Mantaletik sventa asamblea rejional
Yorail mantal. Li tiʼ nae chjam ta vaxakib ora ta sob. Li sone chlik ta 9:20 ta sob, jech yoxibal kʼakʼal. Kʼalal jeche, jkotoltik me skʼan xijchoti sventa oyuk smelol xlik li tsobajele. Li ta viernes xchiʼuk ta sabadoe, tstsuts van ta 5:00 ta bat kʼakʼal li mantaletike xchiʼuk li ta domingoe tstsuts ta 4:00 ta mal kʼakʼal.
Kʼejojetik sventa ta jmuyubtatik Jeova. Li ta voʼnee, li steklumal Diose tsmuyubtaik Jeova ta kʼejojetik. Li avi kʼakʼale li sonetike jech-o tsots skʼoplal ta sventa li yichʼel ta mukʼ Diose (Sal. 28:7). Skotol li jujuvokʼ mantaletik li ta asamblea rejionale, chakʼik kaʼitik son kʼalal skʼan toʼox xlik li mantaletike. Maʼuk noʼox sventa ta jchikintatik, yuʼun chapanbil sventa chkichʼtik-o ta mukʼ Jeova xchiʼuk ti oyuk kʼusi jchantik-o ta stojolale. Jech oxal, kʼalal mi laj yal li buchʼu tslikes asamblea ti chlik xa yichʼ tijel li sone, skʼan xa me te chotolutik xchiʼuk ti jtsʼet chikintatik lek li sone, yuʼun maʼuk xa yorail chijloʼilaj. Mi jech ta jpastike, jaʼ me jech chkakʼtik ta ilel ti ep sbalil chkiltik li yabtel tspasik li buchʼu tstijik son ta Watchtower. Chib velta ta jabil tstoj stuk spasajeik sventa xbatik ta Patterson (Nueva York) yoʼ tspasik gravar li alakʼ sba sonetik ti jkotoltik ta jkʼupintike. Kʼalal mi laj kaʼitik li sonetike, ta jmuyubtatik Jeova kʼalal chijkʼejinutike.
Skotleb karo. Muʼyuk ta xichʼ tojel li skotleb karo mi voʼotik oy ta jbatik skʼelele, jech noxtok li karoetike jaʼ me jech ta xichʼ cholel ti kʼu yelan xcholet chkʼotike. Ta skoj ti chapbil noʼox jaykot karo xuʼ xkotie, mu me junchibuk noʼox yajval xbat li ta jkot karoe, jaʼ me lek mi oy jayvoʼe. Li yaviltak karo ti chal jaʼ noʼox sventa li buchʼutik ipike, jaʼ noʼox me xuʼ xkoti te li karoetik ti oy spermisoik o svunal sventa buchʼu ipike.
Smakel chotlebaletik. Kʼalal chjam li tiʼ nae mu me solel aniluk xa xij-och sventa chbat jmak jchotlebtik ti bu mas lek chkiltike, ti xkoʼolaj xa kʼuchaʼal ta jtsal jbatik yilele. Kʼalal mas tsots skʼoplal chkiltik li yantike oy me ta koʼontontik ti mu jkʼuxubin jba jtuktike. Jaʼ svinajeb ti jaʼutik melel yajtsʼaklomutik Kristoe xchiʼuk jaʼ chtijbat-o yoʼontonik sventa skʼupil kʼoptaik Dios li buchʼutik chilutike (Juan 13:34, 35; 1 Kor. 13:5; 1 Ped. 2:12). Jaʼ noʼox me xuʼ xamakbe xchotleb ti buchʼutik jmoj akaroalike, avutsʼ avalalik o li buchʼu chachanubtasik ta Vivliae. Mu xa mak li chotlebaletik mi muʼyuk chachoti tee. Taje jaʼ sventa xvinaj ti bu xokajtike. Oy chotlebaletik sventa li buchʼutik oy xa sjabilalik xchiʼuk li buchʼutik ipike. Ta skoj ti chapbil noʼoxe, jaʼ yuʼun mu onoʼox skotoluk velta xuʼ te xchiʼinik ta chotlej skotol li yutsʼ yalalike. Avokolikuk, li chotlebaletik taje jaʼ akʼo stunesik li buchʼu oy xa sjabilalike, li buchʼutik ipike xchiʼuk li buchʼutik chkoltaatike.
