Tuneso jpajinatik ta Internet sventa xachanubtasik avalab anichʼnabik
1. ¿Kʼu yuʼun laj yichʼ pasel li jvokʼ ta Internet ti bu chal «Niños» xie?
1 Li jpajinatik ta Internet ta jw.org, pasbil sventa lekuk xilik ta bikʼit ta mukʼ. Li bu chal «Niños» (jaʼ noʼox ta español, akʼbo klik ta «Enseñanzas bíblicas», ta tsʼakale ta «Niños» xie) tskolta sventa mas lek xil sbaik li ololetik xchiʼuk stot smeʼike xchiʼuk ti xnopajik ta stojolal Jeovae (Deut. 6:6, 7). ¿Kʼuxi xuʼ xatunesik sventa xachanubtasik avalab anichʼnabik li jvokʼ ta Internet taje?
2. ¿Kʼuxi xuʼ xatʼujik mantaletik ti lek sta-o li sjabilal avalab anichʼnabike?
2 Tuneso li kʼusi chtun yuʼunike. Jeltos kʼusi chtun yuʼunik li ololetike (1 Cor. 13:11). Vaʼun chaʼa, ¿kʼuxi xuʼ xatʼujik mantaletik sventa xachanik ti lek sta-o li sjabilale? Jakʼbo aba liʼe: «¿Kʼusi xuʼ xkʼot ta yoʼonton li kalab jnichʼnabe? ¿Kʼu to yepal chaʼibeik smelolal? ¿Kʼu sjalil chchikintaik lek li kʼusi chchanike?». Li ololetik ti oxib sjabilalik o mu to stae xuʼ van xichʼ chanel xchiʼukik li mantaletik ti «Kʼusitik chlik jchan ta Vivlia» sbie. Oy jlom utsʼ alaliletike tskʼupinik xchanel li mantaletik ti «Chanubtaso avalab anichʼnabik» sbie. Jech xtok, xuʼ xatunes li kʼusitik chichʼ alel liʼe.
3. ¿Kʼuxi xuʼ stunesik lek totil meʼiletik li jujun loʼil xchiʼuk yan kʼusitik ti te chichʼ tael ta «Ideas para la adoración en familia» sbie?
3 Kʼusitik xuʼ xapas li ta yichʼel ta mukʼ Jeova ta avutsʼ avalale. Li bu chal «Ideas para la adoración en familia» sbie chkoltavan sventa xchanunaj xchiʼuk xnichʼnab li totile. Sventa xanaʼ kʼuxi chatunes jujun loʼil xchiʼuk yan kʼusitike, akʼbo klik li bu chal «Guía para los padres». Tuneso li lokʼoletike, xuʼ xachanubtas-o uni kʼoxetik li lokʼoletik ti stakʼ bonele. Koltao li avalab anichʼnab ti mas xa mukʼtik ti akʼo sabeik lek skʼoplal ti bu chal «Proyecto de investigación» xie. Skotol li kʼusitik xuʼ xichʼ pasele jun noʼox loʼil yichʼoj o jun noʼox xchanobil, jaʼ yuʼun xuʼ xchapan sba skotolik manchuk mi jeltos sjabilalik sventa li kʼusitik xuʼ spasik li bu chal «Ideas para la adoración en familia» sbie.
4. ¿Kʼusitik xuʼ xichʼ tael li bu chal «Hazte amigo de Jehová» sbie?
4 Xuʼ xakʼot ta yamigo Jeova. Li videoetik, sonetik xchiʼuk yan kʼusitik stakʼ pasel ti te chichʼ tael ti bu chal «Hazte amigo de Jehová» sbie, tskolta totil meʼiletik sventa xakʼbeik xchan yalab xnichʼnabik li kʼusi melele (Deut. 31:12). Oy kʼusi toj tsots skʼoplal ch-akʼbat xchanik ololetik li videoetike, li kʼusitik xuʼ spasik tee chakʼ ta ilel ti jaʼ jeche. Ta skoj ti lek onoʼox xaʼiik kʼejimol li ololetike xchiʼuk ti jaʼ chkom-o ta sjolik li kʼusi chchanike, jaʼ yuʼun nopajtik noʼox tstikʼik ta Internet kʼejojetik xchiʼuk sonetik ti jaʼ laj yichʼ tsʼibael ta sventaike.
5. ¿Kʼu yuʼun skʼan skʼanbeik koltael Jeova yoʼ xakʼbeik xchan kʼusi melel yalab xnichʼnabik li totil meʼiletike?
5 Totil meʼiletik, li Jeovae tskʼan ti lekuk xkʼot ta pasel li kʼusi chapasike. Jaʼ yuʼun, kʼanbeik koltael sventa xavakʼbeik xchan kʼusi melel li avalab anichʼnabike (Juec. 13:8). Ta skoj ti chkoltavan li Jeovae xuʼ xatojobtasik lek avalab anichʼnabik yoʼ lek pʼij xbatik sventa sta skolebalik «ti laj [xchʼunik] li Jesucristoe» (2 Tim. 3:15; Prov. 4:1-4).