkʼuʼ jpokʼtik kʼuchaʼaluk ta mukʼta tsobajele, skʼan me ti lekuk noʼox sbae, ti oyuk noʼox smelolale. Ti jech taje ta jkʼuʼ jpokʼtik noʼox me chakʼik venta ti mu xijkoʼolaj xchiʼuk li buchʼutik maʼuk yajtsʼaklom Cristoe (Rom. 12:2). Jech xtok, lek me ti xkichʼtik batel li jgafetetike, yuʼun jech chkalbetik batel skʼoplal li mukʼta tsobajele, xuʼ jcholtik-o mantal xchiʼuk xuʼ snaʼik yan ermanoetik ti jaʼ yajtsʼaklomutik Cristoe.

3. ¿Bu xuʼ xkakʼtik ta ilel ti oy smalael kuʼuntik xchiʼuk slekil koʼontontike?

³ Oyuk smalael kuʼuntik xchiʼuk slekil koʼontontik. Li avie ep tajek ti jaʼ noʼox batem ta yoʼontonik li kʼusi tskʼan stukike xchiʼuk ti mu snaʼ stojik ta vokole. Jaʼ yuʼun, li j-abteletik sventa oteletik xchiʼuk ta veʼebaletike toj lek chaʼiik kʼalal oy slekil koʼontontik xchiʼuk ti jnaʼtik smalaele (2 Tim. 3:1-5). Jech xtok, skʼan jnoptik ta slekilal yantik kʼalal ta jmaktik chotlebale o kʼalal chbat jkʼantik li kʼusitik achʼ chlokʼe (1 Cor. 10:23, 24). Oy jun vinik kʼalal ay ta sba velta ta jun mukʼta tsobajele xi laj yale: «Mu xvul ta jol mi junuk li mantal jelave, pe li kʼusi te komem-o ta jole jaʼ ti kʼuyelan stalelalik li stestigotak Jeovae».

4. ¿Kʼu yuʼun skʼan jnoptik mi xuʼ xijkoltavan li ta mukʼta tsobajele?

⁴ Oyuk ta koʼontontik xijkoltavan. Li kʼusi chichʼik-o ojtikinel li melel yajtsʼaklomtak Cristoe, jaʼ ti lek snaʼ xkoltavanike (Sal. 110:3). ¿Mi xuʼ van xakoltavan li ta mukʼta tsobajele? Ta jun mukʼta tsobajele oy van 600 ta voʼ ermanoetik koltavanik ta xchʼubael li bu echʼ mukʼta tsobajele. Labal tajek sba laj yilik li buchʼu te ch-abtejike, jaʼ yuʼun xi laj yale: «Muʼyuk kʼusi jech xkilkutik-o ti toj labal sbae. Mu jchʼunkutik ti lokʼem ta yoʼonton stukik ti chkoltavanik ta abtele». Oy xa tajek ta koʼontontik li mukʼta tsobajeletik ta oxib kʼakʼal ta 2013, ti maʼuk noʼox xuʼ jtsʼet chikintatik sventa jchantike, yuʼun xuʼ xkakʼtik ta ichʼel ta mukʼ li Jchanubtasvanej kuʼuntike, ti jaʼ li Jeovae.

[Rekuadro ta pajina 3-6]

Mantaletik sventa li mukʼta tsobajel ta oxib kʼakʼal ta 2013

◼ Yorail mantal. Li tiʼ nae chjam ta vaxakib ora ta sob. Li sone chlik ta 9:20 ta sob, jech yoxibal kʼakʼal. Kʼalal jeche, jkotoltik me skʼan xijchoti sventa oyuk smelol xlik li tsobajele. Li ta viernes xchiʼuk ta sabadoe li mantale tstsuts ta 4:50, chichʼ kʼejintael kʼejoj xchiʼuk chichʼ pasel orasion, li ta domingoe ta 3:35 ta mal kʼakʼal tstsuts.

◼ Skotleb karo. Li skotleb karo ti oy ta jbatik skʼelele muʼyuk ta xichʼ tojel, jech noxtok li karoetike jaʼ me jech ta xichʼ cholel ti kʼuyelan chkʼotike. Ta skoj ti chapbil noʼox jaykot karo xuʼ xkotie, mu me junchibuk noʼox yajval xbat li ta jkot karoe, jaʼ me lek mi oy jayvoʼe. Li yaviltak karo ti chal jaʼ noʼox sventa li buchʼutik ipike, jaʼ noʼox me xuʼ xkom te li karoetik ti oy spermisoike o svunalik sventa buchʼu ipike.

