Kʼuxi xuʼ jtunestik li foyeto ¿Buchʼutik tspasik li kʼusi tskʼan yoʼonton Jeova avie?
Laj yichʼ pasel sventa xichʼ beiltasel ta s-organisasion Jeova li buchʼu chichʼik chanubtasel ta Vivliae
1. ¿Kʼusi oxib srasonal ti laj yichʼ pasel li achʼ foyetoe?
1 ¿Mi atunesoj xa li achʼ foyeto taje? Li kʼusi chtun-oe jaʼ sventa: 1) xojtikinik mas li stestigotak Jeovae, 2) xojtikinik li kʼusitik tspasike xchiʼuk 3) ti xojtikinik kʼuyelan ch-abtej li steklumal Jeovae. Li achʼ foyeto taje, jun noʼox pajina yichʼoj li jujun xchanobile xchiʼuk ta voʼob o ta lajuneb noʼox minuto xuʼ xakʼel mi tsuts xaʼox avuʼun yakʼel chanun ta jujukoje.
2. Alo kʼuyelan pasbil xchiʼuk kʼusitik yichʼoj tal li foyetoe.
2 Kʼuyelan pasbil. Li foyetoe pasbil ta oxvokʼ, te chalbe skʼoplal jeltos kʼusitik ta sventa stestigotak Jeova li ta jujuvokʼe, jech kʼuchaʼal laj xa yichʼ alele. Li sbi ta jujun xchanobile jaʼ jun sjakʼobil, li stakʼobile te ta jtatik li ta yuni bitak ti mas ikʼik sbone. Oy van mas ta 50 lumetik ti te xvinaj slokʼole xchiʼuk te tsʼibabil ti bu lumal lokʼeme, taje jaʼ chakʼ ta ilel ti bu to kʼalal kʼotem li kabteltike. Jutuk mu skotoluk li xchanobiltake yichʼoj talel jvokʼ ti bu «Chanbo mas skʼoplal» xie, taje jaʼ sventa xatijbe yoʼonton sventa xchan mas li buchʼu chavakʼbe chanubtasel ta Vivliae.
3. ¿Kʼu yelan xuʼ xatunes li achʼ foyetoe?
3 Kʼuxi ta tunesel. Xuʼ jaʼ baʼyel xavakʼ ta ilel li sbi jujun xchanobile. Ta tsʼakale, kʼelik sjunul li xchanobile xchiʼuk albo skʼoplal li yuni bitak ti mas ikʼik sbone. Vaʼun, ta slajebe kʼelik li sjakʼobiltak ta yok vune. Xuʼ jaʼ to xajakʼ mi tsuts xaʼox avuʼun skʼelel sjunul li xchanobile o xuʼ xajakʼ mi tsuts avuʼun skʼelel li jujun parafoe. Tʼujo me lek kʼusi tekstoal chakʼel. Mu me xchʼay xavaʼi xavalbe skʼoplal li lokʼoletike xchiʼuk li yoʼ bu chal «Chanbo mas skʼoplal» xie. Jutuk mu skotoluk veltae xcholet chichʼ chanel li xchanobiltake. Pe bateltike, xuʼ jaʼ xakʼel ti bu mas toj tunel yuʼun chavil li jchanune. Jech kʼuchaʼal liʼe, mi nopol xaʼox skʼan junuk mukʼta tsobajele xuʼ jaʼ xakʼel li ta xchanobil 11.
4. ¿Kʼu yuʼun xijmuyubaj yuʼun li achʼ foyetoe?
4 Kʼalaluk oy buchʼu ta jchanubtastik ta Vivliae ta jkoltatik ta yojtikinel li Jtotik Jeovae, akʼo mi jech, skʼan xkakʼbetik yojtikin xtok li s-organisasion Jeovae (Prov. 6:20). Xijmuyubajutik tajek, yuʼun li achʼ foyetoe jaʼ tskoltautik sventa mas kʼun xkaʼitik ta xchapbel smelolal taje.