Lekuk noʼox sba li jkʼuʼ jpokʼtike. Skʼan me lekuk noʼox sba xchiʼuk stauk-o li jkʼuʼ jpokʼtik ta jlaptik ta asambleae. Mu me jchanbetik ti kʼu yelan tslap skʼuʼ spokʼik li yan krixchanoetik ti toj yan xa sba ta kʼelele (1 Tim. 2:9). Manchuk mi jaʼo chbat jtsak jbitik ta otel o chijlokʼ xa batele skʼan me ti lekuk xvinaj li jkʼuʼ jpokʼtike xchiʼuk ti oyuk smelolale, jaʼ me jech skʼan lekuk jkʼuʼ jpokʼtik xtok li ta jujun mal kʼakʼal kʼalal chlaj asambleae. Mi jech ta jpastike ta sjunul me koʼontontik ta jnochʼantik li jgafetetike xchiʼuk muʼyuk me chijkʼexav ta xcholel mantal mi xuʼ chkiltike. Ti lek xvinaj jpat jxokontik xchiʼuk jtalelaltik li ta asamblea rejional ti poʼot xae, maʼuk noʼox me chkʼot ta yoʼontonik mantal ti chakʼ kolebal li buchʼutik oy ta yoʼontonike, yuʼun xmuyubaj xtok li Jeovae (Sof. 3:17).
Stunesel li achʼ aparatoetike. Mi chanop chavichʼ batel aselulare o yan aparatoe, avokoluk kʼelo me ti kʼuxi mu xachʼaybe yoʼonton li yantike. Mi chatunes junuk kamara, kamara sventa video, tavleta o yan aparatoetike, skʼan oyuk ta avoʼonton ti mu chopoluk xaʼi sba avuʼun li buchʼutik te oyike o ti mu xa xil avuʼun li plataformae. Sventa xkichʼtik ta mukʼ li yantike, mu jecheʼuk noʼox jtaktik mensajeetik o koreoetik kʼalal jaʼo yakal li mantale.
Veʼlil. Jaʼ mas lek ti xavichʼ batel aveʼelik sventa mu xlokʼ amanik ta oʼlol kʼakʼal. Xuʼ xavichʼik batel bikʼit xkuchobil kʼusitik ti x-och ta yolon chotlebale. Li bu ta x-echʼ asambleae mu stakʼ xkichʼtik batel xkuchobil veʼlil mi toj mukʼe, mi jaʼuk yavil kʼusitik ti snaʼ xvokʼe.
Matanal takʼin. Xuʼ xkakʼtik ta ilel ti ta jtojtik ta vokol li asambleaetik kʼalal chkakʼtik matanal takʼin ta sventa li abtelal ta spʼejel Balumile. Mi ta cheke chichʼ akʼel li matanal takʼine akʼo yichʼ akʼel ta sbi «La Torre del Vigía, A.R.». Jech xtok, ta jlom asambleaetike xuʼ xichʼ akʼel matanal takʼin ta tarjeta de débito xchiʼuk crédito.
Poxil. Mi yakalot stunesel jtosuk poxil ti yalojbot doktor skʼan chavuchʼ o chabikʼe, skʼan xavichʼ batel ti kʼu yepal chtun avuʼune, yuʼun muʼyuk cha-akʼbat te. Mi ipot ta askal chamel ti skʼan xavichʼ akuxae mu me buyuk noʼox xachʼay, yuʼun xibal sba maʼ taje. Mu xachʼay li ta yav kʼaʼep te yoʼ bu ch-echʼ li asambleae, mi jaʼuk li ta otele.
Sventa mu kʼusi xibal sba xkʼot ta pasel. Sventa mu xijyayije toj tsots skʼoplal ti jkʼel jbatik ti mu me xijachʼutik o ti jmak kakantike. Jujun jabile oy buchʼutik tsots tsta svokolik ta skoj li xonobike, mas li bu natik stakonale. Jaʼ yuʼun jaʼ lek ti oyuk smelolal jsaʼ li jxonobtike xchiʼuk ti mu kʼusi xibal sba xkʼot ta pasel kʼalal chijxanav ta skojolkojol o li butik chij-echʼ ti kayajtik stakʼinale, o ta yantik.
Krixchanoetik ti mu xaʼiik lek kʼoponele. Li mantaletik ch-echʼ ta jlom asambleae ta xichʼ jelubtasel ta jun estasion ta radio (FM) ta yut li bu ch-echʼ asambleae. Sventa stakʼ aʼyele skʼan junuk bikʼit radio ti ta pila ch-abteje xchiʼuk ti oyuk s-audifonoale.
Skaroaltak olol xchiʼuk xila ti chpux sbae. Li bu ch-echʼ asambleae mu stakʼ ichʼel batel skaroaltak olol xchiʼuk xila ti chpux sbae. Ti kʼusi xuʼ xichʼ ichʼel batele jaʼ xila sventa ololetik ti xuʼ xichʼ kajanel ta junuk chotlebal ta xokon li totil meʼile.