◼ Smakel chotlebaletik. Jaʼ noʼox me xuʼ xamakbe xchotleb o yavil ti buchʼutik jmoj akaroalike, avutsʼ avalalik o li buchʼu chachanubtasik ta Vivliae. Li chotlebaletik sventa mol meʼeletik xchiʼuk buchʼutik ipe chapbil noʼox, jaʼ yuʼun mu onoʼox skotoluk velta xuʼ te xchiʼinik ta chotlej skotol li yutsʼ yalale. Li chotlebaletik taje jaʼ akʼo stunesik li mol meʼeletike, li buchʼutik ipike xchiʼuk li buchʼutik chkoltavanike (1 Cor. 13:5).

◼ Veʼlil. Jaʼ mas lek xavichʼ batel aveʼelik sventa mu xlokʼ amanik ta oʼlol kʼakʼal. Xuʼ xavichʼik batel bikʼit xkuchobil kʼusitik ti x-och ta yolon chotlebale. Li bu ta x-echʼ mukʼta tsobajele mu stakʼ xkichʼtik batel xkuchobil veʼlil mi toj mukʼe, mi jaʼuk yavil kʼusitik ti snaʼ xvokʼe.

◼ Matanal takʼin. Xuʼ xkakʼtik ta ilel ti ta jtojtik ta vokol li mukʼta tsobajel mi chkakʼtik matanal takʼin li ta mukʼta tsobajel sventa li abtelal ta spʼejel Balumile. Mi ta cheke chichʼ akʼel li matanal takʼin ta mukʼta tsobajele akʼo yichʼ akʼel ta sbi «La Torre del Vigía, A.R.». Jech xtok, ta jlom mukʼta tsobajele xuʼ xichʼ akʼel matanal takʼin ta tarjeta de débito xchiʼuk crédito.

◼ Poxil. Mi yakalot stunesel jtosuk poxil ti yalojbot doktor skʼan chavuchʼ o chabikʼe, skʼan xavichʼ batel ti kʼuyepal chtun avuʼune, yuʼun muʼyuk cha-akʼbat te. Mi ipot ta askal chamel ti skʼan xatunes jeringa xchiʼuk akuxae lek me xachʼay, yuʼun xibal sba maʼ taje. Mu xachʼay li ta yav kʼaʼep te yoʼ bu ch-echʼ li mukʼta tsobajele, mi jaʼuk li ta otele.

◼ Xonobil. Jujun jabile oy buchʼutik tsots tsta svokolik ta skoj li xonobike, mas li bu natik stakonale. Jaʼ yuʼun jaʼ lek ti oyuk smelolal jsaʼ li jxonobtike xchiʼuk ti mu xiʼeluk kʼusi xkʼot ta pasel kʼalal chijxanav ta skojolkojol o li butik chij-echʼ ti kayajtik stakʼinale, o ta yantik.

◼ Krixchanoetik ti mu xaʼiik lek kʼoponele. Li mantaletik ch-echʼ ta junantik mukʼta tsobajele ta xichʼ jelubtasel ta jun estasion ta radio (FM) ta yut li bu ch-echʼ mukʼta tsobajele. Sventa stakʼ aʼyele skʼan junuk bikʼit radio ti ta pila ch-abteje xchiʼuk ti oyuk s-audifonoaltake.

◼ Skaroaltak olol xchiʼuk xila ti chpux sbae. Li bu ch-echʼ mukʼta tsobajele mu stakʼ ichʼel batel skaroaltak olol xchiʼuk xila ti chpux sbae. Ti kʼusi xuʼ xichʼ ichʼel batele jaʼ xila sventa ololetik ti xuʼ xichʼ chukel ta junuk chotlebal ta xokon li totil meʼile.

◼ Perfumeetik. Jutuk mu skotoluk li bu ch-echʼ mukʼta tsobajele makajtik li spat xokone, jaʼ noʼox oy sbe bu ch-och o chlokʼ li ikʼe. Jech oxal, jaʼ me chvinaj ti oy ta koʼontontik yantik mi oy smelolal ta jtunestik li jperfumetike, yuʼun xuʼ van oy buchʼu chopol tspasbat (1 Cor. 10:24).

◼ Vun ti jaʼ sbi Sírvase visitar (S-43-S). Li ta vun taje xuʼ xatsakbe sbi o bu nakal li buchʼu lek laj yaʼi mantal kʼalal la achol mantal ta buyuk noʼox li ta yorail mukʼta tsobajele. Mi la anojes li vunetik taje xuʼ xavakʼ li ta Departamento sventa Vunetike, o xuʼ xavakʼbe li sekretario ta atsobobbail mi lasut xaʼox tal li ta mukʼta tsobajele.

