¿Buchʼutik tspasik li kʼusi tskʼan yoʼonton Jeova avie?

1. ¿Kʼusi ora chlik jchantik li achʼ foyetoe xchiʼuk kʼuxi xuʼ jtabetik sbalil?

¹ Li ta xemanail 28 yuʼun oktuvree, chlik jchantik ta Xchanel Vivlia ta Tsobobbail li foyeto ¿Buchʼutik tspasik li kʼusi tskʼan yoʼonton Jeova avie? Li achʼ foyeto taje jaʼo lokʼ li ta Mukʼta Tsobajel ta oxib kʼakʼal ti jaʼ sbi «Jchabi li koʼontontike». Taje jaʼ sventa jbeiltastik batel ta steklumal Jeova li buchʼutik chichʼik chanubtasel ta Vivliae. Kʼalal ta jchantik li foyetoe maʼuk noʼox tskoltautik ti epuk sbalil xkiltik ti oyutik ta steklumal Jeovae, yuʼun tskoltautik xtok sventa jnaʼtik lek kʼuyelan xuʼ jtunestik li ta cholmantale (Sal. 48:13).

2. ¿Kʼu yelan chichʼ chanel ta tsobobbail li foyetoe?

² Kʼuxi chichʼ chanel. Li buchʼu tsjelubtase skʼan me skʼelbe lek yorail sventa koʼoluk sjalil xichʼ chanel li jujun xchanobile. Kʼalal tslikes li jujun xchanobile skʼan skʼelbe li sjakʼobil te yichʼoj ta slikebale. Vaʼun, li buchʼu tskʼele chchan li parafo ti bu chalbe skʼoplal li kʼusi chichʼ chanele. Mi laje li buchʼu tsjelubtase tsjakʼbe li buchʼutik te oyik li kʼusi xchapanoj xa onoʼox sventa baʼyel parafoe. Ta tsʼakale, li jujuvokʼ ti bonbil ta ikʼ chlike skʼan parte xichʼ kʼelel xchiʼuk parte xichʼ jakʼel. Mi laj xaʼox yichʼ chanel li jujuvokʼe, li buchʼu tsjelubtase chalbe buchʼutik te oyik ti akʼo yal sloʼilik kʼuxi te tstabeik stakʼobil li sjakʼobil ta slikebal xchanobile. Li foyetoe yichʼoj ep lokʼoletik xtok ti xuʼ xalbeik skʼoplale. Mi xakʼ to yoraile skʼan me xichʼ chanel li tekstoetik ti mas tsotsik skʼoplale. Kʼalal skʼan toʼox skʼelik li ta yan xchanobile, li buchʼu tsjelubtase skʼan me svulesbe ta sjolik buchʼutik te oyik li kʼusi la xchanik ti jaʼ tstunes li sjakʼobiltak te ta yok vune. Mi yichʼoj tal li rekuadro «Chanbo mas skʼoplal» xie, skʼan me aptael, vaʼun li buchʼu chetʼese chal ti akʼo yal sloʼilik li buchʼutik te oyik ti kʼuxi tstabeik sbalil jchanunetik ta Vivlia mi chchʼunik li tojobtasel te chale. Mi xakʼ to yorail kʼalal skʼan toʼox xlaj li Xchanel Vivlia ta Tsobobbaile, xuʼ stunes li sbi jujun xchanobil sventa tsjakʼbe kʼusitik la xchanik li buchʼutik te oyike. Skʼan me teuk-o ta joltik ti mu persauk jech chichʼ chanel xchiʼuk li buchʼutik ta jchanubtastik ta Vivliae.

3. ¿Kʼu yelan xuʼ jtabetik lek sbalil li xchanel achʼ foyetoe?

³ Sventa xatabe lek sbalile, skʼan xachapan aba baʼyel kʼalal chabat ta tsobajele. Akʼo me persa sventa xavakʼ aloʼil. Kʼalal yakal chichʼ chanele, nopo kʼu yuʼun jtunel yuʼunik li jchanunetik ta Vivliae. Li xchanel achʼ foyeto liʼe, akʼo xchapanutik sventa jkoltatik yantik yoʼ jmoj jpastik li kʼusi tskʼan yoʼonton Diose xchiʼuk ti spat yoʼontonik xkuxiik sbatel osil eke (1 Juan 2:17).