Perfumeetik. Jutuk mu skotoluk li bu ch-echʼ asambleae makajtik li spat xokone, jaʼ noʼox oy sbe bu ch-och o chlokʼ li ikʼe. Jech oxal, jaʼ me svinajeb ti oy ta koʼontontik yantik mi oy noʼox smelolal ta jtunestik li jperfumetike, yuʼun xuʼ van oy buchʼu chopol tspasbat (1 Kor. 10:24).
Veʼebal. Mi lek jtalelaltik ta veʼebaletike ta xichʼ kʼupil kʼoptabel li sbi Jeovae. Lekuk me li akʼuʼ apokʼ xalape, vinajuk ti yajtsʼaklomot Kristoe. Mi nopem xaʼiik chiktaik uni matanal takʼine mu me toj jutebuk xavikta.
Oteletik:
Mu me jecheʼuk noʼox xamak ep kuartoetik xchiʼuk mu me epuk buchʼutik xvay avuʼun li ta kuartoe, jaʼ noʼox me ti kʼu yepal albilote.
Mu me jecheʼuk noʼox xakʼan mi muʼyuk chatunes li kuartoe, jaʼ to me mi oy kʼusi anil kʼot ta atojolale xchiʼuk alo noʼox me batel ta otel sventa oy buchʼu yan xuʼ stunes li kuartoe (Mat. 5:37). Mi jeche tsʼibao me lek li snumeroal ti bu chal ti muʼyuk xa bu akʼubanoj li kuartoe. Kʼalal chib xaʼox kʼakʼal skʼan kʼalal chaval batel ti muʼyuk xa chakʼan li kuartoe, mu xa bu tsutesboxuk li atakʼine.
Mi chatunes tarjeta de crédito o débito kʼalal chamak junuk kuartoe, teuk ta ajol ti oy oteletik ti maʼuk noʼox tstsakik ti kʼu yepal stojol li akuartoe, yuʼun ta to stsakik jutuk mas ta skoj ti mi oy kʼusi la asokes ti kʼu sjalil te chakome. Mi laj xaʼox xchapik kʼu yepal laj avuʼun ta skotole, li smasil atakʼine xuʼ xatunes mi echʼ xaʼox jayibuk kʼakʼal alokʼel batele.
Jaʼ noʼox me xatunes li xkuchobil ikatsil ta oteletik mi chtun avuʼune, suteso noʼox me ta anil sventa xuʼ stunes li yantike.
Mi jech nopem xaʼiik spasele, akʼbo me yuni moton takʼin li buchʼu tskoltaot xkuchel li kʼusitik avichʼoj batele xchiʼuk iktabo me yuni moton takʼin xtok li jmeskuartoe.
Mu me xameltsan veʼlil li ta kuartoetik ti bu mu xakʼike.
Mu me xavichʼ batel ta asamblea li veʼlil chakʼik ta jujun sob li ta otele, li kafee o li yeloe.
Akʼo ta ilel ti ch-abtej chʼul espiritu ta atojolal kʼalal chachiʼin ta loʼil li j-abteletik ta otele. Vuleso me ta ajol ti ep buchʼutik te chchʼamun skuartoike, jech oxal tstojik ta vokol mi oy lek srasonal chijkʼopoje, ti oy slekil koʼontontike xchiʼuk ti oy smalael kuʼuntike.
Tsots me skʼoplal ti skʼel yalab xnichʼnabik li totil meʼiletik kʼalal te oyik ta otele, ta elevador, li ta nuxinajebale, li ta yochebal otele xchiʼuk li ta spasobil ejersisioe.
Li stojol ti te chal ta slistail oteletike, jaʼ stojol sventa jujun kʼakʼal, muʼyuk bu tsakbil ta venta li spatanile. Mi mas ep la skʼanboxuk stojole o mi tskʼanik ti xatoj kʼusiuk ti muʼyuk bu xakʼan o muʼyuk xatunese, mu me xatoj xchiʼuk anil noʼox me bat alo ta Departamento sventa Saʼel Vayebal.
Mi la ata avokol ta sventa li akuartoe albo me li Departamento sventa Saʼel Vayebal te ta asambleae.
Oyuk ta avoʼonton xakoltavan ta abtel. Skotol ti buchʼu chlokʼ ta yoʼonton chkoltavan ta abtele skʼan xbat yal ta Departamento sventa Buchʼu Oy ta Yoʼonton Chkoltavan ta Abtel. Li buchʼutik mu to staik vaklajuneb sjabilalike xuʼ xkoltavanik ek, jaʼ noʼoxe skʼan chabibilik yuʼun stot o smeʼik, o mi moʼoje xuʼ xchabiatik yuʼun yan yijil krixchano ti jaʼ sbainoj skʼelele.