◼ Veʼebal. Mi lek jtalelaltik ta veʼebaletike ta xichʼ lekil kʼoptael li sbi Jeovae. Lekuk me li akʼuʼ apokʼ xalape, vinajuk ti yajtsʼaklomot Cristoe. Mi nopem xaʼiik chiktaik uni matanal takʼine jech xapas ek.

◼ Oteletik:

1) Mu me jecheʼuk noʼox xamak ep kuartoetik xchiʼuk mu me epuk buchʼutik xvay avuʼun li ta kuartoe, jaʼ noʼox me xkomik ti kʼuyepal albilote.

2) Mu me jecheʼuk noʼox muʼyuk xa chatunes li kuarto amakoje, jaʼ to me mi oy kʼusi anil kʼot ta atojolale xchiʼuk alo noʼox me batel ta otel sventa oy buchʼu yan xuʼ stunes li kuartoetike (Mat. 5:37). Mi jeche tsʼibao me lek li snumeroal ti bu chal ti muʼyuk xa bu akʼubanoj li kuartoe. Kʼalal chib xaʼox kʼakʼal skʼan kʼalal chaval batel ti muʼyuk xa chakʼan li kuartoe, mu xa bu tsutesboxuk li atakʼine.

3) Mi chatunes tarjeta de crédito o débito kʼalal chamak junuk kuarto ta otele, naʼo ti oy oteletike nopem xaʼiik ti maʼuk noʼox tstsakik ti kʼuyepal stojol li akuartoe, yuʼun ta to stsakik jutuk mas ta skoj ti mi oy kʼusi la asokes ti kʼu sjalil te chakome. Ta tsʼakale mi laj xaʼox xchapik kʼuyepal laj avuʼun ta skotole, li sovrail atakʼine xuʼ xatunes yan velta mi echʼ xaʼox jayibuk kʼakʼal laj avikta komel li otele.

4) Jaʼ noʼox me xatunes li xkuchobil ikatsil ta oteletik mi chtun avuʼune, suteso noʼox me ta anil sventa xuʼ stunes li yantike.

5) Mi jech nopem xaʼiik spasele, akʼbo me uni moton takʼin li buchʼu tskoltaot xkuchel ochel li kʼusitik avichʼoj batele xchiʼuk iktabo me uni moton takʼin skotol kʼakʼal xtok li jmeskuartoe.

6) Mu me xameltsan veʼlil ta kuartoetik ti bu mu xakʼike.

7) Mu me jecheʼuk xavixtolan li veʼlil chakʼik ta jujun sobe, li kafe o li yelo ch-akʼbatik li buchʼutik te chchʼamunik li otele.

8) Akʼo ta ilel ti ch-abtej chʼul espiritu ta atojolal kʼalal chachiʼin ta loʼil li j-abteletike. Vuleso me ta ajol ti ep buchʼutik te chchʼamun skuartoike, jech oxal tstojik ta vokol mi oy lek srasonal chijkʼopoje, ti oy slekil koʼontontike xchiʼuk ti oy smalael kuʼuntike.

9) Tsots me skʼoplal ti skʼel yalab xnichʼnabik li totil meʼiletik kʼalal te oyik ta otele, ta ascensor, li ta nuxinajebale, li ta yochebal otele xchiʼuk li bu spasobil ejersisioe.

10) Li stojol ti te chal ta slistail oteletike, jaʼ stojol sventa jujun kʼakʼal, muʼyuk bu tsakbil ta venta li spatan tskʼanike. Mi mas ep la skʼanboxuk stojole o mi tskʼanik ti xatoj kʼusiuk ti muʼyuk bu xakʼan o muʼyuk xatunese, mu me xatoj xchiʼuk anil noʼox me bat alo ta Departamento sventa Saʼel Vayebal.

11) Mi la ata avokol ta sventa li akuartoe albo me li Departamento sventa Saʼel Vayebal te ta mukʼta tsobajele.

◼ Oyuk ta avoʼonton xakoltavan ta abtel. Skotol ti buchʼu chlokʼ ta yoʼonton chkoltavan ta abtele skʼan xbat yal ta Departamento sventa Buchʼu Oy ta Yoʼonton Chkoltavan ta Abtel. Li buchʼutik mu to staik vaklajuneb sjabilalike xuʼ xkoltavanik ek, jaʼ noʼoxe skʼan chabibilik yuʼun stot o smeʼik, o mi moʼoje xuʼ chabibilik ta yan yijil krixchano ti jaʼ iktabilik skʼelel yuʼun li totil o meʼile.