Junchib slikeb jloʼiltik

Kʼuyelan xuʼ jlikestik chanubtasel ta Vivlia li ta baʼyel sabado yuʼun avrile

«Yakal ta jtijbekutik yoʼonton sventa skʼelik Vivlia li krixchanoetike. Pe oy jlome chalik ti toj vokol ta aʼibel smelolale. ¿Mi jech aviloj ek? [Akʼo stakʼ.] Kʼelo avil li kʼusi chal liʼe.» Akʼbo yil li kʼusi chal ta slajebal pajina ta revista Li Jkʼel osil ta toyole, ti jaʼ sventa li 1 yuʼun avrile. Koʼol xachanik li baʼyel parafoe xchiʼuk junuk li teksto yichʼoj tale. Akʼbo li revistaetike, vaʼun albo ti chasut yan velta sventa chachanik li yan sjakʼobile.

Li Jkʼel osil ta toyole 1 yuʼun avril

«Jkotoltik ep kʼusitik vokol ta jnuptantik, ta skoj taje oy bakʼintik ti ta jakʼbe jbatik mi oy sbalil ta melel li jkuxlejaltike xchiʼuk mi xuʼ van xijmuyubaj. ¿Kʼusi jtosukal vokolil xanaʼ ti chmakvan sventa mu xijmuyubaj li avie? [Akʼo stakʼ.] Li Vivliae chal ti poʼot xa slajesbe skʼoplal skotol jvokoltik li Diose [kʼelo Apocalipsis 21:4]. Li jun revista liʼe chalbe skʼoplal li kʼusi chkʼot ta pasel ta jelavele xchiʼuk ti kʼusi xuʼ jpastik sventa oyuk sbalil ta melel jkuxlejaltik li avie.»

¡Despertad! Avril

«Mas xa epajem ti oy majbail xchiʼuk utbail ta yut nae. Oy chalik jlome jaʼ la ta skoj ti jelel laj yichʼik tsʼitesele, li stalel xkuxlejalike xchiʼuk li chʼayob oʼontonal ti naka majbail xchiʼuk utbail chakʼ ta ilele. ¿Kʼu yuʼun xanaʼ ti epajem tajek li majbail xchiʼuk utbaile? [Akʼo stakʼ.] Li Vivliae chakʼ ta ilel ti kʼusi skʼan spasik sventa lek xil sbaik li jun nupultsʼakale [kʼelo Efesios 5:33]. Li jun revista liʼe chakʼ beiltaseletik ta Vivlia ti skoltaoj epal nupultsʼakale.»